Eti Edu Uwem Ada Itoro Edi

N̄WEDMBỤK n̄kpọntịbe Italy oro La Gazzetta del Mezzogiorno ama otoro Mme Ntiense Jehovah ke ndimịn̄ ibuotikọ oro “Matera—City of Unique Cave Dwellings” (Matera—Obio N̄wọrọnda Ebietidụn̄ Abaitiat). Ibuotikọ emi okodu ke nsiondi magazine Awake! eke July 8, 1997, emi ẹkesuande ntatara ntatara ke ediwak usem. Ẹkabade Awake! idahaemi ẹsịn ke usem 81 ẹnyụn̄ ẹsuan se ibede idem miliọn 19 ke ofụri ererimbot. N̄wedmbụk n̄kpọntịbe oro ama etịn̄ ete ke Awake! ekenyene ibat oro awakde akan ke ndaeyo emi “ke ini edide edisịm ubịnikọt usuanetop ke ndimenede mbụk ye ndammana usọ obio [Matera] ke enyọn̄.”

N̄wedmbụk n̄kpọntịbe oro ama otoro Mme Ntiense ke ebuana ye Mbono District “Mbuọtidem ke Ikọ Abasi” emi ẹkenịmde ke Matera ke 1997. Ibuotikọ oro ama etịn̄ ete ke Mme Ntiense ẹma ẹkeme “ndinam owo 4,000 ẹka An̄wambre Settembre [obio] XXI ke ufọt ufọt ndaeyo ye ke idak ọkpọsọn̄ ufiop utịn; mmọ ẹma ẹse ẹban̄a edinam ebiet asana, edifiak nyet ndom mbakara, ye mme akpan n̄kpọ ndinam itie mbre emi eye (akpan akpan itie ukaikọt) ke ata mfọn, ẹdade okụk mmọ ẹdep mme n̄kpọ oro ẹkeyomde.”

Mme Ntiense Jehovah ẹdomo ndidi nti mbọhọidụn̄. (Matthew 22:37-39) Mmọ n̄ko ẹtiene item N̄wed Abasi oro: “Ẹkama idem nte odotde ke iso mme Gentile, man . . . mmọ ẹkpeda nti ido mbufo, ẹmi ẹdikụtde ke ini eke ẹdide ndidomo mbufo nse, ẹnọ Abasi ubọn̄.”—1 Peter 2:12.