Osụk Enyenyene Ufọn Mfịn

“Ikọ fo edi utuenikan̄ ukot mi, ye un̄wana usụn̄ mi.”—PSALM 119:105.

DIDIE KE BIBLE ANANA MBIET? Ẹkeme ndidọhọ ke n̄wed enen̄ede ọfọn, edi enye itemeke owo nte ẹkpedude uwem. Idem mme n̄wed oro ẹsitemede owo nte ẹkpedude uwem mfịn esidi anam anam ẹsio en̄wen. Edi Bible itiehe ntem. “Kpukpru n̄kpọ oro ẹkewetde ke ini edem [ke Bible], ẹkewet mmọ ndida nteme nnyịn” nte ikpodude uwem.—Rome 15:4.

UWỤTN̄KPỌ: Kpa ye oro Bible mîdịghe n̄wed ibọkusọbọ, enye esịne mme item emi ẹkemede ndinam owo okop nsọn̄idem ye inemesịt. Ke uwụtn̄kpọ, Bible ọdọhọ ke “sụn̄sụn̄ esịt edi uwem obụkidem.” (Mme N̄ke 14:30) Enye onyụn̄ ọdọhọ ete: “Owo eke adian̄arede etie ikpọn̄ ediyom ibụk ibụk udọn̄ idemesie; enye oyofụmi kpukpru ata ọniọn̄.” (Mme N̄ke 18:1) Enye etịn̄ ke itie en̄wen ete: “Inemesịt odu ke ndinọnọ akan ke ndibọbọ.”—Utom 20:35.

SE NDỤN̄ỌDE OWỤTDE: Ndinyene sụn̄sụn̄ esịt, nti ufan, nnyụn̄ nnọ owo n̄kpọ ẹkeme ndinam idem ọsọn̄ owo. N̄wed oro The Journal of the American Medical Association ọdọhọ ete: “Mbon oro ẹsisọpde iyatesịt ẹsisọp ẹdọn̄ọ akpauben̄ ẹkan mbon oro mîsisọpke iyat esịt.” Ndụn̄ọde oro ẹkedade isua duop ẹnam ke Australia owụt ke n̄kani owo emi “ẹnyenede nti ufan ye mbon emi mmọ ẹkemede nditịn̄ mfịna mmọ nnọ” ẹsidu uwem ẹbịghi ẹkan mbon oro mînyeneke. Ndien ke 2008, mme anam-ndụn̄ọde ke Canada ye United States ẹma ẹkụt nte ke owo “ndibiat okụk nnam n̄kpọ nnọ mbon en̄wen esinọ owo inemesịt akan ndibiat okụk nnam n̄kpọ nnọ idem.”

AFO EKERE DIDIE? Edieke idem mîsọn̄ke fi, ndi akpanam se ẹtemede ke n̄wed en̄wen ekededi emi ẹkewetde ke n̄kpọ nte isua 2,000 emi ẹkebede man idem ọsọn̄ fi? Okûkam udi Bible inyeneke mbiet?

[Se ẹwetde ke ikpọ abisi ke page 8]

“Mmenen̄ede mma Bible . . . sia enye ọdọn̄ọ ata nti item aban̄a se owo akpanamde man okop nsọn̄idem.”​—HOWARD KELLY, M.D., ANDIKETIENE NSIAK JOHNS HOPKINS UNIVERSITY SCHOOL OF MEDICINE