Ndọ Isua 403 Odu Ke Mfịna

KE Sweden, Ufọkabasi ye Ukara ẹdara n̄kpet n̄kpet itie ebuana ke se iwakde ikan isua 400. Idahaemi ndọ ke ufọt ido ukpono ye ukara ke owụre.

Ẹketọn̄ọ Ido Ukpono Lutheran nte ido ukpono oro Ukara emekde ọnọ idụt ke 1593, ndien kpukpru mbon Sweden ẹkenyene ndidi mme andibuana oro ẹnade baptism. Ediwak isua ke ukperedem, ke mme iduọk isua 1850, ẹma ẹnam ukpụhọde. Owo ikoyomke aba mbon Sweden ẹna baptism; kpa ye oro, ẹkesụk ẹbat mmọ nte mbon Ufọkabasi Lutheran. Ntre, ẹma ẹyom mmọ ẹsikpe mbahade 1 eke ikie ke okụk mmọ oro ẹsisiode tax man ẹda ẹn̄wam ufọkabasi nnyụn̄ n̄kpe okụk ke ndusụk utom obio emi ufọkabasi esinamde. Ke ata ndondo emi ukpụhọde efen ada itie. Ọtọn̄ọde ke 1952, mbon Sweden ẹkeme ndiwọrọ nte ibet enyịmede n̄kpọn̄ ufọkabasi ndien ke ntre ẹsiode mmọ ẹfep ke edikpe akamba ubak tax ufọkabasi.

Ke mme isua ndondo emi odudu Ufọkabasi Lutheran ke osụhọde ke Sweden. Emi edi se owo mîkemeke ndinyan̄a, koro mbahade 10 eke ikie ke otu mme andidụn̄ ke Sweden ẹdi mme odudụn̄ ẹmi mîdịghe mbon Lutheran, ẹsịnede mme Jew, mbon Catholic, ye mbon Muslim. Ntem, ke ntọn̄ọ ntọn̄ọ 1996, mbahade 86 eke ikie kpọt ẹkedi mbon Ufọkabasi Lutheran, ndien ibat emi ke aka iso ndisụhọde.

Unana udọn̄ emi ọkọride-kọri mi ke esịn ubahade ke ufọt Ufọkabasi ye Ukara. Kan̄a kemi, ẹma ẹbiere ẹte ke iyomke edidem edi owo Lutheran, ndien owo ikam ibatke nditọ ẹmi ẹmanade ẹnọ ete m̀mê eka edide owo Lutheran nte mbon Ufọkabasi Lutheran oro Ukara emekde ọnọ idụt. N̄ko-n̄ko, nte ekemde ye The Dallas Morning News, etisịm isua 2000, “ana mme ufọkabasi n̄kann̄kụk ye ukara ẹnam ibat ẹnyụn̄ ẹbahade ata ediwak inyene. Ana ufọkabasi osụhọde ndutịm ubiatokụk esie edide biliọn $1.68, emi ẹbọde ekese ẹto mme tax.” Ke isua ikie emi ebede, ufọkabasi edimek mme bishop esie.

Ke adan̄aemi unana udọn̄ ye usụhọde ibat mme andibuana ọnọmọde Christendom, Mme Ntiense Jehovah ke Sweden ke ẹka iso ndikọri. Ntọt odude ke 1997 Yearbook of Jehovah’s Witnesses owụt ete ke mme asuanetop Obio Ubọn̄ Abasi 24,487 ẹdu ke idụt oro, ndien se ikperede ndisịm mbahade 10 eke ikie ke ẹkwọrọ ikọ nte mme asan̄autom asiakusụn̄ uyọhọ ini. Ediwak ke otu ẹmi ke ẹnyanade ẹbịne mme ifetutom oro ẹkponde ẹkan. Ke uwụtn̄kpọ, ke mme mbono district Mme Ntiense Jehovah eke 1995, mme ọdọ ndọ 20 ẹkesịn n̄wed eben̄e ubọ ukpep nte mme isụn̄utom ke Ufọkn̄wed Enyọn̄-Ukpeme Ukpep Bible eke Gilead. Ke ini oro, n̄kpọ nte mme okụre ukpep 75 ẹtode Sweden ẹkedu ke utom isụn̄utom ke nsio nsio ikpehe ke ererimbot ke mme otu nditọ ufọkn̄wed oro ẹkebemde iso. Nte eyịghe mîdụhe, eti uwụtn̄kpọ mmọ ye mme leta nsịnudọn̄ ye mme edidi ufọk ẹnyene odudu oro onụkde owo ke idem mbon oro ẹkerede ẹban̄a akwa ifetutom emi idahaemi.

Ntem, nte ediwak miliọn ke Christendom ẹkụtde ndutụhọ ẹto n̄wụre eke spirit, Mme Ntiense Jehovah ‘ke ẹkwọ ke idatesịt.’—Isaiah 65:13, 14.

[Ndise obio ke page 30]

(Ama oyom ndikụt nte enye enen̄erede etie, se n̄wed)

Sweden