Ẹbiere Nditiene Usụn̄ Uwem Abasi
Mme Mbono “Usụn̄ Uwem Abasi” ẹma ẹnyene ekese ndinọ mbon oro ẹyomde ndinam n̄kpọ Abasi! Owo kiet oro okodụkde eketịn̄ aban̄a mbono oro nte “utịbe utịbe ini ubọ ukpep, nsịnudọn̄, ye ifiọk.”
OWO en̄wen oro okodụkde ọkọdọhọ ete ke “ekese ama odu ndidara, ndikere, ndida nnyọn̄.” Ẹyak nnyịn idahaemi ikere iban̄a ndutịm oro ke idemesie.
Jesus Christ—Usụn̄, Akpanikọ, ye Uwem
Emi ekedi ibuotikọ akpa usen mbono oro. (John 14:6) Akpa utịn̄ikọ ama owụt uduak oro nnyịn isopde idem ọtọkiet ke mbono: man ẹnọ ukpep efen efen ẹban̄a mfọnn̄kan usụn̄ uwem oro ekemede ndidu, usụn̄ uwem Abasi. Jehovah ekpep ikọt esie nte ẹkpesan̄ade ke mme usụn̄ esie. Enye anam emi ebe ke Bible, “asan̄autom emi anamde akpanikọ, onyụn̄ enyenede ọniọn̄,” ye edisana spirit. (Matthew 24:45-47; Luke 4:1; 2 Timothy 3:16) Nso ifet ke edi ntem ndidi se Andikara ekondo ọnọde ukpep!
Ke ndida ekekem ye ibuotikọ eke usen oro, utịn̄ikọ ibuotikọ mbono ekedi “Ufak Christ—Usụn̄ Oro Abasi Ọnọde Edinyan̄a.” Ke ndida ekekem ye usụn̄ uwem Abasi, edi akpan n̄kpọ ndifiọk udeme Jesus Christ ke uduak Jehovah. Etịn̄ikọ ọkọdọhọ ete: “Ke ufak Jesus Christ mîdụhe, owo ndomokiet, inamke n̄kpọ m̀mê nso ke enye enịm ke akpanikọ m̀mê anam, ikemeke ndinyene nsinsi uwem nto Abasi.” Ekem enye ama okot oto John 3:16, emi ọdọhọde ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” Ndibuọt idem ke uwa ufak Christ oyom ete nnyịn inyene nnennen ifiọk akpanikọ. Emi n̄ko abuana ediyak uwem nnyịn nnọ Jehovah, iyararede emi ke baptism mmọn̄, inyụn̄ idu uwem ke n̄kemuyo ye uwụtn̄kpọ oro Jesus Christ ekenịmde.—1 Peter 2:21.
Edinam uwemeyo ọkọtọn̄ọ ye ibuotikọ oro ọdọhọde “Usụn̄ Ima Idibehe Ifep ke Nsinsi.” Emi ama esịne edineme ufan̄ikọ kiet kiet ke edemede-owo-udọn̄ edinam ima an̄wan̄a eke Paul, oro ẹwetde ke 1 Corinth 13:4-8. Ẹma ẹti otuowo ẹte ke ima n̄waidem edi se ẹdade ẹdiọn̄ọ Ido Ukpono Christ ye nte ke ima ẹnyenede ẹnọ Abasi ye mbọhọidụn̄ ẹdi mme akpan ikpehe ke utuakibuot oro Jehovah enyịmede.
Se iketienede ekedi nneme ikpehe ita emi ibuotikọ edide “Mme Ete ye Eka—Ẹdọdiọn̄ Ẹsiak Usụn̄ Abasi ẹnọ Nditọ Mbufo.” Mme ete ye eka ẹkeme ndin̄wam nditọ mmọ ẹnam n̄kpọ Abasi ebe ke ndinịm eti uwụtn̄kpọ ke ndikot nnyụn̄ n̄kpep Ikọ esie. Mmọ ẹkeme ndidọdiọn̄ nsiak akpanikọ nnọ nditọ mmọ ebe ke ukpepn̄kpọ ubon ofụri ini, ẹnamde enye ekekem ye mme udọn̄ ubon. Edi akpan n̄kpọ n̄ko ndin̄wam nditọwọn̄ ẹbuana ke mme edinam esop ye ke an̄wautom. Okposụkedi edibọk nditọ oro ẹbakde Abasi ke idiọk ererimbot emi edide n̄kpọ-ata, ndinam ntre ada ikpọ utịp edi.
Utịn̄ikọ oro “Yak Jehovah Ọdiọn̄ Fi Enịm ọnọ Itie Ukpono” eketiene nneme emi. Kpa nte obot-eso adade mbateso anam n̄kpọ, kpasụk ntre ke Abasi ada mbon oro ẹduakde ndinam n̄kpọ esie anam n̄kpọ. (Rome 9:20, 21) Enye anam emi ebe ke ndinọ item ke Ikọ esie onyụn̄ ebe ke esop esie. Jehovah ayan̄wam nnyịn ndida mme ukeme nnyịn nnam n̄kpọ ọyọhọ ọyọhọ edieke nnyịn inọde idem nnyịn, idade mme ifet oro ẹbererede inam n̄kpọ, inyụn̄ iyakde enye enen̄ede ikpatisan̄ nnyịn.
Ikpehe oro aduaide owo idem ke ndutịm ama etiene ke emi—“Utom ke An̄wautom Isụn̄utom.” Mme Christian asan̄autom 2,390 oro ẹdade nte mme isụn̄utom ẹnam utom idahaemi ke ofụri isọn̄ ke idụt 148. Mmọ ẹnịm ata eti uwụtn̄kpọ ke edinam akpanikọ ye nsịnifịk ẹnyụn̄ ẹnen̄ede ẹwụt esịtekọm ẹban̄a ifetutom mmọ ndinam utom ke esenidụt. Ke ikpehe ndutịm enye emi ke mbono mme idụt, mme isụn̄utom ẹma ẹneme ẹban̄a mme n̄kpọ-ata ye mme idara eke uwem isụn̄utom.
Akpatre utịn̄ikọ eke akpa usen ekedi “Ndi Uwem Odu ke N̄kpa Ebede?” Mbụme emi afịna ubonowo ke ediwak tọsịn isua. Mme owo ke ofụri n̄ka ẹkere ẹban̄a ibuot nneme oro. Se ẹdade nte ibọrọ inanake. Mmọ ẹdi nsio nsio ukem nte mme ido edinam ye mme ido ukpono mbon oro ẹnọde mmọ. Edi, oyom mme owo ẹkpep akpanikọ.
Mmọdo, etịn̄ikọ ama ọtọt edisio awak-uduot obufa ediye uduot ekpri n̄wed oro enyenede page 32 do Nso Itịbe inọ Nnyịn ke Ini Nnyịn Ikpade? Ediye uduot ekpri n̄wed emi anam ntọn̄ọ ukpepn̄kpọ ukpọn̄ ikpaha ke nsinsi an̄wan̄a onyụn̄ owụt nte ekikere emi edide akpan n̄kpọ ke ekperede ndidi ke kpukpru ido ukpono ererimbot mfịn. Ke in̄wan̄în̄wan̄ ye inem inem usụn̄, enye odụn̄ọde se Bible etịn̄de aban̄a ukpọn̄, ntak emi nnyịn ikpade, ye se itịbede inọ nnyịn ke ini nnyịn ikpade. Ediye uduot ekpri n̄wed emi anam n̄ko idotenyịn emi odude ọnọ mme akpan̄kpa ye mme odu uwem an̄wan̄a. Nso edidiọn̄ ke n̄wed emi edidi ntem ke kpukpru ebiet ọnọ mbon oro ẹyomde akpanikọ!
Ẹtịn̄ Enyịn Ẹkpeme nte Ẹsan̄ade
Nso ibuotikọ oro odotde ke emi ekedi ntem ọnọ udiana usen mbono oro! (Ephesus 5:15) Ndutịm usenubọk okowụhọ ke utom edikwọrọ ikọ ye edinam mbet. Ke ẹma ẹkeneme itien̄wed eke usen ke usen ẹma, ndutịm ama aka iso ye utịn̄ikọ oro “Ndin̄wam Mme Owo Ẹdụk Usụn̄ Oro Adade Esịm Uwem.” Ke ndinam usọp usọp utom emi, edi akpan n̄kpọ ndinyene in̄wan̄în̄wan̄ edu, ifiọkde ite ke ndibuana akpanikọ ye mbon en̄wen edi ifet ye utom. Ke akpa isua ikie E.N., ata ediwak owo ẹma ẹsịn Ikọ Abasi. Nte ededi, kpa ye ubiọn̄ọ, ama odu mme owo ‘ẹmi ẹkenyịmede nsinsi uwem ẹnyụn̄ ẹkabarede ẹnịm ke akpanikọ.’ (Utom 13:48, 50, NW; 14:1-5) Edi kpasụk ntre mfịn. Okposụkedi ediwak owo ẹsịnde akpanikọ Bible, nnyịn ke ika iso ndiyom mbon oro ẹdinamde n̄kpọ nte odotde.—Matthew 10:11-13.
Utịn̄ikọ oro eketienede ekeneme n̄kpọ-ata eke edida etop uwem nsịm mbon en̄wen. Sia etịmde-tịm ọsọn̄ idahaemi ndikụt mme owo ke ufọk, oyom nnyịn inam utom ọyọhọ ọyọhọ inyụn̄ isịn nsio nsio ukeme edieke anade nnyịn ida etop Obio Ubọn̄ isịm ediwak owo nte ikekeme. Ke ediwak idụt, mme asuanetop eti mbụk ẹnyene nti utịp ebe ke unọ ikọ ntiense urụk ukopikọ ye ke ndikwọrọ ikọ ke efakutom mbubehe, ke ntem ẹsịmde mbon oro ekpedide ọkpọsọn̄ n̄kpọ ndisịm mmọ.
Utịn̄ikọ oro ibuotikọ ekedide “Ndikpep Mme Mbet Kpukpru Se Christ Eketemede” okowụhọ ke nte edinyene usọ ke utom ukwọrọikọ nnyịn edide akpan n̄kpọ. Ifori mme ukeme unọ ukpep nnyịn nte nnyịn ikpepde n̄kpọ ito mbon en̄wen inyụn̄ idade ata nti ukpep oro ibọde ke mme mbono esop isịn ke edinam. Nte nnyịn inyenede usọ ke unọ ukpep nnyịn, nnyịn inyene n̄kaiso idatesịt ye uyụhọ ke utom nnyịn ndin̄wam mme owo ẹkpep akpanikọ Bible.
Utịn̄ikọ aban̄ade se uyakidem nnọ ye baptism ọwọrọde akada ikpehe edinam usenubọk ekeberi. Kiet ke otu ọkpọ ikọ oro etịn̄ikọ eketịn̄de ekedi nte ke edieke nnyịn iberide edem ke Abasi ọyọhọ ọyọhọ inyụn̄ idomode ke ofụri esịt ndinam uduak esie, enye ọyọdiọn̄ onyụn̄ omụm nnyịn akama. Enyene-ọniọn̄ owo oro ekewet ete: “Diọn̄ọ [Abasi] ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:6) Idara baptism ke idemesie ekedi akpan n̄kpọ mbono oro owụtde nte ke ediwak owo ẹma ẹtọn̄ọ ndida ekekem ye usụn̄ uwem Abasi.
Ke ini nduọkodudu uwemeyo ama okokụre, ikpehe edinam uwemeyo ọkọtọn̄ọ ye utịn̄ikọ oro “Ndinam Utom ye Anana-Utịt Uwem ke Ekikere.” Uduak Abasi ndinam mme okopitem owo ẹnam n̄kpọ ẹnọ enye ke nsinsi ke isọn̄ oyosu. Do, odot didie ntem nte nnyịn iwụk ekikere, mme uduak, ye idotenyịn nnyịn ke ndinam n̄kpọ Jehovah ye nsinsi ini ke ekikere! Ke adan̄aemi iyomde ndisọn̄ọ nnyene “Usen Ọbọn̄” ke ekikere, edi akpan n̄kpọ nditi nte ke utịtmbuba nnyịn edi ndinam utom ke nsinsi. (2 Peter 3:12) Nditre ndifiọk nnennen ini emi Jesus edisiode usiene Abasi anam nnyịn idu ke edidemede onyụn̄ ọnọ nnyịn ifet ke usen ke usen ndiwụt nte ke nnyịn inam n̄kpọ Jehovah ye mme uduak unana ibụk.
Utịn̄ikọ iba oro ẹketienede ẹkedụn̄ọde ọyọhọ ibuot 4 ke leta oro Paul ekewetde ọnọ ẹsọk mbon Ephesus. Ndusụk ke otu n̄kpọ oro ẹkenemede ẹkedi edidiọn̄ oro nnyịn inyenede ke ‘mme enọ ke owo,’ mme owo ẹmi ẹdotde ke n̄kan̄ eke spirit ẹmi ẹmekde ke edisana spirit. Mbiowo ẹmi ẹnọ item ye ndausụn̄ kaban̄a mme ufọn eke spirit nnyịn. Leta Paul eke odudu spirit n̄ko akpak mme Christian ete ẹmen “obufa owo” ẹsịne. (Ephesus 4:8, 24) Ido Abasi esịne mme utọ edu nte mbọm, mfọnido, nsụkidem, ifụre ifụre ido, ime, ye ima.—Colossae 3:12-14.
Nditịn̄ enyịn n̄kpeme nte isan̄ade abuana ndikpeme idem ke idiọkn̄kpọ emi odude ke ererimbot—kpa ibuotikọ utịn̄ikọ en̄wen. Oyom edida ukem ukem ke edimek unọ idem inemesịt, mme edinam n̄kaowo, ye edibịne mme n̄kpọ eke obụk. Ebede ke ndida item oro odude ke James 1:27 aban̄ade ndikpeme idem ke idiọkn̄kpọ emi odude ke ererimbot nsịn ke edinam, nnyịn inyene edisana idaha ye Abasi inyụn̄ inyene eti ubieresịt. Nnyịn n̄ko imekeme ndidu uwem oro enyenede uduak iyonyụn̄ inyene emem, uforo eke spirit, ye mme utịbe utịbe nsan̄a.
Ekem nneme ikpehe ita oro ibuotikọ ekedide “Mme Uyen—Ẹtiene Usụn̄ Abasi” ama etiene. Ke ẹfiọkde ẹte ke Abasi ama mmimọ onyụn̄ owụt esịtekọm ke mme ukeme mmimọ ndisọn̄ọ ndu ke edisana utuakibuot, n̄kparawa owo ẹkpenyene ndinọ ukeme ikike mmọ ukpep ndinam n̄kpọ esie ke edinam akpanikọ. Usụn̄ kiet ndifori mme ukeme ikike edi ndikot Ikọ Abasi ke usen ke usen nnyụn̄ ntie n̄kere enye. Edieke nnyịn inamde emi, nnyịn imekeme ndidi ndifiọk mme usụn̄ Jehovah. (Psalm 119:9-11) Ẹfori ukeme ikike n̄ko ebe ke ndinyịme nti item ẹtode ete ye eka, mbiowo, ye mme n̄wed N̄ka. Otode edida mme ukeme ikike mmọ nnam n̄kpọ ke nnennen usụn̄, mme uyen ẹbiọn̄ọ edisịn idem n̄kaha ke inyene obụkidem, ndek ndek ikọ, ye ebe-ubọk unọ idem nduọkodudu oro ẹdide edu ererimbot oro adianarede ọkpọn̄ Abasi mi. Ebede ke nditiene usụn̄ uwem Abasi, n̄kparawa owo ye ikpọ owo ẹkeme ndikụt ata unen.
Akpatre utịn̄ikọ usen oro ekedi “Andibot—Edu Esie ye Mme Usụn̄ Esie.” Ke ama okowụt nte ke ediwak biliọn owo ifiọkke Andibot, etịn̄ikọ ama ọdọhọ ete: “Uwem ndinen̄ede nnyene se ọwọrọde enyene ebuana ye edifiọk Andibot, ata Abasi nnyịn; ndifiọk edu esie; nnyụn̄ ndu ke n̄kemuyo ye mme usụn̄ esie. . . . Odu mme akpanikọ ẹban̄ade ererimbot nnyịn ẹnyụn̄ ẹban̄ade nnyịn oro afo ekemede ndida n̄n̄wam mme owo ndinyịme Andibot nnyụn̄ n̄kụt nte enye anamde uwem enyene se ọwọrọde.” Ekem etịn̄ikọ ama eneme uyarade oro owụtde edidu enyene-ọniọn̄ ye ima ima Andibot. Ẹkeda utịn̄ikọ emi ẹkesịm ata-utịt ke ndisio obufa n̄wed—Is There a Creator Who Cares About You?
“Emi Edi Ọkpọ-Usụn̄, Mbufo Ẹsan̄a ke Esịt”
Emi ekedi ibuotikọ ọyọhọ usen ita eke mbono oro. (Isaiah 30:21) Ndutịm ọkọtọn̄ọ ye aduai-owo-idem nneme utịn̄ikọ ita, owụhọde ke n̄kukụt temple eke Ezekiel. N̄kukụt emi enyene akwa n̄kpọ oro ọwọrọde ọnọ ikọt Abasi mfịn, sia enye enyenede ebuana ye edisana utuakibuot ke eyo nnyịn. Ukpọhọde ndifiọk n̄kukụt oro edi emi: Akwa ndutịm temple Jehovah eke spirit ada aban̄a ndutịm esie kaban̄a edisana utuakibuot. Nte ẹkenemede mme ikpehe n̄kukụt oro, mme andikpan̄ utọn̄ ẹma ẹkere ẹban̄a utom mmọ ke ndinọ ibetedem ke utom oro mme ima ima esenyịn oro ẹdide nsụhọ mbon oro ẹyetde aran ye oro mme andibuana ke otu mbọn̄ eke ini iso ẹnamde.
Nte ini akakade ke usenubọk oro, ẹma ẹnam ediye drama Bible emi mbon edinam ẹkesịnede ọyọhọ ọyọhọ usịnen̄kpọ. Ibuotikọ drama oro ekedi “Mme Ubon—Ẹnam Edikot Bible ke Usen ke Usen Edi Usụn̄ Uwem Mbufo!” Enye okowụt mbuọtidem ye uko nditọ Hebrew ita ẹmi ẹkesịnde ndinụhọ ke isọn̄ nnọ owo o-gold emi Edidem Nebuchadnezzar eke Babylon okowụkde. Uduak drama oro ekedi ndiwụt nte ke Bible idịghe n̄wed mbụkeset kpọt edi ke item esie enen̄ede enyene ufọn ọnọ n̄kpri ye ikpọ owo mfịn.
Ikpehe edinam uwemeyo ekedi ini utịn̄ikọ an̄wa oro, “N̄kukụre Usụn̄ Adade Esịm Nsinsi Uwem.” Ke ama okodụn̄ọde mbụk aban̄ade nte ubonowo ọkọduọde odụk idiọkn̄kpọ ye n̄kpa, etịn̄ikọ ama ada ekeberi ye mme ikọ ẹmi ẹnamde owo ekere n̄kpọ mi: “Itien̄wed Bible ọbọpde ibuotikọ mbono eke usen mfịn edi Isaiah ibuot 30, ufan̄ikọ 21, emi ọdọhọde ete: ‘Utọn̄ fo oyokop uyo ke edem fo, ete, “Emi edi ọkpọ-usụn̄, mbufo ẹsan̄a ke esịt,” ke mbufo ẹdiwọn̄ọrede ẹka nnasia, m̀mê ẹnyụn̄ ẹka ufien.’ Nnyịn isan̄a didie ikop uyo emi? Edi ke ndikpan̄ utọn̄ nnọ Ikọ Abasi, kpa Edisana Bible, onyụn̄ ebe ke nditiene ndausụn̄ oro Akwa Anditeme nnyịn, Jehovah Abasi, ọnọde ebe ke enye onyụn̄ ebe ke esop Christian esie eke eyomfịn. Ke akpanikọ, ndinam emi edi n̄kukụre usụn̄ adade esịm nsinsi uwem.”
Akpatre utịn̄ikọ emi ibuotikọ ekedide “Ka Iso Ndisan̄a ke Usụn̄ Jehovah” eketiene ibuotikọ ukpepn̄kpọ Enyọn̄-Ukpeme eke urua oro. Ke ubak ubak, enye ama odụn̄ọde mme akpan n̄kpọ ke ndutịm oro. Ekem etịn̄ikọ ama okot ubiere oro okowụtde uduak ndika iso ndu uwem ke usụn̄ Abasi.
Ubiere oro ekeberi ye mme ikọ ẹmi: “Nnyịn imetịm inịm ite ke ndida mme edumbet, item, ye nsuannọ N̄wed Abasi ndu uwem edi mfọnn̄kan usụn̄ uwem mfịn onyụn̄ esịn eti itiat idakisọn̄ ọnọ ini iso, man nnyịn ikpomụm uwem eke edide ata uwem ikama. Ke akande kpukpru, nnyịn inam ubiere emi koro nnyịn imade Jehovah Abasi ke ofụri esịt, ukpọn̄, ekikere, ye odudu nnyịn!” Kpukpru owo oro ẹkedụkde mbono oro ẹma ẹnyịme ubiere emi ke ndidọhọ ih ke ọkpọsọn̄ uyo!
[Ekebe/Ndise ke page 8]
Ndi Andibot Emi Ekerede Aban̄a Fi Odu?
Obufa n̄wed oro Is There a Creator Who Cares About You? ọnọ uyarade anamde ẹnịm ke akpanikọ ke Andibot odu, kpa Jehovah, onyụn̄ eneme mme edu esie. Ẹnam enye akpan akpan ẹnọ mbon oro ẹnen̄erede ẹnyene ifiọk ke mme n̄kpọ ererimbot edi ẹmi mînịmke Abasi ke akpanikọ. N̄wed emi enyenede page 192 mi eyetịp n̄kpọ esịn n̄ko ke mbuọtidem mme owo ẹmi ẹma ẹkenenịm Abasi ke akpanikọ, anamde esịtekọm mmọ ọkọri kaban̄a edu ye mme usụn̄ esie.
Is There a Creator Who Cares About You? ikereke ite ke andikot enịm Abasi ke akpanikọ. Utu ke oro, enye eneme mme n̄kpọ oro ẹkụtde ye mme ekikere ifiọk ntaifiọk eke ata ndondo emi oro ẹsọn̄ọde ke Andibot odu. Ndusụk ke otu ibuotikọ ẹdi “What Can Add Meaning to Your Life?,” “How Did Our Universe Get Here?—The Controversy,” ye “How Unique You Are!” Mme ibuot eken ẹneme ntak emi nnyịn ikemede nditịm nnịm nte ke ẹda odudu spirit Abasi ẹwet Bible. Obufa n̄wed emi n̄ko ọnọ ekikere Bible ke ofụri ofụri, emi ayararede edu ye mme usụn̄ Andibot. N̄wed emi inemeke ntak emi Abasi ayakde ekese ndutụhọ odu kpọt edi enye n̄ko anam an̄wan̄a nte Abasi editrede oro ke nsinsi.
[Mme ndise ke page 7]
Ediwak owo ẹma ẹna baptism
[Mme ndise ke page 7]
A. D. Schroeder, owo Otu Ukara eke Mme Ntiense Jehovah, ama osio obufa ediye uduot ekpri n̄wed oro
[Mme ndise ke page 8, 9]
Aduai-owo-idem drama ama esịn udọn̄ ọnọ edikot Bible ke usen ke usen