Mme Ntiense Jehovah Ẹyenịm Ikpọ Mbono Ofụri Ererimbot
Otu Ukara eke Mme Ntiense Jehovah ke anam ndutịm ndinịm ikpọ mbono ofụri ererimbot ke 1998. Ẹma ẹbọ ntọt emi ye akwa idatesịt ke mbono ofụri isua eke Watch Tower Bible and Tract Society of Pennsylvania, emi ẹkenịmde ke Ufọk Mbono ke Jersey City ke Saturday, October 5, 1996.
Ke adianade ye mme mbono district eke ofụri ini, ẹyenịm ibat ibat ikpọ mbono ofụri ererimbot ke Edem Edere America ke ufọt ufọt 1998. Ẹdori enyịn ẹte ke mboho ẹmi ayanam ediwak tọsịn Mme Ntiense ke mme itie ikie ke ediwak ikpehe isọn̄ ẹsop idem ọtọkiet. Man ayak mme owo ẹtode ediwak idụt nte ẹkekeme ẹdụk, kiet kiet ke otu se iwakde ikan ọfis n̄kọk itieutom Watch Tower Society 100 eyenyene ibat mme andidụk ke obio mbono ofụri ererimbot oro ẹmekde ke Edem Edere America.
Nte an̄wan̄ade, idịghe kpukpru owo oro ẹkpemade ndinam isan̄ n̄ka Edem Edere America ẹdikeme ndinam ntre. Nte ededi, ekeme ndidi eyemem utom ọnọ ediwak tọsịn owo ndidụk akamba mbono ofụri ererimbot oro ekperede idụt mmọ akan. Ke ẹnam mme ndutịm ndinịm ikpọ mbono ofụri ererimbot ke idụt iba m̀mê ita ke Europe ye mbon eken ke Africa, Asia, Latin America, Edem Usụk Pacific, ye ke Caribbean.
Ke ini oro odotde, mme ọfis n̄kọk itieutom N̄ka ẹyetọt mme esop ke mme efakutom mmọ kiet kiet ẹban̄a obio m̀mê mme obio mbono oro ẹnọde ikot ndidụk. Ẹyenọ ntọt aban̄ade mme usenọfiọn̄ akamba mbono ye mme ndutịm oro ẹnamde ndimek mme andidụk. Mbon oro ẹkerede ndisịn n̄wed eben̄e edimek mme andidụk ẹkeme nditọn̄ọ nsio ndusụk okụk mmọ nnịm mben̄e mme akpan edinam ẹmi.
Kpukpru Mme Ntiense Jehovah ke ofụri ererimbot ẹkeme ndisak iso nse se inade ibet nnyịn ke ikpọ mboho ofụri ererimbot ẹmi ke 1998. Mme mbono district ke kpukpru idụt ẹyenyene ukem ndutịm emi.