Kpukpru N̄wed ke Bible Ẹdu ke N̄kemuyo
“Akananam ntịn̄nnịm ikọ itoho uduak owo, edi mme owo ẹtịn̄ ikọ eke otode Abasi nte edisana spirit adade mmọ usụn̄.”—2 PETER 1:21.
DIDIE KE BIBLE ANANA MBIET? Toto ke eset, idem mme n̄wed emi ẹkesiwetde ke ukem ini ẹban̄a ukem n̄kpọ ẹkesidi enye emi etịn̄ emi enye oko etịn̄ oko. Mme n̄wed emi nsio nsio owo ẹtiede ke nsio nsio ebiet ẹwet ke nsio nsio ini isiwakke ndidu ke n̄kemuyo. Edi Bible owụt ke Owo kiet enyene n̄wed 66 oro ẹdude ke enye, ndien ntak edi oro kpukpru n̄wed emi ẹdude ke n̄kemuyo.—2 Timothy 3:16.
UWỤTN̄KPỌ: Moses, emi ekedide ekpemerọn̄ ke n̄kpọ nte isua 3,600 emi ẹkebede, ama ewet ke akpa n̄wed Bible nte ke “mfri” eyedi edinyan̄a ubonowo. Bible ama etịn̄ nte ini akakade ete ke mfri emi edito ubon Abraham, Isaac, ye Jacob. (Genesis 3:15; 22:17, 18; 26:24; 28:14) Ke n̄kpọ nte isua 3,000 emi ẹkebede, prọfet Nathan ama owụt ke mfri emi edito ubon Edidem David. (2 Samuel 7:12) N̄ko ke n̄kpọ nte isua 2,000 emi ẹkebede, apostle Paul ama owụt ke Jesus ye mme Christian oro ẹyetde aran ẹdi mfri emi. (Rome 1:1-4; Galatia 3:16, 29) Ke akpatre, ke n̄kpọ nte isua 1,900 emi ẹkebede, n̄wed Ediyarade ama etịn̄ nte ke mme Christian oro ẹyetde aran ẹyetie ntiense ẹban̄a Jesus ke isọn̄, ke ẹyenam mmọ ẹset ẹka heaven, ke mmọ ẹyenyụn̄ ẹtiene Jesus ẹkara ke tọsịn isua kiet. Mmọ ẹyediana ye Jesus ẹsobo Devil ẹnyụn̄ ẹnyan̄a ubonowo.—Ediyarade 12:17; 20:6-10.
SE NTA MME EKPEPN̄KPỌ MBAN̄A BIBLE ẸTỊN̄DE: Ke Louis Gaussen ama akada ini odụn̄ọde n̄wed 66 oro ẹdude ke Bible, enye ama ewet ete ke idem ama akpa imọ ndikụt ke “kpa ye oro edide nsio nsio owo ẹkeda n̄kpọ nte isua 1,500 ẹwet nsio nsio n̄wed emi ẹnamde ofụri Bible, ke Bible idịghe etetịn̄ esịn etetịn̄ osio, . . . edi kpukpru mme andikewet ẹketịn̄ n̄kpọ kiet nte n̄kpọ eke ẹdọhọde ke mmọ ẹma ẹfiọk se mmimọ ikewetde iban̄a. N̄kpọ kiet oro kpukpru mmọ ẹkewetde ẹban̄a ekedi nte Eyen Abasi edinyan̄ade ubonowo.”—Theopneusty—The Plenary Inspiration of the Holy Scriptures.
AFO EKERE DIDIE? Ndi emekere ke n̄wed emi n̄kpọ nte owo 40 ẹkedade se ibede isua 1,500 ẹwet ẹkeme ndidu ke n̄kemuyo? Okûkam udi Bible inyeneke mbiet?
[Se ẹwetde ke ikpọ abisi ke page 7]
“Edieke okotde kpukpru n̄wed ke Bible, oyokụt ke ofụri Bible edi n̄wed kiet . . . Idụhe n̄wed en̄wen ke ofụri ererimbot emi etiede nte Bible.”—THE PROBLEM OF THE OLD TESTAMENT, EMI JAMES ORR EWETDE