Ndibiom Ọkpọnọ ke Uyen

KE “NDIỌK eyo” emi, n̄kparawa owo ẹsobo n̄kpọsọn̄ mfịghe. (2 Timothy 3:1) Ẹn̄wan̄a nsunsu ekikere oro ẹsịnde udọn̄ ẹnọ oburobụt ido, un̄wọn̄ sika, ye mme mbiara edu uwem eken ẹfụk mmọ kpukpru usen. Mbon oro ẹtienede mme idaha eke Bible ẹkeme ndidi n̄kpọ nsahi sia ẹsịnde nditiene otu, ndien ndusụk Christian ẹkeme ndikere nte ke edi ata mmemmem n̄kpọ ndiyak idem nnọ.

Ke ekperede utịt ọyọhọ isua ikie itiaba M.E.N., Jeremiah ama ewet ete: “Ọfọn ye owo nte enye obiomde ọkpọnọ ke uyen esie.” (N̄wed Eseme 3:27) Nso ke ikọ esie ọkọwọrọ? Nte ke ndikpep ndiyọ mme idomo ke adan̄aemi owo edide uyen an̄wam nditịm enye idem nnọ edikan mme n̄kpọ-ata eke ini akwa owo. Kpa ye oro mme afanikọn̄ mîsinemke, mme uyen ye ikpọ owo Christian ikemeke ndifep. (2 Timothy 3:12) Edi mme ufọn edinam akpanikọ ẹnen̄ede ẹkpon ẹkan ifụre ibio ini ekededi oro ediyak idem nnọ akpadade edi.

Edieke afo edide uyen, sak iso se mme idomo mbuọtidem fo nnennen nnennen. Ke ini osobode idomo ndibuana ke idiọk edu uwem, sịn ndiyak idem nnọ. Kpa ye oro ekemede ndidi ọkpọsọn̄ n̄kpọ ndinam emi idahaemi, ke akpatre, afo edinyene esisịt editịmede esịt. Jesus ama ọn̄wọn̄ọ ete: “Ẹmen ọkpọnọ mi ẹkọn̄ọ ke itọn̄ mbufo . . . ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.”—Matthew 11:29, 30.

Nyịme n̄kpọ-ata eke edida mme edumbet Bible ndu uwem. Ndinam ntre ọyọnọ fi mfọnn̄kan usụn̄ uwem idahaemi ye idotenyịn ini iso oro mîdikpụho. Nte Bible ọdọhọde, “ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.