Nte Abasi Oyosobo Ererimbot?

NTE Pope John Paul II ọdọhọde, ubonowo ekeme ndise ini iso ye mbuọtidem. Enye ama etịn̄ ete ke ofụri mbụk owo, “mme owo ẹmeka iso ẹnam idiọkn̄kpọ, idem ndusụk ini okponde akan mmọ oro ẹketịn̄de ẹban̄a mbemiso ukwọ.” Kpa ye oro, pope oro ama anam an̄wan̄a ete ke, “otode ke mme ikọ ediomi oro Abasi akanamde ye Noah nnyịn ikụt ite ke idiọkn̄kpọ ndomokiet idụhe emi ekemede ndinam Abasi osobo ererimbot emi enye ke idemesie okobotde.”

Ndi edi akpanikọ nte ke Abasi idisoboke ererimbot tutu amama? Bible ọdọhọ nte ke Ukwọ ama ekebe, Abasi ama ọdọhọ Noah ete: “Kpukpru obụkidem iditakke aba ke mmọn̄ ukwọ; ukwọ eke osobode isọn̄ idinyụn̄ idụhe aba.” (Genesis 9:11) Pope oro ọdọhọ ete ke ye mme ikọ ẹmi, Abasi “ama ọn̄wọn̄ọ ndikpeme [isọn̄] nsio ke nsobo.”

Bible anam an̄wan̄a nte ke Andibot idiyakke ẹsobo ekondo nnyịn. “Ererimbot ada ke nsinsi,” ntre ke Bible ọdọhọ. (Ecclesiastes 1:4) Edi odu n̄kpọ efen efen oro ẹnyenede ndikpep nto Ukwọ oro—n̄kpọ emi pope oro mîketịn̄ke iban̄a.

Jesus ọkọdọhọ ete ke mme idaha ke isọn̄ ke ini edidu esie eke ini iso ẹditie “nte mme usen Noah ẹkedide,” emi mme owo “mînyụn̄ ifiọkke tutu ukwọ edi edimen mmọ kpukpru ẹfep.” (Matthew 24:37-39) Ukem ntre, apostle Peter ama ewet ete ke kpa nte “[ẹkedade mmọn̄] ẹfụk ẹnyụn̄ ẹsobo ererimbot emi okodude adan̄aoro,” kpa ntre ke “usen eke Abasi edikpede ikpe ye mmọ ẹmi mîbakke Enye, edinyụn̄ osobo mmọ” asan̄a ekpere ererimbot emi odude ke emi.—2 Peter 3:5-7.

Ndi Jesus ye Peter ẹma ẹfre ẹban̄a ediomi Abasi ye Noah? N̄wan̄ansa-o! Kpa nte eketịn̄de ke ediomi oro ye Noah, Abasi ididaha mmọn̄ ukwọ ida idiọk editịm n̄kpọ emi isịm utịt. Utu ke oro, enye edida odudu “Edidem ndidem ye Ọbọn̄ mbọn̄,” Jesus Christ. (Ediyarade [Apocalypse] 19:11-21) Nte ekemde ye Bible, ke ntre, owo idisoboke isọn̄, edi “ererimbot” idiọk ubonowo eyedisịm utịt ye unana edikpu. (Mme N̄ke 2:21, 22; Ediyarade 11:18) Ke oro ebede, “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.