Mbufa Usụn̄ Unọ Ikọ Ntiense Ke An̄wan̄wa Ebiet Emi Mme Owo Ẹwakde
1. Uwụtn̄kpọ ewe ke akpa mme Christian ẹkenịm?
1 Akpa mme Christian ikesikwọrọke ikọ ke ufọk ke ufọk kpọt. Mmọ ẹma ẹsikwọrọ ikọ an̄wan̄wa n̄ko. (Utom 20:20) Ke uwụtn̄kpọ, mmọ ẹma ẹka temple, emi mmọ ẹdikemede ndikụt ediwak owo. (Utom 5:42) Ke ini apostle Paul okodude ke Athens, enye ama ọkwọrọ ikọ kpukpru usen ọnọ mbon oro ẹkedude ke an̄waurua. (Utom 17:17) Akpan usụn̄ oro ikwọrọde eti mbụk mfịn edi ke ufọk ke ufọk. Edi imesika n̄ko mme itie ubon moto, mme itie mbubehe, mme itie unọ idem nduọkodudu, itie oro ediwak owo ẹsisan̄ade ẹbe, ye mme itie eken, man ikwọrọ ikọ inọ mme owo ke ebiet ekededi oro ikemede ndikụt mmọ. Ke adan̄aemi ẹsịnde udọn̄ ẹnọ mme asuanetop ẹte ẹnọ ikọ ntiense an̄wan̄wa ke ebiet oro mmọ ẹkemede ndinam ntre, ediwak owo ẹyenyene ifet ndinọ ikọ ntiense an̄wan̄wa ke mbufa usụn̄ iba.
2. Nso obufa usụn̄ unọ ikọ ntiense an̄wan̄wa ke ẹketọn̄ọ ndidomo nse ke November 2011?
2 San̄asan̄a Usụn̄ Unọ Ikọ Ntiense ke An̄wan̄wa Ebiet Emi Mme Owo Ẹwakde ke Ikpọ Obio: Nte ẹwụtde ke N̄wedisua 2013 ke page 16 ye 17, ẹma ẹtọn̄ọ ndidomo obufa usụn̄ unọ ikọ ntiense an̄wan̄wa nse ke New York City, ke November 2011. Ẹma ẹnịm mme okpokoro ye mme ukpatn̄kpọ ke mme ebiet oro ediwak owo ẹsisan̄ade ẹbe, ẹdian ndiye ndise n̄wed nnyịn ẹnyụn̄ ẹdori mme n̄wed nnyịn ke nsio nsio usem. Ediwak tọsịn owo ẹsisan̄a ẹbe do kpukpru usen. Ediwak mmọ ẹdi mbon oro ẹdụn̄de ke ebiet oro Mme Ntiense mîkemeke ndidụk m̀mê oro owo mîsiyakke mmọ ẹdụk, ndusụk ẹdi mbon oro mîsiwakke ndidu ke ufọk. Ata ediwak owo ẹma ẹnen̄ede ẹma mme n̄wed nnyịn. Ke ọfiọn̄ kiet kpọt ke ndondo emi, ẹma ẹnịm magazine 3,797 ye mme n̄wed 7,986. Ediwak mbon oro ẹkesan̄ade ẹbe ẹma ẹdọhọ ẹdikpep mmimọ Bible. Sia akpan ntak oro ẹkenamde emi ẹkedide nditọn̄ọ ukpepn̄kpọ Bible, ẹma ẹsọsọp ẹnọ mme adres mbon oro ẹnyenede udọn̄ ẹsọk esop oro odude ke ebiet oro mme owo emi ẹdude, man ẹka ẹkese mmọ.
3. Adan̄a didie ke ẹdida obufa usụn̄ emi ẹtat utom unọ ikọ ntiense?
3 Sia ẹkụtde unen ke obufa usụn̄ emi, ẹyenam enye ke ofụri ererimbot idahaemi ke ikpọ obio oro ediwak owo ẹdude. N̄kọk itieutom eyebiere m̀mê ewe obio ke ẹdinam emi. Emi edidi mme obio emi mme owo ẹsiwakde ke ntak emi ẹnyenede mme itie udụk n̄kpọisan̄, m̀mê emi ẹnyenede ediwak itieutom m̀mê mme ufọkidụn̄ oro ata ediwak owo ẹdụn̄de. Ekem n̄kọk itieutom eyewet esop oro ẹdikwọrọde ikọ do onyụn̄ eteme mmọ se ẹkpenamde. Ẹsimek mme asiakusụn̄ ofụri ini ye mme akpan asiakusụn̄, edi mme asiakusụn̄ unọ un̄wam ẹsitiene ẹbuana ke ndusụk itie.
4. Didie ke ẹsinam san̄asan̄a unọ ikọ ntiense an̄wan̄wa ke ikpọ obio?
4 Nte Ẹdade Obufa Usụn̄ Emi Ẹnọ Ikọ Ntiense: Mme asiakusụn̄ oro ẹnamde san̄asan̄a unọ ikọ ntiense emi ke ikpọ obio ẹsibet tutu owo asan̄a edi okpokoro m̀mê n̄kpọ udori n̄wed oro ẹkemede ndimen nsan̄a, oro mmọ ẹdoride n̄wed. Owo ama asan̄a edi, mmọ ẹyedọhọ enye emen n̄wed ekededi oro enye amade. Mme asiakusụn̄ oro ẹyeda Bible ẹbọrọ mbụme ekededi oro enye obụpde. Edieke enye emende n̄wed, mme asiakusụn̄ oro iditịn̄ke n̄kpọ iban̄a etịbe. Edi edieke enye obụpde nte nnyịn isisan̄ade inyene okụk ida inam utom nnyịn, mmọ ẹkeme ndidọhọ ke owo ekeme ndinọ etịbe esie ẹsọk n̄kọk itieutom ke adres oro odude ke n̄wed oro. Ufan̄ okpodu, mmọ ẹkeme ndibụp enye ete: “Ndi akpama owo edi edise fi ke ufọk fo?” m̀mê “Ndi ọmọfiọk ke imesinịm ukpepn̄kpọ Bible ye mme owo ke mfọn n̄ko?”
5. Nso utịp ke ebe ye n̄wan kiet ẹkenyene ke nditiene mbuana ke obufa usụn̄ unọ ikọ ntiense emi?
5 Nditiene mbuana ke usụn̄ unọ ikọ ntiense enye emi akama nti utịp. Ebe ye n̄wan kiet ẹma ẹwet ẹte: “Kpukpru usen, nte idade ikpere okpokoro emi inyụn̄ ikụtde ediwak tọsin owo ẹsan̄ade ẹbe, enen̄ede an̄wan̄a nnyịn utọ akamba utom oro ẹnamde man ẹkwọrọ ikọ ẹnọ mme owo ke ofụri ererimbot. Ndikụt utọ ediwak owo emi nnyụn̄ nti nte Jehovah ekerede aban̄a owo kiet kiet anam nnyịn ibiere ndika iso nda utom ukwọrọikọ emi ke akpan n̄kpọ. Nnyịn imesitie ikere nte Jehovah odụn̄ọrede esịt kpukpru mbon oro ẹsan̄ade ẹbe okpokoro nnyịn emi, ke oyom mbon oro ẹdotde. Imekere ke nnyịn inam utom ọtọkiet ye mme angel emi ẹdide nsan̄autom nnyịn.”
6. (a) Ewe usụn̄ unọ ikọ ntiense an̄wan̄wa ke ẹnam ke ediwak esop, ndien didie ke enye emi okpụhọde ye san̄asan̄a usụn̄ unọ ikọ ntiense an̄wan̄wa ke ikpọ obio? (b) Didie ke mme esop ẹkeme ndinam n̄kpọ ke edidianakiet ke ini ẹnọde ikọ ntiense an̄wan̄wa?
6 Unọ Ikọ Ntiense ke An̄wan̄wa Ebiet Emi Mme Owo Ẹwakde Oro Esop Ẹdiomide: Ke adianade ye san̄asan̄a usụn̄ unọ ikọ ntiense an̄wan̄wa ke ikpọ obio, ediwak otu mbiowo ke ẹnam ndutịm ẹnọ obufa usụn̄ unọ ikọ ntiense en̄wen ke efakutom mmọ. Ke usụn̄ enye emi, mme asuanetop ẹsidori mme n̄wed nnyịn ke okpokoro m̀mê ke n̄kpọ udori n̄wed oro ẹkemede ndimen nsan̄a, ke ebiet emi ata ediwak owo ẹsisan̄ade ẹbe ke efakutom esop mmọ. Emi ọkpụhọde ye san̄asan̄a usụn̄ unọ ikọ ntiense an̄wan̄wa ke ikpọ obio, emi nditọete ẹsitode ediwak esop ẹkekwọrọ ikọ ke ukem ebiet oro mme owo ẹwakde, emi n̄kọk itieutom ẹmekde.—Se ekebe oro “Oyom Edidianakiet.”
7. Ke efakutom oro ẹkemede ndinam an̄wan̄wa unọ ikọ ntiense, didie ke mbiowo edinam ndutịm ẹban̄a emi?
7 Mbiowo ẹyese m̀mê enyene itie ke efakutom esop oro mme owo ẹsinen̄erede ẹwak, ẹnyụn̄ ẹbiere m̀mê ọkpọfọn ẹdiomi ndika n̄kọnọ ikọ ntiense an̄wan̄wa do. Mme itie oro ẹkemede ndinịm okpokoro m̀mê n̄kpọ udori n̄wed oro ẹkemede ndimen nsan̄a ẹdi ikpọ itie udụk n̄kpọisan̄, an̄wa obio, itie unọ idem nduọkodudu, efak oro ediwak owo ẹsisan̄ade ẹbe, ebiet emi ikpọ ufọkurua ẹdude, esịt ebiet akamba ufọkn̄wed, an̄wambehe ubomofụm, mme itiembehe tren, ye mme itie oro ẹsinamde edinam kpukpru isua. Ọkpọfọn ẹnyene akpan itie, akpan usen, ye akpan ini emi ẹsinịmde okpokoro. Ẹkụt ẹte ke ndinịm mme okpokoro ke ebiet emi ediwak ikpọ ufọkurua ẹdude esikụt unen akan edinịm ke ebiet emi akamba ufọkurua kiet kpọt odude, sia mbon oro ẹsikade utọ ufọkurua oro ẹsiwụk ekikere kpọt ke se idade mmọ ika do. Ndusụk itie, nte mbenusụn̄ oro mme owo ẹsiwakde ndisan̄a mbe, ọkpọfọn ẹnịm ekpri n̄kpọ udori n̄wed. Mbiowo ẹkeme ndika ikpehe Intanet nnyịn n̄kosio san̄asan̄a ndise Enyọn̄-Ukpeme ye Ẹdemede! ye n̄wed Bible Ekpep emi ẹnamde ẹnọ orụk an̄wan̄wa unọ ikọ ntiense emi. Mbon oro ẹdinamde utom emi ẹnyene ndinam enye nte eke san̄asan̄a usụn̄ unọ ikọ ntiense an̄wan̄wa ke ikpọ obio, ẹkpenyụn̄ ẹnyene nditịm ntiene ndausụn̄ oro esenyịn utom ọnọde. Edieke mmọ ẹbọde owo emi enyenede udọn̄ oro mîdụn̄ke ke efakutom mmọ adres, mmọ ẹkpenyene ndisọsọp n̄wet n̄kpọ nyọhọ babru Please Follow Up (S-43) nnyụn̄ n̄kpọn̄ nnọ ewetn̄wed esop.
8. Edieke esop mînamke ndutịm ndinọ ikọ ntiense ke an̄wan̄wa ẹbiet emi mme owo ẹwakde, nso ifet ke mbufo ẹsụk ẹnyene ndikwọrọ ikọ an̄wan̄wa?
8 Nam An̄wan̄wa Utom Unọ Ikọ Ntiense ke Ini Ọwọrode An̄wautom: Ndusụk esop idinyeneke ebiet ke efakutom mmọ emi ediwak owo ẹsisan̄ade ẹbe, oro mmọ ẹkemede ndinịm okpokoro n̄wed m̀mê n̄kpọ udori n̄wed oro ẹkemede ndimen nsan̄a. Edi, ẹsịn udọn̄ ẹnọ mme asuanetop ke mme esop emi nditiene nnọ ikọ ntiense an̄wan̄wa ke ini mmọ ẹwọrọde an̄wautom. Ndi ẹmenyene mme ufọkurua oro mme owo ẹsiwakde ndidụk m̀mê mme itie mbubehe emi ẹdude ẹkpere usụn̄ ke efakutom mbufo? Ndi urua, itie unọ idem nduọkodudu, m̀mê itie oro mme owo ẹsisopde idem ẹdu do? Ndi odu edinam oro ẹsinamde ke ini ke ini ke efakutom mbufo? Edieke odude, mbufo ẹmekeme ndisụk nnọ ikọ ntiense an̄wan̄wa.
9. Ntak emi ikpesịnde ofụri ukeme ikwọrọ ikọ inọ mme owo ke ebiet ekededi oro ikemede ndikụt mmọ?
9 Jehovah aduak ete “kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:4) Ntem, nnyịn iyom ndinam ediwak owo nte ikekeme ẹkop etop Obio Ubọn̄ mbemiso utịt edide. (Matt. 24:14) Ke ediwak itie, ọsọsọn̄ ndikụt mme owo ke ufọk. Edi ke ini inọde ikọ ntiense an̄wan̄wa iyekeme ndikwọrọ ikọ nnọ mmọ. Ekeme ndidi n̄kukụre ini oro ndusụk owo ẹdinyenede ifet ndikop eti mbụk edidi ke ini inọde ikọ ntiense an̄wan̄wa. Mmọdo, ẹyak inam utom nnyịn ọyọhọ ọyọhọ ima ke ndikwọrọ ikọ nnọ mme owo ke ebiet ekededi oro ikemede ndikụt mmọ.—2 Tim. 4:5.
[Ekebe ke page 5]
Oyom Edidianakiet
Ẹdọhọ ke mme asuanetop ke nsio nsio esop ke n̄kann̄kụk ẹsika ukem efak, ukem itie ubon moto, ukem itie mbubehe m̀mê ukem itie udụk n̄kpọisan̄, ẹkenọ ikọ ntiense an̄wan̄wa. Mme asuanetop ke nsio nsio esop ẹsinyụn̄ ẹka ukem itie udụk bọs, itie unọ idem nduọkodudu, m̀mê itie ubet owo ẹkenọ mme owo magazine, ẹnyụn̄ ẹkwọrọ ikọ ke ukem itie mbubehe. N̄kpọ emi esifịna mme enyene itie mbubehe, ye mbon oro ẹdụn̄de ke mbọhọ oro mme asuanetop emi ẹsikade, idem ọkpọkọm mmọ ẹkwọrọ ikọ do ke nsio nsio ini. Ke ntre, ọfọn mme asuanetop ẹnọ ikọ ntiense ke an̄wan̄wa ebiet emi mme owo ẹwakde ke efakutom esop mmọ kpọt.
Edieke mme asuanetop ẹyomde ndika n̄kọnọ ikọ ntiense an̄wan̄wa ke efakutom esop en̄wen oro odude ekpere mmọ, mmọ ẹkpenyene ndineme n̄kpọ emi ye esenyịn utom esop mmọ. Enye eyenyene nneme ye esenyịn utom esop oro enyenede efakutom emi onyụn̄ ọbọ unyịme mbemiso mbon esop esie ẹkade. Ke ebiet emi mme esop oro ẹsemde nsio nsio usem ẹkwọrọde ikọ ke ukem efakutom, mme esenyịn utom ke mme esop emi ẹkpenyene ndineme nte mmọ ẹdinamde mbak ẹditie nte mmọ ẹfefịna mme owo ke efakutom oro. Edieke edidianakiet odude, kpukpru n̄kpọ ẹyeda itie ke “ido nte eyede ye ke ndutịm.”—1 Cor. 14:40.
[Ndise ke page 6]
[Ndise ke page 6]