‘Ẹdụk Ufụn Ẹnọ Christ Ọbọn̄’

KE OFỤRI mbụk, ediwak miliọn owo ẹmeyọ mfịghe itie ufụn. Ediwak tọsịn isua ẹmi ẹkebede, nditọ Israel, ke uwụtn̄kpọ, ẹma ẹbọ ufen akamba akamba ke ubọk mme esenyịn ẹkedide nditọ Egypt. Nte Bible ọdọhọde, mmọ “ẹma ẹnịm mme ekpeme ifịn ndise mban̄a nditọ Israel man ẹfịk mmọ ke idak ndodobi mbiomo,” akpan akpan ke nditịm mme kọrikọri.—Exodus 1:11, The Jerusalem Bible.

Ke ediwak idut mfịn, ekeme ndidi mme owo idụkke ufụn ke ataata usụn̄ifiọk, edi ediwak owo ẹnyene ndinam utom ke ediwak hour ke idak ọkpọsọn̄—ndusụk ini ndiọi—idaha. Mmọ ẹdu ke idak ndodobi mbiomo oro ẹkemede ndikot ufụn eke ndutịm uforo.

Nte ededi, orụk ufụn kiet odu oro mîfịkke-fịk owo. Apostle Paul akakpak mme ekemmọ andinịm ke akpanikọ ete: ‘Ẹdụk ufụn ẹnọ Christ Ọbọn̄.’ (Colossae 3:24) Mbon oro ẹmekde ndikabade ndi ifịn Christ ẹkụt nte ẹnamde ndodobi mbiomo mmọ ẹfere. Jesus ke idemesie ọkọdọhọ ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyọnọ mbufo nduọkodudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre ifụre ido nnyụn̄ nsụhọde idem ke esịt; ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.”—Matthew 11:28-30.

Ndinyịme ọkpọnọ Christ inamke owo ọbọhọ mbiomo edinọ ubon esie n̄kpọ obụkidem. (1 Timothy 5:8) Nte ededi, enye anam owo ọbọhọ ekese n̄kukọmọ eke edibịne mme n̄kpọ obụkidem. Utu ke ndinam inem n̄kpọ obụkidem edi akpan utịtmbuba mmọ ke uwem, mme Christian ẹkop uyụhọ ke ndinyene mme akpan n̄kpọ oro ẹyomde.—1 Timothy 6:6-10; men 1 Corinth 7:31 domo.

Mme Christian ẹkụt nduọkodudu n̄ko ke ndiyọhọ mbiomo mmọ eke edikwọrọ “gospel” Obio Ubọn̄ Abasi. (Matthew 24:14) Emi ada ata idatesịt ye uyụhọ edi!

Nnyịn ikpenyene ndiwụt esịtekọm nte ke nnyịn imekeme ‘ndidụk ufụn nnọ Christ Ọbọn̄’!

[Ebiet Ẹdade Ndise Ẹto ke page 32]

Pictorial Archive (Near Eastern History) Est.