Ntọt M’ọkwọrọ Obio Ubọn̄
Odudu Oro Ikọ Abasi Enyenede Ndinam N̄kpọ Asana
ẸTỊN̄ ẹte ke ata ediwak mme enyene mbumehe uda n̄kpọsọn̄ ibọk ẹsifiak ẹbịne edu mmọ ke ini ẹsion̄ode mmọ ke mme itie unam ukpụhọde. Edi Ikọ Abasi ekeme ndinam se mme itie usọbọ ẹsiwakde ndikpu ndinam. (Mme Hebrew 4:12) Ikọ ye spirit Abasi an̄wam ediwak owo ndikan mbumehe uda n̄kpọsọn̄ ibọk nnyụn̄ nnam item emi: “Ẹyak nnyịn iyet kpukpru se isabarede obụkidem ye spirit ifep ke idem nnyịn, inam nti ido nnyịn ẹfọn ẹma ke edibak Abasi.”—2 Corinth 7:1.
Ifiọkutom emi otode Myanmar owụt emi. Eren kiet emi akan̄wanade ndikan mbumehe uda n̄kpọsọn̄ ibọk ke ediwak isua ọdọhọ ete: “N̄kakabade ndi enyene mbumehe uda n̄kpọsọn̄ ibọk ke adan̄aemi ndide uyen. Ediwak ini mma n̄n̄wana ndikịbe mbọhọ, edi n̄kekemeke. Man n̄ka iso ke edu uda n̄kpọsọn̄ ibọk mi, mma n̄wọn̄ọde ndụk uyịp inọ. Nte utịp, ke 1988, ẹma ẹnọ mi n̄ka n̄kpọkọbi isua kiet.
“Ke ẹma ẹkesio mi ke ufọk-n̄kpọkọbi, mma mfiak n̄kosobo ye n̄kani ufan mi. Esisịt ini ke oro ebede mma mfiak ntọn̄ọ uda n̄kpọsọn̄ ibọk. Edinam ubiat-idem emi ama anam mbon ubon ẹsịbe kpukpru ebuana ye ami. Adianade do, edu nsọn̄ibuot mi ama anam ediwak owo ke obio ẹfehe mi, ndien mmọ n̄ko ẹma ẹtọn̄ọ ndisọn mi.
“Ndien usen kiet se owo mîkpenịmke ke ekeme nditịbe ama etịbe—ọkpọsọn̄ ibọk ama anam mi. Ẹma ẹnọ mi mfiak n̄ka ufọk-n̄kpọkọbi, isan̄ enyeemi isua ita. Okposụkedi uwem ke ufọk-n̄kpọkọbi ọkọsọn̄de etieti, ke usụn̄ kiet m̀mê eken mma n̄n̄wana mbọhọ.
“Ke mma n̄koto ufọk-n̄kpọkọbi nnyọn̄ ufọk, mma mben̄e ubon mi ẹdahado ẹnọ mi ke n̄kani ndudue mi. Mmọ ke mfọnido ẹma ẹfiak ẹda mi, edi ini kiet efen, mme ufan ẹma ẹtap mi ndifiak mbịne akani usụn̄uwem mi.
“Ke akpatre, ekaete mi ama ọdọhọ pastọ n̄kann̄kụk yak ami ndụk akpan ufọkn̄wed ukpep Bible. Pastọ oro ama enyịme. Nte ededi, mbemiso n̄kọtọn̄ọde ndidụk, eyeneka ete mi an̄wan, edide kiet ke otu Mme Ntiense Jehovah, ama ọdọhọ ete ke edieke ami nnen̄erede nyom ndikpep Bible, ami nnyene ndikpep n̄kpọ ye Mme Ntiense.
“Mma n̄ka Ufọkmbono Obio Ubọn̄ ndien ẹma ẹmen mi ẹwụt eren kiet oro ekenyịmede ndikpep Bible ye ami. Ediwak owo ke otu mme andidụk ẹma ẹkọm mi ufiop ufiop ẹnyụn̄ ẹnam mi mfiọk ke ẹdara mi.
“Ke mma n̄kọtọn̄ọ ndikpep Bible nnyụn̄ ndụk mme mbonoesop Christian, udọn̄ edisịk n̄kpere Abasi ama ada itie udọn̄ edida n̄kpọsọn̄ ibọk. Isua kiet ke oro ebede mma nnam n̄kọri n̄kesịm idaha ediyak uwem mi nnọ Jehovah Abasi, mma nnyụn̄ nyarade uyakidem oro ke baptism mmọn̄.
“Ke ndondo emi, ke adan̄aemi nsan̄ade ke ufọk ke ufọk, mma nsobo ye kiet ke otu n̄kani nsan̄a uda n̄kpọsọn̄ ibọk mi. Ikan̄wan̄ake enye nte n̄kasan̄ade nnam n̄wọrọnda ukpụhọde. Emi ama eberede usụn̄ edinọ ikọ ntiense, ndien mma n̄keme ndinyene nneme ye enye mban̄a idotenyịn Obio Ubọn̄.
“Ke akpatre ami mmokụt ata uduak ye se uwem ọwọrọde. Ke ntak un̄wam Abasi ye item otode Ikọ esie, idahaemi ami mmekeme ndin̄wam mbon en̄wen ẹkịbe ẹbọhọ mbiara ido eke edida n̄kpọsọn̄ ibọk ke idiọk usụn̄.”