Ediwak Owo Ẹdọhọ ke Imenyene Mbuọtidem
“JESUS edi utịbe! Enye enen̄ede edi utịbe!” ntre ke n̄wan ido ukpono kiet ke Brazil okofiori. Ke akpanikọ, owo ikemeke ndifan̄a odudu oro enyịn̄ Jesus enyenede. Ke ofụri mbụk, mme owo ẹmenyịme ndibọ ufen nnyụn̄ n̄kpa mban̄a enye.
Apostle Peter ye John ẹma ẹkwọrọ ikọ ‘ke enyịn̄ Jesus’ ke Jerusalem. Ke ndinam oro, ẹma ẹmụm ẹnyụn̄ ẹmia mmọ. Edi mmọ “ẹwọrọ ẹkpọn̄ esop, ẹdara koro ẹbatde ẹte mmọ ẹmedot ndibọ esuene kaban̄a enyịn̄ Jesus.”—Utom 5:28, 41.
Antipas ekedi Christian efen ke akpa isua ikie emi akadade enyịn̄ Jesus ke ọsọn̄urua n̄kpọ. Ke akpatre n̄wed Bible, Ediyarade, Jesus etịn̄ aban̄a enye nte “ntiense Mi . . . , owo akpanikọ Mi, emi ẹkewotde ke otu mbufo, ke ebiet oro Satan odụn̄de.” (Ediyarade 2:13) Antipas ama adiana ye mme Christian eken ke Pergamum esịn ndikan̄ mbuọtidem esie ke Christ. Antipas ama ọsọn̄ọ omụm enyịn̄ Jesus akama tutu ọduọk uwem esie!
Ke n̄kpọ nte isua 50 ke ukperedem, ke 155 E.N., owo kiet emi ekekerede Polycarp emi ọkọdọhọde ke idi Christian ama osobo ukem udomo oro ke ini ẹkedọhọde enye osụn̄i Christ. Ibọrọ esie ekedi: “Mmanam n̄kpọ nnọ Enye ke isua 86, ndien akanam Enye inamke mi ukwan̄ n̄kpọ ndomokiet. N̄keme didie ndisụn̄i Edidem mi emi akanyan̄ade mi?” Ke ntak emi enye ekesịnde ndikan̄ Christ, ẹma ẹyịri Polycarp ke eto ẹfọp.
Mme apostle, Antipas, ye mbon eken ẹma ẹnyịme ndida n̄kpa nsọn̄ọ ntiense oro mmọ ẹtiede ẹban̄a Christ! Nso kaban̄a mme owo mfịn?
Enyịn̄ Jesus Mfịn
Enyịn̄ Jesus aka iso ndidemede n̄kpọsọn̄ ntụk. Ke Latin America, ufọkabasi oro ẹdọhọde ke imenịm Jesus ke akpanikọ ẹdọdiọn̄ ẹkọri ẹkan ke ibat ke mme iduọkisua ndondo emi. Idem n̄kpri-n̄kan obio-in̄wan̄ ẹnyene ufọkabasi Pentecostal. Ke ukem ini oro, odudu ukaraidem eke mme utọ ufọkabasi oro ke ọkọri. Ke uwụtn̄kpọ, ke Ufọkmbet ye Akwa Ufọkmbet Brazil, mme andibuana ke mme ufọkabasi ẹmi ẹnyene itie 31.
Jesus n̄ko edi akpan owo emi udọn̄ obufa n̄ka ido ukpono ke United States owụhọde. Mme anditiene enye ẹkot idemmọ Mme Andinịm Un̄wọn̄ọ. Magazine Time ama ọtọt ke 1997 ete ke ibat mme andidụk mme mboho mmọ ama ọkọri oto 4,200 ke 1991 esịm miliọn 1.1 ke 1996. Kiet ke otu ikwọ esie aka ntem: “Oh edikan ke Jesus, Andinyan̄a mi ke nsinsi.”
Nte ededi, idịghe kpukpru ekikere oro enyịn̄ Jesus edemerede ẹdi nti. Ẹsiwak ndida enyịn̄ esie n̄n̄wana ekọn̄. Ẹma ẹwot mme Jew ọkwọkudịm, ẹwot ekese mme okpono ndem, ẹtụhọde, ẹkpok ndido ẹnyụn̄ ẹyịri mme asiak isio ido ukpono ke eto ẹfọp—kpukpru ke enyịn̄ Jesus. Ndien ke ata ndondo emi, ẹkụt nte edida utom ukwọrọikọ nnam mbubịne ọwọrọde etop. Kpukpru ẹmi ẹdi oburobụt ye etek-owo-esịt edida enyịn̄ Jesus ye se enye enen̄erede ada ọnọ nnam n̄kpọ ke idiọk usụn̄!
N̄ko-n̄ko, enye edemerede mme akpan mbụme: Nso ibuana ke ndinyene mbuọtidem ke enyịn̄ Jesus? Ndien nso idi ekikere Mme Ntiense Jehovah ke ibuot nneme emi? Ibuotikọ oro etienede ọyọbọrọ mme mbụme ẹmi.