Ẹyenyan̄a Kpukpru Orụk Owo
1 Jehovah oyom “kpukpru [orụk, NW] owo ẹnyene edinyan̄a, ẹnyụn̄ ẹsịm ifiọk akpanikọ.” (1 Tim. 2:4) Okposụkedi ke ndusụk udomo ndammana n̄kpọ, idaha ke uwem, ye n̄kann̄kụk ẹnyenede odudu ke idem mme owo, mmọ ẹnyene ifụre uduak ẹnyụn̄ ẹkeme ndimek ke idemmọ kiet kiet nte ẹdidade uwem mmọ ẹnam n̄kpọ. Mmọ ẹkeme ndinam se ifọnde ẹnyụn̄ ẹdu uwem, mîdịghe mmọ ẹkeme ndinam se idiọkde ẹnyụn̄ ẹtak. (Matt. 7:13, 14) Didie ke ifiọk emi otụk nte nnyịn ikerede iban̄a mme owo ẹmi idade eti mbụk Obio Ubọn̄ ika ibịne?
2 Nnyịn ikpenyeneke ndida nte ke ẹda mme utọ n̄kpọ nte idaha idụt m̀mê ekpụk m̀mê idaha n̄kaowo ẹbiere udọn̄ oro owo enyenede ke akpanikọ. Akpanikọ ekeme ndidemede udọn̄ mbon oro ẹnyenede esisịt m̀mê akwa ifiọkn̄wed, mbon oro ẹsịnde idem ke mbubehe ukaraidem, nta ubọkọkọ, mbon oro mînịmke edidu Abasi ke akpanikọ, mbon oro ẹdọhọde ke owo idiọn̄ọke m̀mê Abasi odu m̀mê idụhe, ye idem mme anamidiọk ẹmi ẹwọrọde etop. Mme owo ẹtode kpukpru idaha ke uwem ye mme idaha ke n̄kaowo ẹmekpụhọde ẹkpọn̄ akani ido mmọ ẹnyụn̄ ẹsak iso idahaemi ẹse edibọ uwem ke obufa ererimbot Abasi. (N̄ke 11:19) Ke ntre, nnyịn ikpemen̄eke ndida etop Obio Ubọn̄ n̄ka mbịne mme owo ẹdude ke kpukpru idaha ke uwem.
3 Kere Ban̄a Mme Uwụtn̄kpọ Ẹmi: Eren kiet ama odiomi ndiwot ebeeka esie edi ikowotke. Ekem enye ama oyom ndiwot idemesie edi ikemeke. Ke ẹma ẹkesịn enye ke ufọk-n̄kpọkọbi ke ntak uyịpinọ ye unyam n̄kpọsọn̄ ibọk, ndọ esie ama abiara. Mfịn owo emi odu uwem akpanikọ onyụn̄ adara inem inem ndọ ọkọrọ ye eti itie ebuana ye ebeeka esie. Nso ikedi ntak ukpụhọde emi? Enye ama ekpep Bible ye Mme Ntiense Jehovah onyụn̄ ada se enye ekekpepde esịn ke edinam. Jehovah ikadaha ke enye ebe se ẹnyan̄ade.
4 Etop emi n̄kaiferi kiet ọkọwọrọde nte owo edinam TV ikadaha inemesịt isọk enye. Edi ke nti ido Mme Ntiense otụkde, enye ama enyịme ukpepn̄kpọ Bible, ndien ikebịghike enye ama an̄wam mbon en̄wen ẹkpep ẹban̄a eti mbụk Obio Ubọn̄. Ẹma ẹdiọn̄ọ enye ke kpukpru ebiet oro enye awahade ke utom ukwọrọikọ eke enyịnusụn̄ ke enyịnusụn̄, edi enye ye inemesịt ama anam an̄wan̄a ke iyom ẹdiọn̄ọ imọ nte kiet ke otu Mme Ntiense Jehovah utu ke nte owo edinam.
5 Ke ini Ntiense okodiomide ukpepn̄kpọ Bible ọnọ otobo Enyọn̄-Ukpeme kiet, mbọhọ kiet ama okop onyụn̄ odụk ukpepn̄kpọ oro. Mbọhọ oro inikiet inikiet ama okụt akpanikọ emi enye ekesiyomde! Enye ye ebe esie ẹma ẹbiat ewụhọ usiondọ emi ẹkenọde mmọ ẹnyụn̄ ẹnam emem. Enye ama enen̄ede esịn idem ke edisiak ntantaọfiọn̄ onyụn̄ esịn idem ke ubụpekpo, edi enye ama ọsọsọp ọduọn̄ọ mme ọsọn̄urua n̄wed ye kpukpru n̄kpọ ekededi emi enye ẹkenyenede oro ekenyenede ebuana ye utuakibuot nnọ mme demon. Ikebịghike enye ama ọtọn̄ọ ndidụk mme mbonoesop onyụn̄ esinyene nneme ye mme iman ye mme ufan aban̄a obufa ido ukpono esie. Idahaemi enye ye ifiopesịt esinọ mbon en̄wen ikọ ntiense.
6 Nnyịn ikpenyeneke ndibem iso mbiere ikpe nnọ owo ekededi. Utu ke oro, ẹyak nnyịn ibuana eti mbụk ifịk ifịk ye mme owo ke kpukpru ebiet. Nnyịn imenyene kpukpru ntak ndinyene mbuọtidem nte ke Jehovah, emi ‘esede esịt,’ eyedi “Andinyan̄a kpukpru [orụk, NW] owo.”—1 Sam. 16:7; 1 Tim. 4:10.