Akpanikọ Aban̄ade Hell

NTỌT otode itieutom esede n̄kpọ aban̄a ukpepn̄kpọ Ufọkabasi England ọdọhọ ete ke nte ededi ke hell idịghe ufiop ufiop ebiet oro ikan̄ asakde; utu ke oro, enye edi ukpọk ukpọk ebiet oro ẹkerede-kere. “Ekese ntak ẹdu kaban̄a ukpụhọde emi,” ntre ke ntọt oro anam an̄wan̄a. “Edi ndusụk ke otu mmọ ẹdi mfan̄a ido uwem oro otode mbon oro ẹdude ye mbon oro mîdụhe ke ido ukpono Christian kaban̄a ido ukpono akamade ndịk, ye ifiọk ọkọride-kọri nte ke ekikere aban̄ade Abasi emi ọnọde ediwak miliọn owo ẹka nsinsi nsobo enen̄ede edi isio ye uyarade ima Abasi ke Christ.”

Unana edinyịme ye ekikere eset oro aban̄ade hell mi itreke ye Ufọkabasi England. Ọsọsọn̄ mme owo ẹmi ẹdude ke nsio nsio n̄ka ido ukpono ndituak ibuot nnọ Abasi usiene emi ọfọpde mme anamidiọk ke ikan̄. “Mme owo ẹyom Abasi emi atuade owo mbọm onyụn̄ ememde ido,” ntre ke Jackson Carroll ọdọhọ, kpa prọfesọ ido ukpono ye n̄kaowo ke Ikpehe Ukpepn̄kpọ Ido Ukpono ke Ufọkn̄wed Ntaifiọk Duke. “Enye edi isio ye ido ukere n̄kpọ eyomfịn nditịn̄ mban̄a idiọkn̄kpọ ye ubiomikpe.”

Mme Ntiense Jehovah ke anyanini ẹmenịm ke akpanikọ ẹte ke hell, nte Bible ekpepde, edi sụk ikpîkpu udi n̄kpakpa ubonowo—idịghe itie ikan̄îkan̄ ndutụhọ. Mmọ ẹnịm emi, idịghe ke ntak ediwak owo ẹmade enye, edi ke ntak se Bible etịn̄de: “Ama edi mme akpa-n̄kpa, mmọ ifiọkke baba n̄kpọ kiet . . . baba edinam, baba uduak, baba ifiọk, baba mbufiọk [idụhe] ke obio ekpo [“hell,” Douay Version eke mbon Catholic].”—Ecclesiastes 9:5, 10.

Ye in̄wan̄în̄wan̄ ifiọk oro aban̄ade idaha mme akpan̄kpa mi, Charles Taze Russell, akpa etieibuot Watch Tower Society, ama ewet ko ke edem ke 1896 ete: “Nnyịn ikwe utọ itie nsinsi ndutụhọ oro [ke Bible] nte mme ikọ mbuọtidem ye mme n̄wed ikwọ, ye ediwak mme ọkwọrọ ederi, ke ndudue ẹkpepde. Edi nnyịn imokụt ‘hell,’ sheol, hades, emi ẹkebierede ikpe ofụri orụk nnyịn ẹnọ ke ntak idiọkn̄kpọ Adam, emi edinyụn̄ ẹdade n̄kpa Ọbọn̄ nnyịn ẹfak kpukpru owo ẹsio ke enye; ndien ‘hell’ oro edi udi—kpa idaha n̄kpa.”

Ntem ke se iwakde ikan isua ikie, Mme Ntiense Jehovah ẹmekpep akpanikọ eke Bible aban̄ade hell.

[Ndise ke page 32]

Charles T. Russell