Nte Afo ke Ekpebe Jehovah ke Ndikere Mban̄a Mbon En̄wen?

‘ẸTOP kpukpru editịmede esịt mbufo ẹdori Abasi ke idem, koro enye ekere aban̄a mbufo.’ (1 Peter 5:7) Nso inem inem nsịnudọn̄ ke emi edi ntem! Jehovah Abasi enen̄ede ekere aban̄a ikọt esie. Nnyịn imekeme ndinyene ifụre ke idak ukpeme esie.

Nnyịn ikpenyene ndikpebe utọ edu oro inyụn̄ inen̄ede ikere iban̄a mme owo. Sia nnyịn idide mme anana-mfọnmma owo, oyom ifiọk ndusụk n̄kpọ oro anade ifep ke ini ikerede iban̄a mbon en̄wen. Mbemiso inemede ndusụk n̄kpọ emi, ẹyak ineme ndusụk usụn̄ oro Jehovah esede aban̄a ikọt esie.

David andiwet psalm akada uwụtn̄kpọ ekpemerọn̄ etịn̄ aban̄a nte Abasi esede aban̄a nnyịn ete: “Jehovah edi andibọk mi, ndinanake n̄kpọ. Enye ayanam mi nsụhọde nna ke awawa mbiet: ayada mi aka ke mmọn̄ nduọk-odudu. Enye eyedemede ukpọn̄ mi: . . . Ndien n̄ko ke ini ndisan̄ade ke itịghede mfụt n̄kpa, ndifeheke idiọk: koro afo odude ye ami.”—Psalm 23:1-4.

Sia David ke idem esiemmọ ekedide ekpemerọn̄, enye ama ọfiọk se ndise mban̄a erọn̄ ọwọrọde. Ekpemerọn̄ ekpeme erọn̄ esie ọbiọn̄ọ utọ ndiọi unam nte ekpe, ebua ikọt, ye bear. Enye iyakke erọn̄ ẹsuana, oyom enye oro osopde, akama enye oro idem ememde ke ikpanesịt esie, onyụn̄ ese aban̄a enye oro ọdọn̄ọde onyụn̄ adade unan. Enye ọnọ erọn̄ mmọn̄ kpukpru usen. Emi iwọrọke ke ekpemerọn̄ ekpeme kpukpru ebiet emi erọn̄ akade. Erọn̄ ẹnyene ifụre okposụkedi ẹkpemede-kpeme mmọ.

Nte Jehovah esede aban̄a ikọt esie edi oro. Apostle Peter ọkọdọhọ ete: ‘Ẹda odudu Abasi ẹkpeme mbufo.’ Ikọ oro ‘ẹkpeme mbufo’ ke ata ata usụn̄ ọwọrọ “ẹtie ẹse.” (1 Peter 1:5) Ke ntak emi Jehovah enen̄erede ekere aban̄a nnyịn, enye ese aban̄a nnyịn kpukpru ini, onyụn̄ enen̄ede eben̄e idem ndin̄wam nnyịn ini ekededi oro iyomde un̄wam. Nte ededi, Jehovah ọnọ nnyịn ifụre ndimek se imade, ke ntre enye isisịbeke idụk kpukpru edinam ye ubiere nnyịn. Didie ke nnyịn ikeme ndikpebe Jehovah ke afan̄ emi?

Kpebe Abasi ke Ndikere Mban̄a Nditọ Fo

“Nditọ ẹdi udeme Jehovah.” Mmọdo, mme ete ye eka ẹkpenyene ndikpeme nnyụn̄ nse mban̄a nditọ mmọ. (Psalm 127:3) Oro ekeme ndisịne ndisịn udọn̄ nnọ nditọ ẹtịn̄ ekikere mmọ ye nte etiede mmọ ke idem ndien ekem ẹkere ẹban̄a oro ke ini ẹnamde n̄kpọ ye nditọ mmọ. Edieke ete ye eka ẹdomode ndibiere kpukpru n̄kpọ oro nditọ mmọ ẹnamde, inyụn̄ ikereke iban̄a ekikere nditọ mmọ, ekpetie nte ekpemerọn̄ ndiyịri erọn̄ urụk ke itọn̄ nda ndụri n̄ka ebiet ekededi oro enye oyomde erọn̄ aka. Idụhe ekpemerọn̄ emi ekpesede aban̄a erọn̄ esie ntre; Jehovah inyụn̄ isehe iban̄a nnyịn ntre.

Marikoa ọdọhọ ete: “Ke ata ediwak isua n̄kesidọhọ nditọ mi nte, ‘Ẹkûnam emi,’ ‘Ẹnam oko.’ N̄kekere ke emi edi utom mi sia ndide eka. N̄kesitoroke mmọ m̀mê ndineme ata nneme ye mmọ.” Okposụkedi eyen Mariko ekesinen̄erede eneme nneme ebịghi ye mme ufan esie ke urụk ukopikọ, enye ikesinemeke nneme ibịghi ye eka esie. Mariko aka iso ete: “Ekem mma ndikụt se ikedide ntak. Ke ini eyen mi enemede nneme ye mme ufan esie, enye ama esitịn̄ ikọ oro owụtde ke enye okụt n̄kpọ oro nte mme ufan esie ẹkụtde; utọ ikọ nte ‘Ih, ntre ke edi,’ m̀mê ‘Ye ami nde.’ Mma ntọn̄ọ nditiene ntịn̄ utọ ikọ oro man eyen mi etịn̄ nte etiede enye ke idem, ndien ikebịghike nnyịn ima isineme nneme inem inem inyụn̄ ineme ibịghi.” Emi owụt ufọn edineme inem inem nneme, emi esidide n̄kpọ owo iba, idịghe owo kiet kpọt.

Oyom mme ete ye eka ẹsịn udọn̄ ẹnọ nditọ mmọ ẹtịn̄ nte etiede mmọ ke idem ye se mmọ ẹmade, onyụn̄ oyom nditọ ẹfiọk ke ete ye eka ndise mban̄a mmimọ edi ukpeme. Bible eteme nditọ ete ẹkop uyo mme ete ye eka mmọ; ekem etịn̄ ntak ete: “Man ọkpọfọn ye afo, afo okponyụn̄ odu uwem ebịghi ke isọn̄.” (Ephesus 6:1, 3) Esimem utom ọnọ nditọ emi ẹnen̄erede ẹfiọk ufọn nsụkibuot ndikop uyo.

Ke Ndise Mban̄a Otuerọn̄ Jehovah

Esop Abasi owụt edima usụn̄ oro Jehovah ekerede aban̄a nnyịn. Sia Jesus Christ edide Ibuot esop, enye eteme mbiowo ete ẹse ẹban̄a otuerọn̄. (John 21:15-17) Ikọ Greek oro ẹkabarede esenyịn enyene ebuana ye ikọedinam oro ọwọrọde “editịn̄ enyịn n̄kpeme.” Peter ọsọn̄ọ etịn̄ nte ẹkpenamde emi ke ini etemede mbiowo ete: “Ẹkpeme otuerọn̄ Abasi emi odude ke idak ukpeme mbufo, idịghe ke edinyenyịk, edi ke unyịmesịt; inyụn̄ idịghe ke edima idiọk udori, edi ye ọkpọsọn̄ udọn̄; idịghe ndibre odudu ye mmọ emi ẹdide udeme Abasi, edi ndikabade ndi uwụtn̄kpọ nnọ otuerọn̄.”—1 Peter 5:2, 3.

Ih, utom mbiowo ebiet eke mme ekpemerọn̄. Mbiowo Christian ẹnyene ndise mban̄a mbon oro ẹdọn̄ọde ke n̄kan̄ eke spirit ẹnyụn̄ ẹnen̄ede mmọ man uwem mmọ ekpekem ye ndinen edumbet. Mbiowo ẹnyene utom edidiomi mme edinam eke spirit ke esop, oro edi, ẹnam ndutịm ẹnọ mme mbono esop ẹnyụn̄ ẹnam n̄kpọ ẹsan̄a ke nde ke nde ke esop.—1 Corinth 14:33.

Nte ededi, ikọ Peter oro ikokotde, asian nnyịn n̄kpọndịk kiet—oro edi, mbiowo “ndibre odudu” ke esop. N̄kpọ kiet emi owụtde ke ebiowo ebre odudu edi enye ndibọp mbet nte mîdotke. Ke ntak emi ebiowo enen̄erede ekere ke obiomo imọ ndikpeme otuerọn̄, enye ekeme ndinam n̄kpọ mbe ubọk. Ke esop kiet ke Asia, mbiowo ẹma ẹbọp mbet ẹban̄a nte ẹkpesikọmde owo ke Ufọkmbono Obio Ubọn̄—utọ nte m̀mê anie ekpebem iso ọkọm owo—sia ẹkekere ke ndinịm utọ mbet emi ayanam emem odu ke esop. Okposụkedi mmọ ẹkenamde emi ye eti ekikere, ndi mbiowo oro ẹma ẹkpebe Jehovah nte enye esede aban̄a ikọt esie? Edi akpan n̄kpọ ndikụt ke ikọ apostle Paul emi owụt nte enye ekekerede n̄kpọ: “Idịghe nte ke nnyịn idi mme andikara mbuọtidem mbufo, edi nnyịn idi nsan̄autom ndinam mbufo ẹnyene idatesịt, koro mbuọtidem mbufo anam mbufo ẹsọn̄ọ ẹda.” (2 Corinth 1:24) Jehovah enyene mbuọtidem ke ikọt esie.

Mbiowo oro ẹnen̄erede ẹkere ẹban̄a owo isibọpke mbet oro mîkemke ye N̄wed Abasi, mmọ isinyụn̄ iyarakede ikọ idịbi owo en̄wen. Mmọ ẹsiti ntọt Abasi emi: “Kûyarade ikọ idịbi owo efen.”—Mme N̄ke 25:9.

Apostle Paul ekemen esop mme Christian oro ẹyetde aran odomo ye idem owo, ete: “Abasi akatan̄ ikpọkidem adian kiet . . . mbak ubahade edidu ke ikpọkidem, edi man mme ndido esie ẹkpekere ẹban̄a kiet eken ukem ukem.” (1 Corinth 12:12, 24-26) Ikọ Greek oro ẹkabarede “ẹkpekere ẹban̄a kiet eken ukem ukem” ọwọrọ ke ata ata usụn̄ ‘ẹkpekere m̀mê nso itịbe inọ kiet eken.’ Mbon esop Christian ẹkpenyene ndinen̄ede n̄kere mban̄a kiet eken.—Philippi 2:4.

Didie ke ata mme Christian ẹkeme ndiwụt ke ‘imekere m̀mê nso itịbe inọ kiet eken’? Mmọ ẹkeme ndiwụt ke imekere iban̄a mbon eken ke esop ke akam mmọ ẹnyụn̄ ẹn̄wam mbon oro ẹdude ke unana. Emi an̄wam mbon en̄wen ẹnam ofụri ukeme mmọ. Kere ban̄a nte utọ ima ima edikere mban̄a oro akan̄wamde Tadataka. Enye akana baptism ke ini emi enye ekedide isua 17, ndien enye ikpọn̄ akanam n̄kpọ Jehovah ke ufọk mmọ ini oro. Enye ọdọhọ ete: “Ubon kiet ke esop ẹma ẹsiwak ndikot mi ufọk ye mboho otuowo. Mma nsiwaha ufọk mmọ ke ekperede ndidi kpukpru usenubọk ke usụn̄ uka n̄wed man ntiene mmọ nneme itie Bible usen oro. Mma nsibọ item aban̄ade nte n̄kpọyọde mfịna ke ufọkn̄wed, isinyụn̄ ibọn̄ akam iban̄a mme mfịna oro ọtọkiet. Mma n̄kpep ntatubọk nto ubon emi.” Tadataka ke ada se enye ekekpepde esịn ke edinam ke emi enye anamde utom ke n̄kọk itieutom Mme Ntiense Jehovah.

Apostle Paul ama odụri owo utọn̄ aban̄a n̄kpọ en̄wen oro ikpefepde ke ini iwụtde ke imekere iban̄a mbon en̄wen. Enye ama etịn̄ aban̄a ndusụk iban emi ẹkekabarede “mme etịn̄ ikọ-edem ye mme esịn idem ke mbubehe mbon en̄wen, ẹtịn̄ mme n̄kpọ oro mmọ mîkpetịn̄ke.” (1 Timothy 5:13) Ke adan̄aemi odotde ikere iban̄a mbon en̄wen, ana ikpeme mbak emi edinam inọhọ ke ọkpọkpọ mbubehe mmọ. N̄kpọ emi owụtde ke imọnọhọ ke mbubehe mbon en̄wen edi ‘nditịn̄ mme n̄kpọ oro nnyịn mîkpetịn̄ke,’ utọ nte edikụt ndudue nnọ mmọ.

Ikpenyene nditi ke mme Christian ẹkeme ndinam mbubehe idemmọ ke nsio nsio usụn̄, ẹmek se mmọ ẹmade ndidia, ẹmek orụk eti unọ idem inemesịt oro mmọ ẹmade. Owo enyene ifụre ndimek se enye amade ndinam nte ekemde ye mme edumbet Bible. Paul eketeme mme Christian ke Rome ete: “Ẹyak nnyịn ikûkpe aba ikpe inọ kiet eken. . . . Ẹyak nnyịn ibịne mme n̄kpọ eke ẹnamde emem odu ye mme n̄kpọ oro ẹbọpde-bọp kiet eken ẹnam ọkọri.” (Rome 14:13, 19) Ikpenyene ndiwụt ke imenen̄ede ikere iban̄a mbon en̄wen ke esop ke ndin̄wam mmọ, idịghe ndinọhọ ke mme ọkpọkpọ mbubehe mmọ. Ke ini ikerede iban̄a kiet eken ntem, ima ye edidianakiet ẹyenen̄ede ẹdu ke ubon nnyịn ye ke esop.

[Ikọ idakisọn̄]

[Ndise ke page 19]

Da itoro ye edikere mban̄a nam nditọ fo ẹtịn̄ ekikere mmọ ye nte etiede mmọ ke idem