Ibịghike—Ererimbot Oro Unana Idotenyịn Mîdụhe Oyodu

UWEM ke ọsọsọn̄ aka iso, ndien mme ntak unana idotenyịn ẹwak. Ke ini ikụtde edikpu, ekeme ndidi ọkpọsọn̄ n̄kpọ ndikara mme ntụk nnyịn. Kamse, idem mbon oro ẹmade uwem ẹkeme ndinen̄ede n̄kop mfụhọ! Kere ban̄a uwụtn̄kpọ ifan̄.

Ke eset, prọfet Moses ama enen̄ede okop mfụhọ tutu enye ọdọhọ Abasi ete: “Mbọk, wowot mi, edieke nnemde fi: man n̄kukụt idiọk itie mi.” (Numbers 11:15) Ke efehede ọbọhọ mme asua esie, prọfet Elijah ama ofiori ete: “Ekem, ndien; O Jehovah, kam bọ mi uwem.” (1 Ndidem 19:4) Ndien prọfet Jonah ama ọdọhọ ete: “O Jehovah, mbọk, ndien, bọ mi uwem mi: koro n̄kpa mi ọfọnde akan uwem mi.” (Jonah 4:3) Edi Moses, Elijah, m̀mê Jonah ikowotke idem. Kpukpru mmọ ẹma ẹfiọk ibet Abasi oro: “Kûwot owo.” (Exodus 20:13) Ke ẹnyenede ọkpọsọn̄ mbuọtidem ke Abasi, mmọ ẹma ẹfiọk ẹte ke idụhe idaha oro idotenyịn mîdụhe ye nte ke uwem edi enọ Abasi.

Nso kaban̄a mme mfịna oro nnyịn isobode idahaemi? Ke adianade ye mfịghe eke ntụk m̀mê mme mfịna ikpọkidem, mme ini ẹkeme ndidu oro oyomde nnyịn iyọ mfiomo otode mbonubon, mme mbọhọidụn̄, m̀mê mme nsan̄a utom. Bible etịn̄ aban̄a mbon oro ẹyọhọde “ye kpukpru ukwan̄ido ye oburobụt ido ye idiọk mbumek ye udu; ẹyọhọ ye ufụp, ye obom, ye utọk, ye n̄kari, ye idiọk esịt; mmọ ẹdi mbon-nsụk-uyo, mbon iban̄a, mbon emi Abasi asuade, mbon emiom, mbon ikponesịt, mbon mbụre, mme etịbi idiọk-n̄kpọ, ye mme ọsọn̄-ibuot ye ete ye eka; mmọ ẹdi mme anana ifiọk, mme abiat ediomi, mme anana ima uduot owo, ye mme anana esịt mbọm.” (Rome 1:28-31) Ndidu n̄kpere utọ mbon emi ke usen ke usen ekeme ndinam uwem efek owo. Didie ke nnyịn ikeme ndin̄wam mbon oro ẹyomde ndọn̄esịt ye un̄wam?

Ndinyịme Ndikpan̄ Utọn̄

Mme afanikọn̄ ye ndutụhọ ẹkeme ndinam owo etre ndida ukem ukem ke ekikere. Enyene-ọniọn̄ owo oro ọkọdọhọ ete: ‘Ufịk anam enyene-ibuot owo akabade edi ndisịme.’ (Ecclesiastes 7:7) Ntre owo ikpadaha owo oro etịn̄de aban̄a uwotidem mfefere mfefere. Ekeme ndiyom ẹnọ mme mfịna oro enye enyenede, edide eke ntụk, eke ikpọkidem, eke ekikere, m̀mê eke spirit, usọp usọp ntịn̄enyịn. Edi akpanikọ, mme usọbọ ntaifiọk ẹdi nsio nsio, ndien ẹnyene ndinam mme ọkpọkpọ ubiere kaban̄a mme orụk usọbọ.—Galatia 6:5.

Se ededi ntak oro anamde owo oyom ndiwot idem, nditịn̄ ikọ idịbi nnọ owo oro enyenede mbufiọk, mbọm, ye ime ekeme ndinyene akamba ufọn. Mbonubon ye mme ufan oro ẹnyịmede ndikpan̄ utọn̄ ẹkeme ndin̄wam. Ke adianade ye mbọm ye mfọnido, mme ekikere oro ẹbọpde-bọp oro ẹtode Ikọ Abasi ẹkeme ndinen̄ede ndi n̄kpọ un̄wam nnọ mbon oro ẹduọkde idotenyịn.

Un̄wam eke Spirit Odude ọnọ Mbon Mfụhọ

Ekeme ndikpa fi idem ndifiọk nte edikot Bible ekemede ndinọ nsịnudọn̄. Okposụkedi enye mîdịghe n̄wed udọn̄ọ ekikere, Bible ekeme ndin̄wam nnyịn ida uwem ke ọsọn̄urua n̄kpọ. Edidem Solomon ọkọdọhọ ete: “Mmọfiọk nte ke baba eti n̄kpọ kiet idụhe mmọ ke esịt, ke mîbọhọke owo ndidat esịt, nnyụn̄ nnam se ifọnde ke uwem esie. Ndien n̄ko ama edi kpukpru owo eke ẹdiade n̄kpọ ẹnyụn̄ ẹn̄wọn̄de, ẹnyụn̄ ẹkụtde eti n̄kpọ ke kpukpru ọkpọsọn̄ utom mmọ, emi onyụn̄ edi enọ Abasi.” (Ecclesiastes 3:12, 13) Ke ẹsiode ọnọ-uyụhọ utom oro anamde uwem enyene se ọwọrọde ẹfep, n̄kpri n̄kpọ—utọ nte mbịtmbịt ofụm, utịn, mme flawa, mme eto, ye mme inuen—ẹdi mme enọ Abasi oro nnyịn ikemede ndidara.

Se ikam inọde nsịnudọn̄ ikan edi nsọn̄ọ otode Bible nte ke Jehovah Abasi ye Eyen esie, Jesus Christ, ẹkere ẹban̄a nnyịn. (John 3:16; 1 Peter 5:6, 7) Nte odotde, andiwet psalm ama ọdọhọ ete: “Ekọm enyene Jehovah, emi obiomde mbiomo nnyịn kpukpru usen, ata Abasi edinyan̄a nnyịn.” (Psalm 68:19, NW) Okposụkedi nnyịn ikemede ndikere ke nnyịn iwọrọke n̄kpọ inyụn̄ idotke, Abasi ọnọ nnyịn ikot ete ibọn̄ akam inọ imọ. Nyene mbuọtidem nte ke enye idisehe owo ekededi oro oyomde un̄wam esie ke nsụhọde idem ye ke esịt akpanikọ ke usụhọde.

Owo ndomokiet ikemeke ndidori enyịn ndidu uwem unana mfịna mfịn. (Job 14:1) Edi, akpanikọ otode Ikọ Abasi owụt ediwak owo nte ke uwotidem idịghe nnennen usụn̄ ndikọk mme mfịna mmọ. Kam kere nte apostle Paul akan̄wamde ekpeme ufọk-n̄kpọkọbi oro okodude ke nnanenyịn emi, ke “obụmerede ke idap, okụt mme usụn̄ ufọk-n̄kpọkọbi nte ẹnade in̄wan̄, enye osio ofụt esie oyom ndiwot idem, koro enye esede ete mbon n̄kpọkọbi ẹma ẹfen̄e.” Ke ndondo oro, ekpeme ufọk-n̄kpọkọbi oro ama ebiere ete ke uwotidem ama ọfọn akan esuene esuene n̄kpa oro onyụn̄ ekemede ndidi sụn̄sụn̄ ke ntak edikpu esie. Apostle oro ama ofiori ete: “Kûnam idem fo idiọk: koro nnyịn kpukpru mi”! Paul iketreke do. Ke akpanikọ, enye ye Silas ẹma ẹdọn̄ ekpeme ufọk-n̄kpọkọbi oro esịt ẹnyụn̄ ẹbọrọ mbụme esie oro: “Mme ete, nnyene ndinam nso man ẹnyan̄a mi?” Mmọ ẹma ẹbọrọ ẹte: “Buọt idem ye Ọbọn̄ Jesus, ndien ẹyenyan̄a fi ye ufọk fo.” Ekem mmọ ẹma ẹkwọrọ ikọ Jehovah ẹnọ enye ye mbonufọk esie, ndien utịp ekedi nte ke “idaha oro n̄ko enye ana baptism ye ofụri ufọk esie.” Ekpeme ufọk-n̄kpọkọbi oro ye ofụri ufọk esie ẹma ẹdat esịt eti-eti ẹnyụn̄ ẹkụt se uwem ọwọrọde.—Utom 16:27-35.

Mfịn, ọnọ ndọn̄esịt didie ntem ndifiọk nte ke idịghe Abasi edi ntak idiọkido! Ikọ esie owụt idiọk spirit, “oro ẹkotde enye ẹte, andidori ikọt Abasi ikọ ye Satan,” nte “andibian̄a ofụri ererimbot.” Edi ini esie ọmọn̄ okụre. (Ediyarade 12:9, 12) Ibịghike, Abasi ndisịbe ndụk eyetre kpukpru afanikọn̄ oro Satan ye mme demon esie ẹnamde ẹsịm mme andidụn̄ isọn̄. Ekem obufa ererimbot edinen ido oro Abasi ọn̄wọn̄ọde ayada ata utịt ọsọk mme ntak unana idotenyịn ye uwotidem.—2 Peter 3:13.

Ndọn̄esịt Ẹnọde Mbon Oro Ẹsemede Ẹyom Un̄wam

Idem idahaemi, mbon oro ẹkopde iduọesịt ẹkeme ndibọ ndọn̄esịt nto N̄wed Abasi. (Rome 15:4) David andiwet psalm ama ọkwọ ete: “O Abasi, afo usịnke edibụn̄ọ ye edinuaha esịt ke ndek.” (Psalm 51:17) Edi akpanikọ, nnyịn imesisobo mme idomo inyụn̄ ikụt mme utịp unana mfọnmma oro nnyịn mîkemeke ndifep. Edi ndikpep nnennen ifiọk aban̄ade ọfọn-ido, ye ima ima Ete nnyịn eke heaven oro enyenede eti ibuot, ọyọnọ nnyịn nsọn̄ọ nte ke nnyịn imọsọn̄ urua ke enyịn esie. Abasi ekeme ndikabade ndi akakan Ufan ye Andikpep nnyịn. Edieke nnyịn ikọride n̄kpet n̄kpet itie ebuana ye Jehovah Abasi, enye idikpụhu nnyịn tutu amama. Andibot nnyịn ọdọhọ ete: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.”—Isaiah 48:17.

Ndiberi edem ke Abasi aman̄wam ediwak owo. Ke ndinam an̄wan̄a: Mara ama okokop mmemidem ke ntak mfụhọ oro ekebịghide ke ini n̄kukụre eyeneren esie akakpade ke mbabuat n̄kpọntịbe n̄kpọisan̄.a Enye ama enyek idem onyụn̄ odomo ndiwot idem. Nte ededi, idahaemi enye esibak edemede kpukpru usen anam utom ufọk esie. Enye esima ndikpan̄ utọn̄ nnọ ikwọ ye ndin̄wam mbon efen. Idotenyịn oro nte ke “nti owo ye mme idiọk owo ẹyeset ke n̄kpa” omosụhọde ndusụk ubiak otode n̄kpa edima eyen esie onyụn̄ ọsọn̄ọ mbuọtidem esie ke Abasi. (Utom 24:15) Sia akananam Mara mînyeneke udọn̄ nditie nte angel ke heaven, mme ikọ Psalm 37:11 ẹma ẹtụk enye esịt: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”

N̄wan efen otode Brazil, Sandra, ama esinam utom ata ọkpọsọn̄ ọkpọsọn̄ ndidi eti eka nnọ nditọ esie ita. Enye enyịme ete: “Mma nsiyọhọ ye utom tutu ke ini ete mi akakpade ke mbuari ndien ami, ke ukem ini oro, mfiọkde ke ebe mi ke ekesinyene ebuana idan̄ ye n̄wan efen, n̄kakam n̄kereke ndibọn̄ akam mben̄e Abasi un̄wam.” Ke ọduọkde idotenyịn Sandra ama odomo ndiwot idem. Nso ikan̄wam enye okûnam emi? Esịtekọm oro enye enyenede ọnọ mme n̄kpọ eke spirit. “Kpukpru okoneyo mbemiso ndụkde idap, mmesikot Bible, ndien mmesidomo ndinịm idemmi ke idaha mbon oro n̄kotde mban̄a. Mmesikot mme magazine Enyọn̄-Ukpeme ye Awake! n̄ko, ndien mmesinen̄ede mma mme mbụk eyouwem koro mmọ ẹsin̄wam mi ndiyụhọ ye idaha mi ke uwem.” Ke ọfiọkde ete ke Jehovah edi akpan ufan imọ, enye ekpep ndisitịn̄ ikọ nnennen nnennen ke mme akam esie.

Ini Iso Oro Unana Idotenyịn Mîdụhe

Ọnọ ndọn̄esịt didie ntem ndifiọk ke ndutụhọ owo edi ke ibio ini! Ke idak ukara Obio Ubọn̄ Abasi, nditọwọn̄ ye ikpọ owo oro ubiatibet, ukwan̄ikpe, m̀mê asari ọnọmọde idahaemi ẹyedat esịt. Nte ẹkebemde iso ẹtịn̄ ke ntịn̄nnịm psalm, Edidem oro Jehovah emekde, Jesus Christ, “ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a.” Akan oro, “enye ayatua eyen unana ye ubuene mbọm, onyụn̄ anyan̄a ukpọn̄ mme ubuene.” Ke akpanikọ, “enye ayafak ukpọn̄ [mmọ] osio ke ukụt ye nnama: onyụn̄ ese iyịp mmọ ke n̄kpọ-uto.”—Psalm 72:12-14.

Ini edisu mme ntịn̄nnịm ikọ oro ekpere. Nte ekikere edidu uwem ke nsinsi ke isọn̄ ke mme utọ idaha oro edemede fi udọn̄? Ke edide ntre, afo emenyene ntak ndidat esịt nnyụn̄ ndara uwem nte enọ Abasi. Ndien edieke abuanade mme ọnọ-nsịnudọn̄ un̄wọn̄ọ N̄wed Abasi emi ye mbon en̄wen, afo emekeme ndida akwa idatesịt nsọk mbon oro ẹsemede ẹyom un̄wam ke ererimbot unana esịt mbọm ye unana ima emi.

[Mme Ikọ idakisọn̄]

[Ndise ke page 6]

Ediwak idaha oro ẹnọde inemesịt ẹdu mfịn

[Ndise ke page 7]

Nte afo omodori enyịn ke ererimbot oro unana idotenyịn mîdụhe?