Mmọ Ẹma Ẹnam Uduak Jehovah
Edidahado nnọ Eberede Usụn̄ ọnọ Edinyan̄a
NDITỌIREN Jacob duop oro ẹkedade ke iso akpan isụn̄utom Egypt ẹma ẹnyene enyene-ndịk ndedịbe n̄kpọ. Ediwak isua ke mbemiso mmọ ẹma ẹnyam Joseph eyenete mmọ ẹsịn ke ufụn, ẹdiomide ndisian ete mmọ nte ke idiọk unam okowot enye.—Genesis 37:18-35.
Idahaemi, n̄kpọ nte isua 20 ke oro ebede, ọkpọsọn̄ akan̄ ama enyịk irenowo duop ẹmi ndidi Egypt ndidep ibokpot. Edi n̄kpọ ikasan̄ake ọfọn. Akpan isụn̄utom oro, emi n̄ko ekedide esenyịn udia, ama odori mmọ ikọ ete ke mmọ ẹdi mbon uyep. Enye ama ọkọbi owo kiet ke otu mmọ onyụn̄ ọdọhọ mbon oro ẹkesụhọde ete ẹnyọn̄ ufọk ẹkeda n̄kpri-n̄kan eyeneka mmọ, Benjamin, ẹdi. Ke ini mmọ ẹkenamde ntre, akpan isụn̄utom oro ama anam ndutịm man ẹmụm Benjamin.—Genesis 42:1–44:12.
Judah, kiet ke otu nditọiren Jacob, ama afan̄a. Enye ọkọdọhọ ete: ‘Ke Benjamin mîsan̄ake ye nnyịn inyọn̄, ete nnyịn ayakpa.’ Ekem n̄kpọ oro Judah m̀mê owo ekededi ke otu nsan̄a esie mîkodorike enyịn ama etịbe. Ke ama ọkọnọ ewụhọ ete kpukpru owo ẹwọn̄ọ ke ubet ke ẹsiode nditọ Jacob ẹfep, akpan isụn̄utom oro ama atua eyet ọkpọsọn̄. Ekem, ke ama akafiak okot idem ọdọn̄, enye ama ọdọhọ ete: “Ami ndi Joseph.”—Genesis 44:18–45:3.
Edu Mbọm ye Edinyan̄a
Joseph ama obụp nditọete esie ete: “Nte ete mi ke ododu uwem?” Ibọrọ ikodụhe. Ke akpanikọ, nditọete Joseph ikọdiọn̄ọke se ẹkpetịn̄de. Nte mmọ ẹkpedadara, m̀mê mmọ ẹkpekop ndịk? Kamse, ke isua 20 ko ke edem, mmọ ẹma ẹnyam eren emi ẹsịn ke ufụn. Joseph ama enyene odudu ndikọbi mmọ, ndinọ mmọ ẹnyọn̄ọ ye unana udia, m̀mê—ke akam ọdiọkde akan—ndiwot mmọ! Ye eti ntak, nditọete Joseph “[ikekwe] nte ẹbọrọde enye: koro idem akpade mmọ ke iso esie.”—Genesis 45:3.
Joseph ama ọsọsọp anam idem osụhọde iren ẹmi. Enye ọkọdọhọ ete: “Mbufo ẹsan̄a ẹkpere mi, mbọk.” Mmọ ẹma ẹnam ntre. Ekem enye ama ọdọhọ ete: “Ami ndi Joseph, eyen-ete mbufo, emi mbufo ẹkenyamde ẹnọ ke Egypt. Edi mbufo ẹkûfụhọ, ẹkûnyụn̄ ẹyat esịt koro ẹkenyamde mi ken: koro edi Abasi ọkọdọn̄ mi ete mbem mbufo iso ndinịm uwem.”—Genesis 45:4, 5.
Joseph ikowụtke mbọm ye unana ntak. Enye ama okokụt uyarade edikabade esịt mmọ. Ke uwụtn̄kpọ, ke ini Joseph okodoride nditọete esie ikọ ete ke mmọ ẹdi mbon uyep, enye ama okop mmọ ẹtịn̄de ke otu idemmọ ete: “Nnyịn ikedue eti-eti ke ikọ eyen-ete nnyịn . . . oro esịn nnanenyịn emi etiene nnyịn.” (Genesis 42:21) N̄ko, Judah ama enyịme nditie ufụn ke ibuot Benjamin man otodo ẹfiak ẹda akparawa oro ẹsọk ete esie.—Genesis 44:33, 34.
Ntem, Joseph ama enen ke ndiwụt mbọm. Ke akpanikọ, enye ama ọfiọk ete ke ndinam ntre ama ekeme ndida n̄kesịm edinyan̄a ofụri ubon esie. Ke ntre, Joseph ama ọdọhọ nditọete esie ẹfiak ẹnyọn̄ọ ẹtiene ete mmọ, Jacob, ẹnyụn̄ ẹka ẹkedọhọ enye ẹte: “Ntem ke eyen fo Joseph ọdọhọ, ete, Abasi ama enịm mi ke ọbọn̄ ofụri Egypt: sụhọde tiene mi, kûbịghi: ndien afo oyodụn̄ ke isọn̄ Goshen, oyonyụn̄ ekpere mi, afo ye nditọ fo, ye nditọ nditọ fo, ye otu erọn̄ fo, ye udịm enan̄ fo, ye kpukpru se afo enyenede: nyonyụn̄ mbọk fi do.”—Genesis 45:9-11.
N̄kponn̄kan Joseph
Ẹkeme ndikot Jesus Christ N̄kponn̄kan Joseph, koro mme n̄wọrọnda mbiet n̄kpọ ẹdu ke ufọt irenowo iba ẹmi. Ukem nte Joseph, nditọete esie, mme ekemmọ andito ubon Abraham, ẹma ẹnam n̄kpọ ye Jesus ke idiọk usụn̄. (Men Utom 2:14, 29, 37 domo.) Edi, iren iba ẹmi ẹma ẹkụt n̄wọrọnda ukpụhọde. Nte ini akakade, ẹma ẹkpụhọde itie ufụn Joseph ẹnam enye edi akpan isụn̄utom, emi ekedide udiana Pharaoh. Ukem ntre, Jehovah ama anam Jesus eset ke n̄kpa onyụn̄ emenede enye odori ke n̄kponn̄kan itie ke “ubọk nnasia Abasi.”—Utom 2:33; Philippi 2:9-11.
Nte akpan isụn̄utom, Joseph ama ekeme ndideme udia nnọ kpukpru mbon oro ẹkedide Egypt ndidep ibokpot. Mfịn, N̄kponn̄kan Joseph enyene asan̄autom emi anamde akpanikọ, onyụn̄ enyenede ọniọn̄ ke isọn̄ emi enye adade ọnọ udia eke spirit “ke edikem ini.” (Matthew 24:45-47; Luke 12:42-44) Ke akpanikọ, mbon oro ẹdide ẹbịne Jesus “idikopke aba biọn̄, idinyụn̄ ikopke aba nsat-itọn̄ . . . koro Eyen-erọn̄ emi etiede ke ufọt ebekpo eyedi Andikpeme mmọ, oyonyụn̄ ada mmọ aka ke idịm mmọn̄ uwem.”—Ediyarade 7:16, 17.
Ukpepn̄kpọ Odude ọnọ Nnyịn
Joseph ama ọnọ n̄wọrọnda uwụtn̄kpọ eke mbọm. Ọkpọsọn̄ unenikpe okpokoyom ete enye ọnọ mbon oro ẹkenyamde enye esịn ke ufụn ufen. Ke edide isio, ntụk okpokonụk enye n̄kukụre ndifre mban̄a ndudue mmọ. Joseph ikanamke ndomokiet ke otu iba ẹmi. Utu ke oro, enye ama odomo edikabade esịt nditọete esie ese. Ekem, ke ini enye okokụtde ete ke mfụhọ mmọ okoto esịt, enye ama adahado ọnọ mmọ.
Nnyịn imekeme ndikpebe Joseph. Ke ini owo oro ekeduede nnyịn owụtde ke imenen̄ede ikabade esịt, nnyịn ikpenyene ndidahado nnọ enye. Nte ededi, nnyịn ikpayakke ikpîkpu ntụk ekwi nnyịn enyịn abaha akwa idiọkn̄kpọ. Ke n̄kan̄ eken, nnyịn ikpayakke iyatesịt ekwi nnyịn enyịn abaha mme edinam ata edikabade esịt. Ntre ẹyak nnyịn ika iso ‘ndime ime ye kiet eken, nnyụn̄ mfen kiet eken.’ (Colossae 3:13) Ke ndinam ntre, nnyịn idikpebe Abasi nnyịn, Jehovah, emi ‘amade ndidahado.’—Psalm 86:5; Micah 7:18, 19.