“Un̄wam Mi Oto Jehovah”

Jehovah Ọdiọn̄ Mbon N̄waidem

EREN kiet esiwat enan̄ukwak ebe ke esịt akai Cameroon. Enye esiwat ediwak hour ebe usụn̄ oro mmọn̄ ofụkde onyụn̄ etiede okpụkokpụk, osobo ediwak n̄kpọndịk man ọkọsọn̄ọ mbon en̄wen idem. Ndusụk owo ke Zimbabwe ẹsisan̄a kilomita 15 ẹnyụn̄ ẹwọk ẹbe akpa, ẹbiomde ọfọn̄ ye ikpaukot mmọ ke ibuot ke ntak mmọn̄, man ẹkekpep otu oro odude nsannsan n̄kpọ. Ke ebiet en̄wen, n̄wan kiet esidemede ke n̄kanika inan̄ usenubọk man aka ekekpep n̄kpọ ye nurse kiet emi esinyenede hour kiet kpọt ndikpep n̄kpọ ke usenubọk.

Mmanie ẹsịn utọ ukeme emi? Kpukpru mmọ ẹdi mme asan̄autom uyọhọ ini eke Mme Ntiense Jehovah oro ẹnamde utom edikpep mme owo akpanikọ Bible. Mmọ ẹsịne mme asiakusụn̄ ofụri ini, mme akpan asiakusụn̄, mme isụn̄utom, mme esenyịn oro ẹsan̄ade-san̄a, ye ediwak tọsịn mbon oro ẹnamde utom unyịmesịt ke mme ufọkidụn̄ Bethel ke ofụri ererimbot. Kpukpru mmọ ẹnyene edu n̄waidem.a

Akpan Ntak Oro Mmọ Ẹnamde Emi

Mme Ntiense Jehovah ke ẹnam item oro apostle Paul ọkọnọde Timothy ete: “Sịn ofụri ukeme fo ndiwụt Abasi idemfo ete idi owo emi ẹnyịmede, anamutom emi mînyeneke n̄kpọ eke anamde enye okop bụt, etịmde asiak ikọ akpanikọ.” (2 Timothy 2:15) Nso inam ediwak tọsịn Mme Ntiense ẹnam utom uyọhọ ini?

Ke ini ẹsibụpde mme asan̄autom uyọhọ ini ntak emi mmọ ẹsịnde ifịk ẹnam utom Jehovah, mmọ ẹsidọhọ ke ima oro mmimọ imade Abasi ye ekemmọ owo edi ntak. (Matthew 22:37-39) Emi enen̄ede odot, koro edieke mîdịghe ima edi ntak oro nnyịn inamde n̄kpọ Abasi, do ukeme ekededi oro nnyịn isịnde ediwọrọ ikpîkpu.—1 Corinth 13:1-3.

Utom N̄waidem

Kpukpru mme Christian oro ẹma ẹkeyak idem ẹnọ ẹnyịme ikot Jesus emi: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie onyụn̄ aka iso etiene mi.” (Matthew 16:24) Ndikan̄ idem nnyịn ọwọrọ ndisụhọde idem nyak Jehovah Abasi ye Jesus Christ ẹdi mme andinyene nnyịn ye mme andida nnyịn usụn̄. Emi anam ediwak owo ẹwa idem ẹnam utom ukwọrọikọ uyọhọ ini.

Ediwak Mme Ntiense ẹnen̄ede ẹsịn ukeme nditat utom oro mmọ ẹnamde ẹnọ Jehovah. Kere ban̄a Júlia, asiakusụn̄ emi edide isua 56, ke São Paulo ke Brazil. Enye ọdọhọ ete: “Eyenete kiet otode China ama okot mi ke urụk ukopikọ onyụn̄ obụp m̀mê n̄kpama ndikpep usem Chinese. Ke ntak isua emana mi, n̄kaduakke ndikpep obufa usem. Edi ke usen ifan̄ ẹbede, mma nnyịme ndinam ọkpọsọn̄ utom emi. Mfịn, mmekeme ndikwọrọ ikọ Abasi ke usem Chinese.”

N̄kọk itieutom Mme Ntiense Jehovah ke Peru ọtọt ete: “Ke mme isua ndondo emi, ediwak mme asiakusụn̄ ofụri ini ẹmewọrọ ẹka mme efakutom oro owo mîbahakede inọ owo, ẹnyene uko ye edu n̄waidem. Mmọ ẹmewọrọ ẹka mme nsannsan obio oro mme n̄kpọ oro ẹnamde uwem enem mîdụhe, emi onyụn̄ ọsọn̄de ndinyene utom. Nditọete emi ẹnyịme ndinam n̄waidem ekededi man ẹsọn̄ọ ẹdu ke utom uyọhọ ini. Edi ke edide akpan n̄kpọ akan, utom ukwọrọikọ oro mmọ ẹnamde enen̄ede on̄wụm mfri ke ediwak ebiet. Mme esenyịn oro ẹsan̄ade-san̄a ẹtọt ẹte ke mme asiakusụn̄ ofụri ini oro ẹnamde n̄waidem mi ẹn̄wam ẹsiak mbufa otu.”

Ndusụk Christian ẹmesịn uwem mmọ ke itiendịk man ẹn̄wam ekemmọ mme andinịm ke akpanikọ. (Rome 16:3, 4) Esenyịn circuit kiet oro anamde utom ke idụt kiet ke Africa oro ẹn̄wanade ekọn̄, ọtọt ete: “Mbemiso ikesịmde akpatre itie ukpeme ke ufọt ikpehe oro mbon nsọn̄ibuot oro ẹn̄wanade ye ukara ẹdude ye enye oro mbonekọn̄ ukara ẹdude, mbonekọn̄ inan̄ emi ẹdide mme etubom mbon nsọn̄ibuot oro ọkọrọ ye mbon oro ẹkpemede mmọ, ẹma ẹkan mi ye n̄wan mi ẹkụk ẹnyụn̄ ẹbụp m̀mê nnyịn idi mmanie. Ke ini mmọ ẹkesede kad idiọn̄ọ nnyịn ẹnyụn̄ ẹkụtde ke ito ikpehe oro mbonekọn̄ ukara ẹkpemede, mmọ ẹma ẹnyene eyịghe ẹban̄a nnyịn. Ẹkedọhọ ke ami ndi owo uyep. Ke ntre, mmọ ẹma ẹbiere nditop mi nsịn ke obube. Mma nsian mmọ owo emi nnyịn idide, ndien mmọ ẹma ẹsana nnyịn ẹyak.” Mme esop ẹkekop inemesịt didie ntem ke ini ebe ye n̄wan oro ẹnamde n̄waidem mi ẹkekade ẹkese mmọ!

Kpa ye mme mfịna oro mmọ ẹsobode, ibat mbon oro ẹnamde utom uyọhọ ini aka iso ndikọkọri ke ofụri ererimbot. (Isaiah 6:8) Mme anam utom uyọhọ ini oro ẹnyenede ifịk mi ẹma san̄asan̄a ifet oro mmọ ẹnyenede ndinam n̄kpọ Jehovah. Ediwak miliọn mbon en̄wen oro ẹnyenede edu n̄waidem nte mmọ ke ẹtoro Jehovah idahaemi. Jehovah enen̄ede ọdiọn̄ mmọ ke ntak emi. (Mme N̄ke 10:22) Sia mme ọkwọrọikọ oro ẹnamde utom ọkpọsọn̄ mi ẹnịmde ke Jehovah ayaka iso ọdiọn̄ onyụn̄ ebere ye mmimọ, mmọ ẹnyene ukem edu andiwet psalm emi ọkọkwọde ete: “Un̄wam mi oto Jehovah.”—Psalm 121:2, NW.

[Ikọ idakisọn̄]

[Se Ẹwetde ke Ikpọ Abisi ke page 9]

‘Ikọt fo ẹyenọ idemmọ ke imaesịt ke usen odudu fo.’ —PSALM 110:3

[Ekebe ke page 8]

JEHOVAH AMA MME ASAN̄AUTOM ESIE ORO ẸNYENEDE IFỊK

“Ẹsọn̄ọ ẹda, ẹkûyak n̄kpọ esịghede mbufo, ẹnyene ekese ndinam ke utom Ọbọn̄ kpukpru ini, sia ẹfiọkde ẹte utom mbufo idịghe ikpîkpu ke ebuana ye Ọbọn̄.” —1 Corinth 15:58.

“Abasi ikwan̄ake nte efrede utom ye ima eke mbufo ẹwụtde ẹban̄a enyịn̄ esie.”—Mme Hebrew 6:10.