Ndisan̄a ye Abasi—Mme Akpa Usio-Ukot

“Ẹsan̄a ẹkpere Abasi, ndien enye ayasan̄a ekpere mbufo.”—JAMES 4:8.

1, 2. Ntak emi afo ọkpọdọhọde ke edi akwa ifet ndinam n̄kpọ nnọ Jehovah?

EREN oro ama ọbọ ufen ke ufọk-n̄kpọkọbi ke ediwak isua. Ekem ẹma ẹkot enye ọwọrọ edi ke iso andikara idụt oro. N̄kpọ ẹketịbe usọp usọp. Inikiet inikiet, owo n̄kpọkọbi oro ama okụt idemesie anamde utom ọnọ edidem oro okokopde odudu akan emi okodude ke isọn̄ ini oro. Ẹma ẹnọ akani owo n̄kpọkọbi emi akwa ifetutom ye n̄wọrọnda ukpono. Joseph—eren emi inikiet ko ẹkedọn̄de ukot ke ebuka—akasan̄a ye edidem idahaemi!—Genesis 41:14, 39-43; Psalm 105:17, 18.

² Mfịn, mme owo ẹnyene ifet ndinam utom nnọ owo emi enen̄erede okpon akan Pharaoh eke Egypt. Akakan Owo ke ekondo ọnọ kpukpru nnyịn ikot ndinam n̄kpọ nnọ enye. Nso enyene-uten̄e ifet ke edi ntem ndinam ntre ndinyụn̄ n̄kọri n̄kpet n̄kpet itie ebuana ye Jehovah, ata ọkpọsọn̄ Abasi! Ke N̄wed Abasi, ẹwụt ke uku uku odudu ye ubọn̄ ọkọrọ ye ifụre, uyai, ye inemesịt ẹdu ye enye. (Ezekiel 1:26-28; Ediyarade 4:1-3) Ima akara kpukpru edinam esie. (1 John 4:8) Akananam enye isụhu nsu. (Numbers 23:19) Ndien akananam Jehovah ikpụhu mbon oro ẹnamde akpanikọ ẹnọ enye. (Psalm 18:25) Ke ndidu uwem ke n̄kemuyo ye ndinen n̄kpọ oro enye oyomde oto nnyịn, nnyịn imekeme ndidu uwem inemesịt oro enyenede uduak idahaemi, ye nsinsi uwem ke ekikere. (John 17:3) Idụhe andikara edide owo oro ọnọde n̄kpọ ekededi oro ekperede-kpere ndimen udomo ye mme utọ edidiọn̄ ye ifetutom oro.

3. Ke nso usụn̄ ke Noah ‘akasan̄a ye Abasi’?

³ Ke anyanini ko, ete-ekpụk oro Noah ama ebiere ndidu uwem ke n̄kemuyo ye uduak Abasi. Kaban̄a enye, Bible ọdọhọ ete: “Noah enen onyụn̄ ọfọn ama ke eyo esie, Noah asan̄a ye Abasi.” (Genesis 6:9) Edi akpanikọ, Noah ikasan̄ake ye Jehovah ke ata ata usụn̄, sia akanam baba owo kiet mîkam “ikwe Abasi.” (John 1:18) Utu ke oro, Noah akasan̄a ye Abasi koro enye akanamde se Abasi ọkọdọhọde enye anam. Sia Noah akayakde ofụri uwem esie esịn ke ndinam uduak Jehovah, enye ama adara ufiop ufiop, ntotụn̄ọ itie ebuana ye Ata Ọkpọsọn̄ Abasi. Ukem nte Noah, ediwak miliọn owo mfịn ke ‘ẹsan̄a ye Abasi’ ebe ke ndida item ye ukpep Jehovah ndu uwem. Didie ke owo ọtọn̄ọ utọ usụn̄ uwem oro?

Nnennen Ifiọk Edi Akpan N̄kpọ

4. Didie ke Jehovah ọnọ ikọt esie ukpep?

⁴ Man isan̄a ye Jehovah, ana nnyịn ibem iso idifiọk enye. Prọfet Isaiah ama ebem iso etịn̄ ete: “Ama ekem ke utịt eyo, obot ufọk Jehovah oyowụhọ ke enyọn̄ ikpọ obot, onyụn̄ okon̄ akan n̄kpri obot; ndien kpukpru mme idụt ẹyebụn̄ọ ẹdụk ke esịt. Ndien ediwak obio ẹyeka ẹkedọhọ, ẹte, Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ, nnyịn iyonyụn̄ isan̄a ke usụn̄ esie: koro mme ewụhọ ẹyeto ke Zion, uyo Jehovah oyonyụn̄ oto ke Jerusalem.” (Isaiah 2:2, 3) Ih, nnyịn imekeme ndinyene mbuọtidem nte ke Jehovah eyeteme kpukpru mbon oro ẹyomde ndisan̄a ke usụn̄ esie. Jehovah ọmọnọ Ikọ esie, kpa Bible, enye onyụn̄ an̄wam nnyịn ndidiọn̄ọ enye. “Asan̄autom emi anamde akpanikọ, onyụn̄ enyenede ọniọn̄” edi usụn̄ kiet emi enye adade anam emi. (Matthew 24:45-47) Jehovah ada “asan̄autom emi anamde akpanikọ” ndinọ ukpep eke spirit ebe ke mme n̄wed ẹkọn̄ọde ke Bible, mme mbono esop Christian, ye ndutịm ukpepn̄kpọ Bible mfọn. Abasi n̄ko an̄wam ikọt esie ndidiọn̄ọ Ikọ esie ebe ke edisana spirit esie.—1 Corinth 2:10-16.

5. Ntak emi akpanikọ N̄wed Abasi edide ọsọn̄urua n̄kpọ ntre?

⁵ Okposụkedi nnyịn mîkpehe okụk ndinyene akpanikọ Bible, enye edi ọsọn̄urua n̄kpọ. Nte nnyịn ikpepde Ikọ Abasi, nnyịn imekpep iban̄a Abasi ke idemesie—enyịn̄ esie, edu esie, uduak esie, ye usụn̄ oro enye anamde n̄kpọ ye mme owo. Nnyịn imọfiọk n̄ko mme ibọrọ ẹnamde owo ọwọrọ ufụn ke mme akpan mbụme ke uwem: Ntak emi nnyịn idude mi-e? Ntak emi Abasi ayakde idiọk ido odu? Nso ke ini iso akama? Ntak emi nnyịn ikọride isọn̄ inyụn̄ ikpade? Nte uwem odu ke n̄kpa ebede? Akan oro, nnyịn imekpep se idide uduak Abasi kaban̄a nnyịn, oro edi, nte nnyịn ikpasan̄ade man inem enye esịt ọyọhọ ọyọhọ. Nnyịn imekpep nte ke mme n̄kpọ oro enye oyomde ẹwụt eti ibuot ẹnyụn̄ ẹnyene mme utịbe utịbe ufọn ke ini nnyịn idude uwem ekekem ye mmọ. Ke ẹsiode ukpep otode Abasi ẹfep, nnyịn ikpọdiọn̄ọke mme utọ n̄kpọ oro tutu amama.

6. Nso usụn̄ uwem ke nnennen ifiọk Bible an̄wam nnyịn ndibịne?

⁶ Akpanikọ Bible okop odudu onyụn̄ onụk nnyịn ndinam mme ukpụhọde ke uwem nnyịn. (Mme Hebrew 4:12) Mbemiso ikenyenede ifiọk N̄wed Abasi, nnyịn n̄kukụre ikekeme ndisan̄a “nte ido eyo eke ererimbot emi edide.” (Ephesus 2:2) Edi nnennen ifiọk Ikọ Abasi etịm isio isio usụn̄ uwem ọnọ nnyịn man otodo nnyịn ikeme ‘ndisan̄a ke ido nte odotde Ọbọn̄, inem Enye esịt ke kpukpru usụn̄.’ (Colossae 1:10) Nso n̄kpọ idatesịt ke edi ntem ndinam mme akpa usio-ukot ke ndisan̄a ye Jehovah, ata n̄kponn̄kan Owo ke ofụri ekondo!—Luke 11:28.

Akpan Usio-Ukot Iba —Uyakidem Nnọ ye Baptism

7. Nte ikpepde Ikọ Abasi, nso akpanikọ aban̄ade ndausụn̄ owo akabade ana in̄wan̄în̄wan̄?

⁷ Ke ini nnyịn ikọride ke ifiọk Bible, nnyịn itọn̄ọ ndidụn̄ọde mme edinam owo ye uwem nnyịn ke un̄wana eke spirit eke Ikọ Abasi. Ke ntem uyarade ata akpanikọ akabade ana in̄wan̄în̄wan̄. Prọfet Jeremiah eketịn̄ akpanikọ oro anyan ini ko, emi ekewetde ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Mme owo—kpukpru nnyịn—imoyom ndausụn̄ Abasi.

8. (a) Nso isinụk mme owo ndiyak idem nnọ Abasi? (b) Nso idi uyakidem Christian?

⁸ Ndifiọk nte akpanikọ emi edide akpan n̄kpọ onụk nnyịn ndiyom ndausụn̄ otode Jehovah. Ndien ima inyenede inọ Abasi onụk nnyịn ndiyak uwem nnyịn nnọ enye. Ndiyak idem nnọ Abasi ọwọrọ ndika mbịne enye ke akam nnyụn̄ nsọn̄ọ n̄n̄wọn̄ọ ndida uwem nnyịn nnam n̄kpọ nnọ enye nnyụn̄ nsan̄a ke usụn̄ esie ke edinam akpanikọ. Ke ndinam emi, nnyịn itiene uwụtn̄kpọ Jesus, emi ọkọnọde Jehovah idemesie ye ọkpọsọn̄ ubiere ndinam uduak Abasi.—Mme Hebrew 10:7.

9. Ntak emi mme owo ẹyakde uwem mmọ ẹnọ Jehovah?

⁹ Akananam Jehovah Abasi inyịkke m̀mê ndikpakpak owo ekededi ndinam uyakidem nnọ enye. (Men 2 Corinth 9:7 domo.) Akan oro, Abasi iyomke baba owo kiet ayak uwem esie ọnọ Imọ ke ntak ntụk ibio ini. Mbemiso anade baptism, anaedi owo ama ededi mbet, ndien oro oyom ọkpọsọn̄ ukeme ndikọ ifiọk. (Matthew 28:19, 20) Paul ama ekpe ye mbon oro ẹma ẹkenana baptism ‘ndida ikpọkidem mmọ nnọ Abasi nte odu-uwem uwa, emi asanade, emi onyụn̄ enemde Abasi ndibọ, kpa edisana utom ye ukeme ukere n̄kpọ mmọ.’ (Rome 12:1) Edi kpa ke ukem usụn̄ edida ukeme ukere n̄kpọ nnyịn nnam n̄kpọ ke nnyịn inam uyakidem inọ Jehovah Abasi. Ke ima ikekpep se ibuanade inyụn̄ itịn̄ enyịn ikọk ibuot ke n̄kpọ emi, nnyịn ke unyịmesịt ye ke idatesịt iyak uwem nnyịn inọ Abasi.—Psalm 110:3.

10. Nso ebuana ke ediyak idem nnọ enyene ye baptism?

¹⁰ Ke ima ikebịne Abasi ke akam ke ndịbe nditịn̄ ubiere nnyịn ndisan̄a ke usụn̄ esie, nnyịn inam usio-ukot efen. Nnyịn inam ẹfiọk uyakidem nnyịn an̄wan̄wa ebe ke baptism nnyịn ke mmọn̄. Emi edi an̄wan̄wa uyarade nte ke nnyịn imọn̄wọn̄ọ ndinam uduak Abasi. Ke ntọn̄ọ ntọn̄ọ utom ukwọrọikọ esie ke isọn̄, Jesus ama ana baptism ke ubọk John, ke ntem enịmde uwụtn̄kpọ ọnọ nnyịn. (Matthew 3:13-17) Ekem, Jesus ama osio mme anditiene enye ọdọn̄ ete ẹkenam mme mbet ẹnyụn̄ ẹnịm mmọ baptism. Ke ntre, uyakidem nnọ ye baptism ẹdi akpan usio-ukot ẹnọ owo ekededi emi oyomde ndisan̄a ye Jehovah.

11, 12. (a) Didie ke ẹkeme ndimen baptism ndomo ye udianndọ? (b) Nso mbiet ke ẹkeme ndikụt ke ufọt itie ebuana nnyịn ye Jehovah ye enye oro odude ke ufọt ebe ye n̄wan?

¹¹ Ndikabade ndi mbet Jesus Christ oro ama akayak idem ọnọ onyụn̄ ana baptism aka nditie nte edidọ ndọ. Ke ediwak idụt, ediwak usio-ukot ẹsibem usen udianndọ iso. Eren ye n̄wan ẹsobo, ẹmehe ye kiet eken, ẹnyụn̄ ẹma idemmọ. Ekem ẹdụk ediomi ndọ. Udianndọ ayarade an̄wan̄wa se ẹkebierede ke ndịbe—ndidụk ke ndọ ndien ẹdụn̄ ọtọkiet nte ebe ye n̄wan. Udianndọ owụt ntọn̄ọ akpan itie ebuana oro an̄wan̄wa. Usen oro edi ntọn̄ọ ndọ oro. Ke ẹmende ẹdomo, baptism owụt ntọn̄ọ uwem oro ẹyakde ẹsịn ke ndisan̄a ke itie ebuana oro ẹma ẹkeyak idem ẹnọ Jehovah.

¹² Kere ban̄a uwụtn̄kpọ efen. Ke usen ndọ mmọ ebede, ima odude ke ufọt ebe ye n̄wan ekpenyene nditụn̄ọ nnyụn̄ n̄kọri nsịm ọyọhọ idaha. Man ẹtetịm ẹsịk ẹkpere kiet eken, ana nsan̄andọ mbiba ke unana ibụk ẹdomo ndika iso nnyụn̄ nsọn̄ọ itie ebuana ndọ mmọ. Okposụkedi nnyịn mîdụkke ke ndọ ye Abasi, ke ima ikana baptism ana nnyịn inam utom ndimụm n̄kpet n̄kpet itie ebuana ye Jehovah n̄kama. Enye okụt onyụn̄ enem esịt ke ukeme nnyịn ndinam uduak esie onyụn̄ esịk ekpere nnyịn. “Ẹsan̄a ẹkpere Abasi,” ntem ke James ekewet, “ndien enye ayasan̄a ekpere mbufo.”—James 4:8.

Ndisan̄a ke Nde Ikpat Jesus

13. Ke ndisan̄a ye Abasi, uwụtn̄kpọ anie ke nnyịn ikpetiene?

¹³ Man isan̄a ye Jehovah, ana nnyịn ida ekekem ye uwụtn̄kpọ oro Jesus Christ ekenịmde. Apostle Peter ekewet ete: “Ẹkekot mbufo ẹte ẹdinam oro; koro Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.” (1 Peter 2:21) Sia Jesus ekedide mfọnmma owo nnyịn inyụn̄ idide mme anana mfọnmma, nnyịn ikemeke nditiene uwụtn̄kpọ oro enye ekenịmde ye unana ndudue. Kpa ye oro, Jehovah odori enyịn nnyịn ndinam ofụri se ikemede ndinam. Ẹyak nnyịn ikere iban̄a ikpehe ition eke uwem ye utom Jesus oro mme Christian oro ẹyakde idem ẹnọ ẹkpedomode ndikpebe.

14. Nso ibuana ke ndidiọn̄ọ Ikọ Abasi?

¹⁴ Jesus ama enyene nnennen ye ntotụn̄ọ ifiọk Ikọ Abasi. Ke utom ukwọrọikọ esie, Jesus ama okot ndien ndien oto N̄wed Abasi Usem Hebrew. (Luke 4:4, 8) Edi akpanikọ, ndiọi adaiso ido ukpono eke ini oro ẹma ẹsikot n̄ko ẹto N̄wed Abasi. (Matthew 22:23, 24) Ukpụhọde ekedi nte ke se N̄wed Abasi eketịn̄de ama an̄wan̄a Jesus, ndien enye ama ada mmọ esịn ke edinam ke uwem esie. Enye ikọfiọkke sụk ikọ Ibet edi n̄ko se enye ọwọrọde. Nte nnyịn itienede uwụtn̄kpọ Christ, nnyịn n̄ko ikpodomo ndinam Ikọ Abasi an̄wan̄a nnyịn, ifiọkde se enye ọwọrọde. Ke ndinam ntre, nnyịn imekeme ndikabade ndi mme anamutom oro Abasi ọnọde unyịme, ẹmi ikemede ‘nditịm nsiak ikọ akpanikọ.’—2 Timothy 2:15.

15. Didie ke Jesus ekenịm uwụtn̄kpọ ke nditịn̄ mban̄a Abasi?

¹⁵ Christ Jesus ama etịn̄ ọnọ mbon en̄wen aban̄a Ete esie eke heaven. Jesus ikomụmke ifiọk Ikọ Abasi oro enye ekenyenede ikama ke idemesie ikpọn̄. Idem mme asua esie ẹkekot enye “Andikpep,” koro ke kpukpru ebiet oro enye akakade enye ama etịn̄ ọnọ mbon en̄wen aban̄a Jehovah ye mme uduak Esie. (Matthew 12:38) Jesus ama ọkwọrọ ikọ an̄wan̄wa ke ikpehe temple, ke mme synagogue, ke ikpọ obio, ye ke mme obio-in̄wan̄. (Mark 1:39; Luke 8:1; John 18:20) Enye ekekpep n̄kpọ ye mbọm ye mfọnido, owụtde mbon oro enye akan̄wamde ima. (Matthew 4:23) Mbon oro ẹtienede uwụtn̄kpọ Jesus ẹyom n̄ko ediwak ebiet ye mme usụn̄ ndikpep mbon efen mban̄a Jehovah Abasi ye mme utịbe utịbe uduak esie.

16. Itie ebuana oro Jesus ekenyenede ye mme ekemmọ andituak ibuot nnọ Jehovah ekedi n̄kpet n̄kpet adan̄a didie?

¹⁶ Jesus ama enyene n̄kpet n̄kpet itie ebuana ye mbon efen oro ẹketuakde ibuot ẹnọ Jehovah. Ke adan̄aemi Jesus eketịn̄de ikọ ọnọ otuowo ke idaha kiet, eka esie ye nditọeka esie oro mîkenịmke ke akpanikọ ẹma ẹdi ndineme nneme ye enye. Mbụk Bible ọdọhọ ete: “Owo kiet ọdọhọ Enye ete, Sese, uka ye nditọ-uka ke ẹda ke an̄wa, ẹyom Fi, ndineme ye Afo. Edi Enye ọbọrọ owo emi ọdọhọde ntem ye Enye, ete, Anie edi eka Mi? mme anie ẹnyụn̄ ẹdi nditọ-eka Mi? Ndien Enye anyan ubọk owụt mbet Esie, onyụn̄ ọdọhọ ete, Sese, eka Mi ye nditọ-eka Mi! Koro owo ekededi eke anamde se Ete Mi emi odude ke heaven amade, enye edi eyen-eka Mi eren ye eyen-eka Mi an̄wan, ye eka Mi.” (Matthew 12:47-50) Emi iwọrọke ite ke Jesus ama esịn ubon esie, koro mme n̄kpọntịbe oro ẹketienede ẹwụt ẹte ke enye ikanamke ntre. (John 19:25-27) Edi, mbụk emi ọsọn̄ọ owụt ima oro Jesus ekenyenede ọnọ mme ekemmọ andinịm ke akpanikọ. Ukem ntre mfịn, mbon oro ẹsan̄ade ye Abasi ẹdụk nsan̄a ye mme asan̄autom Jehovah efen ẹnyụn̄ ẹkọri ntotụn̄ọ ima ẹnọ mmọ.—1 Peter 4:8.

17. Didie ke Jesus ekese edinam uduak Ete esie eke heaven, ndien didie ke oro okpotụk nnyịn?

¹⁷ Ebede ke ndinam uduak Abasi, Jesus ama owụt ima ọnọ Ete esie eke heaven. Jesus ama anam item Jehovah ke kpukpru n̄kpọ. Enye ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34) Christ ọkọdọhọ n̄ko ete: “Ami [nnam] se inemde [Abasi] esịt kpukpru ini.” (John 8:29) Jesus ama ama Ete esie eke heaven tutu “Enye osụhọde idem, akabade osụk ibuot tutu osụn̄ọ ke n̄kpa, kpa n̄kpa [ke eto ndutụhọ, NW].” (Philippi 2:8) Ndien, Jehovah ama ọdiọn̄ Jesus, emenede enye ọnọ idaha andikara ye ukpono emi Jehovah ke idemesie ikpọn̄ okponde akan. (Philippi 2:9-11) Ukem nte Jesus, nnyịn iwụt ima oro imade Abasi ebe ke ndinịm mme ewụhọ esie ye ke ndinam uduak esie.—1 John 5:3.

18. Ke nso usụn̄ ke Jesus ekenịm uwụtn̄kpọ ke n̄kpọ aban̄ade akam?

¹⁸ Jesus ekedi owo akam. Enye ama ọbọn̄ akam ke ini baptism esie. (Luke 3:21) Mbemiso ekemekde apostle esie 12, enye ama ada ofụri okoneyo oro ọbọn̄ akam. (Luke 6:12, 13) Jesus ama ekpep mme mbet esie ndibọn̄ akam. (Luke 11:1-4) Ke okoneyo oro mbemiso n̄kpa esie, enye ama ọbọn̄ akam ọnọ mme mbet esie onyụn̄ ọbọn̄ ye mmọ. (John 17:1-26) Akam ekedi akpan ubak uwem Jesus, idem kpa nte ekpedide ke uwem nnyịn, sia nnyịn idide mme anditiene enye. Nso ukpono ke edi ntem ndinyene nneme ye Andikara Ekondo ke akam! Akan oro, Jehovah esibọrọ akam, koro John ekewet ete: “Nnyịn imonyụn̄ ibụre ifiọk iban̄a Enye, ite, edieke nnyịn iben̄ede n̄kpọ ekededi nte ekemde uduak Esie, Enye ọbiọn̄ utọn̄ ke eben̄e nnyịn; ndien edieke nnyịn ifiọkde ite, Enye ọbiọn̄ utọn̄ ke eben̄e nnyịn, nnyịn imonyụn̄ ifiọk ite, imọbọ se ikeben̄ede Enye.”—1 John 5:14, 15.

19. (a) Ewe edu Jesus ke nnyịn ikpekpebe? (b) Ke mme usụn̄ ewe ke nnyịn ibọ ufọn ito edikpep uwem ye utom Jesus?

¹⁹ Ekese n̄kpọ ẹdu ndikpep nto editịn̄ enyịn ndụn̄ọde uwem ye utom Jesus Christ eke isọn̄! Tie kere mme edu oro enye okowụtde: ima, mbọm, mfọnido, odudu, edida ukem ukem, eti ibuot, nsụhọdeidem, uko, ye unana ibụk. Adan̄a nte nnyịn ikpepde n̄kpọ iban̄a Jesus, ntre ke udọn̄ nnyịn ndidi mme anditiene enye oro inamde akpanikọ edikpon. Ifiọk aban̄ade Jesus n̄ko odụri nnyịn enen̄ede ekpere Jehovah. Kamse, Jesus ekedi mfọnmma mbiet Ete esie eke heaven. Enye ama enen̄ede ekpere Jehovah tutu enye ekekeme ndidọhọ: “Owo eke okokụtde Mi okokụt Ete.”—John 14:9.

Buọt Idem ke Abasi Ndimụm Fi N̄kama

20. Didie ke ikeme ndinyene uko ke ndisan̄a ye Jehovah?

²⁰ Ke ini nditọwọn̄ ẹkpepde-kpep ndisan̄a, ikpat mmọ ẹsinyenyek. Didie ke mmọ ẹsikpep ndisan̄a uko uko? Ebe n̄kukụre ke edinam ye nsịnifịk. Ọfọn, mbon oro ẹsan̄ade ye Jehovah ẹdomo ndisan̄a uko uko, ye unana ediyok ke nte ẹkekeme. Emi n̄ko oyom ini ye nsịnifịk. Paul ama owụt nte nsịnifịk edide akpan n̄kpọ ke ndisan̄a ye Abasi ke ini enye ekewetde ete: “Ke akpatre itie, nditọ-ete, nnyịn imeben̄e mbufo, inyụn̄ isọn̄ọ ikpe ye mbufo ke Ọbọn̄ Jesus, ite, kpa nte mbufo ẹkekopde ke inua nnyịn nte mbufo ẹkpesan̄ade ẹkenem Abasi esịt, kpa nte mbufo ẹnyụn̄ ẹsan̄ade, mbufo ẹdọdiọn̄ ẹnam ntre.”—1 Thessalonica 4:1.

21. Nte nnyịn isan̄ade ye Jehovah, mme edidiọn̄ ewe ke nnyịn ikeme ndidara?

²¹ Edieke iyakde idem ofụri ofụri inọ Abasi, enye ayan̄wam nnyịn ndika iso nsan̄a ye enye. (Isaiah 40:29-31) Owo ikemeke ndimen n̄kpọ ndomokiet oro ererimbot emi enyenede ndinọ ndomo ye edidiọn̄ oro enye ọnọde mbon oro ẹsan̄ade ke usụn̄ esie. Enye ‘ekpep nnyịn usụn̄ udori, ada nnyịn usụn̄ eke nnyịn idisan̄ade. Edieke nnyịn ikam ikpan̄de utọn̄ ke mbet esie, emem nnyịn eyebiet akpa mmọn̄, edinen ido nnyịn eyebiet mbufụt inyan̄.’ (Isaiah 48:17, 18) Ebede ke ndinyịme ikot ndisan̄a ye Abasi ye ke ndinam ntre ke akpanikọ, nnyịn imekeme ndinyene emem ye enye ke nsinsi.

Didie ke Afo Ọkpọbọrọ?

◻ Ntak edide n̄kpọ ukpono ndisan̄a ye ata Abasi?

◻ Ntak emi ukpepn̄kpọ, uyakidem nnọ, ye baptism ẹdide mme akpa usio-ukot ke ndisan̄a ye Jehovah?

◻ Didie ke nnyịn ikeme nditiene nde ikpat Jesus?

◻ Nnyịn isan̄a didie ifiọk ke Jehovah oyomụm nnyịn akama nte isan̄ade ye enye?

[Mme ndise ke page 13]

Ukpepn̄kpọ, uyakidem nnọ, ye baptism ẹdi mme akpa usio-ukot ke ndisan̄a ye Abasi