Ntak Mûdụhe ye Mmọ?

NDJAUKUA ULIMBA edi isua 73 ke emana, ndien isua oko enye ama aka isan̄ oro okoyomde usụn̄ ke n̄kpọ nte kilomita 450. Enye akasasan̄a ke ofụri anyan usụn̄ oro, ndien akada enye usen 16.

Sụn̄sụn̄ akanieren emi akanam anyan isan̄ esie emi man okodụk kiet ke otu ikpọ mbono Mme Ntiense Jehovah eke isua ke isua. Ke mbono oro ama akasuana, ke ọyọhọde ye idatesịt ye nsọn̄idem eke spirit, enye ama afiak asan̄a ọnyọn̄ ufọk—usen 16 efen. Nte emi ama odot ukeme oro ekesịnde? Ih, ama enen̄ede odot! Ndjaukua Ulimba amanam isan̄ emi ke isua ke isua ke isua ifan̄ ẹbede.

Eren Africa emi ekedi kiet ke otu owo miliọn 15 ẹketode se ibede idụt 230 oro ẹkedụkde ikpọ mbono Mme Ntiense Jehovah isua oko. Nte ededi, ata ekese owo ikenyeneke ndisan̄a ediwak usen n̄ka obio mbono oro. N̄wakn̄kan owo ẹkesan̄a ke ekpri moto, bọs, tren, m̀mê ubomofụm ẹkesịm. Nte afo ekedi kiet ke otu mmọ?

Ke 1998, ẹyefiak ẹnịm ikpọ mbono ke ofụri ererimbot, akpan akpan ke mme ọfiọn̄ ndaeyo. Edieke okopde nsọn̄idem, etie nte Ndjaukua Ulimba ayafiak anam ukem anyan isan̄ oro man okodụk. Enye ye ediwak miliọn owo eken ẹyekop nti, ọsọn̄ọ-mbuọtidem, ye ọnọ-odudu edinam. Ye kpukpru owo oro ẹdụkde, akwa mbono oro edidi akpan n̄kpọ eke isua. Ẹnọ fi n̄ko ufiop ufiop ikot ndidụk. Mme Ntiense Jehovah ke n̄kann̄kụk fo ẹyedara ndisian fi obio mbono oro ekperede fi akan.