Utom Usiakusụn̄—Nte Enye Enyene Fi?
1 “N̄kemeke ndikere ndinam n̄kpọ ndomokiet efen. Ke akpanikọ n̄kemeke ndikere mban̄a n̄kpọ efen oro ekemede ndinọ mi ukem idatesịt oro.” Anie eketịn̄ ikọ emi? Kiet ke otu ediwak tọsịn Mme Ntiense Jehovah ke mme itie ikie ẹmi ẹkenamde utom ukwọrọikọ uyọhọ ini edi idara idara ubọkọkọ mmọ ke uwem. Nte afo ama ekere ke akam aban̄a m̀mê utom usiakusụn̄ enyene fi? Ke ima ikanam uyakidem nnọ oro owo mîfamke n̄kpọ ida inọ Jehovah, nnyịn ke akpanikọ ikpenyene ndikere mban̄a m̀mê nnyịn imekeme nditịm nnyene ọyọhọ ebuana ke edisuan eti mbụk Obio Ubọn̄. Ke ntak oro, mbọk kere ban̄a ndusụk mbụme oro ediwak owo ẹbụpde ẹban̄a utom usiakusụn̄.
MBỤME 1: “Ndusụk owo ẹdọhọ ke usiakusụn̄ inyeneke kpukpru owo. Ami nsan̄a didie mfiọk m̀mê enye enyene mi?”
2 Ibọrọ ọkọn̄ọ ke mme idaha ye mbiomo N̄wed Abasi fo. Ediwak owo ẹdu ẹmi nsọn̄idem m̀mê idaha eke ndondo emi ke uwem mîyakke mmọ ẹsịn hour 90 ke ọfiọn̄ ke utom ukwọrọikọ. Da ediwak nditọete iban ẹmi ẹdide ibanndọ Christian ye mme eka nte uwụtn̄kpọ kiet. Mmọ ẹsibuana ke utom ukwọrọikọ adan̄a ediwak ini nte mmọ ẹkekeme ke udomo oro mme idaha mmọ ẹyakde. Nte ifet ayakde, mmọ ẹsinam usiakusụn̄ unọ un̄wam ke ọfiọn̄ kiet m̀mê awakde akan oro ke isua kiet kiet, ẹdọkde idatesịt oro otode editat ebuana mmọ ke utom ukwọrọikọ. (Gal. 6:9) Okposụkedi mme idaha mmọ ẹkemede nditre ndiyak mmọ ẹnam utom nte mme asiakusụn̄ uyọhọ ini idahaemi, mmọ ẹsịn udọn̄ ẹnọ edu usiakusụn̄ ẹnyụn̄ ẹdi edidiọn̄ ẹnọ esop nte ifịk ifịk mme asuanetop eti mbụk.
3 Ke n̄kan̄ eken, ediwak nditọete iren ye iban oro ke ndusụk udomo mîbiomke mbiomo ẹnam ufan̄ ẹnọ utom usiakusụn̄ ebe ke ndinam ukpụhọde ke se mmọ ẹdade nte ebe iso n̄kpọ. Nso kaban̄a fi? Nte afo edi uyen oro ama okokụre ufọkn̄wed fo? Nte afo edi n̄wanndọ emi ebe ekemede nditịm n̄kpọ nnọ ubon nte ọfọnde? Nte afo edi ọdọ ndọ oro mînyeneke nditọ ẹmi ẹberide edem ke afo? Nte afo ama ọkpọn̄ utom idịbi udia? Ndisiak usụn̄ m̀mê nditre ndisiak usụn̄ edi ubiere owo kiet kiet enyenede ndinam nnọ idemesie. Mbụme edi, Nte afo emekeme ndinam ufan̄ ke uwem fo nnọ usiakusụn̄?
4 Satan ada editịm n̄kpọ ererimbot esie ndiyọhọ uwem nnyịn ye mme n̄kpọ oro ẹwọn̄ọrede owo ntịn̄enyịn nnyụn̄ nnam ibụk ibụk usụn̄ uwem ẹkan nnyịn ẹkụk. Edieke nnyịn ibierede nditre ndidi ubak ererimbot, Jehovah ayan̄wam nnyịn ndinịm mme ufọn n̄kpọ Obio Ubọn̄ akpa ndinyụn̄ nnyanade mbịne nnyụn̄ nnyịme kpukpru ifet ke utom ukara Abasi oro ẹdude ẹnọ nnyịn. Edieke afo ekemede ndinam ukpụhọde ke mme idaha fo man anam utom nte asiakusụn̄, ntak mûnamke ntre?
MBỤME 2: “Didie ke n̄keme ndifiọk ke ami mmekeme ndise mban̄a idemmi ke n̄kan̄ okụk ke utom uyọhọ ini?”
5 Edi akpanikọ nte ke ediwak idụt ibat hour oro oyomde ẹnam utom idịbi udia ke urua kiet kiet man ẹnyene se ẹdade nte mme n̄kpọ oro ẹyomde ke uwem ọmọkọri nte mme isua ẹbede. Nte ededi, ediwak owo ẹmenam utom usiakusụn̄ ke ediwak isua ke mme itie duop, ndien Jehovah aka iso ndibọk mmọ. Man ẹkụt unen nte asiakusụn̄, ẹyom mbuọtidem ye edu n̄waidem. (Matt. 17:20) Nnyịn imenyene un̄wọn̄ọ oro ke Psalm 34:10 nte ke ‘mmọ eke ẹyomde Jehovah idinanake baba eti n̄kpọ kiet.’ Owo ekededi oro odụkde utom usiakusụn̄ ekpenyene ndinam ntre ye ọyọhọ mbuọtidem nte ke Jehovah eyese aban̄a imọ. Enye anam kpasụk ntre ọnọ mme anam-akpanikọ asiakusụn̄ ke kpukpru itie! (Ps. 37:25) Nte ededi, ke n̄kemuyo ye mme edumbet ke 2 Thessalonica 3:8, 10, ye 1 Timothy 5:8, mme asiakusụn̄ idorike enyịn mbon efen ndin̄wam mmọ ke n̄kan̄ okụk.
6 Owo ekededi oro ekerede aban̄a utom usiakusụn̄ ekpenyene ndinam nte Jesus eketịn̄de ete: ‘Bem iso tie bat se iditakde.’ (Luke 14:28) Ndinam emi oyom ata ọniọn̄. Nyene nneme ye mbon oro ẹma ẹkesiak usụn̄ uforo uforo ke ediwak isua. Bụp nte Jehovah ọbọkde mmọ. Esenyịn circuit fo edi asiakusụn̄ oro enyenede mbufiọk oro edikopde inemesịt ndinọ mme ekikere ke nte ẹkemede ndikụt unen ke utom ukwọrọikọ uyọhọ ini.
7 Tutu amama owo idinyeneke ọyọhọ ifiọk iban̄a akpanikọ oro odude ke un̄wọn̄ọ Jesus ke Matthew 6:33 ibọhọke enye ayak idemesie esịn ke ubọk Jehovah. Anam-akpanikọ asiakusụn̄ kiet okobụk ete: “Ke ini ami ye nsan̄a mi ikesịmde obufa efakutom nte mme asiakusụn̄, nnyịn ikenyene sụk ekpri ikọn̄, efọk bọta kiet, inyụn̄ inyeneke okụk ndomokiet. Nnyịn ima ikụre udia oro ikenyenede ke udia mbubịteyo inyụn̄ idọhọ ite, ‘Idahaemi nnyịn inyeneke n̄kpọ ndomokiet ndidia n̄kpọn̄.’ Nnyịn ima ibọn̄ akam iban̄a oro, inyụn̄ idụk idap. Tụhi-tụhi usenubọk Ntiense kiet ke n̄kann̄kụk ama edi onyụn̄ editịn̄ owo emi enye edide, ọdọhọde ete, ‘Ami n̄kọbọn̄ akam nte yak Jehovah ọnọ mme asiakusụn̄ ẹdi. Idahaemi mmekeme ndisan̄a ye mbufo ke ediwak usen, edi sia ndụn̄de oyom usụn̄ ọkpọn̄ mi, nyadia udia uwemeyo ye mbufo, ntre mmada udia ndi man kpukpru nnyịn idia.’ Ekedi akamba unam ye ediwak ikọn̄.” Eyịghe idụhe Jesus ọkọn̄wọn̄ọde ọnọ nnyịn ete ke nnyịn ‘ikpenyeneke nditịmede esịt mban̄a uwem nnyịn’! Ekem enye ama adian ete: “Anie ke otu mbufo ekeme ndida ekikere ndian ibio idomo okụk kiet ke idaha esie?”—Matt. 6:25, 27.
8 Ererimbot oro akande nnyịn okụk ọdọdiọn̄ akabade ama inyene obụkidem akan. Ẹdọdiọn̄ ẹsịn nnyịn mfịghe edikpụhọ nda ekekem. Nte ededi, ndinyene esịtekọm nsụhọdeidem mban̄a utom ukwọrọikọ uyọhọ ini anam nnyịn iyụhọ ye esisịt ke n̄kan̄ eke obụk. (1 Tim. 6:8) Mme asiakusụn̄ oro ẹdude mmemmem uwem, oro n̄kpọ mînyụn̄ itịmekede, ẹnyene ini efen efen ke utom ukwọrọikọ ẹnyụn̄ ẹnyene idara oro okponde akan ye ukeme eke spirit ẹto edikpep mbon efen akpanikọ. Okposụkedi mmọ mîdomoke ndidu uwem oro asuade inem uwem, mmọ ndida ukem ukem kaban̄a idaha ndutịm uforo mmọ amanam mmọ ẹdara mme edidiọn̄ utom usiakusụn̄.
9 Edieke afo enen̄erede ọfiọk nte ke nnyịn idu uwem ke ukperedem ini ye nte ke ini ke okụre abaha idiọk ererimbot emi, oyonụk fi ke n̄kan̄ eke spirit ndinam mme n̄waidem oro oyomde man ọkwọrọ eti mbụk ke kpukpru ifet. Ebede ke ndifiak nse idaha ndutịm uforo fo ye ke ndiyak n̄kpọ oro nsịn Jehovah ke ubọk, afo emekeme ndikụt nte ke imọ imekeme ndinam n̄kpọ nnọ enye ke uyọhọ ini. Idem ọkpọkọm afo enyene ndiyak ndusụk n̄kpọ eke obụk oro oyomde atak man asiak usụn̄, afo ayadara uwak edidiọn̄ Jehovah.—Ps. 145:16.
MBỤME 3: “Nte uyen, ntak emi n̄kpekerede mban̄a utom usiakusụn̄ nte ubọkọkọ oro mmekde?”
10 Ke adan̄aemi okụrede akpatre isua ifan̄ ke ufọkn̄wed, afo ke ndammana usụn̄ emekere aban̄a ini iso. Afo oyom enye enyene ifụre, inemesịt, ye uyụhọ. Mme ọnọitem oro ẹnọde ndausụn̄ ke ufọkn̄wed ẹkeme ndidomo ndiwọn̄ọde fi nsịn ke uforo uforo ubọkọkọ oro oyomde ediwak isua ukpepn̄kpọ ke ufọkn̄wed ntaifiọk. Ubieresịt Christian fo oro ẹtịmde ẹnọ ukpep asian fi ete ke afo ekpeben̄e idem ndinam n̄kpọ Jehovah ọyọhọ ọyọhọ nte ekekeme. (Eccl. 12:1) Afo emekeme n̄ko ndikere mban̄a edidọ ndọ ke akpatre nnyụn̄ nnyene ubon. Nso ke afo edinam?
11 Mme ubiere ẹmi afo anamde ini emi ke uwem fo ẹkeme ndibiere ofụri ini iso fo. Edieke afo edide Ntiense Jehovah oro ama akayayak idem ọnọ onyụn̄ ana baptism, afo ama ayak idemfo ọnọ Jehovah ke ofụri ukpọn̄. (Heb. 10:7) Ke akpa ifet oro afo enyenede, domo usiakusụn̄ unọ un̄wam se ke ọfiọn̄ kiet m̀mê awakde akan oro. Emi ọyọnọ fi ntabi nse idatesịt ye mbiomo ẹmi ẹsan̄ade ye usiakusụn̄ ofụri ini, ndien ekikere fo ke se akpadade uwem fo anam nte eyịghe mîdụhe ayakabade ana in̄wan̄în̄wan̄ akan. Ekem, utu ke ndida utom idịbi udia uyọhọ ini nyọhọ ufan̄ oro osụhọde ke okụrede ufọkn̄wed, ntak mûtọn̄ọke usiakusụn̄ ofụri ini? Ndusụk owo oro ẹkebetde tutu ke ukperedem ke uwem ndien ẹdidụk utom usiakusụn̄ ẹtua n̄kpọfiọk ke mmọ ndiketre ndibak ntọn̄ọ n̄kan oro.
12 Nte akparawa owo, da mme ifet oro ẹnyenede ndibịne itie unana ndọ nam n̄kpọ nte ọfọnde, nyụn̄ dara mme ufọn oro enye ọnọde ke utom ukwọrọikọ uyọhọ ini. Edieke afo enyenede udọn̄ ndidọ ndọ usen kiet, idụhe itiat idakisọn̄ efen emi ekemede ndisịn nnọ ndọ oro ọkpọfọnde akan edibem iso nnam utom usiakusụn̄ ofụri ini. Nte afo ọkọride esịm ọyọhọ idaha onyụn̄ ọkọride ke idaha eke spirit, afo emekeme ndimek ndinam usiakusụn̄ edi ubọkọkọ fo ye nsan̄a ndọ oro enyenede ukem ekikere. Ndusụk mme ọdọ ndọ oro ẹkesiakde usụn̄ ọtọkiet ẹma ẹdụk utom circuit m̀mê an̄wautom isụn̄utom. Usụn̄ uwem oro ọnọde uyụhọ ke akpanikọ!
13 Inamke n̄kpọ m̀mê afo aka iso asiak usụn̄ ebịghi adan̄a didie, afo ọyọbọ n̄kem n̄kem ukpepn̄kpọ ye ọsọn̄urua ukpep oro baba utom kiet efen ke isọn̄ mîkemeke ndinọ. Usiakusụn̄ ekpep owo ntụnọ, ọkpọkpọ ndutịm, nte ẹkemede ndinam n̄kpọ ye mme owo, ibetedem ke Jehovah, ye nte ẹkemede ndikọri ime ye mfọnido—mme edu oro ẹditịmde fi idem ndibiom mme mbiomo ẹmi ẹkponde ẹkan.
14 Akananam uwem inanake iwụk ntem inọ ubonowo. Ibat ibat n̄kpọ ẹnen̄ede ẹbịghi, ke ẹsiode se Jehovah ọn̄wọn̄ọde ẹfep. Sia ini iso fo anade fi ata in̄wan̄în̄wan̄ ke iso, ewe ini ọkpọfọn akan emi ndinen̄ede n̄kere mban̄a se afo edinamde ye uwem fo ke mme isua ẹmi ẹdide? Domo ifet edisiak usụn̄ ketket se. Tutu amama afo udutuaha n̄kpọfiọk ndimek utom usiakusụn̄ nte ubọkọkọ fo.
MBỤME 4: “Nte enye idịghe mfịghe ofụri ini ndiyọhọ hour oro ẹyomde? Nso edieke mmen̄kemeke ndiyọhọ ini mi?”
15 Ke ini afo ewetde n̄kpọ ọyọhọ n̄wed eben̄e usiakusụn̄ ofụri ini, ana afo ọbọrọ mbụme emi: “Nte afo emetịm ọkpọkpọ mbubehe fo man afo nte owụtde eti ibuot ekeme ndidori enyịn ndisịm se ẹyomde ke isua ke isua emi edide hour 1,000?” Man esịm enye, oyom afo enyene n̄kpọ nte hour ita ke usen ke utom ukwọrọikọ ke ẹbaharede ukem ukem. Nte an̄wan̄ade, emi oyom eti ndutịm ye unọ idem ntụnọ. Ata ediwak mme asiakusụn̄ ẹnyene ata ndutịm emi enyenede ufọn ke ufan̄ ọfiọn̄ ifan̄ kpọt.
16 Nte ededi, Ecclesiastes 9:11 ọdọhọ ke akpanikọ ete, ‘Ini ye unọmọ ẹtetịbe ẹnọ nnyịn kpukpru.’ Ọkpọsọn̄ udọn̄ọ m̀mê unọmọ efen ekeme ndinam asiakusụn̄ etre ndiyọhọ se ẹyomde. Edieke mfịna oro mîdịghe enye oro ebịghide onyụn̄ etịbede ke ntọn̄ọ ntọn̄ọ isua utom, ekeme ndidi ofụri se ẹyomde edi ndutịm oro etịmde ọyọhọ ye utom man ẹfiak ẹnyene ini oro ẹketabade. Edi nso edieke akpan mfịna edemerede ọfiọn̄ ifan̄ kpọt osụhọde ke isua utom ndien asiakusụn̄ oro ikemeke ndisịm se ẹyomde?
17 Edieke afo ọdọn̄ọde ke ibio ini ke ọfiọn̄ ifan̄ m̀mê afo mûkemeke ndisịm hour oro ẹyomde ke ntak ndusụk usọp usọp ntak efen oro afo mûkemeke ndikara, afo emekeme ndika mbịne andibuana ke Kọmiti Utom Esop onyụn̄ anam mfịna oro an̄wan̄a. Edieke mbiowo ẹmi ẹkerede ke owụt ifiọk ndiyak fi aka iso ke utom usiakusụn̄ ye unana edifịna idem mban̄a ediyọhọ ini oro akatabade, mmọ ẹkeme ndinam ubiere oro. Ewetn̄wed eyewet n̄kpọ ke kad Ibatutom Asuanetop Esop ndiwụt nte ke owo iyomke afo ọyọhọ ini oro akatabade. Emi idịghe unyịme ndikpọn̄ utom, utu ke oro, edi akpan edikere mban̄a ke ntak mme idaha fo.—Se esịne-esịt Utom Obio Ubọn̄ Nnyịn eke September 1986, ikpehe ekikere 18.
18 Mme asiakusụn̄ ẹmi ẹnyenede mbufiọk ẹsikọ hour ẹbon ke ntọn̄ọ ntọn̄ọ isua utom. Utom usiakusụn̄ mmọ esidi ebe iso n̄kpọ, ntre mmọ ndusụk ini ẹsikụt ẹte ke oyom isịbe mme edinam oro mîdịghe akpan n̄kpọ ifep. Edieke asiakusụn̄ etrede ndiyọhọ se ẹyomde ke ntak idiọk ndutịm m̀mê unana edinọ idem ntụnọ ndisọn̄ọ nyịre ke ndutịm, enye ekpenyene ndikụt nte ke edi mbiomo imọ ndiyọhọ ini oro ikatabade idịghe ndidori enyịn ke akpan edikere mban̄a.
19 Mme ini ẹdu emi mme idaha asiakusụn̄ ẹsikpụhọde ke usụn̄ oro owo mîkemeke ndifep. Enye ekeme ndikụt nte ke imọ ikemeke ndisịm hour oro ẹyomde ke anyan ini ke ntak n̄kaiso mfịna unana nsọn̄idem, mbiomo ubon oro ọkọride-kọri, ye ntre ntre eken. Ke idaha emi, usụn̄ ọniọn̄ ekpedi ndifiak n̄ka idaha asuanetop nnyụn̄ mbuana ini ekededi oro ekemede ke utom usiakusụn̄ unọ un̄wam. Ndutịm ofụri ini idụhe ndiyak owo odu ke udịm mme asiakusụn̄ edieke mme idaha esie mîyakke enye esịm hour oro ẹyomde.
20 Nnyịn idori enyịn ke ndutịm edinọ mbon oro ẹdotde akpan edikere mban̄a eyesịn udọn̄ ọnọ mbon efen efen ndisịn enyịn̄ ke utom usiakusụn̄ ye unana editịmede esịt nte mîdotke. Enye ekpenyene n̄ko ndisịn udọn̄ nnọ mbon oro ẹma ẹkedodu ke utom uyọhọ ini ndika iso ke usiakusụn̄. Nnyịn iyom mme asiakusụn̄ ẹkụt unen ke utom uyọhọ ini mmọ.
MBỤME 5: “Nyom ndinam n̄kpọ nnyụn̄ n̄kop inemesịt ke ndinam enye. Nte utom usiakusụn̄ ayanam mi n̄kop uyụhọ?”
21 Ata inemesịt ọkọn̄ọ akamba akamba ke ndinyene n̄kpet n̄kpet, ọkpọkpọ itie ebuana ye Jehovah ye edinịm ke akpanikọ nte ke nnyịn inam n̄kpọ inọ enye ke edinam akpanikọ. Jesus ọkọyọ eto ndutụhọ “kaban̄a idatesịt eke anade Enye ke iso.” (Heb. 12:2) Idatesịt esie okoto edinam uduak Abasi. (Ps. 40:8) Ke editịm n̄kpọ emi odude ke emi, nnyịn imekeme ndinyene ata idatesịt edieke ata ediwak edinam nnyịn ke uwem ẹnyenede ebuana ye utuakibuot nnyịn nnọ Jehovah. Ndibịne n̄kpọ eke spirit ọnọ nnyịn ekikere edinyene uduak koro ke ata isọn̄ esịt nnyịn nnyịn imọfiọk ite ke nnyịn inam se inende. Inemesịt oto edinọnọ, ndien nnyịn ifiọkke usụn̄ oro ọfọnde akan ndinọ idem nnyịn emi akande edikpep mbon efen nte ẹkemede ndinyene nsinsi uwem ke obufa ererimbot Abasi.—Utom 20:35.
22 Asiakusụn̄ oro ẹkekotde ẹto ke akpa ikpehe ekikere ama anam enye an̄wan̄a ke usụn̄ emi: “Nte idatesịt efen ekeme ndidu oro okponde akan eke edikụt owo emi afo ekpepde n̄kpọ akabarede edi ifịk ifịk anditoro Jehovah? Edi n̄kpọ nduaidem ye se isọn̄ọde mbuọtidem ndikụt nte Ikọ Abasi enyenede odudu ke ndinụk mme owo ẹnam mme ukpụhọde ke uwem mmọ man otodo ẹnem Jehovah esịt.” (Se Enyọn̄-Ukpeme, October 15, 1997, page 18-23.) Ntre, nso ida inemesịt isọk fi? Utu ke inemesịt ekpri ini oro ererimbot ọnọde, edieke afo adade mme ukeme oro ẹbịghide, ẹmi ẹsọn̄de urua, ke akpan n̄kpọ, usiakusụn̄ ayanam fi enyene utịbe utịbe ekikere uyụhọ oro edinamde fi enen̄ede okop inemesịt.
MBỤME 6: “Edieke owo mîyomke enye man ẹdu nsinsi uwem, nte idịghe mbubehe mi ndisiak usụn̄ m̀mê nditre ndisiak?”
23 Edi akpanikọ, ana ubiere ndisiak usụn̄ edi okwo. Jehovah ikpọn̄ ekeme ndibiere mme ọkpọkpọ idaha fo ke uwem. (Rome 14:4) Enye nte enende odori enyịn afo ndinam n̄kpọ nnọ enye ke ofụri esịt, ukpọn̄, ekikere, ye odudu. (Mark 12:30; Gal. 6:4, 5) Enye amama owo eke ọnọde ke inemesịt, enye emi anamde n̄kpọ esie ke idatesịt, idịghe ke mfụhọ esịt m̀mê ke edinyenyịk. (2 Cor. 9:7; Col. 3:23) Ntak oro afo enyenede ke ndinam utom uyọhọ ini akpana edi nte ke afo amama Jehovah ye mme owo ke efakutom. (Matt. 9:36-38; Mark 12:30, 31) Edieke afo ekerede n̄kpọ ke usụn̄ emi, do odot afo enen̄ede ekere aban̄a utom usiakusụn̄.
24 Nnyịn idori enyịn ite ke se ẹtịn̄de ẹban̄a mi ayan̄wam fi ndidomo mme idotenyịn ẹmi ẹdude ke afo ndisiak usụn̄ nse. Nte afo emekeme ndinam ukpụhọde ke mme idaha fo ndinam usiakusụn̄ ofụri ini? Ẹmịn̄ ke idak isọn̄ emi n̄wed usenọfiọn̄ oro ẹkotde “Ndutịm Utom Usiakusụn̄ Mi eke Urua ke Urua.” Se m̀mê afo emekeme ndiwet n̄kpọ nyọhọ ndutịm oro ekemede ndinanam ke idemfo oro ediyakde fi enyene hour 23 ke ẹbahade ukem ukem ke urua kiet kiet ke utom ukwọrọikọ. Ekem, kọn̄ ọyọhọ mbuọtidem ye ibetedem fo ke Jehovah. Ye un̄wam esie afo emekeme ndikụt unen! Enye ọn̄wọn̄ọ ete: ‘Nyan̄wan̄a nti n̄kpọ nnọ mbufo, tutu akaha.’—Mal. 3:10.
25 Ntre nnyịn ibụp ite, “Utom usiakusụn̄—nte enye enyene fi?” Edieke afo ekemede ndidọhọ “Ih,” nịm usenọfiọn̄ nditọn̄ọ usiakusụn̄ ofụri ini ke mîbịghike nyụn̄ fiọk ke Jehovah ayada idara idara uwem ọdiọn̄ fi!
[Chart ke page 6]
(Ama oyom ndikụt nte enye enen̄erede etie, se n̄wed)
Ndutịm Utom Usiakusụn̄ Mi eke Urua ke Urua
MONDAY: Utom ukwọrọikọ usenubọk
TUESDAY: Utom ukwọrọikọ usenubọk
WEDNESDAY: Utom ukwọrọikọ usenubọk
THURSDAY: Utom ukwọrọikọ usenubọk
FRIDAY: Utom ukwọrọikọ usenubọk
SATURDAY: Utom ukwọrọikọ usenubọk
SUNDAY: Utom ukwọrọikọ usenubọk
MONDAY: Utom ukwọrọikọ uwemeyo
TUESDAY: Utom ukwọrọikọ uwemeyo
WEDNESDAY: Utom ukwọrọikọ uwemeyo
THURSDAY: Utom ukwọrọikọ uwemeyo
FRIDAY: Utom ukwọrọikọ uwemeyo
SATURDAY: Utom ukwọrọikọ uwemeyo
SUNDAY: Utom ukwọrọikọ uwemeyo
MONDAY: Utom ukwọrọikọ mbubịteyo
TUESDAY: Utom ukwọrọikọ mbubịteyo
WEDNESDAY: Utom ukwọrọikọ mbubịteyo
THURSDAY: Utom ukwọrọikọ mbubịteyo
FRIDAY: Utom ukwọrọikọ mbubịteyo
SATURDAY: Utom ukwọrọikọ mbubịteyo
SUNDAY: Utom ukwọrọikọ mbubịteyo
Da benetap wet ndutịm fo eke usen kiet kiet ke urua.
Tịm ofụri ibat edide n̄kpọ nte hour 23 ke urua kiet kiet ke utom ukwọrọikọ.
Ofụri ibat hour ke urua kiet kiet oro ntịmde ____________________