Ẹkpeme Idem ye Mbon Nsahi!

Mfịn, mme ntịn̄nnịm ikọ ẹyọyọhọ, ndien ukpepn̄kpọ aban̄ade ini iso edi mbubehe oro enyenede uforo. “Nte isua 2000 etịmde-tịm asan̄a ekpere,” The Daily Telegraph eke London ọdọhọ, “esen esen n̄kpọ ndien kpa ye oro inen̄ekede idi se owo mîkodorike enyịn ke etịbe. Ediwak tọsịn owo ke ofụri ererimbot ke ẹnyene mme esen esen ndien ediwak ini enyene-ndịk n̄kukụt ẹban̄a ini iso.” Ye ediwak mme anam ndụn̄ọde ọkpọsọn̄ udọn̄ emi kaban̄a ini iso edi sụk edifiak nnyene idotenyịn oro ẹma ẹkenyenyene ẹban̄a mme ukpụhọde oro mîkadaha itie.

NTE n̄kpọisan̄ oro enan̄-mbakara odụride ọkọdọkde ke ibat ke ọyọhọ isua ikie 19, owo kiet ama ebem iso etịn̄ ete ke mme obio Europe ke akpatre ẹdiyọhọ ye ifuọ enan̄-mbakara. Nte ededi, ntịn̄nnịm ikọ esie ikedịghe akpanikọ. Ntem, ke ndidụri ntịn̄enyịn n̄wụt usụn̄ oro mme ntịn̄nnịm ikọ ẹsikpude ndien ndien, The Times eke London ama ọdọhọ ete: “Ini iso etie kpa nte akpakịp ifuọ enan̄-mbakara.”

Mbon efen ẹsasak mbon oro ẹdade ẹkụt n̄kpọndịk. Ke uwụtn̄kpọ, prọfesọ mbubehe kiet ke ufọkn̄wed ntaifiọk kiet ke United States ama afan̄a ye mbon oro ẹdụride owo utọn̄ ẹban̄a idiọk idaha n̄kann̄kụk ete ẹmia imọ ata m̀mê nte mme n̄kpọ ẹtiede ọyọdọdiọk akan. Nte ẹketọtde ke magazine New Scientist, enye ọdọhọ ete ke “uduot uwem nnyịn ke enyene uforo ndien ke oyosụk aka iso ndinam ntre ke nsinsi.”

Ke ufọt ndutịme ke se ẹdọhọde nte n̄kpọ editịbede ye se ẹdọhọde nte mîditịbeke, ediwak owo ẹnịm ke akpanikọ nte ke kpukpru n̄kpọ ẹyeka iso ẹdu ye unana akpan ukpụhọde. Ke ẹsakde ekikere ekededi aban̄ade Abasi ndisịbe ndụk mme mbubehe owo, mmọ ẹwụt edu ebietde eke mbon nsahi ke akpa isua ikie E.N.

Nte Kpukpru N̄kpọ Ẹsụk Ẹdi Ukem?

Ọyọhọ leta iba eke odudu spirit oro Christian apostle Peter ekewetde ke n̄kpọ nte 64 E.N., ama ọtọt ete: “Ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọk itọn̄ mmọ.”—2 Peter 3:3.

Mbon nsahi ẹsiyom ndinam se mmọ ẹdade ẹnam nsahi etie nte edi n̄kpọ imam. Owo oro ayakde idem ọnọ nsahi ekeme ndiduọ ndụk afia ibụk koro owo nsahi esiwakde ndiyom mbon oro ẹkpan̄de utọn̄ ẹnyịme ekikere esie. Ekeme ndidi ndusụk mbon nsahi oro Peter okodụride owo utọn̄ aban̄a ẹketie ntem, ‘ẹsan̄ade ke mme idiọk itọn̄ mmọ.’ Ke anamde mme andikot n̄wed esie ẹdu ke edidemede, apostle oro ama ada orụk ikọ oro odoride nsọn̄uyo. Enye ama odụri owo utọn̄ aban̄a edidi eke ‘mbon nsahi ye nsahi mmọ.’

Mbon nsahi eke akpa isua ikie oro ẹma ẹneni ẹban̄a nte ‘un̄wọn̄ọ edidi’ Christ edide ata idem n̄kpọ, ẹdọhọde ẹte: “Edidi eke Enye ọkọn̄wọn̄ọde ete iyedi enye? koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.” (2 Peter 3:4) Eketie mmọ ntre. Edi, ko ke edem ke isua 33 E.N., Jesus ama ebem iso etịn̄ aban̄a nsobo obio Jerusalem. Enye ọkọdọhọ ete: “Mme usen ẹyesịm fi eke mme asua fo ẹdibotde ibombom ẹkanade fi, ẹkan fi ẹkụk, ẹnyụn̄ ẹbaha fi ke kpukpru n̄kan̄; ẹyenyụn̄ ẹsụhọde fi ẹnịm ke isọn̄, ye nditọ fo ẹmi ẹdụn̄de fi ke esịt; ndien idikpọn̄ke itiat kiet ke enyọn̄ itiat eken ke esịt fo.” Mbon oro ẹkesakde ntọt oro ẹkenam ndudue didie ntem! Ke 70 E.N., udịmekọn̄ Rome ẹma ẹkan Jerusalem ẹkụk ẹnyụn̄ ẹsobo obio oro, ye akpakịp mbio obio ẹtabade uwem. Ntak emi n̄wakn̄kan mme andidụn̄ obio oro mîketịmke idem inọ afanikọn̄ emi? Koro mmọ ikọfiọkke ite ke Abasi ama edi edise mmọ ebe ke Eyen esie, Jesus.—Luke 19:43, 44.

Apostle Peter etịn̄ aban̄a nte Ata Ọkpọsọn̄ Abasi edisịbede odụk ke ini iso. Peter ọtọt ete ke “Usen Ọbọn̄ edibuat nte inọ.” (2 Peter 3:10) Ke ini oro Abasi oyosio mbon unana uten̄e Abasi efep ke ofụri isọn̄ onyụn̄ anyan̄a mbon oro ẹbierede ikpe ẹnọ nte ndinen owo. Nte n̄wedmbụk emi esinamde an̄wan̄a ndien ndien, ‘edidu’ Christ Jesus ọkọtọn̄ọ ke 1914. Edi enye ndinam n̄kpọ nte Andinam ubiereikpe Abasi ke ndisio idiọkido mfep osụk edi ke ini iso. Mmọdo, ntọt apostle oro nte yak ẹkpeme idem ye mbon nsahi enyene ebuana idahaemi ke usụn̄ edide usọp usọp akan.

Ekeme ndidi afo emebebet ke anyan ini ndikụt Abasi esịbede odụk ke mme mbubehe owo. Nso idin̄wam fi ndika iso mbet ke ime ye unana edidi se mbon nsahi ẹkande ubọk? Mbọk kot ka iso.

[Se Ẹwetde ke Ikpọ Abisi ke page 4]

“Mme usen ẹyesịm fi eke mme asua fo . . . [ẹdikande] fi ẹkụk, ẹnyụn̄ ẹbaha fi ke kpukpru n̄kan̄; . . . ndien idikpọn̄ke itiat kiet ke enyọn̄ itiat eken ke esịt fo.” Oro ikedịghe ntọt ndida nnam n̄kpọ nsahi. Udịmekọn̄ Rome ẹma ẹsobo Jerusalem, ye akpakịp uwem ẹtakde.