Edidianakiet Anam Ubon Ọkọri ke N̄kan̄ Eke Spirit
ANA ubon oro ẹyomde ndituak ibuot nnọ Jehovah ẹdiana kiet. Ke ini Jehovah okobotde Adam ye Eve, enye ama owụt nte edidianakiet edide akpan n̄kpọ. Eve ekenyene ndinam utom ye Adam nte ‘andinyan̄a eke ekemde’ ye enye. (Gen. 2:18) Ebe ye n̄wan ẹkpenyene ndidiana kiet nte nsan̄a, ẹnyụn̄ ẹn̄wam kiet eken. (Eccl. 4:9-12) Oyom ete, eka, ye nditọ ẹdiana kiet, man ẹkeme ndinam se Jehovah oyomde oto mmọ.
Ubon Ndidiana Kiet Ntuak Ibuot Nnọ Abasi
Barry ye Heidi ẹnyene nditọ ition. Mmọ ẹkụt ke mmimọ ndidiana kiet nnịm ukpepn̄kpọ Bible ubon an̄wam mmimọ inam n̄kọri. Barry ọdọhọ ete: “Ke ini ke ini, mmesinọ nditọ mi n̄kpri utom ndinam mben̄e ukpepn̄kpọ ubon. Ndusụk ini mmesidọhọ mmọ ẹtịn̄ ibio ibio ẹban̄a se idude ke Awake! Imesinam n̄ko iwụt nte ẹkpekwọrọde ikọ ke an̄wautom man kpukpru mmọ ẹnyene se ẹditịn̄de.” Heidi adian do ete: “Kpukpru nnyịn imesiwet mme utịtmbuba eke spirit oro iyomde ndisịm, inyụn̄ ineme iban̄a mmọ ke mme ini oro inịmde ukpepn̄kpọ ubon man ise m̀mê imanam n̄kọri.” Ebe ye n̄wan emi ẹkụt n̄ko ke ndisitre ndise ekebe ndise ke okoneyo ẹsinọ ofụri ubon ifet ndikot n̄wed.
Mme Mbono Esop
Mike ye Denise ẹnyene nditọ inan̄. Ndidiana kiet nnam utom akan̄wam ubon mmọ didie? Mike ọdọhọ ete: “Enyene mme ini oro nnyịn mîsikemeke ndidụk mbono esop ke eti ini idem ke ima ikababak inam ndutịm, edi ke ini kpukpru owo ẹdianade kiet, nnyịn imesikeme ndika mbono esop ke ini.” Denise ọdọhọ ete: “Ke ini nditọ nnyịn ẹkesụk ẹdide n̄kpri, ima isinọ mmọ utom oro mmọ ẹdinamde ke ufọk. Kim adiaha nnyịn ama esin̄wam ke utem udia onyụn̄ etịm okpokoro udia.” Michael eyen mmọ ọdọhọ ete: “Sia ẹkesinịmde mbono esop ke ufọk nnyịn mbubreyo Tuesday, ima isibabak inam ubet asana, inyụn̄ ibon n̄kpọitie ke nde.” Matthew Eyen mmọ en̄wen adian do ete: “Papa ama esibak ọnyọn̄ utom ke mme usen mbono esop man anam nnyịn itịm idem inọ mbono emi.” Nso ikedi utịp?
Ofụri Ukeme Oro Enyene Ufọn
Mike ọdọhọ ete: “Ami ye Denise ima itọn̄ọ utom usiakusụn̄ ke 1987. Nditọ nnyịn ita ke ẹkesụk ẹdụn̄ ye nnyịn ini oro. Iba ke otu mmọ ẹma ẹtọn̄ọ utom usiakusụn̄ n̄ko, ndien mbon eken ẹma ẹtiene ẹbuana ke utom edibọp Bethel. N̄kpọ en̄wen oro anamde ubon nnyịn okop idatesịt edi ndin̄wam owo 40 ẹyak idem mmọ ẹnọ Jehovah ẹnyụn̄ ẹna baptism. Nnyịn n̄ko ima inyene ifet ndinam utom nte ubon ke mme itie ubọp n̄kpọ Obio Ubọn̄, idem ke mme idụt en̄wen.”
Ke akpanikọ, ndidiana kiet nnam utom nte ubon enyene ufọn. Nte odu usụn̄ en̄wen oro afo ekemede ndidiana kiet nnam n̄kpọ ye mbonubon mbufo? Ndidiana kiet nnam n̄kpọ ayan̄wam ubon fo ẹka iso ẹtuak ibuot ẹnọ Jehovah.
[Ndise ke page 28]
Ndisinam n̄wụt nte ẹkpekwọrọde ikọ an̄wam ubon ẹnam n̄kọri ke an̄wautom