Enen̄ede Edi Akpan N̄kpọ Ndifiọk Se Idiọn̄ọ Ọwọrọde!
“Ke akpa n̄kekere ke ibuot ọkọn̄ Andreas eyen nnyịn. Edi enye ikekemeke aba ndidia udia, onyụn̄ enyene ọkpọsọn̄ ufiopidem. Ibuot ama etetịm ọkọn̄ enye, ntre esịt ama etịmede mi. Ke ini ebe mi ọkọnyọn̄de edi, nnyịn ima imen Andreas ika ufọk abiausọbọ. Abiausọbọ oro ama ese Andreas idem onyụn̄ ọdọhọ isọsọp imen enye ika ufọkibọk. Udọn̄ọ oro ikedịghe ikpîkpu n̄kọn̄ibuot. Andreas ọkọdọn̄ọ idiọk udọn̄ọ ẹkotde meningitis. Ẹma ẹnọ enye usọbọ ndien ikebịghike idem ama ọsọn̄ enye.”—Gertrud, eka kiet otode Germany.
EKEME ndidi ediwak mme ete ye eka ẹmehe ye se iketịbede inọ Gertrud. Mmọ ẹsikụt mme idiọn̄ọ oro ẹwụtde ke ekeme ndidi idem isọn̄ke eyen mmimọ. Okposụkedi mîdịghe kpukpru udọn̄ọ ẹkeme ndiwot owo, mme ete ye eka ikemeke ndifụmi mme idiọn̄ọ oro ẹwụtde ke idem isọn̄ke nditọ mmimọ. Ndifiọk mme idiọn̄ọ nnyụn̄ nnam nnennen n̄kpọ mban̄a mmọ ekeme ndinen̄ede nnyene ufọn. Emi edi n̄kpọ n̄kpa ye uwem.
Ndifiọk se idiọn̄ọ ọwọrọde edi akpan n̄kpọ n̄ko ke mme n̄kpọ efen ke ẹsiode n̄kpọ aban̄ade nsọn̄idem ẹfep. Uwụtn̄kpọ kiet edi akwa unyekisọn̄ oro eketịbede ke December 2004 emi akanamde akpa adaha ke ofụri ikpehe Inyan̄ibom India. Mme ufọkutom ukara ke mme idụt nte Australia ye Hawaii ẹma ẹkụt idiọn̄ọ owụtde ke akwa unyekisọn̄ ọmọn̄ etịbe ke edere edere Sumatra ẹnyụn̄ ẹfiọk afanikọn̄ oro emi ekemede ndida ndi. Edi, usụn̄ ndomokiet ikodụhe ndinọ mbon oro ẹkedụn̄ọde ke mbọhọ afanikọn̄ oro ntọt ekededi, usụn̄ ikonyụn̄ idụhe mmọ ndinam n̄kpọ mban̄a ntọt oro. Emi ama anam se iwakde ibe owo 220,000 ẹtaba uwem mmọ.
Idiọn̄ọ Oro Akam Edide Akpan N̄kpọ Akan
Ke ini Jesus Christ okodude ke isọn̄, enye ama ekpep mbon oro ẹkekpan̄de utọn̄ ẹnọ enye ndifiọk mme idiọn̄ọ nnyụn̄ nnam n̄kpọ mban̄a mmọ. Enye ama etịn̄ aban̄a idiọn̄ọ oro edide akpan n̄kpọ akan. Bible obụk ete: “Mme Pharisee ye mme Sadducee ẹka ẹbịne enye, ndidomo enye idomo, ẹnyụn̄ ẹdọhọ enye ẹte owụt mmimọ idiọn̄ọ otode enyọn̄. Enye ọbọrọ mmọ ete: ‘Ke ini mbubịteyo mbufo ẹmemehe ndidọhọ ẹte, “Enyọn̄ ọyọfọn, koro enyọn̄ eyịbe”; ndien ke usenubọk, mbufo ẹte, “Mfịn eyetuebe onyụn̄ edep edịm, koro enyọn̄ eyịbe, onyụn̄ okpụk.” Mbufo ẹmefiọk nditịn̄ nte ikpaenyọn̄ etiede, edi mbufo ikemeke ndifiọk mme idiọn̄ọ ini.’”—Matthew 16:1-3.
Ke nditịn̄ mban̄a “mme idiọn̄ọ ini,” Jesus okowụt ke mme Jew akpa isua ikie oro ẹkekpan̄de utọn̄ ẹnọ imọ ẹkpekenyene ndidiọn̄ọ ke editịm n̄kpọ mmimọ ọmọn̄ ọsọp esịm utịt. Ẹkenyene ndisobo editịm n̄kpọ mme Jew ke mîbịghike, ndien nsobo oro ekenyene nditụk kpukpru mmọ. Usen ifan̄ mbemiso Jesus akakpade, enye ama asian mme mbet esie idiọn̄ọ efen—idiọn̄ọ edidu esie. Se enye eketịn̄de mbemiso enye akpade enen̄ede edi akpan n̄kpọ ọnọ kpukpru owo mfịn.