Ndi Mbon Ukụt Ẹyenyene Emem Tutu Amama?

NTE afo akpama ndikụt ndutụhọ etrede, idịghe ndutụhọ oro afo ikpọn̄ okụtde edi eke ofụri ubonowo? Kere ban̄a mme uwụtn̄kpọ ẹmi:

Sonia omokụt ekese ukụt.a Akpa, enye ama edifiọk ete ke ebe esie emesịn efịbe ke isua duop. Ekem akpatre eyeneren esie ama ọdọn̄ọ ke ntak ekenyenede HIV (ifọt udọn̄ọ uwot editịbe idemowo) onyụn̄ akpa ke ntak AIDS. Isua iba ke ukperedem eyeneren esie efen ama ọdọn̄ọ, ndien ikebịghike enyeoro n̄ko ama akpa ke ntak AIDS. Sonia eti ete: “Akpatre ikpehe udọn̄ọ esie ama enen̄ede ebịghi. . . . Enye ama odu ke ọkpọsọn̄ mfụhọ, idet ebehe enye ke ibuot, ikonyụn̄ ikemeke ndikụt n̄kpọ ọfọn. Ekedi ata n̄kpọ mfụhọ.”

Fabiana, eyen ufọkn̄wed ntaifiọk otode Brazil, ama ekere aban̄a mme ukwan̄ikpe oro ẹdude ke n̄kaowo ke ererimbot. Ekem n̄kpọ mmọn̄eyet ama otụk uwem esie. Eyeneka esie eren, emi okodude ke mfụhọ, ama owot idem. Ke ini ẹkesiode Fabiana ke utom, ufan esie kiet ama ọnọ ekikere ete enye aka ebịne pai-de-santo (abia ifọt), ọdọhọde ete ke ana edi odu owo anamde Fabiana enyene utọ ndiọkiso oro! Edi pai-de-santo ikọnọhọ un̄wam ndomokiet. Utu ke oro, Fabiana ama odu ke ndutụhọ, ikemeke ndide idap ke ntak afanikọn̄ esie.

Ukụt Ana ọkọtọn̄ọ ke ini uyen. Enye obụk ete: “Ke ini n̄kedide isua kiet ke emana, eka mi ama ọkpọn̄ mi, ntre ekaeka mi ama emen mi akama.” Ekem, ke ini Ana ekedide isua ita kpọt ke emana, ekaeka esie ama akpa. Ẹma ẹnọ Ana aka itie ubọk nditọakpa ke Rio de Janeiro, ke ebiet emi enye okodude tutu enye esịm isua 13. Enye ọdọhọ ete: “Ẹma ẹkama nnyịn ke ata idiọk usụn̄ do, ndien mma n̄kabade ndi owo nsọn̄ibuot. Nte n̄kọkọride n̄wọrọ owo, mma nsin̄wana en̄wan ke ekperede ndidi ke kpukpru n̄kpọ.”

Etie nte ukụt otụk uwem kpukpru owo ke usụn̄ kiet m̀mê eken. Ke akpanikọ, nnyịn imesikop mme mbụk ẹban̄ade n̄kpọ mmọn̄eyet oro esịmde mme owo ke usen ke usen—ini ekededi oro nnyịn isede, ikotde, m̀mê ikpan̄de utọn̄ ke mbụk n̄kpọntịbe. Dr. Mary Sykes Wylie ewet ete: “Edi ke . . . eyo akpakịp mbụk n̄kpọntịbe nnyịn emi ke ọkpọsọn̄ en̄wan ndiọi mbụk akabade edi ataata n̄kpọ oro nnyịn mîkemeke ndibọhọ. Mme ekọn̄, oto-obot afanikọn̄, unọmọ ẹtịbede ẹto usiakifia, n̄kpan̄a ke ọkpọusụn̄, ubiatibet, edinam oyomonsia, edisabade owo ke idan̄, idan̄ n̄kanubọk, afai esịtufọk—kpukpru ẹmi ẹnam ubiak edi enyene-ndịk mbụk eke usen ke usen ke ọyọhọ isua ikie 20 emi.” Christian apostle Paul ke ataata usụn̄ ama etịn̄ ifiọk n̄kpọntịbe oro mme owo ẹnyenede ke ibio ibio usụn̄ ete: “Ofụri ekondo ke omụm mmụm, onyụn̄ odu ke ubiak uman.”—Rome 8:22.

Nso kaban̄a fi? Nte afo omokụt ukụt? Nso ubọhọ ke afo ekeme ndidori enyịn ndinyene? Nte afo eyenyene ata emem tutu amama? Sonia, Fabiana, ye Ana ẹma ẹkụt ata ndọn̄esịt ye ata emem! Afo emekeme ndikot mban̄a emi ke ibuotikọ oro etienede.

[Mme Ikọ idakisọn̄]