Ndisọn̄ọ Mbuọtidem Nnyịn ke Ikọ Abasi
EDIWAK owo ẹmekot Bible ẹkan n̄wed efen ekededi. Edi ifan̄ ẹwụt mbuọtidem ke etop esie? Bible ke idemesie anam an̄wan̄a nte ke “idịghe kpukpru owo ẹnyene mbuọtidem.” (2 Thessalonica 3:2) Nte an̄wan̄ade, nnyịn imanake ye mbuọtidem. Ana ẹkọkọri enye. Inaha idem mbon oro ẹnyenede ndusụk udomo mbuọtidem ẹda enye mfefere mfefere. Mbuọtidem ekeme ndibiara nnyụn̄ n̄kpa. Ntem, oyom ukeme man ẹsụk ẹkaiso “ẹkop idem ke mbuọtidem.”—Titus 2:2.
Ye eti ntak, ndien, Otu Ukara eke Mme Ntiense Jehovah ama emek ibuotikọ oro “Mbuọtidem ke Ikọ Abasi” ọnọ udịm udịm mbono district mmọ eke 1997/98. Ediwak miliọn Mme Ntiense ye mmọ en̄wen ke ntem ẹma ẹnyene ifet ndiboho ọtọkiet man ẹsọn̄ọ mbuọtidem mmọ ke Ikọ Abasi.
Ikọ Abasi Edi Akpanikọ—Isọn̄ Mbuọtidem Nnyịn
Emi ekedi ibuotikọ akpa usen mbono. Enye ọkọtọn̄ọ ye mme ikọ itoro ọnọ kpukpru mme andidụk. Uyarade kaban̄a ukpono oro ẹnyenede ẹnọ Bible ama odu ke mbono oro. Edi, ẹma ẹdemede mme mbụme ẹnamde owo ekere n̄kpọ kaban̄a orụk mbuọtidem nnyịn: ‘Nte nnyịn imekeme ndisọn̄ọ se nnyịn inịmde ke akpanikọ, idade Ikọ Abasi nte odudu? Nte nnyịn imowụt esịtekọm inọ udia eke spirit, ye unana edida Bible, mme mbonoesop, ye mme n̄wed ẹkọn̄ọde ke Bible mfefere mfefere? Nte nnyịn ke ikọri ke ima, nnennen ifiọk, ye ikike?’ Etịn̄ikọ ama esịn udọn̄ ọnọ kpukpru owo nditịm nnọ n̄kpan̄utọn̄, owụtde nte “ke ẹtịm mbono District ‘Mbuọtidem ke Ikọ Abasi’ emi ndin̄wam nnyịn itịm ise idem nnyịn inyụn̄ idụn̄ọde udomo ye orụk mbuọtidem emi nnyịn kiet kiet inyenede.”
Utịn̄ikọ ibuotikọ mbono ekedi “Ndisan̄a ke Mbuọtidem, Idịghe ke Edikụt ke Enyịn.” (2 Corinth 5:7) “Mbuọtidem mbon oro ẹkabarede ẹdi Mme Ntiense Jehovah idịghe se mînyeneke nsọn̄ọ,” ntre ke etịn̄ikọ ọkọdọhọ. Emi edi akpanikọ didie ntem! Ata mbuọtidem idịghe nnan. Enye ọkọn̄ọ ke mme ata idem n̄kpọ. Mme Hebrew 11:1 ọdọhọ ete: “Mbuọtidem ọwọrọ ete, nnyịn itịm ibụre ifiọk ite iyọbọ se nnyịn idoride enyịn ke esịt, inyụn̄ itịm inịm ite se idịbede owo ke enyịn ododu.” Etịn̄ikọ ama ọdọhọ ete: “Edieke nnyịn ke akpanikọ iyomde ndisan̄a ke mbuọtidem, nnyịn imoyom mbuọtidem emi etịmde enyene nsọn̄ọ.” Koro nnyịn isan̄ade ke mbuọtidem, mîdịghe ke edikụt ke enyịn, nnyịn iyomke ofụri ofụri ntọt aban̄ade usụn̄ ye ini emi Jehovah ediyọhọde ofụri ikpehe uduak esie. Se nnyịn ima ikọdọdiọn̄ọ iban̄a enye ọnọ nnyịn ọyọhọ mbuọtidem ke odudu esie ndisu mme un̄wọn̄ọ esie ke ima ye ke edinen usụn̄.
Utịn̄ikọ oro “Mme Uyen Christian—Akpan Ubak Esop” ama eti mme uyen aban̄a nte mmọ ẹsọn̄de urua ke enyịn Jehovah. Ẹma ẹsịn udọn̄ ẹnọ mmọ ndikọri ke n̄kan̄ eke spirit ebe ke ndibịne mme utọ utịtmbuba nte edikot ofụri Bible mma ye edisịm mme n̄kpọ oro ẹyomde kaban̄a uyakidem ye baptism. Edibịne ubọ ukpep efen efen edi mbubehe idemowo emi ẹdibierede ye ete ye eka, edi edieke ẹnyịmede, uduak kpukpru ini ekpenyene ndidi nditịm idem ndinam utom Abasi ọfọn akan. Ubọ ukpep ererimbot ekeme ndinyene ufọn ke ini nnyịn “[idomode ifiọk] se ifọnde ikan” emi enyenede ebuana ye mbuọtidem nnyịn.—Philippi 1:9, 10.
Ekem nneme utịn̄ikọ ita ama etiene ke ibuotikọ oro “Mme Idaha Anie ke Afo Etiene?” Mbuọtidem ke Ikọ Abasi onụk nnyịn ndisọn̄ọ nyịre ke mme edumbet Bible. Mme Christian ẹnịm mbet ye mme edumbet Jehovah. Ke uwụtn̄kpọ, N̄wed Abasi ọnọ nnyịn item ete ikûtịn̄ ndek ndek ikọ ye ikọ isụn̄i. (Ephesus 4:31, 32) Etịn̄ikọ ama obụp ete: “Edieke ẹduede m̀mê ẹyatde fi esịt, nte afo emesifiori ikọ isụn̄i ye nsan̄andọ m̀mê nditọ fo?” Ke akpanikọ, oro ikpedịghe edu Christian. Abasi n̄ko enyene mme edumbet ẹban̄ade ukamaidem nnyịn. Ana mme Christian “ẹsịne n̄kpọ eke owụtde bụt ye eti ibuot.” (1 Timothy 2:9, 10) Ikọ oro “eti ibuot” ọnọ ekikere aban̄a ukpono idemowo, eti etop, edida n̄kpọ ke akpan n̄kpọ, ye mfaraidem. Ima inyenede inọ mbon efen onụk nnyịn ndien mme edumbet Bible ye ifiọk aban̄ade se idotde ẹda nnyịn usụn̄.
Utịn̄ikọ iba ẹmi ẹketienede ẹma ẹsịne edineme ufan̄ikọ kiet kiet ke Mme Hebrew 3:7-15 ye 4:1-16. Mme udịmikọ Bible ẹmi ẹdụri nnyịn utọn̄ ẹbiọn̄ọ n̄kpọndịk edidi se “idiọkn̄kpọ [adade] abian̄a esie ọsọn̄ . . . esịt.” (Mme Hebrew 3:13) Didie ke nnyịn ikeme ndikụt unen ke en̄wan nnyịn ye idiọkn̄kpọ? Jehovah an̄wam nnyịn ebe ke Ikọ esie. Ke akpanikọ, “ikọ Abasi enyene uwem, onyụn̄ ananam n̄kpọ . . . onyụn̄ enyene ukeme ndidụn̄ọde ekikere ye uduak esịt owo.”—Mme Hebrew 4:12.
Akpatre utịn̄ikọ ke akpa usen mbono ekedi “N̄wed Ofụri Owo.” Enye ama osio owụt nte Bible edide akpanikọ, enende, onyụn̄ enyenede ata ufọn. Ekedemede udọn̄ didie ntem ndikop etịn̄ikọ ọtọtde edisio obufa ediye uduot ekpri n̄wed oro enyenede page 32 ẹkotde N̄wed Ofụri Owo! Ẹketịm obufa n̄wed emi akpan akpan ẹnọ mme owo ẹmi, okposụkedi ẹnyenede ifiọkn̄wed, ẹdiọn̄ọde esisịt ẹban̄a Bible. Utịn̄ikọ oro ama etre ye mme ikọ ẹmi: “Oyom mme owo ẹdụn̄ọde Ikọ Abasi ke idemmọ. Nnyịn imenịm ite ke edieke mmọ ẹdụn̄ọrede ke idemmọ, mmọ ẹyedifiọk ete ke n̄wọrọnda n̄wed emi, kpa Bible, ke akpanikọ edi n̄wed ofụri owo!”
Kpebe “Andinam Mbuọtidem Nnyịn Ọfọn Ama”
Ibuotikọ ọyọhọ usen mbono iba emi ama odụri ntịn̄enyịn owụt Jesus Christ, “Andinam [mbuọtidem nnyịn] ọfọn ama.” Oyom nnyịn ‘itiene isan̄a ke nde ikpat esie.’ (Mme Hebrew 12:2; 1 Peter 2:21) Ẹdọhọ ediwak owo ke Christendom ẹte: ‘Nịm Ọbọn̄ Jesus ke akpanikọ, ndien ẹyenyan̄a fi!’ Edi ndi mbuọtidem okụre ke oro? Bible ọdọhọ ke “[mbuọtidem, NW] emi mîsan̄ake ye edinam n̄kpọ onyụn̄ akpa.” (James 2:26) Ke ntre, ke ẹsiode edinịm Jesus ke akpanikọ ẹfep, nnyịn inyene ndinam mme utom oro enye akanamde, akpan akpan ke ndikwọrọ eti mbụk Obio Ubọn̄ Abasi.
Edinam usenubọk okowụk ntịn̄enyịn ke utom ukwọrọikọ. Ukem nte Paul, ana nnyịn inyene ọkpọsọn̄ udọn̄ nditan̄a eti mbụk edinyan̄a. (Rome 1:14-16) Jesus ama esikwọrọ ikọ ọnọ mme owo ke kpukpru itie. Okposụkedi utom ukwọrọikọ nnyịn eke ufọk ke ufọk oro inamde kpukpru ini osion̄ode nti utịp, ediwak owo efen efen isidụhe ke ufọk ke ini nnyịn iwahade. (Utom 20:20) Ekese ẹdu ke ufọkn̄wed, ẹnam utom, ẹka urua, mîdịghe ẹka isan̄. Ntem, oyom nnyịn n̄ko ikwọrọ ikọ ke an̄wan̄wa itie ye ke ebiet ekededi oro ẹkemede ndikụt mme owo.
Utịn̄ikọ oro “Dọn̄ N̄kam Nyụn̄ Sọn̄ọ Da ke Akpanikọ” ama eti nnyịn aban̄a uwak ibat mbufa mbet ẹmi ẹnade baptism—se ibede owo 1,000 ke usen kiet kiet ke ẹbaharede ukem ukem! Edi akpan n̄kpọ nte mbufa owo ẹmi ẹdọn̄ n̄kam ọfọn ẹnyụn̄ ẹsọn̄ọ ẹda ke mbuọtidem. (Colossae 2:6, 7) Etịn̄ikọ ama anam an̄wan̄a nte ke ata orụn̄ esifịp mmọn̄ ye udia ke adan̄aemi ọnọde eto nsọn̄ọ m̀mê ibetedem n̄ko. Kpasụk ntre, ebede ke nti edu ukpepn̄kpọ ye eti ebuana, mbufa mbet ẹkeme ndisọn̄ọ nda ke akpanikọ.
Item emi ama enen̄ede odot ye mmọ oro ẹkeyomde ndina baptism. Ih, ke ọyọhọ usen iba ke mbono oro, otu mbufa mbet ẹma ẹna baptism, ẹtienede uwụtn̄kpọ Jesus. Utịn̄ikọ oro “Mbuọtidem ke Ikọ Abasi Ada Ekesịm Baptism” ama eti mmọ oro ẹdotde nte ke ndibụhọ ke mmọn̄ ofụri ofụri edi idiọn̄ọ oro odotde kaban̄a mmọ ndikpa n̄kpọn̄ akani usụn̄ uwem uyom ufọn nnọ idem. Edimenede mmọ nsio ke mmọn̄ ada aban̄a edinam mmọ ẹdu uwem ndinam uduak Abasi.
Utịn̄ikọ oro “Ẹsọn̄ọ Ẹn̄wana Kaban̄a Ikọ Mbuọtidem” ọkọkọn̄ọ ke n̄wed Jude eke Bible. Ẹma ẹsịn udọn̄ ẹnọ nnyịn ndikpeme mbuọtidem nnyịn ebe ke ndibiọn̄ọ ndiọi odudu, utọ nte oburobụt ido, nsọn̄ibuot, ye mfiakedem. Ekem, mme ete ye eka—akpan akpan mme ete—ẹma ẹbọ akpan ntịn̄enyịn ke utịn̄ikọ oro “Tịm N̄kpọ nọ Mbonufọk Fo.” Nditịm n̄kpọ nnọ mme udọn̄ eke spirit, obụk, ye ntụk ubon edi mbiomo N̄wed Abasi. (1 Timothy 5:8) Emi oyom ini, nneme, ye edidianakiet. Jehovah Abasi enen̄ede enem esịt ke kpukpru n̄kpọsọn̄ utom oro mme ete ye eka Christian ẹnamde ndibọk nditọ mmọ ke akpanikọ.
Nneme oro eketienede, “Nnyịn Iyaka ke Ufọk Jehovah,” ama edemede esịtekọm ọnọ mme mbonoesop Christian. Mmọ ẹnọ nduọkodudu ke mme editịmede esịt ererimbot emi. Ke mme mbonoesop nnyịn imenyene ifet ndibuana nsịnudọn̄, ndien nnyịn imekeme ndiwụt ima oro nnyịn inyenede inọ ekemmọ mme andinịm ke akpanikọ. (Mme Hebrew 10:24, 25) Mme mbonoesop n̄ko ẹn̄wam nnyịn ndiban usọ nnyịn nte mme andikpep, ndien mmọ ẹnam ifiọk uduak Abasi nnyịn otụn̄ọ. (Mme N̄ke 27:17) Akpakam nnyịn inịmke idem nnyịn san̄asan̄a ikpọn̄ esop, ndien ẹyak nnyịn iti mme ikọ Jesus oro: “Ọtọ nte owo iba m̀mê ita ẹsopde idem ke enyịn̄ Mi, do ke ndodu ke ufọt mmọ.”—Matthew 18:20.
Akpatre utịn̄ikọ ke usen oro ekedi “Uduot Mbuọtidem Fo—Ke Ẹdomo Idahaemi.” Mbuọtidem oro owo mîdomoke inyeneke uyarade ndiwụt ke enye odot, owo inyụn̄ idiọn̄ọke uduot esie. Enye etie nte babru ubọ okụk ke ban̄k emi owo mîdaha ibọ okụk kan̄a. Ndi enye enen̄ede ekem ye ibat okụk ẹmi ẹwetde ke esịt? Ukem ntre, ana ẹdomo mbuọtidem nnyịn ndiwụt nte ke enye enyene nsọn̄ọ onyụn̄ edi ata mbuọtidem. (1 Peter 1:6, 7) Etịn̄ikọ oro ama ọdọhọ ete: “Ke ndusụk ini, mme ọkwọrọ ederi ye mbon nsọn̄ibuot ẹsibian̄a ndutịm usuanetop ye ukara nditịbi nsunsu etop ndian nnyịn, ẹyụtde mme edinịm ke akpanikọ ye usụn̄ udu uwem Christian nnyịn. . . . Nte nnyịn iyayak mbon ẹmi Satan ekịmde enyịn ẹsịn nnyịn ndịk ke idem ẹnyụn̄ ẹnam idem emem nnyịn ẹnyụn̄ ẹnam nnyịn ikop bụt iban̄a eti mbụk? Nte nnyịn iyayak mme nsu ẹban̄ade akpanikọ ẹtụk edidụk mbonoesop nnyịn ofụri ini ye utom ukwọrọikọ? Mîdịghe nte nnyịn iyọsọn̄ọ ida inyene uko inyụn̄ isọn̄ọ ibiere ikan nte akanam edide ndika iso ntan̄a akpanikọ aban̄ade Jehovah ye Obio Ubọn̄ esie?”
Da Mbuọtidem Du Uwem
Ibuotikọ ọyọhọ usen mbono ita ọkọkọn̄ọ ke mme ikọ Paul ẹmi: “Ẹte ikpe itebeke baba owo kiet ke iso Abasi ke ntak edinịm ibet: edi ẹte, ‘Edinen owo edida mbuọtidem odu uwem.’” (Galatia 3:11) Nneme oro, “Mme Ntịn̄nnịm Ikọ Joel Kaban̄a Eyo Nnyịn,” ekedi kiet ke otu mme akpan n̄kpọ usenubọk. N̄wed Joel anyan ubọk owụt eyo nnyịn onyụn̄ ọdọhọ ye ifiọk aban̄ade usọp usọp ini ete: “Mbọm usen oro! koro usen Jehovah emekpere, enye oyonyụn̄ edi nte nsobo eke otode Ata Ọkpọsọn̄!” (Joel 1:15) Ke usụn̄ oro ebietde eke n̄kukun̄kpọyọriyọ oro mîduọkke odudu, mme Christian oro ẹyetde aran iyakke n̄kpọ ndomokiet ada ke usụn̄ editan̄a Obio Ubọn̄ ke utịt ini emi.
N̄wed Joel n̄ko ọnọ idotenyịn, ọdọhọde ete: “Kpukpru owo eke ẹsemede ẹkot enyịn̄ Jehovah ẹyebọhọ.” (Joel 2:32) Emi ọwọrọ se ikande sụk edida enyịn̄ Jehovah. Oyom editua n̄kpọfiọk esịt akpanikọ, ndien emi abuana ediwọn̄ọde n̄kpọn̄ idiọkn̄kpọ. (Joel 2:12, 13) Ini idụhe ndinam ubịghi koro ke mîbịghike Jehovah ọmọn̄ ebiere ikpe ọnọ mme idụt, ukem nte enye akanamde ye Moab, Ammon, ye obot obot ikpehe Seir ke eyo Edidem Jehoshaphat eke Judah.—2 Chronicles 20:1-30; Joel 3:2, 12.
Ẹma ẹsịn udọn̄ ẹnọ kpukpru owo ke utịn̄ikọ oro “Wụt Mbuọtidem ebe ke Ndibet Jehovah.” Idahaemi ke etịmde ekpere utịt ini, nnyịn imekeme ndifiak nse edisu eke ekese un̄wọn̄ọ Jehovah, ndien nnyịn imenyene ọkpọsọn̄ udọn̄ ke mme n̄kpọ ẹmi ẹdisude ke iso. Ana ikọt Jehovah ẹka iso ndinyene ime, ẹtide nte ke kpukpru se Abasi ọkọn̄wọn̄ọde ẹyeda itie.—Titus 2:13; 2 Peter 3:9, 10.
Ndutịm usenubọk ama etre ye drama oro “Nam Enyịn Fo Enen̄ede Ese.” Edinam oro okowụtde ata idem n̄kpọ do ama esịn udọn̄ ọnọ nnyịn ndidụn̄ọde edu nnyịn kaban̄a uyom inyene obụkidem. Inamke n̄kpọ m̀mê m̀mọ̀n̄ ke nnyịn idu, edieke nnyịn iyomde uwem nnyịn ọbọhọ editịmede esịt, ana nnyịn itiene item Jesus ndinam enyịn nnyịn enen̄ede ese, owụhọ in̄wan̄in̄wan̄ ke Obio Ubọn̄ Abasi.—Matthew 6:22.
Utịn̄ikọ an̄wa ama enyene edemede-owo-udọn̄ ibuotikọ oro “Mbuọtidem ye Ini Iso Fo.” Enye ama ọnọ uyarade unana ukeme eke mme andikara ẹdide owo ndikọk mme mfịna ererimbot. (Jeremiah 10:23) Mbụk owo aka iso ndifiak ntịn̄ idemesie—ke udomo okponde onyụn̄ ọdiọkde akan. Didie ke Mme Ntiense Jehovah ẹkere ẹban̄a ini iso? Nnyịn imenịm ke akpanikọ ite ke mme anam-akpanikọ ubonowo ẹnyene nyayama ini iso ke idak Obio Ubọn̄ Abasi. (Matthew 5:5) Abasi oyosu mme un̄wọn̄ọ esie ke ufọn kpukpru owo ẹmi ẹbuọtde idem ke Ikọ esie, emi etemede ete: “Mbufo ẹyom Jehovah, ke ini ẹkemede ndikụt enye, ẹseme ẹkot enye, ke ini enye ekperede.”—Isaiah 55:6.
Jesus ama edemede akpan mbụme kiet ye eyo nnyịn ke ekikere. Enye okobụp ete: “Ke adan̄aemi Eyen Owo edidide, nte Enye oyokụt mbuọtidem ke isọn̄?” (Luke 18:8) Akpatre utịn̄ikọ ama odụn̄ọde ndutịm mbono onyụn̄ owụt nte enye ọnọde in̄wan̄in̄wan̄ uyarade nte ke mbuọtidem ke Ikọ Abasi odu, idem okposụkedi nnyịn idude uwem ke ererimbot unana mbuọtidem ye udọn̄ n̄kpọ eke spirit.
Kpa ye oro, nnyịn owo kiet kiet imekeme ndibụp idem nnyịn, ‘Nte ami ndi kiet ke otu mmọ oro ẹnyenede mbuọtidem oro mîsehekede ke Abasi ye ke Ikọ esie?’ Mbono District “Mbuọtidem ke Ikọ Abasi” ekpenyene ndin̄wam nnyịn ndibọrọ ih nnọ mbụme oro. Ndien nnyịn iwụt esịtekọm didie ntem inọ Jehovah ke ndisọn̄ọ mbuọtidem nnyịn ke enye ye ke Ikọ esie eke odudu spirit, kpa Bible!
[Mme ndise ke page 24]
Ediwak mme anam utom unyịmesịt ẹma ẹnam utom idara idara man itie idụn̄ odu ọnọ ediwak tọsịn mme andidụk mbono
[Mme ndise ke page 25]
Ẹma ẹda ikpọ an̄wambre nte enye emi ẹnam n̄kpọ ke ofụri ererimbot
[Ndise ke page 25]
L. A. Swingle eke Otu Ukara osiode obufa ediye uduot ekpri n̄wed
[Ndise ke page 26]
Ediwak owo ẹma ẹna baptism ke idiọn̄ọ uyakidem mmọ nnọ Jehovah
[Mme ndise ke page 27]
Mme andidụk mbono ẹma ẹkwọ mme ikwọ Obio Ubọn̄ ye idatesịt. Esịne-esịt: drama oro “Nam Enyịn Fo Enen̄ede Ese”