Nọ Ikọ Ntiense ke Ebiet Ekededi Emi Mme Owo Ẹdude
1 Ke ọfiọkde udeme oro spirit Abasi ekenyenede ke utom ukwọrọikọ esie, apostle Paul ọkọdọhọ ete: “N̄kọri oto Abasi.” Enye ama ọdọhọ n̄ko ete: “Nnyịn isan̄a ikpat kiet idi mme anamutom Abasi.” (1 Cor. 3:5-9) Emi edi utịbe utịbe ifetutom. Didie ke nnyịn ikeme ndiwụt an̄wan̄wa nte ke nnyịn imowụt esịtekọm iban̄a edisan̄a ikpat kiet ndi mme anamutom Abasi? Ebe ke nditan̄a eti mbụk nnọ kpukpru mbon oro nnyịn isobode ke utom eke ufọk ke ufọk ye ke kpukpru ebiet eken.
2 Ẹwụk nnyịn ẹte ‘inam mme mbet.’ (Matt. 28:19) Edieke nnyịn isobode ibat ibat owo kpọt ke ini ibuanade ke utom ukwọrọikọ, nnyịn imekeme ndisọp n̄kop mba inyụn̄ ikere ke nnyịn inam esisịt. Ke n̄kan̄ eken, nnyịn inen̄ede ikop inem utom ukwọrọikọ nnyịn ke ini ikemede ndikụt ediwak owo nnyụn̄ nnyene nneme ye mmọ. Emi ekeme ndinen̄ede ndi n̄kpọ-ata, sia emi oyomde ndusụk usio-ukot ke n̄kan̄ nnyịn ndika ebiet ekededi emi mme owo ẹdude man otodo ikeme ndisobo ye mmọ.
3 Nti Uwụtn̄kpọ: Nnyịn imekeme ndinọ mme owo ikọ ntiense ke mme urua, mme itie inemesịt, mme itie mbehe bọs, ye mme itie mbehe n̄kpọisan̄. Ke ini odụkde n̄kpọisan̄ ofụri owo, nte afo emeben̄e idem ndinọ ikọ ntiense ke usụn̄? Ntiense iba ẹmi ẹkedụkde bọs oro mme owo ẹkeyọhọde ẹka ndidụk mbono an̄wautom ẹma ẹneme ndise Paradise ke n̄wed Ifiọk, ẹnemede mme un̄wọn̄ọ Abasi kaban̄a ini iso. Kpa nte mmọ ẹkedoride enyịn ke eyetịbe, akparawa kiet emi akadade ekpere ama akpan̄ utọn̄ ndien se enye okokopde ama otụk enye. Mbemiso ọwọrọde ke bọs oro, enye ama ọbọ n̄wed kiet onyụn̄ ọdọhọ yak owo esidi ufọk imọ.
4 Ediwak asuanetop ẹmekop idatesịt ke ndinọ ikọ ntiense ido nneme. Eyenete an̄wan kiet ama aka akwa ufọkurua n̄kann̄kụk ke uwemeyo onyụn̄ aka ebịne mme owo ẹmi ẹma ẹkedep n̄kpọ ẹkụre edi ẹmi mîketiehe nte ẹtie itọk itọk. Enye ama enịm kpukpru n̄wed ẹmi ẹkedọn̄ọde ke ekpat esie. Eren kiet emi ekebetde ke moto esie ama okop inemesịt ndibọ mme magazine nto enye. Enye ama esidụk mme mbonoesop ke mbemiso, ndien nneme mmọ ama afiak edemede enye udọn̄.
5 Edi ifetutom nditoro enyịn̄ Jehovah. Ebede ke ndiwụt ifịk oro inyenede ke utom ukwọrọikọ, nnyịn iwụt ite ke nnyịn itabake uduak mfọnido Abasi oro owo mîdotke emi ẹwụtde nnyịn. Sia edide ‘ini mfọnido edi emi’ ndin̄wam mbon en̄wen, ẹyak nnyịn ika ke ebiet ekededi oro mme owo ẹdude inyụn̄ inọ mmọ ikọ ntiense iban̄a “usen edinyan̄a” Jehovah.—2 Cor. 6:1, 2.