Nte Ẹkpenyenede Ekikere Oro Adade Ukem Ukem Ẹban̄a Utom
KE ERERIMBOT unyamurua emi ọyọhọde ye ọkpọsọn̄ mfịghe, ibak ibak umia mbuba, ye akpakịp n̄kpọ oro ẹsion̄ode ẹdi mi, isidọn̄ke ediwak owo ndika utom kpukpru usen. Kpa ye oro, nnyịn ikpenyene ndikop idatesịt ke utom nnyịn. Ntak-a? Koro ẹkebot nnyịn ke mbiet Abasi—ndien Abasi esidat esịt ke utom esie. Ke uwụtn̄kpọ, ke ini enye akafiakde ese se enye akanamde ke utịt “usen” (m̀mê ke anyan ini) edibotn̄kpọ itiokiet, Genesis 1:31 ọdọhọ ete: “Abasi okụt kpukpru se enye akanamde, ndien, sese ẹfọn eti eti.”
Anaedi ntak kiet oro ẹkotde Jehovah “Abasi inemesịt” edi koro enye amade utom. (1 Timothy 1:11, NW) Do, ndi iwụtke ifiọk nte ke adan̄a nte nnyịn ikpebede enye, ntre ke nnyịn itetịm ikop inemesịt? Ke afan̄ emi, Edidem Solomon eke Israel eset, emi ekedide n̄wọrọnda andibọp ye anam ndutịm, ekewet ete: ‘Kpukpru owo ẹdia n̄kpọ ẹnyụn̄ ẹn̄wọn̄, ẹnyụn̄ ẹkụt eti n̄kpọ ke kpukpru ọkpọsọn̄ utom mmọ, emi onyụn̄ edi enọ Abasi.’—Ecclesiastes 3:13.
Ekeme ndidi ọkpọsọn̄ n̄kpọ ndinyene eti ekikere oro adade ukem ukem mban̄a utom ke eyo nnyịn emi utom esikpụhọrede ke ediyịp enyịn. Edi Jehovah esidiọn̄ mbon oro ẹtienede ima ima ndausụn̄ esie. (Psalm 119:99, 100) Ẹsinen̄ede ẹma utọ mbonutom oro ẹnyụn̄ ẹberi edem ke mmọ, owo isinyụn̄ isọpke ndision̄o mmọ ke utom. Idịghe ufọn eke obụkidem kpọt ke mmọ ẹsikere ẹban̄a ke uwem ye ke utom mmọ, edi mmọ ẹsikere n̄ko ẹban̄a nte enye editụkde idaha eke spirit mmimọ. Emi esin̄wam mmọ ndinam nti ubiere ke uwem nnyụn̄ n̄kụt nte ke inemesịt ye ifụre mmimọ ikọn̄ọke ke utom mmimọ m̀mê ke utom oro mîsiwakke ndinyene iwụk. (Matthew 6:31-33; 1 Corinth 2:14, 15) Emi esin̄wam mmọ ndinyene ata eti edu unamutom oro adade ukem ukem.
Nyene Edu Unamutom Oro Abasi Amade
Ndusụk owo ẹdụk ufụn ẹnọ utom, ẹyakde utom mmọ edi ebeiso n̄kpọ. Mbon eken ẹsitetie ẹbet utom asuana man ẹnyọn̄ ufọk. Ekikere ewe ada ukem ukem? Bible ọbọrọ ete: “Ifụre eke ọyọhọde ubọk kiet ọfọn akan ọkpọsọn̄ utom ye ikpîkpu idomo eke ẹyọhọde ubọk mbiba.” (Ecclesiastes 4:6) Ke nditịm ntịn̄, ndinam utom ọkpọsọn̄ n̄kaha m̀mê ndinam utom mbịghi n̄kaha inyeneke ufọn—edi “ikpîkpu idomo” eke mîwọrọke usụn̄. Ntak edide ntre? Koro nnyịn imekeme ndibiat ata n̄kpọ oro akakan inemesịt nnyịn ọkọn̄ọde: itie ebuana nnyịn ye mbonubon ye mme ufan nnyịn, idaha eke spirit nnyịn, nsọn̄ọidem nnyịn, ye idem isua uwem nnyịn. (1 Timothy 6:9, 10) Ekikere oro adade ukem ukem edi ndiyụhọ ye ekpri se owo enyenede nnyụn̄ nnyene ndusụk udomo emem, utu ke mfịghe ọkpọsọn̄ utom oro akamade utọk ye unana inemesịt.
Ke ndisịn udọn̄ nnọ utọ ekikere oro adade ukem ukem do, Bible idọhọke itie ifu. (Mme N̄ke 20:4) Editie ifu isiyakke ẹnyene ukpono idemowo isinyụn̄ iyakke mbon en̄wen ẹkpono nnyịn. Ke ọdiọkde akan oro, enye esibiat itie ebuana nnyịn ye Abasi. Bible etịn̄ in̄wan̄-in̄wan̄ ete ke owo oro mînyịmeke ndinam utom idotke ndidia udia oro mbon en̄wen ẹkpade utom ke esịt. (2 Thessalonica 3:10) Utu ke oro, enye ekpenyene ndikpụhọde usụn̄ uwem esie nnyụn̄ nnam ọkpọsọn̄ utom, ke ntem adade ukpono ukpono usụn̄ ọnọ idemesie ye mbon oro ẹberide edem ke enye se ẹyomde. Ke anamde ọkpọsọn̄ utom enye akam ekeme ndin̄wam ata mbon unana—kpa edinam oro Ikọ Abasi otorode.—Mme N̄ke 21:25, 26; Ephesus 4:28.
Ẹkpep Mmọ Ndima Utom Toto ke Uyen
Owo isinyeneke eti edu unam utom ke mbuari; ẹsikpep toto ke uyen. Ntem, Bible eteme mme ete ye eka ete: “Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.” (Mme N̄ke 22:6) Ke adianade ye mmọ ndinịm nti uwụtn̄kpọ nte mme anamutom, mme ete ye eka oro ẹnyenede ọniọn̄ ẹsitọn̄ọ ndinọ n̄kpri nditọ mmọ ukpep ebe ke ndinọ mmọ utomufọk oro ekemde ye idaha isua emana mmọ. Okposụkedi nditọwọn̄ ẹkemede ndisua ndusụk utom, mmọ ẹyedi ẹdikụt nte ke mmimọ idi mbonubon oro ẹnyenede ufọn—akpan akpan ke ini ete ye eka ẹtorode mmọ ke utom oro mmọ ẹnamde ọfọn. Ke mfụhọ, ndusụk ete ye eka ẹsinam ke ekperede ndidi kpukpru n̄kpọ ẹnọ nditọ mmọ, eyedi ẹkerede ke edi edifọn ido ye mmọ. Utọ ete ye eka oro ẹkpenyene ndikere mban̄a ikọ Mme N̄ke 29:21 (NW) emi ọdọhọde ete: “Edieke owo akamade eyenufọk [m̀mê eyen] esie dekdek toto ke uyen, ke ukperedem isua uwem esie enye ayakam akabade edi anana esịtekọm.”
Nti ete ye eka n̄ko ẹsinen̄ede ẹnyene udọn̄ ke ubọ ukpep nditọ mmọ, ẹsịnde udọn̄ ẹnọ mmọ ndikpep n̄kpọ nnyụn̄ nnam utom ọkpọsọn̄ ke adan̄aemi mmọ ẹdude ke ufọkn̄wed. Emi ekeme ndinyene ufọn nnọ n̄kpri owo emi ke ini iso, ke ini mmọ ẹdinamde utom.
Wụt Ọniọn̄ ke Utom Oro Emekde
Okposụkedi Bible mîtịn̄ke utọ utom oro nnyịn ikpanamde, enye ọnọ nnyịn nti ndausụn̄ oro ikpetienede mbak n̄kpọ edibiat n̄kọri eke spirit nnyịn, utom oro inamde inọ Abasi, ye mme akpan mbiomo nnyịn eken. Ke uwụtn̄kpọ, apostle Paul ekewet ete: “Ẹsịbe ini omụhọ; ntre ọtọn̄ọde ke ini emi, yak mmọ emi . . . ẹdade ererimbot ẹnam n̄kpọ ẹnyụn̄ ẹdu uwem nte mmọ emi mînọhọke ke esịt. Koro ido ererimbot emi ke ebebe efep.” (1 Corinth 7:29-32a) Idụhe n̄kpọ ndomokiet oro ebịghide ke nsinsi m̀mê enen̄ede enyene iwụk ke editịm n̄kpọ oro odude ke emi. Ndisịn ofụri ukeme ye ini nnyịn ke enye etie nte nditan̄ kpukpru inyene nnyịn ndọn̄ ke ufọk oro ẹbọpde ke itie oro ukwọ esitọde emen. Nso ọkọ atahade ke emi ekpedi ntem!
Edikabade Bible efen akabade ikọ oro “mînọhọke ke esịt” nte “mîsịnke idem ke esịt ofụri ofụri.” (The Jerusalem Bible) Mbon oro ẹnyenede ọniọn̄ isifreke ite ke “ẹsịbe” ini editịm n̄kpọ emi omụhọ, ntre ‘ndisịn idem ke esịt ofụri ofụri’ edisụn̄ọ ke edikpu ye editua n̄kpọfiọk.—1 John 2:15-17.
‘Abasi Idikpọn̄ke Fi’
Jehovah akam ọfiọk se nnyịn iyomde akan nte nnyịn ifiọkde. Enye ọfiọk n̄ko ini oro osụhọde ke edisu uduak esie. Oro edi ntak enye etide nnyịn ete: “Ẹkûkọmọ ke ima inyene; ẹnem-esịt ye se mbufo ẹnyenede; koro Abasi ọdọhọde ete, Ndikpụhu fi, ndinyụn̄ n̄kpọn̄ke fi.” (Mme Hebrew 13:5) Ikọ emi akama ndọn̄esịt didie ntem! Ke ndikpebe ima ima edikere oro Abasi ekerede aban̄a ikọt esie, Jesus ama ada akamba ikpehe ke ọwọrọetop Ukwọrọikọ esie oro ke Obot ekpep mme mbet esie ete ẹnyene eti ekikere ẹban̄a utom ye inyene obụkidem.—Matthew 6:19-33.
Mme Ntiense Jehovah ẹdomo nditiene ukpepn̄kpọ oro. Ke uwụtn̄kpọ, ke ini eteutom kiet ọkọdọhọde Ntiense kiet emi edide anamutom ikan̄ ilektrik ete esinam utom ebe ini kpukpru usen, Ntiense emi ama esịn. Ntak-a? Koro enye ikoyomke utom idịbi udia esie atuaha ye ini oro enye esibiatde ye ubon esie ye ini oro enye esidade ese aban̄a mme n̄kpọ eke spirit. Sia enye ekedide ata eti owoutom oro ẹberide edem, eteutom esie ama enyịme ye enye. Nte ededi, n̄kpọ isidịghe ntre kpukpru ini, ndien owo ekeme ndiyom utom efen man aka iso odu uwem oro adade ukem ukem. Edi, mbon oro ẹbuọtde idem ọyọhọ ọyọhọ ye Jehovah ẹsiwak ndikụt ke eti ido ye eti edu unam utom mmimọ ẹsinam mme eteutom ẹma mmimọ.—Mme N̄ke 3:5, 6.
Ke Ini Kpukpru Utom Ẹdinyenede Ufọn
Ke anana-mfọnmma editịm n̄kpọ oro odude ke emi, utom ye idotenyịn unyene utom ẹdiyọhọ ye mfịna ẹyenyụn̄ ẹnana iwụk. Ke akpanikọ, n̄kpọ ekeme ndidọdiọn̄ ndiọk n̄ka iso nte ererimbot ye ndutịm uforo ẹkade iso ẹnana iwụk. Edi n̄kpọ iditiehe ntem ke nsinsi. Ke mîbịghike, owo ndomokiet idinanake utom. Akan oro, kpukpru utom ẹyenen̄ede ẹnyene inem ẹnyụn̄ ẹnyene ufọn. Oro edisan̄a didie itịbe? Nso idida utọ ukpụhọde oro idi?
Ebede ke prọfet esie Isaiah, Jehovah ama anyan ubọk owụt utọ ini oro. Jehovah ọkọdọhọ ete: “Mmọn̄ mbot mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt.” (Isaiah 65:17) Enye eketịn̄ aban̄a obufa ukara oro imọ ididade idi, emi ata obufa ye isio isio n̄kaowo ẹdidude.—Daniel 2:44.
Kaban̄a nte mme owo ẹdidude uwem inyụn̄ inam utom adan̄aoro, ntịn̄nnịm ikọ oro aka iso ete: “Ndien mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ẹbietde usen eto, ndien edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọndịk: koro mmọ ye ubon mmọ n̄ko ẹdide nditọ mmọ eke Jehovah ọdiọn̄de.”—Isaiah 65:21-23.
Nso ukpụhọde ke obufa ererimbot Abasi emi edida edi ntem! Nte ọdọn̄ fi ndidu ke utọ ererimbot oro, ererimbot oro afo ‘mûdunamke utom ke ikpîkpu,’ edi edidiade se “ubọk” fo anamde? Tịm fiọk mbon oro ẹdibọde edidiọn̄ emi: ‘Ubon mmọ eke Jehovah ọdiọn̄de.’ Afo emekeme ndidi kiet ke otu “mmọ eke Jehovah ọdiọn̄de” ebe ke ndikpep mban̄a Jehovah nnyụn̄ nnam mme n̄kpọ oro enye oyomde. Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Mme Ntiense Jehovah ẹyekop inemesịt ndin̄wam fi enyene ọnọ-uwem ifiọk emi ebe ke ndikpep Ikọ Abasi, kpa Bible, ye afo.
[Ekebe ke page 6]
“MMỌ ẸSỌSỌBỌ KPUKPRU INI”
Bible ọdọhọ ete: “Se ededi eke mbufo ẹnamde, ẹnam ke ofụri esịt, nte n̄kpọ eke ẹnamde ẹnọ Ọbọn̄, mînamke inọ owo.” (Colossae 3:23) Nte an̄wan̄ade, owo oro adade edumbet emi esịn ke edinam ke utom esie edidi anamutom oro ọsọbọde etieti. Oro edi ntak J. J. Luna, ke n̄wed esie oro How to Be Invisible, etemede mbon oro ẹyomde ndida owo ke utom ete ẹyom ifịk ifịk mme andibuana ke ndusụk n̄ka ido ukpono, edi enye ama adian do ete: “Ke nditịm ntịn̄, nnyịn isida Mme Ntiense [Jehovah] ke akpatre.” Kiet ke otu ntak oro enye ọnọde edi nte ke ẹdiọn̄ọ mmọ ke edinam akpanikọ mmọ, ndien oro anam mmọ ‘ẹsọbọ kpukpru ini’ ke nsio nsio utom.
[Mme ndise ke page 5]
Ndinịm utom, mme edinam eke spirit ye unọ idem nduọkodudu ke itie mmọ ọnọ uyụhọ