Ẹfọn Ẹma, Ẹnyụn̄ Ẹtịm Ẹfiọk
Ediwak Miliọn Owo ke Ofụri Ererimbot Ẹma New World Translation
AKADA ifịk ifịk utom isua 12, ọfiọn̄ 3, ye usen 11. Nte ededi, ke March 13, 1960, ẹma ẹkụre akpatre ikpehe uwetn̄kpọ obufa edikabade Bible. Ẹkekot enye New World Translation of the Holy Scriptures.
Isua kiet ke ukperedem, Mme Ntiense Jehovah ẹma ẹsio edikabade emi ke eboho kiet. Ẹkemịn̄ nsiondi eke 1961 oro idem miliọn kiet. Mfịn, ibat oro ẹmịn̄de ebe miliọn ikie, anamde New World Translation edi kiet ke otu Bible oro ẹsuande atara akan. Nte ededi, nso ikonụk Mme Ntiense nditịm edikabade emi?
Ntak Ẹkeyomde Obufa Edikabade Bible?
Man ẹfiọk ẹnyụn̄ ẹtan̄a etop Edisana N̄wed Abasi, Mme Ntiense Jehovah ẹmeda nsio nsio edikabade Bible Ikọmbakara ẹnam n̄kpọ ke ediwak isua emi ẹkebede. Ke adan̄aemi ndusụk ikpehe ke mme nsiondi emi ẹnyenede ufọn, mmọ ẹsiwak ndidọn̄ọ mme item ye ukpepn̄kpọ ido ukpono Christendom. (Matthew 15:6) Ke ntre Mme Ntiense Jehovah ẹma ẹfiọk ke ẹyom edikabade Bible oro edidide ukem ye se isịnede ke akpasarade uwetn̄kpọ odudu spirit.
Ẹma ẹnam akpa usio-ukot ndiyụhọ udọn̄ emi ke October 1946 ke ini Nathan H. Knorr, owo Otu Ukara eke Mme Ntiense Jehovah, ọkọnọde ekikere ete ẹsio obufa edikabade Bible. Ke December 2, 1947, Kọmiti Ukabade Bible New World ama ọtọn̄ọ edikabade oro edidide ukem ye akpasarade uwetn̄kpọ, edikabade oro edidọn̄ọde mme ntọt nditọ ukpepn̄kpọ eke ndondo emi oro ẹdade ẹto n̄kani uwetn̄kpọ Bible oro ẹfiọhọde obufa, edinyụn̄ adade usem oro mme andikot enye mfịn ẹmehede.
Ke ẹma ẹkesio akpa eboho—New World Translation of the Christian Greek Scriptures—ke 1950, ama ana in̄wan̄-in̄wan̄ nte ke mme akabade n̄wed oro ẹma ẹsịm utịtmbuba mmọ. Mme itien̄wed Bible oro ke akpa mîkan̄wan̄ake owo ẹma ẹnen̄ede ẹn̄wan̄a. Ke uwụtn̄kpọ, kere ban̄a uwetn̄kpọ oro ọsọn̄de ndifiọk ke Matthew 5:3: “Ọfọfọn ọnọ mmọ eke ẹbuenede ke spirit.” Ẹkesịn enye ntem: “Inemesịt odu ọnọ mmọ eke ẹdiọn̄ọde ẹban̄a udọn̄ n̄kpọ spirit mmọ.” Ẹma ẹkabade mbụme mme mbet Jesus oro, “Nso idinyụn̄ idi idiọn̄ọ edidi Fo”? nte: “Nso ididi idiọn̄ọ edidu fo”? (Matthew 24:3) Ndien ikọ apostle John aban̄ade “mbumek obụkidem” okot, “udọn̄ obụkidem.” (1 John 2:16) Nte an̄wan̄ade, New World Translation ama anam Bible an̄wan̄a ke obufa usụn̄.
Nsio nsio nditọ ukpepn̄kpọ ẹma ẹnem esịt. Ke uwụtn̄kpọ, eyen ukpepn̄kpọ Bible Britain oro Alexander Thomson ama ọdọhọ ete ke New World Translation edi n̄wọrọnda ke ndikabade ikọ Greek oro owụtde idahaemi. Ke ndinam an̄wan̄a: Ephesus 5:25 okot ete, “Mme ebe, ẹka iso ndima iban mbufo” utu ke ikpîkpu edidọhọ, “Mme ebe, ẹma iban mbufo.” Thomson ama etịn̄ aban̄a New World Translation ete: “Etie nte idụhe edikabade en̄wen ekededi oro adade ikọ Greek owụtde idahaemi ọyọhọ ọyọhọ ye ke ediwak itie ntre.”
N̄wọrọnda n̄kpọ efen ke New World Translation edi nte enye adade ọkpọkpọ enyịn̄ Abasi, Jehovah, ke N̄wed Abasi usem Hebrew ye N̄wed Abasi usem Greek. Sia enyịn̄ Abasi ke usem Hebrew odude ekpere ndisịm utịm ike-7,000 ke inua-okot Akani Testament kpọt, ana in̄wan̄-in̄wan̄ nte ke Andibot nnyịn oyom mme andituak ibuot nnọ imọ ẹkot enyịn̄ imọ ẹnyụn̄ ẹdiọn̄ọ imọ nte owo. (Exodus 34:6, 7) New World Translation aman̄wam ediwak miliọn owo ndinam oro.
Ẹsion̄o New World Translation ke Ediwak Usem
Tọn̄ọ nte enye ọkọwọrọ ke Ikọmbakara, ọdọn̄ Mme Ntiense Jehovah ke ofụri ererimbot ndinyene New World Translation ke usem emana mmọ—ndien emi edi ye eti ntak. Ke ndusụk idụt, ekedi ọkpọsọn̄ n̄kpọ ndinyene mme edikabade eke usem n̄kann̄kụk koro mme andida ke ibuot mme N̄ka Bible oro ẹkesuande mmọ ikokopke inemesịt ndikụt Mme Ntiense Jehovah ẹnyenede mme edikabade Bible mmọ. Akan oro, mme utọ Bible usem n̄kann̄kụk oro ẹma ẹsiwak ndidịp mme akpan ukpepn̄kpọ. Uwụtn̄kpọ kiet edi edikabade kiet ke usem usụk usụk Europe oro edịpde akpan ntọt aban̄ade enyịn̄ Abasi ke ndisịn mme ikọ emi “Mme owo ẹkpekam ẹkpono fi” ke itie mme ikọ Jesus oro “Yak ikpono enyịn̄ Fo.”—Matthew 6:9.
Ke 1961, mme akabade n̄wed ẹma ẹtọtọn̄ọ ndikabade uwetn̄kpọ New World Translation Ikọmbakara nsịn ke mme usem en̄wen. Isua iba kpọt ke ukperedem, ẹma ẹkabade New World Translation of the Christian Greek Scriptures ẹsịn ke usem itiokiet en̄wen. Etisịm ini oro, 3 ke otu Ntiense 4 ke ofụri ererimbot ẹma ẹkeme ndikot Bible emi ke usem emana mmọ. Edi, ẹkenyene ndinam ekese utom efen efen edieke anade Mme Ntiense Jehovah ẹnam Bible emi esịm ediwak miliọn owo.
Ke 1989 ẹma ẹkpere ndisịm utịtmbuba oro ke ini ẹketọn̄ọde Itieutom Esede Aban̄a Ukabade N̄wed ke ibuot itieutom ofụri ererimbot eke Mme Ntiense Jehovah. Itieutom oro ama ọtọn̄ọ usụn̄ ukabade n̄wed oro ẹkedade ndutịm kọmputa ẹkpep mme ikọ Bible. Ndikama ndutịm emi amanam ẹkeme ndikabade N̄wed Abasi Christian Usem Greek nsịn ke mme usem efen efen ke isua kiet ye N̄wed Abasi Usem Hebrew ke isua iba—kpa esisịt ke udomo ini oro ẹsiyomde ke utom edikabade Bible. Toto nte ẹketọn̄ọ ndutịm emi, ẹmekabade nsiondi New World Translation 29 ẹto Ikọmbakara ẹnyụn̄ ẹsion̄o ke mme usem oro se iwakde ibe biliọn owo iba ẹsemde. Ke ẹkabade usem 12 efen efen ke ubọk idahaemi. Tutu esịm emi, ẹkabade New World Translation Ikọmbakara, ofụri ofụri m̀mê ke ubak ubak, ẹsịn ke usem 41 efen.
Se ikande isua 50 ẹmebe idahaemi tọn̄ọ nte ẹkesio akpa eboho New World Translation ke August 3, 1950, ke Mbono N̄kọri Ukara Abasi eke Mme Ntiense Jehovah ke New York City. Ke edinam oro, Nathan H. Knorr ama esịn udọn̄ ọnọ mme andidụk mbono ete: “Ẹbọ edikabade emi. Ẹkot enye ofụri ofụri, enye edi n̄kpọ oro ẹdikopde inem ndinam. Ẹkpep enye, koro enye ayan̄wam mbufo nditịm mfiọk Ikọ Abasi. Ẹdeme enye ẹnọ mbon en̄wen.” Nnyịn isịn udọn̄ inọ mbufo ite ẹkot Bible kpukpru usen, koro etop esie ekeme ndin̄wam mbufo “ẹfọn ẹma, ẹnyụn̄ ẹtịm ẹfiọk ofụri uduak Abasi.”—Colossae 4:12.
[Mme ndise ke page 8, 9]
(Ama oyom ndikụt nte enye enen̄erede etie, se n̄wed)
“New World Translation Oro Ẹsion̄ode”
New World Translation, oro ẹkebemde iso ẹsio ke Ikọmbakara, odu idahaemi ke ofụri ofụri m̀mê ke ubak ubak ke usem 41 efen efen
N̄wed Abasi Christian Usem Greek Ofụri Bible
1950 1
1960-1969 6 5
1970-1979 4 2
1980-1989 2 2
1990-Idahaemi 29 19