Ẹdi Mme Okop-inemesịt Andikot N̄wed Ediyarade

“Ọfọfọn [“inemesịt odu,” NW] ọnọ andikot n̄wed, ye mmọ ẹmi ẹkopde ikọ prophecy emi, ẹnyụn̄ ẹnịmde mme n̄kpọ eke ẹwetde ke esịt.”—EDIYARADE 1:3.

1. Ke mme nso utọ idaha ke apostle John okodu ke ini enye ekewetde Ediyarade, ndien nso idi uduak emi ẹkewetde mme n̄kukụt ẹmi ẹnịm?

“AMI John . . . n̄kodu ke isuo emi ekerede Patmos, ke ntak ikọ Abasi, ye ikọ-ntiense mban̄a Jesus.” (Ediyarade 1:9) Mmọ oro ẹdi mme idaha oro apostle John okodude ewet n̄wed Ediyarade. Ẹkere ke ẹkeda enye ẹka ntan̄mfep ke Patmos ke ini ukara Akwa Edidem Domitian (81-96 E.N.) eke Rome, emi akadade odudu anam ẹtuak ibuot ẹnọ akwa edidem okonyụn̄ akabarede edi andikọbọ mme Christian. Ke adan̄aemi okodude ke Patmos, John ama ọbọ mme udịm udịm n̄kukụt oro enye ekewetde enịm. Enye ikobụkke mmọ man esịn mme akpa Christian ndịk ke idem, edi man ọsọn̄ọ mmọ idem, ọdọn̄ mmọ esịt, onyụn̄ esịn udọn̄ ọnọ mmọ ke ekerede aban̄a idomo oro mmọ ẹkesobode ye mmọ oro ẹkedude ke iso.—Utom 28:22; Ediyarade 1:4; 2:3, 9, 10, 13.

2. Ntak emi idaha oro John ye mme ekemmọ Christian ẹkedude ekpedide n̄kpọ udọn̄ ọnọ mme Christian ẹmi ẹdude uwem mfịn?

² Mme idaha ẹmi ẹkedude ẹwet n̄wed Bible emi ẹnyene se ẹwọrọde ẹnọ mme Christian ẹmi ẹdude uwem mfịn. John okosobo ukọbọ ke ntak emi enye eketiede ntiense ọnọ Jehovah ye Eyen Esie, Christ Jesus. Enye ye ekemmọ mme Christian ẹkedu uwem ke idaha oro usua okodude koro, ke adan̄aemi ẹdomode ndidi nti nditọisọn̄, mmọ ikekemeke ndituak ibuot nnọ akwa edidem. (Luke 4:8) Ke ndusụk idụt, mme ata Christian mfịn ẹdu ke ukem idaha oro, ke ebiet emi Ukara ekerede ke imenyene unen ndibiere se “inende ke n̄kan̄ ido ukpono.” Ke ntre, mme ikọ oro ẹkụtde ke ntọn̄ọikọ n̄wed Ediyarade ẹnọ ndọn̄esịt didie ntem: “Ọfọfọn [“inemesịt odu,” NW] ọnọ andikot n̄wed, ye mmọ ẹmi ẹkopde ikọ prophecy emi, ẹnyụn̄ ẹnịmde mme n̄kpọ eke ẹwetde ke esịt: koro ini ke ekpere.” (Ediyarade 1:3) Ih, mme andikot Ediyarade ẹmi ẹkpan̄de utọn̄ ẹnyụn̄ ẹkopde item ẹkeme ndinyene ata inemesịt ye ediwak edidiọn̄.

3. Anie edi Owo emi ọkọnọde John Ediyarade?

³ Anie edi akpan Owo emi ọkọnọde Ediyarade, ndien nso usụn̄ ke ada ọnọ enye? Akpa ufan̄ikọ asian nnyịn ete: “Ikọ ediyarade Jesus Christ, emi Abasi ọkọnọde Enye, ete owụt ikọt Esie, kpa n̄kpọ eke enyenede ndisu ke ekpri ibio ini: ndien Enye ọkọdọn̄ angel Esie okowụt n̄kpọ emi ọnọ owo Esie John.” (Ediyarade 1:1) Ke nditịn̄ ke mmemmem usụn̄, ata Owo emi ọkọnọde Ediyarade edi Jehovah Abasi, emi ekemende enye ọnọ Jesus, ndien ebede ke angel, Jesus ama emen enye etịn̄ ọnọ John. Edika iso ndụn̄ọde esisịt ayarade nte ke Jesus ama ada n̄ko edisana spirit ọnọ mme etop ẹsọk mme esop onyụn̄ owụt John mme n̄kukụt.—Ediyarade 2:7, 11, 17, 29; 3:6, 13, 22; 4:2; 17:3; 21:10; men Utom 2:33 domo.

4. Mme usụn̄ ewe ke Jehovah osụk ada mfịn ndinọ ikọt esie ndausụn̄ ke isọn̄?

⁴ Jehovah osụk adada Eyen esie, emi edide “Ibuot ọnọ ufọk Abasi,” ndinọ mme asan̄autom esie ukpep ke isọn̄. (Ephesus 5:23; Isaiah 54:13; John 6:45) Jehovah ada n̄ko spirit esie nditeme ikọt esie. (John 15:26; 1 Corinth 2:10) Ndien kpa nte Jesus akadade “owo Esie John” ndideme isek isek udia eke spirit nnọ mme esop akpa isua ikie, ntre mfịn enye ada “asan̄autom emi anamde akpanikọ, onyụn̄ enyenede ọniọn̄,” emi “nditọete” esie ẹmi ẹyetde aran, oro ẹdude ke isọn̄ ẹnamde, ndinọ mbonufọk esie ye mme nsan̄a mmọ “udia [eke spirit] ke edikem ini.” (Matthew 24:45-47; 25:40) Mbon oro ẹdiọn̄ọde Ebiet emi ‘nti enọ’ ẹmi nnyịn ibọde ke uduot udia eke spirit ẹtode ye usụn̄ emi Enye adade ẹkop inemesịt.—James 1:17.

Mme Esop Oro Christ Ọnọde Ndausụn̄

5. (a) Ẹmen mme esop Christian ye mme esenyịn mmọ ẹdomo ye nso? (b) Kpa ye unana mfọnmma owo, nso iditịp isịn ke nnyịn ndikop inemesịt?

⁵ Ke mme ntọn̄ọ ntọn̄ọ ibuot Ediyarade, ẹmen mme esop Christian ẹdomo ye udiọk-utuenikan̄. Ẹmen mme esenyịn mmọ ẹdomo ye mme angel (mme isụn̄utom) ye mme ntantaọfiọn̄. (Ediyarade 1:20)a Ke etịn̄de aban̄a idemesie, Christ ọkọdọhọ John ewet ete: “Ntem ke Enye, emi omụmde ntantaọfiọn̄ itiaba akama ke ubọk nnasia Esie, onyụn̄ asan̄ade ke ufọt udiọk-utuenikan̄ o-gold itiaba, ọdọhọ.” (Ediyarade 2:1) Etop itiaba oro ẹkenọde ẹsọk esop itiaba ke Asia ẹwụt nte ke akpa isua ikie E.N., mme esop ye mbiowo mmọ ẹma ẹnyene nti edu ye mmeme. Ntre ke edi mfịn. Ke ntre, nnyịn iyenen̄ede ikop inemesịt ikan edieke nnyịn mîdehede ifre akpanikọ oro nte ke Christ, Ibuot nnyịn, odu ke ufọt mme esop. Enye ọfiọk nnennen se ikade iso. Mme esenyịn ke ndamban̄a usụn̄ ẹdu “ke ubọk nnasia Esie,” oro edi, ke idak odudu ye ndausụn̄ esie ẹnyụn̄ ẹnyene ndinam ibat nnọ enye kaban̄a usụn̄ nte mmọ ẹkpemede mme esop.—Utom 20:28; Mme Hebrew 13:17.

6. Nso iwụt ke idịghe mme esenyịn kpọt ẹnyene ndinam ibat nnọ Christ?

⁶ Nte ededi, nnyịn ikpababian̄a idem nnyịn edieke nnyịn ikerede ke mme esenyịn kpọt ẹnyene ndinam ibat nnọ Christ kaban̄a mme edinam mmọ. Ke kiet ke otu mme etop esie, Christ ọkọdọhọ ete: “Kpukpru mme ufọk Abasi ẹyefiọk ẹte ke Ami ndi Andidụn̄ọde ekpụt ye esịt; nyonyụn̄ nnọ kpukpru mbufo kiet kiet nte ekemde ye utom mbufo.” (Ediyarade 2:23) Emi edi ntọt afiak edi nsịnudọn̄ kpa ke ukem ini oro—ntọt nte ke Christ ọfiọk ntotụn̄ọ uduakesịt nnyịn, nsịnudọn̄ koro enye ọsọn̄ọ ọnọ nnyịn nte ke Christ okụt mme ukeme nnyịn oyonyụn̄ ọdiọn̄ nnyịn edieke nnyịn inamde se ikemede.—Mark 14:6-9; Luke 21:3, 4.

7. Didie ke mme Christian ke Philadelphia ‘ẹkekpeme uyo anyan ime Jesus’?

⁷ Etop oro Christ ọkọnọde ẹsọk esop oro odude ke obio Philadelphia ke Lydia isịneke nsuannọ, edi esịne un̄wọn̄ọ oro ekpedide akakan n̄kpọ udọn̄ ọnọ nnyịn. “Sia ama ekekpeme uyo anyan ime Mi, Ami nyonyụn̄ n̄kpeme fi ke ini idomo, emi ọmọn̄ edisịm ofụri ererimbot.” (Ediyarade 3:10) Ikọ Greek oro adade ọnọ “ekekpeme uyo anyan ime Mi” ekeme n̄ko ndiwọrọ “ekekpeme se n̄ketịn̄de mban̄a anyan ime.” Ufan̄ikọ 8 ọnọ ekikere ete ke ikụreke ke mme Christian ke Philadelphia ndikanam mme ewụhọ Christ edi ẹma ẹnam item oro enye ọkọnọde ete mmọ ke idemmọ ẹme ime ke edinam akpanikọ.—Matthew 10:22; Luke 21:19.

8. (a) Nso ke Jesus ọkọn̄wọn̄ọ ọnọ mme Christian ke Philadelphia? (b) Mmanie mfịn ke “ini idomo” otụk?

⁸ Jesus ama adian do ete ke imọ iyekpeme mmọ isio ke “ini idomo.” Nnyịn ifiọkke se oro akakam ọwọrọde ọnọ mme Christian oro ke ini oro. Okposụkedi ukọbọ oro eketekde ubọk esisịt ke Domitian ama akakpa ke 96 E.N., ọkpọsọn̄ ukọbọ efen ama afiak ọtọn̄ọ ke idak Trajan (98-117 E.N.), nte eyịghe mîdụhe adade mme idomo efen efen ẹdi. Edi akpan “ini idomo” odu ke “usen Ọbọn̄” ke “utịt ini,” emi nnyịn idude idahaemi. (Ediyarade 1:10; Daniel 12:4) Mme Christian oro ẹyetde aran ke spirit ẹma ẹsobo san̄asan̄a ini idomo ke ini Ekọn̄ Ererimbot I ye ke ndondo oro ekọn̄ oro okokụrede. Edi, “ini idomo” ke akaka iso. Enye otụk “ofụri ererimbot,” esịnede ediwak miliọn owo ẹmi ẹnamde akwa otuowo, ẹmi ẹdoride enyịn ndibọhọ akwa ukụt. (Ediyarade 3:10; 7:9, 14) Nnyịn iyokop inemesịt edieke nnyịn ‘ikpemede se Jesus eketịn̄de aban̄a anyan ime,’ oro edi: “Ẹyenyan̄a owo eke edimede ime tutu esịm akpatre.”—Matthew 24:13.

Ndisụk Ibuot ye Inemesịt nnọ Itie Edikara Jehovah

9, 10. (a) Ke mme usụn̄ ewe ke n̄kukụt ebekpo Jehovah okpotụk nnyịn? (b) Didie ke nnyịn ndikot Ediyarade ekeme nditịp nsịn ke nnyịn ndikop inemesịt?

⁹ N̄kukụt aban̄ade ebekpo Jehovah ye esop esie eke heaven oro ẹnọde ke Ediyarade ibuot 4 ye 5 ekpenyene ndinyene nnyịn uten̄e. Mme ikọ itoro ofụri esịt oro mme okopodudu edibotn̄kpọ eke heaven ẹtịn̄de nte mmọ ẹsụkde ibuot ke idatesịt ẹnọ edinen itie edikara Jehovah ẹkpenyene nditụk nnyịn. (Ediyarade 4:8-10b) Ẹkpenyene ndikop uyo nnyịn ke otu mbon oro ẹdọhọde ẹte: “Yak edidiọn̄, ye ukpono, ye ubọn̄, ye edikara ofụri ekondo, ẹnyene Enye emi etiede ke ebekpo, ẹnyụn̄ ẹnyene Eyen-erọn̄ ke nsinsi-nsinsi.”—Ediyarade 5:13.

¹⁰ Ke ata ata usụn̄, emi ọwọrọ nnyịn ndisụk ibuot idara idara nnọ uduak Jehovah ke kpukpru n̄kpọ. Apostle Paul ekewet ete: “Sededi mbufo ẹnyụn̄ ẹnamde ke ikọ ye utom, ẹnam kpukpru ke enyịn̄ Ọbọn̄ Jesus, ẹnọ Abasi Ete ekọm oto ke Enye.” (Colossae 3:17) Nnyịn ndikot Ediyarade ayanam nnyịn inen̄ede ikop inemesịt edieke nnyịn ke isọn̄ esịt nnyịn inyịmede itie edikara Jehovah inyụn̄ ikerede iban̄a edinam uduak esie ke ofụri ikpehe uwem nnyịn.

11, 12. (a) Didie ke ẹdinyen̄e ẹnyụn̄ ẹsobo editịm n̄kpọ Satan eke isọn̄? (b) Nte Ediyarade ibuot 7 ọdọhọde, mmanie “ẹkeme ndida” ke ini oro?

¹¹ Ndisụk ibuot ke idatesịt nnọ itie edikara Jehovah edi ntak inemesịt ọnọ owo kiet kiet ye ofụri ekondo. Ke mîbịghike ndamban̄a akwa unyekisọn̄ eyenyen̄e ndutịm ererimbot Satan esịm ata itiat idakisọn̄ esie onyụn̄ osobo enye. Ebiet ubọhọ ididụhe inọ mme owo ẹmi ẹsịnde ndisụk ibuot nnọ ukara Obio Ubọn̄ Christ eke heaven, emi adade ke ibuot edinen ukara Abasi. Ntịn̄nnịm ikọ oro ọdọhọ ete: “Ndidem isọn̄, ye mbọn̄, ye ikpọ mme etubom ekọn̄, ye mbon inyene, ye n̄kpọsọn̄ owo, ye kpukpru ifịn ye nditọ-isọn̄, ẹdịbe ke mme aba ye ke ikpọ itiat ẹmi ẹdude ke ikpọ obot; mmọ ẹnyụn̄ ẹdọhọ ikpọ obot ye ikpọ itiat ẹte, Ẹduọ ẹfụk nnyịn, ẹnyụn̄ ẹdịp nnyịn, man nnyịn ibọhọ iso Anditie ke ebekpo ye iyatesịt Eyen-erọn̄; koro akwa usen iyatesịt Mmọ emedi, ndien anie ekeme ndida?”—Ediyarade 6:12, 15-17.

¹² Kaban̄a mbụme oro, ke ibuot oro etienede, apostle John etịn̄ aban̄a mbon oro ẹnamde akwa otuowo, ẹmi ẹketode ke akwa ukụt ẹwọn̄ọ, nte ke “ẹda ke iso ebekpo ye ke iso Eyenerọn̄.” (Ediyarade 7:9, 14, 15) Mmọ ndida ke iso ebekpo Abasi owụt ke mmọ ẹdiọn̄ọ ebekpo oro ẹnyụn̄ ẹsụk ibuot ọyọhọ ọyọhọ ẹnọ itie edikara Jehovah. Ke ntre, ẹnyịme mmọ.

13. (a) Nso ke ata ediwak mme andidụn̄ isọn̄ ẹtuak ibuot ẹnọ, ndien nso ke idiọn̄ọ oro odude ke ọkpọiso mmọ m̀mê ke ubọk mmọ owụt? (b) Ntre ntak emi ediyomde ẹnyene ime?

¹³ Ke n̄kan̄ eken, ibuot 13 owụt mbon eken ẹmi ẹdụn̄de ke isọn̄ nte ẹtuakde ibuot ẹnọ ndutịm ukaraidem Satan, emi unam adade aban̄a. Mmọ ẹbọ idiọn̄ọ ke “ọkpọiso” mmọ m̀mê ke “ubọk” mmọ, owụtde ke mmọ ẹnyịme ẹnyụn̄ ẹnen̄ede ẹn̄wam ndutịm oro. (Ediyarade 13:1-8, 16, 17) Ekem, ibuot 14 adian ete: “Edieke owo atuakde ibuot ọnọ unam oro ye mbiet esie, onyụn̄ ọbọde idiọn̄ọ ke ọkpọ-iso m̀mê ke ubọk, enye nde ọyọn̄wọn̄ wine ifụtesịt Abasi, emi ẹbuakde ẹnana mbọm ke cup iyatesịt Esie . . . Mi ke ẹkụt ime nti ikọt Abasi, kpa mmọ ẹmi ẹnịmde mbet Abasi, ẹnyụn̄ ẹbuọtde idem ye Jesus.” (Ediyarade 14:9, 10, 12) Nte ini akade, mbụme emi ọyọdọdiọn̄ odu: Afo ada ye anie? Jehovah ye itie edikara esie m̀mê idiọk ndutịm ukaraidem emi unam adade aban̄a? Mbon oro ẹsịnde ndibọ idiọn̄ọ unam oro ẹmi ẹnyụn̄ ẹmede ime ke edinam akpanikọ ke nsụkibuot nnọ itie edikara Jehovah ẹyekop inemesịt.

14, 15. Ewe etop isịbe idụk se Ediyarade etịn̄de aban̄a Armageddon, ndien emi ọwọrọ nso ọnọ nnyịn?

¹⁴ Mme andikara “kpukpru ekondo” ẹmọn̄ ẹtuaha iso ye iso, ẹsakde iso ẹse en̄wan emi ẹdin̄wanade ye Jehovah kaban̄a eneni itie edikara. Ẹdibiere emi ke Armageddon, “ekọn̄ akwa usen Abasi, Andikara kpukpru n̄kpọ.” (Ediyarade 16:14, 16) Edemede-udọn̄ ntọt esịbe odụk ufọt ikọ oro ẹtịn̄de ẹban̄a editan̄ mme andikara isọn̄ mbok mben̄e ekọn̄ ye Jehovah. Jesus ke idemesie esịbe odụk n̄kukụt oro ndidọhọ: “Sese, ndidi nte inọ; ọfọfọn ọnọ owo eke esịnede edisịne-n̄kpọ etie ekpeme; mbak enye edisan̄a iferi, owo edinyụn̄ okụt mbubiam esie.” (Ediyarade 16:15) Ekeme ndidi emi etịn̄ aban̄a mme Levite ẹmi ẹkekpemede temple oro ẹkesision̄ode mmọ edisịnen̄kpọ ẹnyụn̄ ẹsuenede an̄wan̄wa edieke ẹkụtde mmọ nte ẹdede idap ke itie ukpeme mmọ.

¹⁵ Etop emi an̄wan̄a: Edieke nnyịn iyomde ndibọhọ Armageddon, ana nnyịn idu ke edidemede ke n̄kan̄ eke spirit inyụn̄ ika iso isịne ndamban̄a edisịnen̄kpọ oro anamde ẹdiọn̄ọ nnyịn nte mme anam-akpanikọ Ntiense Jehovah Abasi. Nnyịn iyokop inemesịt edieke nnyịn ifepde idap eke spirit inyụn̄ ikade iso ye unana edikpa mba, ibuanade ifịk ifịk ke ndisuan “nsinsi gospel” Obio Ubọn̄ Abasi oro ẹma ẹkewụk.—Ediyarade 14:6.

‘Inemesịt Odu ọnọ Owo eke Enịmde Ikọ Ẹmi’

16. Ntak emi mme akpatre ibuot Ediyarade ẹdide akpan ntak ndikop inemesịt?

¹⁶ Mme okop-inemesịt andikot n̄wed Ediyarade ẹkeme ndikam nsio n̄kpo idara nte mmọ ẹkotde mme akpatre ibuot oro ẹtịn̄de ẹban̄a ubọn̄ ubọn̄ idotenyịn nnyịn—obufa enyọn̄ ye obufa isọn̄, oro edi, edinen ukara Obio Ubọn̄ eke heaven emi akarade obufa n̄ka owo emi ẹnamde asana, kpukpru adade itoro ọsọk “Jehovah Abasi Andikara kpukpru n̄kpọ.” (Ediyarade 21:22) Nte mme utịbe utịbe, udịm udịm n̄kukụt ẹsịmde utịt, isụn̄utom edide angel mi ọkọdọhọ John ete: “Ikọ ẹmi ẹdi akpanikọ eke owo ekpenịmde. Ndien Ọbọn̄, emi edide Abasi spirit mme prophet, ọkọdọn̄ angel ediwụt ikọt Esie se iditịbede ke ekpri ibio ini. Sese, mmọn̄ ndedi idaha emi. Ọfọfọn [“inemesịt odu,” NW] ọnọ owo eke enịmde ikọ prophecy n̄wed emi.”—Ediyarade 22:6, 7.

17. (a) Nso nsọn̄ọ ke ẹnọ ke Ediyarade 22:6? (b) Nnyịn ikpodu ke edidemede man ifep nso?

¹⁷ Mme okop-inemesịt andikot Ediyarade ẹyeti ẹte ke mme ukem ikọ ẹmi ẹdu ke ntọn̄ọ “n̄wed” emi. (Ediyarade 1:1, 3) Mme ikọ ẹmi ẹsọn̄ọ ẹnọ nnyịn nte ke kpukpru “n̄kpọ” ẹmi ẹketịn̄de ntịn̄nnịm ikọ ẹban̄a ke akpatre n̄wed Bible emi ‘ẹyetịbe ke ekpri ibio ini.’ Nnyịn imaka anyan ke utịt ini anam mme akpan n̄kpọntịbe oro ẹkebemde iso ẹtịn̄ ẹban̄a ke Ediyarade iditreke-tre nditịbe ke adiana ke adiana ke mîbịghike. Ke ntre, n̄kpọ ekededi oro ekpetiede nte enyene iwụk ke editịm n̄kpọ Satan ikpenyeneke ndinam nnyịn iyet idap. Okot-n̄wed emi odude ke edidemede eyeti mme ntọt oro ẹnọde ke mme etop oro ẹkenọde ẹsọk esop itiaba ke Asia oyonyụn̄ efep afia uyom inyene obụkidem, ukpono ndem, oburobụt ido, editie ndebe ndebe, ye edisiak isio n̄ka eke mbon nsọn̄ibuot.

18, 19. (a) Ntak emi Jesus enyenede ndidi, ndien nnyịn ibuana ke ewe idotenyịn emi John etịn̄de aban̄a? (b) Nso idi uduak emi Jehovah enyenede ‘ndidi’?

¹⁸ Ke n̄wed Ediyarade, Jesus ọtọt ediwak ini ete: ‘Mmọn̄ ndedi iwiwa.’ (Ediyarade 2:16; 3:11; 22:7, 20a) Enye enyene ndidi ndibiere ikpe nnọ Akwa Babylon, ndutịm ukaraidem Satan, ye kpukpru owo ẹmi ẹsịnde ndisụk ibuot nnọ itie edikara Jehovah, nte ẹwụtde idahaemi ebe ke Obio Ubọn̄ Messiah. Nnyịn imadian uyo nnyịn ye eke apostle John, emi okofioride ete: “Amen. Di, Ọbọn̄ Jesus.”—Ediyarade 22:20b.

¹⁹ Jehovah ke idemesie ọdọhọ ete: “Sese, mmọn̄ ndedi idaha emi; nnyụn̄ nsan̄a ye utịp Mi, ndinọ kpukpru owo nte ekemde ye ubọk-utom esie.” (Ediyarade 22:12) Ke adan̄aemi ibetde ubọn̄ ubọn̄ utịp uwem emi utịt mîdụhe, edide nte ubak “obufa enyọn̄” emi ẹn̄wọn̄ọde m̀mê “obufa isọn̄,” nnyịn ikpakam isịn ifịk idiana kiet ke ndinọ mbon esịt akpanikọ ikot emi: “Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Mmọ n̄ko ẹkpekam ẹkabade ẹdi mme okop-inemesịt andikot aduai-owo-idem n̄wed Ediyarade emi ẹkedade odudu spirit ẹwet!

[Ikọ idakisọn̄]

Mme Akpan N̄kpọ Ndidụn̄ọde

◻ Nso usụn̄ ke Jehovah akada ọnọ Ediyarade, ndien nso ke nnyịn ikeme ndikpep nto emi?

◻ Ntak emi nnyịn ikpokopde inemesịt ndikot mme etop oro ẹkenọde ẹsọk esop itiaba oro ke Asia?

◻ Didie ke ẹkeme ndikpeme nnyịn ke “ini idomo”?

◻ Nso inemesịt ke nnyịn idinyene edieke nnyịn inịmde mme ikọ n̄wed oro ẹdude ke Ediyarade?

[Mme ndise ke page 15]

Mbon oro ẹdiọn̄ọde Owo emi ọnọde etop idatesịt oro ẹkop inemesịt

[Ndise ke page 18]

Owo emi odude ke edidemede okop inemesịt