Ntọt Mme Anditan̄a Obio Ubọn̄

Ẹnọ Ediyom Abasi Akpanikọ Utịp

KE ỌYỌHỌ isua tọsịn kiet M.E.N., obio ubọn̄ esien iba eke Judah ọkọyọhọ ye nsunsu utuakibuot. Nte ededi, ke ufọt ntatara ukpono ndem emi, owo kiet ama odu emi esịt esie ekekemde ye Abasi. Enyịn̄ esie ekedi Jehoshaphat. Prọfet Jehu eketịn̄ aban̄a enye ete: “Ẹmekụt nti n̄kpọ ke idem fo, ke oro afo . . . owụkde esịt fo oyom Abasi.” (2 Chronicles 19:3) Ukem ntre mfịn, ke “ndiọk eyo” emi, ediwak miliọn owo ‘ẹwụk esịt mmọ’ ndiyom Abasi akpanikọ, Jehovah. (2 Timothy 3:1-5) Ifiọkutom emi etienede mi otode Togo, West Africa, ọsọn̄ọ emi.

Casimir akaka ufọkn̄wed Catholic okonyụn̄ adia akpa Udia Ọbọn̄ esie ke ini enye ekedide isua usụkkiet ke emana. Nte ededi, etisịm ini enye edide isua 14, Casimir ama etre ndika ufọkabasi. Emi ama anam enye odu ke ndịk koro enye ekekere ete ke nditaba Mass ekeme ndisụn̄ọ ke imọ ndika hell ikan̄, m̀mê ke nsụhọde n̄kaha, ndika purgatory.

Ke ufọkn̄wed, Casimir ama odụk otu mme uyen oro ẹkesisopde idem ini kiet ke urua ndikpep Bible. Enye n̄ko ama ọtọn̄ọ ndikot Bible ke idem esie. Ke idaha kiet Casimir ama okot ke n̄wed Ediyarade aban̄a enyene-ndịk unam oro ọkọwọrọde ke inyan̄. (Ediyarade 13:1, 2) Ke ini enye okobụpde adausụn̄ otu ukpepn̄kpọ Bible oro aban̄a emi, ẹma ẹdọhọ enye ke unam oro ekedi ata ata unam ndien nte ke enye ke akpanikọ edito ke inyan̄ ọwọrọ. Edinam an̄wan̄a emi ama afịna Casimir koro enye okodụn̄de ekpere Mbenesụk Atlantic. Enye ama enịm ke akpanikọ ete ke imọ ididi kiet ke otu mme akpa owo emi idiọk unam oro editade.

Casimir ama ọtọn̄ọ ndifam okụk esie nnịm man enye ekeme ndifehe nnyọn̄ desert ke edem edere man ọbọhọ idiọk unam oro. Enye ama etịn̄ ọnọ nsan̄a ubet ukpepn̄kpọ esie aban̄a uduak esie. Ke edide kiet ke otu Mme Ntiense Jehovah, nsan̄a ubet ukpepn̄kpọ oro ama ọsọn̄ọ ọdọhọ enye ete ke utọ idiọk unam oro ndomokiet iditoho ke inyan̄ iwọrọ idi. Esisịt ini ke oro ebede, ẹma ẹnọ Casimir ikot ndidụk mme mbono esop ke Ufọkmbono Obio Ubọn̄. Enye ama okop inem mme mbono esop oro onyụn̄ ọtọn̄ọ ndidụk kpukpru ini. Enye n̄ko ama enyịme ukpepn̄kpọ Bible.

Nte Casimir akanamde n̄kọri ke ukpepn̄kpọ esie, ubiọn̄ọ otode ubon ama ọtọn̄ọ. Ubon esie ekesituak ibuot ọnọ mme ete ete onyụn̄ ata unam oro owo mîduọkke iyịp emi okosụhọde ke ẹma ẹkewa uwa. Ke ini Casimir ekesịnde ukpono ukpono ndita unam oro, ẹma ẹdịghe enye ẹnyụn̄ ẹdọhọ enye ọwọrọ ke ufọk. Casimir ama omụm idem akama, ndien owo ikanamke ndịghe oro. Nte ededi, ke ọfiọn̄ ita, ẹkesitem utọ unam oro kpọt ke mme udia ubon. Casimir ama esinyene mfịna ndinyene udia oro ekemde ndidia, edi enye ama ọyọ emi ye mme nsọn̄ọn̄kpọ efen.

Casimir ama aka iso ndinam n̄kọri eke spirit tutu esịm uyakidem ye baptism. Ekem, ẹma ẹmek enye asan̄autom unamutom, enye ama onyụn̄ odụk ọyọhọ otu inan̄ eke Ufọkn̄wed Unọ Mme Asan̄autom Ukpep ke Togo. Idahaemi, enye okop inemesịt ndinam utom unyịmesịt ke n̄kọk itieutom.

Ih, mme ikọ Edidem David ẹdi akpanikọ didie ntem ke ediwak idaha: “Afo ama oyom [Jehovah], oyokụt enye.”—1 Chronicles 28:9.

[Mme ndise ke page 8]

Casimir (nnasia) okop inemesịt ndinam utom unyịmesịt ke n̄kọk itieutom