Ndi Obio Ubọn̄ Abasi Odu Owo ke Esịt?

Pope Benedict XVI ekewet ke n̄wed esie oro Jesus of Nazareth ete: “Obio Ubọn̄ Abasi edi ọnọ owo ke ini enye enyịmede Jesus ke esịt esie.” Ndusụk owo ẹkere ke Obio Ubọn̄ Abasi edi owo ndikabade esịt nnyịme Jesus Christ nnyụn̄ mbuọt idem ye enye. Ndi Obio Ubọn̄ Abasi edi owo ndikabade esịt, mîdịghe, ndi enye ‘odu owo ke esịt’?

JESUS akada Obio Ubọn̄ emi nte ata akpan n̄kpọ. Pope Benedict enyịme ke Obio Ubọn̄ emi ekedi “akpan ibuot ukwọrọikọ Jesus.” Jesus ama asan̄a akanade ofụri Galilee “ọkwọrọ eti mbụk obio ubọn̄” ke ekpri ini oro enye akanamde utom ukwọrọikọ esie. (Matthew 4:23) Se Jesus ekekpepde ye mme utịben̄kpọ oro enye akanamde ẹwụt ke Obio Ubọn̄ Abasi idịghe owo ndinyịme ndinam n̄kpọ Abasi nnyụn̄ n̄kop item esie. Se Obio Ubọn̄ Abasi edide abuana ukara, ye ikpe, ye nsinsi edidiọn̄.

Ukara ye Ikpe

Isan̄ kiet, ke mme akpatre ini ukwọrọikọ Jesus, eka James ye John—mme mbet emi ẹkenen̄erede ẹkpere enye—ama ọkọdọhọ Jesus ete: “Nọ uyo man nditọiren mi iba emi ẹkpetie, kiet ke ubọk nnasia fo, kiet ke ufien, ke obio ubọn̄ fo.” (Matthew 20:21) Imenen̄ede ikụt ke mma oro iketịn̄ke iban̄a n̄kpọ emi odude ke esịt nditọ esie. Enye ama ọdiọn̄ọ ke mme owo ẹyetiene Jesus ẹkara ke Obio Ubọn̄, ndien enye okoyom nditọ esie ẹtiene ẹkara. Ndien ke akpan, Jesus ama ọn̄wọn̄ọ ọnọ mme anam-akpanikọ apostle esie 11 ke mmọ ẹyedu ke Obio Ubọn̄ imọ ẹnyụn̄ “ẹtie ke mme ebekpo” ẹtiene imọ “ẹkpe ikpe.” (Luke 22:30) Ntre, mme anditiene Jesus ẹda Obio Ubọn̄ emi nte ata ukara.

Nso kaban̄a mbon eyo Jesus? Ndi mmọ ẹkeda Obio Ubọn̄ Abasi nte owo ndikabade esịt, mîdịghe ndi ẹkeda enye ke usụn̄ en̄wen? Esisịt ini mbemiso Passover eke isua 33 E.N., Jesus ama odoro ke eyen ass odụk Jerusalem, ndien otuowo ẹma ẹdara enye ẹnyụn̄ ẹfiori ẹte: “Mbọk, nyan̄a [nnyịn] Eyen David!” (Matthew 21:9) Nso ikanam mmọ ẹdọhọ ntre? Anaedi mmọ ẹma ẹdifiọk ke Jesus edi Messiah oro ẹken̄wọn̄ọde ye nte ke Abasi ọyọnọ enye nsinsi Obio Ubọn̄, kpa “ebekpo ete esie David.” Mmọ ẹkenen̄ede ẹyom edinyan̄a, ye emem, ye unenikpe emi Obio Ubọn̄ Abasi edidade idi.—Luke 1:32; Zechariah 9:9.

Nsinsi Edidiọn̄

Idem mbon emi mîkenen̄ekede ima ukwọrọikọ Jesus ẹma ẹdiọn̄ọ kiet ke otu n̄kpọ emi enye ekesikpepde. Abiatibet kiet emi ọkọkọn̄ọde ekpere Jesus ke eto ama ekpe enye ubọk ete: “Jesus, ti mi ke ini afo odụkde obio ubọn̄ fo.” Nso ke Jesus ọkọbọrọ enye? Enye ọkọdọhọ abiatibet oro ete: “Afo oyodu ye ami ke Paradise.”—Luke 23:42, 43.

Emi owụt ke abiatibet oro ama ọdiọn̄ọ ke Jesus oyodụk Obio Ubọn̄ mîdịghe ke ẹyenọ enye Obio Ubọn̄ ke enye ama ekeset ke n̄kpa. Jesus eyenyene odudu onyụn̄ anam eren emi ye ediwak mbon en̄wen ẹset, onyụn̄ an̄wam mmọ ẹkpụhọrede. Nte Andikara ke heaven, Jesus ayada Obio Ubọn̄ emi ọnọ ofụri ubonowo nsinsi edidiọn̄.—John 5:28, 29.

Obio Ubọn̄ ke Otu Mmọ

Ndi Jesus ikọdọhọke ite: “Obio ubọn̄ Abasi odu ke otu mbufo”? Ikọ Jesus emi odu ke Luke 17:21. Ke nditịm ntịn̄, ndusụk Bible ẹsịn ufan̄ikọ emi ntem: “Obio Ubọn̄ Abasi ododu kesịt mbufo.” (Edisana N̄wed Abasi Ibom eke 1949) Nso ke ikọ Jesus ọkọwọrọ?

Mme ufan̄ikọ eken ke ibuot n̄wed emi ẹwụt ke Jesus eketịn̄ ikọ emi ye mme Pharisee kpa mme adaiso ido ukpono emi ẹkedide mme asua esie. Enyene se mmọ ẹkedoride enyịn ẹban̄a Messiah ye Obio Ubọn̄ esie. Mmọ ẹkekere ke Messiah edisan̄a “ke obubịt enyọn̄ edi” nte Edidem emi odotde ukpono man edinyan̄a mme Jew osio ke ubọk mbon Rome onyụn̄ ọtọn̄ọ ntak owụk obio ubọn̄ ke Israel. (Daniel 7:13, 14) Ntre, Jesus ama owụt ke mmọ inenke ke ndidọhọ mmọ nte: “Obio ubọn̄ Abasi idịghe nte ẹkụtde ke enyịn.” Ekem enye ama adian do ete: “Sese! obio ubọn̄ Abasi odu ke otu mbufo.”—Luke 17:20, 21.

Ke ini Jesus ekekpepde mme owo n̄kpọ onyụn̄ anamde mme utịben̄kpọ emi ẹkenen̄erede ẹwụt ke enye edi Edidem Obio Ubọn̄ emi ẹken̄wọn̄ọde, mme Pharisee emi mîkenyeneke eti esịt ye mbuọtidem ẹma ẹtetịm ẹbiọn̄ọ enye. Mmọ ikenịmke ke enye edi Messiah. Ntre, enye ama anam mmọ ẹdiọn̄ọ ke Obio Ubọn̄ emi imọ idide Edidem ‘odu ke otu mmọ.’ Enye ikọdọhọke mmọ ẹse esịt mmọ.a Jesus ye mme mbet esie ẹkedu do ye mmọ. Contemporary English Version esịn itien̄wed emi ntem: “Obio Ubọn̄ Abasi odu mi ye mbufo.”—Luke 17:21.

Yak Obio Ubọn̄ Edi Akpan Nkpọ Ọnọ Fi

Okposụkedi emi Obio Ubọn̄ Abasi mîdụhe ke esịt nnyịn mme anamidiọk, ana iyak enye edi akpan n̄kpọ ọnọ nnyịn. Nte Jesus ekekpepde n̄kpọ onyụn̄ anamde mme utịben̄kpọ, enye ama odomo ndinam mbon oro ẹkekpan̄de utọn̄ ẹnọ enye ẹnyene mbuọtidem ke edinen ukara emi edidade emem ye ifụre idi mi. Enye okoyom mmọ ẹnyene utọ mbuọtidem emi edinyenede ufọn inọ mmọ. Ke akpanikọ, enye ama ekpep mmọ ndibọn̄ akam ete: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:9, 10) Se enye ekekpepde ama otụk ediwak mbon oro ẹkekpan̄de utọn̄ ẹnọ enye tutu mmọ ẹnyene mbuọtidem emi akanamde mmọ ẹtiene Jesus ẹyom mme edidiọn̄ Obio Ubọn̄ Abasi.

Ndi akpama ndinyene utọ mbuọtidem emi? Nso ndien ke akpanam man enyene utọ mbuọtidem emi? Ti se Jesus eketịn̄de ke ntọn̄ọ ntọn̄ọ ọwọrọetop Ukwọrọikọ esie oro ke Obot, ete: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt, koro obio ubọn̄ heaven enyenede mmọ.” (Matthew 5:3) Mbọk nam Mme Ntiense Jehovah oro ẹkedade magazine emi ẹsọk fi ẹkpep fi Bible. Ndinam emi ayanam enyene mbuọtidem ke eti ye edinen ukara Obio Ubọn̄ emi edidade emem ye ifụre ọsọk kpukpru owo.

[Ikọ Idakisọn̄]

[Se ẹwetde ke ikpọ abisi ke page 11]

Ndi Obio Ubọn̄ Abasi okodu ke esịt mme asua Jesus emi ẹkedide mbon isọn̄esịt ye mme owotowo?