Ntọt Mme Anditan̄a Obio Ubọn̄
Ndikwọrọ Ikọ “ke Edide Ekem Ini ye ke Mînyụn̄ Idịghe Ekem Ini”
KE INI ekọn̄ akan̄wanade ke idụt Bosnia and Herzegovina, ediwak tọsịn owo ẹma ẹsobo ọkpọsọn̄ nsọn̄ọn̄kpọ. Ke ọkpọsọn̄ ini oro, Mme Ntiense Jehovah ẹma ẹsịn ofụri ukeme ndida nsịnudọn̄ ye idotenyịn nsọk mme owo. Se itienede emi edi ubak leta emi Ntiense kiet emi akanamde utom ke ndusụk ini ke Sarajevo ekewetde.
“Uwem ọsọn̄ etieti mi, edi mme owo ẹnyịme akpanikọ Bible. Mme Ntiense n̄kann̄kụk ẹdi utịbe-utịbe uwụtn̄kpọ nsịnifịk. Ke n̄kan̄ n̄kpọ eke obụk, mmọ ẹnyene ata esisịt, edi mmọ ẹnyene ata eti edu. Ekpere ndidi kpukpru n̄kpri owo ke esop ẹdu ke utom uyọhọ ini. Ifịk emi esịn udọn̄ ọnọ mbufa asuanetop, ndien idịghe esen n̄kpọ inọ mmọ ndisịn hour 60 m̀mê akande oro ke ọfiọn̄ ke utom ukwọrọikọ toto ke akpa ọfiọn̄ mmọ ke an̄wautom.
“Ke ẹsiode edikwọrọ ikọ ke ufọk ke ufọk ẹfep, nnyịn ima idomo nsio nsio usụn̄ en̄wen ndisịm mme owo ise. Ke uwụtn̄kpọ, nnyịn ima inyene nti utịp ndinọ mme owo n̄wed Bible ke ediwak itie ubụkowo ke obio oro.
“Ẹmenọ ikọ ntiense n̄ko ke mme ufọkibọk. Ke Ikpehe Itieutom Esede Aban̄a Esịt ke ufọkibọk Sarajevo, akwa abiausọbọ ama ọbọ Awake! eke December 8, 1996, emi enyenede ibuotikọ ikpaedem oro ‘Heart Attack—What Can Be Done?’ (Ifehesịt—Nso ke Ẹkeme Ndinam?) Enye ama ọdọhọ ẹnọ imọ efen efen man ikpọnọ mbiaibọk eken. Ekem ẹma ẹnọ Mme Ntiense oro unyịme ndisan̄a nse kpukpru mbon udọn̄ọ ke ikpehe itieutom esie. Ntem, ke se ibede hour kiet esisịt, ẹma ẹsuan se ibede magazine 100 to ke bed sịm bed. Ediwak mbon udọn̄ọ ẹkedọhọ ẹte ke oro ekedi akpa ini emi owo ekededi ekedide edise mmimọ ke ufọkibọk man ọnọ nsịnudọn̄ ye idotenyịn.
“Ke isan̄ en̄wen ẹma ẹda mme ibuotikọ magazine ẹmi ẹdotde ye nditọwọn̄ ẹka Ikpehe Itieutom Esede Aban̄a Nditọwọn̄. Akwa abiausọbọ ama ọbọ n̄ko ibat ibat N̄wed Mi eke Mme Mbụk Bible ndibon ke ubet ukotn̄wed. Idahaemi mme eka ẹmi ẹkade ẹkese nditọ mmọ ke ufọkibọk ẹsikot mme mbụk Bible ẹnọ mmọ kpukpru usen. Ẹmenam ndutịm n̄ko ndika mbịne abiaibọk emi ke ufọk esie.
“Ediwak tọsịn mbonekọn̄ NATO [Esop Ediomi Edem Edere Atlantic] ẹtode nsio nsio idụt ẹdu ke Sarajevo. Ẹmenọ mmọ ẹmi n̄ko ọyọhọ-ọyọhọ ikọ ntiense. Ndusụk ini nnyịn imesisan̄a to ke ubomisọn̄ ekọn̄ sịm ubomisọn̄ ekọn̄ ikamade ekpri n̄wed oro Good News for All Nations ye magazine Enyọn̄-Ukpeme ye Awake! ke nsio nsio usem. Ẹma ẹnịm se ibede magazine 200 ke itieidụn̄ udịmekọn̄ Italy. Ke ata n̄kpaidem, ediwak mbonekọn̄ Italy ẹma ẹdọhọ ẹte ke akananam mmimọ ikenyeneke nneme ye Mme Ntiense Jehovah. Nte ededi, nnyịn ima isobo ye mmọ ke Sarajevo.
“Usen kiet ẹma ẹnịm ubomisọn̄ ekọn̄ ke mbenusụn̄. Mma nda ufụkeyo mi n̄kpọi ubomisọn̄ oro, ndien owoekọn̄ kiet ama ọwọrọ edi. Mma nnọ enye Enyọn̄-Ukpeme emi ekenyenede ibuotikọ ikpaedem oro ‘Mme Isụn̄utom Emem—Mmọ Ẹdi Mmanie?’ Owoekọn̄ oro ama ese mi onyụn̄ obụp ete, ‘Mmọn̄ọ, okûdi afo edi kiet ke otu Mme Ntiense Jehovah?’ Ke ama ọkọfiọk ke edi ntre, enye ama ọbọrọ ete, ‘Akpa mi idem; mbufo mi n̄ko! Ọwọrọ idụhe ebiet ke isọn̄ emi Mme Ntiense mîdụhe?’”
Apostle Paul eketeme ete: “Kwọrọ ikọ Abasi; sịn ifịk nam emi, ke edide ekem ini ye ke mînyụn̄ idịghe ekem ini.” (2 Timothy 4:1, 2) Ukem nte mme ekemmọ andinịm ke akpanikọ ke ofụri ererimbot, Mme Ntiense Jehovah ke Sarajevo ke ẹnam oro, idem to ke bed sịm bed ye to ke ubomisọn̄ ekọn̄ sịm ubomisọn̄ ekọn̄!