Ndi Mary Akakpa Ndammana N̄kpa?

NTE ekemde ye n̄wedmbụk n̄kpọntịbe Obio Ukara Pope oro L’Osservatore Romano, ukpepn̄kpọ Catholic eke Edimen Ndọk ọdọhọ ete: “Ẹma ẹmen Edisana Eyenan̄wan, oro ẹnịmde asana ọbọhọ kpukpru ntọi akpa idiọkn̄kpọ, ke obụkidem ye ke ukpọn̄ ẹdụk ke ubọn̄ eke heaven, ke ini uwem esie eke isọn̄ okokụrede.” Ukpepn̄kpọ emi anam ndusụk mme ekpep ukpepn̄kpọ ido ukpono Catholic ẹdọhọ nte ke Mary “ikakpaha edi ke ẹma ẹmenede enye ndondo oro ẹkpọn̄ uwem eke isọn̄ ẹka ubọn̄ eke heaven,” ntre ke n̄wedmbụk n̄kpọntịbe oro ọdọhọ.a

Ke ndondo emi, Pope John Paul II anam n̄kpọ emi an̄wan̄a ke isio isio usụn̄. Ke Mbono Ofụri Owo ke Obio Ukara Pope ke June 25, 1997, enye ama ọdọhọ ete: “Obufa Testament inọhọ ntọt iban̄a idaha n̄kpa Mary. Ndopuyo oro anam owo ekere ke enye eketịbe ke ndammana usụn̄, ye unana ọyọhọ ntọt ndomokiet oro odotde se ẹtịn̄de ẹban̄a. . . . Mme ekikere oro ẹnọde ndisio enye mfep ke ndammana n̄kpa ẹtie nte inyeneke isọn̄.”

Ikọ Pope John Paul ayarade akamba ndudue oro odude ke ukpepn̄kpọ Edisana Uyomo idịbi. Edieke ẹkenịmde eka Jesus “asana ọbọhọ kpukpru ntọi akpa idiọkn̄kpọ,” didie ke Mary akpakpa oto “ndammana n̄kpa,” emi edide utịp idiọkn̄kpọ oro anamidiọk Adam akayakde ọnọ? (Rome 5:12) Mfịna ukpepn̄kpọ ido ukpono emi etiene ukwan̄ ekikere Ufọkabasi Catholic kaban̄a eka Jesus. Ikpaha owo idem ikaha nte ke ubahade ye ndutịme ẹdemede ke esịt Ufọkabasi Catholic kaban̄a n̄kpọ emi.

Ke adan̄aemi Bible owụtde Mary nte owo osụhọrede idem, anamde akpanikọ, onyụn̄ enyenede ifịk, enye idọhọke ke mme edu ẹmi ẹto “edisana uyomo idịbi.” (Luke 1:38; Utom 1:13, 14) Bible n̄kukụre ọdọhọ: “Kpukpru owo ẹma ẹnam idiọk-n̄kpọ, ẹnyụn̄ ẹtaba ubọn̄ Abasi.” (Rome 3:23) Ih, Mary ama ada idiọkn̄kpọ ye unana mfọnmma amana kpa nte ofụri ubonowo eken, ndien uyarade ndomokiet idụhe nte ke enye ikakpaha ke usụn̄ efen ikan ndammana n̄kpa.—Men 1 John 1:8-10 domo.

[Mme Ikọ idakisọn̄]