Mmọ Ẹma “Ẹbak Abasi”

KE ADAN̄AEMI nditọ Israel ẹkedude ke ufụn ke Egypt, mme omụm iban Hebrew uman, Shiphrah ye Puah, ẹkedu ke itie nnanenyịn. Ke odomode nditre ibat isen owo oro ẹkekọride usọp usọp, Pharaoh ama owụk iban ẹmi ete: “Ke ini mbufo ẹmụmde iban Hebrew uman, . . . ama edi eyen-eren, mbufo ẹwot enye.”—Exodus 1:15, 16.

Shiphrah ye Puah ẹma “ẹbak Abasi,” ntre mmọ ẹma ẹnyene uko inyụn̄ “inamke nte edidem Egypt ọkọdọhọde mmọ.” Utu ke oro, mmọ ẹma ẹnịm nseknditọ iren uwem, okposụkedi ekemede ndidi utọ uko uko idaha emi ama esịn mmọ ke itiendịk. Jehovah ama ‘ọfọn ido ye mme omụm uman’ oro, onyụn̄ ọnọ mmọ utịp ke utom unyan̄a uwem mmọ.—Exodus 1:17-21.

Mbụk emi ọsọn̄ọ nte Jehovah owụtde esịtekọm ọnọ mbon oro ẹnamde n̄kpọ esie. Okposụkedi ekedide uko uko edinam, ekeme ndidi enye ekese se Shiphrah ye Puah ẹkenamde nte n̄kpọ oro ẹkam ẹnamde ke ufọn mme owo. Kamse, idụhe n̄wan ekededi oro enyenede eti ibuot emi okpowotde nseknditọ! Kpa ye oro, Jehovah nte eyịghe mîdụhe ama ekere aban̄a akpanikọ oro nte ke ndusụk owo ẹma ẹnam ata oburobụt ido ke ntak ndịk owo. Enye ama ọfiọk nte ke idịghe mfọnido eke owo kpọt edi n̄ko ke edi mbak ye uten̄e Abasi okonụk mme omụm-uman ẹmi.

Nnyịn ikeme ndiwụt esịtekọm didie ntem nnọ Abasi emi okụtde nti utom nnyịn! Edi akpanikọ, eyedi idụhe owo nnyịn ekededi emi osobode idomo mbuọtidem emi Shiphrah ye Puah ẹkesobode. Edi, ke ini nnyịn isọn̄ọde ida ke se inende—edide ke ufọkn̄wed, ke itie utom nnyịn, m̀mê ke itie efen ekededi—Jehovah idaha ima nsọn̄ọnda nnyịn mfefere mfefere. Ke edide isio, enye “edi Andinọ mmọ ẹmi ẹyomde Enye utịp.” (Mme Hebrew 11:6) Ih, “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.”—Mme Hebrew 6:10.