Kpeme Idem Ye Edidep Itie!
ẸMA ẹkpono Simon eke Samaria etieti ke obio esie. Enye okodu uwem ke akpa isua ikie E.N., ndien idem ama akpa mme owo aban̄a ubreidiọn̄ esie tutu ẹsitịn̄ ẹban̄a enye ẹte: “Owo emi edi odudu Abasi emi ekerede Akwa Odudu.”—Utom 8:9-11.
Nte ededi, ke Simon ama akakabade edi Christian emi anade baptism, enye ama okụt odudu emi eketịmde okpon akan enye emi enye okowụtde ke mbemiso. Ekedi odudu emi ẹkenọde mme apostle Jesus, anamde mmọ ẹkeme ndinọ mbon en̄wen mme utịbe utịbe enọ eke edisana spirit. Emi ama otụk Simon tutu enye ọnọ mme apostle okụk onyụn̄ eben̄e ete: “Ẹnọ mi nde odudu emi, man owo ekededi eke ndidoride enye ubọk ọkpọbọ Edisana Spirit.”—Utom 8:13-19.
Apostle Peter ama asua ọnọ Simon, ete: “Okụk fo etiene fi atak, koro afo ekerede ete iyada okụk idep enọ Abasi. Afo unyeneke udeme ye nsan̄a ke n̄kpọ emi: koro esịt fo mînenke ke iso Abasi.”—Utom 8:20, 21.
Ọkọn̄ọde ke mbụk Bible emi ke ẹnyene Ikọmbakara oro “simony” [edidep itie], emi ẹkabarede nte “idiọkn̄kpọ eke edidep m̀mê edinyam m̀mê edimenede mme owo itie ke ufọkabasi.” New Catholic Encyclopedia enyịme ete ke akpan akpan ọtọn̄ọde ke ọyọhọ isua ikie 9 esịm 11 “edida okụk ndep itie ke ufọkabasi ọkọyọyọhọ mme ufọkidụn̄ n̄ka mọn̄k, mme usụhọde ọkwọrọ ederi, ukara ufọkabasi, ye idem itie pope.” Ọyọhọ nsiondi usụkkiet eke The Encyclopædia Britannica (1878) ọdọhọ ete: “Edidụn̄ọde mbụk aban̄ade mme ndedịbe mbono Pope anam eyen ukpepn̄kpọ enịm ke akpanikọ nte ke akananam idụhe umekowo oro ẹkenamde emi edidep itie mîkabuanake, ke adan̄aemi ke ediwak idaha edidep itie emi ẹkesinamde ke ndedịbe mbono oro ẹkedide orụk oro ẹkekponide ẹkan, ẹnyenede bụt ẹkan, ẹnyụn̄ ẹnade in̄wan̄în̄wan̄ ẹkan.”
Ana mme ata Christian mfịn ẹkpeme idem ye edidep itie. Ke uwụtn̄kpọ, ndusụk owo ẹkeme ndinọ mbon oro ẹkemede ndinọ mmọ mme ifetutom efen efen ebeubọk itoro ye mme enọ. Ke n̄kan̄ eken, mbon oro ẹkemede ndinọ mme utọ ifetutom oro ẹkeme ndiwụt uma nnọ mbon oro ẹkemede—ndien ediwak ini ẹsinyenede ọkpọsọn̄ udọn̄—ndinọ mmọ mme enọ. Idaha mbiba ẹbuana edidep itie, ndien N̄wed Abasi obiom utọ edinam oro ikpe in̄wan̄în̄wan̄. Peter ama akpak Simon ete: “Kabade esịt ndien, kpọn̄ idiọk ido fo emi, nyụn̄ kpe Ọbọn̄ ubọk, m̀mê ndusụk enye ayadahado ọnọ fi ke se ekerede ntem ke esịt fo [“idiọk uduak fo emi,” New Jerusalem Bible]. Koro n̄kụt nte afo etie ke ata ndot-ndot itie ye ke urụk ukwan̄n̄kpọ.”—Utom 8:22, 23.
Nte enemde, Simon ama okụt nte idiọk udọn̄ esie ọkọdiọkde. Enye ama ekpe mme apostle ubọk ete: “Ẹkpe Ọbọn̄ ubọk ẹnọ mi, ẹte, se mbufo ẹtịn̄de ndomo kiet okûsịm mi.” (Utom 8:24) Ke ẹdade akpan ukpepn̄kpọ oro odude ke mbụk emi ẹsịn ke edinam, mme ata Christian ẹdomo ndifep ntọi edidedep itie ekededi.