Ntak Emi Mmọ Ẹkpọn̄de Ido Ukpono?

KE UFỌT ufọt ọyọhọ isua ikie 19, ọkọsọsọn̄ ndikop andidụn̄ Prussia (idahaemi edide edere edere Germany) ọdọhọde ke imọ inyeneke akpan ido ukpono. Ke akpanikọ, ndikam n̄kpụhọde nto akpan ido ukpono n̄ka ufọkabasi oro edide isio ama ekeme ndinam owo edi se mme bodisi ẹtịn̄de enyịn ẹkpeme. Ini okpụhọde didie ntem!

Mfịn, ediwak mbon Germany ke ẹsịn n̄wed ẹwọrọ ẹkpọn̄ ufọkabasi. Nte mbụk ọdọhọde, owo 1 ke otu owo 4 ẹdọhọ ke mmimọ inyeneke ido ukpono ndomokiet. Ẹkụt ukem edu emi ke Austria ye Switzerland. Edieke mme andibuana ẹdide uwem ido ukpono, do, nte ewetn̄wed owo Germany oro Reimer Gronemeyer esịnde enye, “Mme ufọkabasi Europe ke ẹkpere ndikpa.”

Ntak Emi Mmọ Ẹsịnde Ido Ukpono

Ntak emi ediwak owo ẹsịnde ido ukpono oro ẹtịmde-tịm? Ediwak ini, ke ntak okụk, akpan akpan ke mme idụt oro ẹyomde mme andibuana ẹkpe tax ufọkabasi. Ediwak owo ẹbụp ẹte, ‘Ntak emi okụk emi mbọde ufen n̄n̄wana akpakade ebịne ufọkabasi?’ Akamba uforo ye odudu ufọkabasi anam ndusụk owo ẹfiak edem. Eyedi mmọ ẹnyịme ye Cardinal Joachim Meisner eke Cologne, Germany, emi ọkọdọhọde ete ke ekeme ndidi inyene ufọkabasi omonụk enye ndinọ inyene obụkidem ntịn̄enyịn n̄kaha inyụn̄ “idịghe ke ndida mbuọtidem ke Christ ke akpan n̄kpọ nte ekemde.”

Ediwak owo ke ẹkpọn̄ ufọkabasi mmọ koro mmọ ẹkụtde nte enye asatde-sat, ananade inem, ananade ukeme ndiyụhọ biọn̄ eke spirit mmọ. Mmọ ẹdu ke akan̄ oro prọfet oro Amos ekebemde iso etịn̄ ete, “idịghe akan̄ udia, inyụn̄ idịghe nsat-itọn̄ mmọn̄, edi eke edikop ikọ Jehovah.” (Amos 8:11) Sia mmọ ẹbọde esisịt udia ẹto ido ukpono mmọ, mmọ ẹwọrọ ẹkpọn̄ enye.

Ke adan̄aemi mme mfịna oro ẹsobode ẹdide ata idem n̄kpọ, ndi nnennen n̄kpọ edi ndision̄o idem n̄kpọn̄ kpukpru ido ukpono? Kere ban̄a owo biọn̄ emi okụtde se itiede nte bred. Nte ededi, ke ini enye odomode ndita enye, enye okụt ete ke ẹda ntọn̄ eto ẹnam enye. Nte enye okposion̄o idem ọkpọn̄ ekikere edidia udia nnyụn̄ nyụhọ biọn̄ esie? Baba, enye okpoyom ata udia. Ukem ntre, edieke ido ukpono mîyụhọke biọn̄ eke spirit mme andibuana ke enye, nte mmọ ẹkpenyene ndision̄o idem n̄kpọn̄ ido ukpono? Mîdịghe nte mmọ ẹkpewụt eti ibuot ẹkan ke ndiyom usụn̄ ndiyụhọ biọn̄ eke spirit mmọ? Se ediwak owo ẹnamde edi oro, nte ibuotikọ etienede mi owụtde.