Ndida Ifụre Eke Spirit Nsọk Mbon Oro Ẹdude ke Ufọk-N̄kpọkọbi

“NNYỊN iketetie ibet mbufo.” “Mma ndaba mban̄a edidi mbufo okoneyo ifan̄ ẹmi ẹbede.” “Ẹsọsọn̄ọ ke ndinọ owo esidi edise nnyịn kpukpru ini.” “Nnyịn iyom ndiwụt esịtekọm nnyịn ke kpukpru edidiọn̄ oro nnyịn mîdotke emi ibọde ito Jehovah ye kaban̄a udia eke spirit oro ẹnọde ke nnennen ini.”

Nso ikedi ntak kaban̄a mme ikọ esịtekọm ẹmi? Mmọemi ẹdi ndusụk ikọ oro mbon ẹmi ẹkedọn̄de ke nsio nsio ufọk-n̄kpọkọbi ke Mexico ẹketịn̄de. Mmọ ẹdara ntịn̄enyịn oro mmọ ẹbọde ẹto Mme Ntiense Jehovah, emi adade ifụre eke spirit ọsọk mmọ idem ke adan̄aemi ẹdude ke ufọk-n̄kpọkọbi. Ufọk-n̄kpọkọbi 42 ẹdu ke Mexico emi Mme Ntiense Jehovah kpukpru ini ẹsisede ẹban̄a mme udọn̄ eke spirit mbon ufọk-n̄kpọkọbi. Ẹkot mme itie ẹmi Centro Readaptación Social (Itie Ẹnamde Owo Afiak Odu ke Eti Idaha N̄kaowo). Ke ndusụk ufọk-n̄kpọkọbi ẹmi, ẹsikam ẹnịm mme mbonoesop Christian kpukpru ini ye ata nti utịp. Ke uwụtn̄kpọ, ke ibat owo oro ẹkebatde ndondo emi, n̄kpọ nte owo 380 ẹkesidụk mme mbonoesop ke mme itie ẹmi. Ke ini oro ẹkesinịm mme ukpepn̄kpọ Bible 350 ke ẹbaharede ukem ukem. Owo 37 ẹma ẹdot nditọn̄ọ ukwọrọikọ, ndien owo 32 ẹma ẹyak idemmọ ẹnọ Jehovah, ẹyarade emi ẹwụt ke baptism mmọn̄.

Nte Ẹnamde Utom

Didie ke Mme Ntiense Jehovah ẹnam utom mmọ ke mme itie ẹmi? Akpa mmọ ẹka ẹbịne ikpọ owo ukara ẹmi ẹsede enyịn ndibọ unyịme oro ẹwetde-wet man ẹdụk ufọk-n̄kpọkọbi, ẹnamde uduak edika n̄kese an̄wan̄a—ndikpep mbon ufọk-n̄kpọkọbi nte ẹkemede ndifori uduot uwem mmọ nnyụn̄ nnam n̄kpọ Abasi ke usụn̄ oro enemde enye esịt.

Ke idaha kiet kiet mbon ukara ẹma ẹnọ unyịme mmọ. Ikpọ owo ukara ẹmi ẹwụt esịtekọm ẹban̄a item Bible oro ẹnọde mbon n̄kpọkọbi ẹmi. Mme akama ufọk-n̄kpọkọbi ẹkụt nte ke Mme Ntiense Jehovah ẹnịm mme ibet ukpeme oro ẹnịmde ẹnọ mme itie ẹmi. Mmọ ẹyak mme asan̄autom ẹmi ẹdide ẹda mme ọfis, ubet udia, ye mme efeutom ẹnịm mbonoesop mmọ. Ke itie kiet ẹma ẹkam ẹnyịme Mme Ntiense ẹbọp ekpri Ufọkmbono Obio Ubọn̄, nte ẹwụtde ke ifiọkutom etienede mi emi esenyịn kiet oro asan̄ade-san̄a ke n̄kan̄ ufọt edem usụk ye edem usiahautịn Mexico obụkde.

“Ke ntọn̄ọ ntọn̄ọ 1991 nnyịn ima itọn̄ọ ndika n̄kese ufọk-n̄kpọkọbi ke Tehuantepec, Oaxaca, emi nnyịn ikokụtde nte ọkpọsọn̄ ọbiọn̄ eke spirit odude. Ikebịghike nnyịn ima itọn̄ọ ukpepn̄kpọ Bible 27. Ke ikerede iban̄a udọn̄ mbon n̄kpọkọbi, ẹma ẹdiomi mbonoesop ition. Kiet ke otu mbon n̄kpọkọbi, emi okowụtde akwa ima ọnọ Jehovah, ama ebiere ndibọp ekpri Ufọkmbono Obio Ubọn̄ ke okụre ufọk-n̄kpọkọbi man ẹnyene itie ndinịm mme mbonoesop. Enye ama aka ebịne akamautom ufọk-n̄kpọkọbi onyụn̄ ọkọbọ unyịme, mbon ukara ẹma ẹnen̄ede ẹdiana kiet. Ke ntọn̄ọ ntọn̄ọ December 1992, mbon n̄kpọkọbi itiokiet ẹma ẹdot nte mme asuanetop eti mbụk. Ke ntak n̄kọri emi ẹkewụtde, ẹma ẹnam ndutịm man ẹnịm Editi ke okụre ufọk-n̄kpọkọbi. Nnyịn ima ibọ eben̄e ito akamautom ufọk-n̄kpọkọbi man ida mme n̄kpọ idiọn̄ọ—bred ye wine idụk idi—ndien ke ima ikenyene nneme ke hour inan̄, ẹma ẹnọ unyịme.

“Nte n̄kpọ eketiede edi nte ke April 3, 1993 (usen ita mbemiso usọrọ Editi), ẹma ẹsion̄o ndusụk mbon n̄kpọkọbi. Ke ini kiet emi ekedide asuanetop ọkọbọde n̄wed emi ẹkedade ẹsio enye, enye ama ọdọhọ yak itịn̄ ikọ ye akamautom ufọk-n̄kpọkọbi man ibọ unyịme ndidu tutu Editi okụre. Emi ama anam akamautom enen̄ede okop n̄kpaidem, sia emi mîkedịghe ọsọ eben̄e, edi ke ntak ọkpọsọn̄ udọn̄ oro owo n̄kpọkọbi emi ekenyenede ke ndidụk Editi do ke ufọk-n̄kpọkọbi, enye ama enyịme eben̄e oro. Owo 53, ẹmi ẹketuade eyet ke ntak idatesịt ke utịt ndutịm oro, ẹkedụk Editi oro. Nnyịn ima inyịme ndikot otu emi ‘Ifụre Cereso,’ koro mmọ ẹnyenede ifụre ke usụn̄ eke spirit.”

Ẹnen̄ede ẹdara utom Mme Ntiense Jehovah ke mme itie ẹmi. Ke kiet ke otu ufọk-n̄kpọkọbi ẹmi, owo emi esede enyịn ama otoro edidụk mme mbonoesop Mme Ntiense Jehovah in̄wan̄în̄wan̄ nte “usọbọ” kaban̄a mbon n̄kpọkọbi ndisọsọp nnyene eti idaha.

Ndutịm Edinam Owo Afiak Odu Eti Uwem Oro Okụtde Unen

Utom Mme Ntiense Jehovah amada ekesịm edinam mbon n̄kpọkọbi ẹfiak ẹdu eti uwem ọyọhọ ọyọhọ. Ke adan̄aemi awakde ndidi akpanikọ nte ke mbon oro ẹkedude ke ufọk-n̄kpọkọbi ẹsifiak ẹkedu uwem ubiatibet ndondo oro ẹsiode mmọ, mbon ẹmi ẹnen̄erede ẹnyịme etop Ikọ Abasi ẹsikpụhọde ofụri ofụri. Mmọ ndikpụhọde anam nnyịn iti mme ikọ apostle Paul: “Mbon-use . . . ye mme inọ, ye mme ẹsịn esịt ke n̄kpọ owo, ye mme oyụhọ mmịn, ye mbon idiọk inua, ye mme akan owo ubọk ididaha Obio Ubọn̄ Abasi inyene. Ndien ndusụk mbufo ẹketie ntem; edi ẹma ẹyet mbufo, ẹma ẹnam mbufo ẹsana, ẹma ẹtebe mbufo ikpe ke enyịn̄ Ọbọn̄ Jesus Christ, ye ke Spirit Abasi nnyịn.”—1 Corinth 6:9-11.

N̄wọrọnda ukpụhọde ke edu mmọ ana in̄wan̄în̄wan̄ ke ini mmọ ẹtịn̄de ekikere mmọ. Miguel, emi odude ke ufọk-n̄kpọkọbi Campeche ke Obio Campeche, esịn enye ke usụn̄ emi: “Mfịn mmekeme nditịn̄ ye idatesịt nte ke mbat idemmi nsịn ke otu mme erọn̄ en̄wen ẹmi ẹnyenede idotenyịn oro ẹwetde ke 2 Peter 3:13 ye Matthew 5:5.” José, emi odude ke Koben, ufọk-n̄kpọkọbi Campeche, ọkọdọhọ ete: “Okposụkedi ndide owo n̄kpọkọbi ndien ekeme ndidi ubiatibet mi enen̄ede ọdiọk, ami mmọdiọn̄ọ nte ke Jehovah esinen̄ede atua owo mbọm onyụn̄ okop akam ye n̄kpeubọk mi. Enye ekeme ndifen mme idiọkn̄kpọ mi onyụn̄ ọnọ mi ifet ndida ofụri uwem mi oro osụhọde mbuana eti mbụk aban̄ade Obio Ubọn̄ Abasi. Imọkọm mbiowo nnyịn ke ini oro mmọ ẹsidade ẹdi ufọk-n̄kpọkọbi ẹdise nnyịn man otodo nnyịn ikeme ndibọ ufọn nto mme un̄wọn̄ọ Obio Ubọn̄ Abasi. Nso inem inem edidiọn̄ ke emi edi ntem! Nte mmekeme ndidọhọ ke ami ndi owo n̄kpọkọbi? Baba, Jehovah ọmọnọ mi ifụre eke spirit oro n̄koyomde.”

Nso inam mme owotowo, mme adan̄-owo-ke-n̄kanubọk, mme abiat inyene, mme inọ, ye mmọ eken ẹkpụhọde ẹkabade ẹdi mme Christian oro ẹdude eti uwem? Nte iren ẹmi ẹdọhọde, edi odudu oro Ikọ Abasi enyenede ndikpụhọde owo ye edidụk nsan̄a ye mbon oro ẹnen̄ede ẹnyene ifịk. Se iban̄ade Tiburcio, emi ẹkesịnde ke ufọk-n̄kpọkọbi ke Mazatlán, Sinaloa, owụt nte ndutịm edinam owo afiak odu eti uwem okụtde unen. Enye ama odu ke ufọk-n̄kpọkọbi ke Concordia, Sinaloa, ke ebiet emi ekenyenede mfịna ke ntak ikponesịt. N̄wan esie ekedi kiet ke otu Mme Ntiense Jehovah, ndien enye ama enen̄ede ọdiọk ido ye n̄wan emi, idem ke ini edide ndise enye ke ufọk-n̄kpọkọbi. N̄wan emi ama enyene ime onyụn̄ osụk esidi edise enye, ntre ebe ama ọdọhọ enye ada n̄wed Afo Emekeme Ndidu Uwem ke Nsinsi ke Paradise ke Isọn̄ ọsọk imọ, ndien enye ama ọtọn̄ọ ndikpep ke idemesie.a Ekem enye ama ọdọhọ yak owo esidi ufọk-n̄kpọkọbi edikpep imọ n̄kpọ. Enye ama ọtọn̄ọ ndinam n̄kọri eke spirit, ndien itie ebuana esie ye mbon en̄wen ama ọtọn̄ọ ndifọn. Ẹma ẹnọ enye aka ufọk-n̄kpọkọbi Mazatlán ke ebiet emi otu oro ekpepde Bible odude, enye onyụn̄ edi asuanetop idahaemi. Enye ọdọhọ ete: “Idahaemi, ke ndianade ye n̄wan ye nditọ mi ye ekemmọ mbon ufọk-n̄kpọkọbi, ami mmenem esịt etieti ndikpan̄ utọn̄ nnọ etop Bible ke itie emi, ye idotenyịn nte ke n̄kpet n̄kpet ini iso, ẹyesio mi nyonyụn̄ n̄keme ndidụk kpukpru mbono ye mme mbonoesop.”

N̄ko, Conrado odu, emi okopde inemesịt etieti kaban̄a mme ukpụhọde emi enye ekemede ndinam ke uwem esie. Enye ama enyene ekese mfịna ndọ tutu n̄wan esie ọkpọn̄ enye. Enye ama oyom ndọn̄esịt oto n̄kpọsọn̄ ibọk. Nte ini akade enye ama akabade edi anyam n̄kpọsọn̄ ibọk. Ẹma ẹmụm enye ẹnyụn̄ ẹsịn ke ufọk-n̄kpọkọbi ke ntak edimen ikọn̄ekpo ye cocaine n̄wọrọ. Ama odu otu emi ekekpepde Bible ye Mme Ntiense Jehovah ke ufọk-n̄kpọkọbi, ndien ẹma ẹnọ enye ikot edikpep n̄kpọ ye mmọ. Enye etịn̄ mme ekikere esie ke usụn̄ emi: “Mma n̄kop inemesịt mban̄a edinịm oro ẹkenịmde mme mbonoesop ke nde ke nde, ndutịm edida mme n̄wed nnam ndụn̄ọde, ye akpanikọ oro nte ke kpukpru n̄kpọ ẹkekọn̄ọ ke Bible. Mma nyom ukpepn̄kpọ Bible ke ndondo oro nnyụn̄ ntọn̄ọ ndidụk mme mbonoesop.” Oro ekedi ke January 1993. Idahaemi Conrado ama ọwọrọ ke ufọk-n̄kpọkọbi onyụn̄ aka iso ndinam n̄kọri ke esop Christian.

Islas Marías

Odu enyene-ndịk ufọk-n̄kpọkọbi kiet ke Mexico ẹkotde Islas Marías emi isuo inan̄ ẹnamde. Mbon n̄kpọkọbi ẹkeme ndinam isan̄ n̄kanade isuo unọ ufen oro ẹkụkde mmọ ẹsịn. Ndusụk owo ẹdụn̄ do ye iban ye nditọ mmọ.

Ẹma ẹsiak ekpri esop kiet do. Nditọete ita ẹtode Mazatlán ẹsinam isan̄ ẹka do inikiet ke ọfiọn̄, ẹn̄wamde ndinịm mme mbonoesop, nnọ mme n̄wed, nnyụn̄ nnọ nsịnudọn̄. Ndusụk ini esenyịn circuit esika ekese mmọ. Ibat mme andidụk ke ẹbaharede ukem ukem ọtọn̄ọ ke 20 esịm 25. Mme asuanetop inan̄ ẹnade baptism ye iba oro mînaha baptism ẹdu. Esenyịn oro asan̄ade-san̄a ọtọt ete ke “ndusụk owo ẹsisan̄a kilomita 17 [itiat 10] man ẹkedụk mbonoesop ke Sunday ndien ẹsinyene ndikpọn̄ mbonoesop usọp usọp man ẹnyọn̄ ẹkesịm ukot enyịn̄. Ke ẹsan̄ade usọp usọp, esida mmọ se ibede hour iba ndinyọn̄ n̄kesịm.” Kiet ke otu nditọete, emi ekekpepde akpanikọ ke ufọk-n̄kpọkọbi oro, ọkọdọhọ ke ndondo emi ete: “Mma nsinyene udọn̄ ndisọsọp n̄wọrọ, edi idahaemi ekeme ndidi ini ekededi emi Jehovah enyịmede, sia nte ededi mmenyene ekese utom ndinam mi ke ufọk-n̄kpọkọbi.”

Nnyịn imenem esịt nte ke akpanikọ ke ada odudu esie anam mbon esịt akpanikọ ẹmi ẹyomde usụn̄ ndinem Jehovah esịt ẹnyene ifụre. Ẹma ẹsio se ibede owo 12 ke otu emi, ẹmi ẹkekpepde akpanikọ ke ufọk-n̄kpọkọbi, ẹna baptism, ndien idahaemi ẹdu eti uwem nte mme asan̄autom Abasi, ndusụk ẹkam ẹdide mbiowo esop. Odudu oro Bible enyenede ke ndidiọn̄ nnyụn̄ n̄kpụhọde mme owo owụt idem in̄wan̄în̄wan̄. Ndondo oro iren ẹmi ẹkesịnde ke ufọk-n̄kpọkọbi ke ndinam idiọkn̄kpọ ẹdụkde usụn̄ un̄wana Ikọ Abasi, mmọ ẹkụt ata ifụre oro Jesus ọkọn̄wọn̄ọde ke ini enye ọkọdọhọde ete: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.”—John 8:32; Psalm 119:105.

[Mme Ikọ idakisọn̄]

[Ndise ke page 23]

Ediwak owo ẹma ẹbọ ufọn ẹto mme akpanikọ Christian oro mmọ ẹkekpepde ke ufọk-n̄kpọkọbi