“Mma N̄keme Ndikụt Emem Emem Idaha”

REN kiet esemde usem German ama aka mbono oro Mme Ntiense Jehovah ẹkediomide man “ekeyep” Mme Ntiense. Ntak-a? Uduak esie ekedi man “ayarade n̄ka emi onyụn̄ anyan̄a mme ufan esie mbak ẹdisop usụn̄.” Ke ama okodụk mbono oro, enye ama ewet leta oro etienede mi ọnọ ẹsọk mme ufan esie:

“Ke ini n̄kekperede itie akamba mbono oro, mma n̄kere m̀mê nnennen itie ekedi oro. N̄kekwe owo ndomokiet ke an̄wa, ndien ndek m̀mê tian beer ndomokiet ikanaha ke isọn̄. Nte n̄kasan̄ade n̄kpere, mma n̄kụt nti iren iba ke inuaotop an̄wambre oro. Mmọ ẹma ẹkọm mi ẹnyụn̄ ẹyak mi mbe ndụk.

“Mma ndori enyịn ndikop uyom ediwak tọsịn owo ẹmi n̄kekerede ke ẹyedu do, edi ọtọ oro ama odobo etieti. Mma n̄kere nte, ‘Nte ededi, eyedi owo ifan̄ kpọt ẹtie ntomo ntomo ke ofụri ebiet oro.’

“Ke ini n̄kodụkde, drama oro ẹkenamde ke mbot utịn̄ikọ ama omụm ntịn̄enyịn mi inikiet inikiet. Ke ukperedem ke n̄kedifiọk nte ke ediwak tọsịn owo oro ẹketịmde ẹnọ n̄kpan̄utọn̄ ẹma ẹtie ẹyọhọ an̄wambre oro. Mma n̄keme ndikụt emem emem idaha. Se n̄kokopde nnyụn̄ n̄kụtde ke ikpehe oro okosụhọde ke mbono oro ama enen̄ede otụk mi.

“Ke nsịnede ke otu Mme Ntiense, mma n̄kụt mme iso inemesịt mmọ nnyụn̄ n̄kop mme ima ima ikọ mmọ. Ke mbuari, n̄kekemeke ndifịk ekikere oro nnịm nte ke ‘Mmọ ẹmi ẹnen̄ede ẹdi ikọt Abasi!’”

Utu ke ‘ndinyan̄a mme ufan esie mbak ẹdisop usụn̄,’ akparawa emi ama ọdọhọ mmọ ete ẹkpep imọ Bible. Nso ikedi utịp? Mfịn, enye edi ebiowo Christian. Enye ye ubon esie ke ẹsịn ifịk ke kiet ke otu esop ẹdude ke Zug, Switzerland.