Nte Mme Esenyịn Oro Ẹsan̄ade-san̄a Ẹnamde Utom Nte Mme Anam-akpanikọ Akama-ukpọhọde
“Adan̄a nte mbufo kiet kiet ẹma ẹkebọ enọ ke ubọk Abasi, ẹda ẹnam n̄kpọ ẹnọ kiet eken nte nti mme akama-ukpọhọde nsio nsio ufọn Abasi.”—1 PETER 4:10.
1, 2. (a) Didie ke afo akpakabade ikọ oro “akama-ukpọhọde”? (b) Mmanie ẹsịne ke otu mme akama-ukpọhọde oro Abasi adade anam n̄kpọ?
JEHOVAH ada kpukpru mme anam-akpanikọ Christian anam n̄kpọ nte mme akama-ukpọhọde. Akama-ukpọhọde esiwak ndidi ofụn emi esede aban̄a ufọk. Enye ekeme n̄ko ndise mban̄a mbubehe eteufọk esie. (Luke 16:1-3; Galatia 4:1, 2) Jesus okokot otu mbon ima esie oro ẹyetde aran ẹmi ẹdude ke isọn̄ “akama ukpọhọde, emi anamde akpanikọ.” Enye ama ayak “kpukpru se enyenede,” esịnede utom ukwọrọikọ Obio Ubọn̄, esịn akama-ukpọhọde emi ke ubọk.—Luke 12:42-44; Matthew 24:14, 45.
2 Apostle Peter ọkọdọhọ ke kpukpru Christian ẹdi mme akama-ukpọhọde nsio nsio ufọn Abasi. Christian kiet kiet enyene itie emi enye ekemede ndinam utom itie akama-ukpọhọde ke edinam akpanikọ. (1 Peter 4:10) Mbiowo Christian oro ẹmekde ẹdi mme akama-ukpọhọde, ndien ndusụk ke otu mmọ ẹdi mme esenyịn oro ẹsan̄ade-san̄a. (Titus 1:7) Didie ke ẹkpese mbiowo oro ẹsan̄ade-san̄a mi? Mme edu ye mme uduakesịt ewe ke mmọ ẹkpenyene? Ndien didie ke mmọ ẹkeme ndinam ekese ufọn?
Ẹwụt Esịtekọm ke Utom Mmọ
3. Ntak emi ẹkemede ndikot mme esenyịn oro ẹsan̄ade-san̄a “nti akama-ukpọhọde”?
3 Ke ẹwetde n̄wed ẹnọ ẹsọk esenyịn kiet oro asan̄ade-san̄a ye n̄wan esie, Christian ebe ye n̄wan kiet ẹkedọhọ ẹte: “Nnyịn ikpama nditịn̄ esịtekọm nnyịn kaban̄a kpukpru ini ye ima oro mbufo ẹnọde nnyịn. Nte ubon, nnyịn imọbọ ufọn akamba akamba ito nsịnudọn̄ ye item mbufo. Nnyịn imọfiọk ite ke nnyịn inyene ndika iso n̄kọri ke n̄kan̄ eke spirit, edi ye un̄wam Jehovah ye nditọete iren ye iban nte mbufo, ẹnam ubiak n̄kọri ẹdi mmemmem.” Mme utọ ikọ ẹmi ẹwak koro mme esenyịn oro ẹsan̄ade-san̄a ẹnyenede ọkpọkpọ udọn̄ ke idem ekemmọ mme andinịm ke akpanikọ, ukem nte eti akama-ukpọhọde etịmde ese aban̄a mme udọn̄ esịtufọk. Ndusụk ẹdi mme n̄wọrọnda etịn̄ikọ. Ediwak ẹnam ọfọn akan ke utom ukwọrọikọ, ke adan̄aemi ẹfiọkde mbon en̄wen ke ufiop ye mbọm mmọ. Ebede ke ndifori nnyụn̄ nda mme utọ enọ oro nnam n̄kpọ nnọ mbon en̄wen, ẹkeme nte enende ndikot mme esenyịn oro ẹsan̄ade-san̄a “nti akama-ukpọhọde.”
4. Mbụme ewe ke ẹdikere ẹban̄a kemi?
4 Apostle Paul ekewet ete: “Ẹyom ẹte mme akama-ukpọhọde ẹdi mme anam-akpanikọ.” (1 Corinth 4:2) Ndinam n̄kpọ nnọ ekemmọ mme Christian ke nsio nsio esop ke urua ke urua edi n̄wọrọnda ye idara idara ifet. Nte ededi, enye edi n̄ko ndodobi mbiomo. Do, didie ke mme esenyịn oro ẹsan̄ade-san̄a ẹkeme ndinam utom mmọ nte mme akama-ukpọhọde ke edinam akpanikọ ẹnyụn̄ ẹkụt unen?
Ndikụt Unen ke Edinam Utom Mmọ nte Mme Akama-Ukpọhọde
5, 6. Ntak emi ediberi edem ke Jehovah ke akam edide ata akpan n̄kpọ ke uwem esenyịn oro asan̄ade-san̄a?
5 Ibetedem ke Jehovah ke akam edi akpan n̄kpọ edieke anade mme esenyịn oro ẹsan̄ade-san̄a ẹdi mme akama-ukpọhọde oro ẹkụtde unen. Ke ntak ndutịm ye ediwak mbiomo mmọ, mmọ ẹkeme ndikop mfịghe ndusụk ini. (Men 2 Corinth 5:4 domo.) Ntre oyom mmọ ẹnam n̄kpọ ke n̄kemuyo ye ikwọ David andiwet psalm: “Top mbiomo fo nọ Jehovah, ndien enye eyekama fi: enye idiyakke edinen owo esehede ke nsinsi.” (Psalm 55:22) Mme ikọ David ẹmi n̄ko ẹnọ ndọn̄esịt: “Ekọm enyene Jehovah, emi obiomde mbiomo nnyịn kpukpru usen.”—Psalm 68:19, NW.
6 Paul akada m̀mọ̀n̄ ukeme ndise mban̄a mme mbiomo eke spirit esie? Enye ekewet ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Ih, Jehovah Abasi ekedi Ebiet emi ukeme Paul okotode. Ukem ntre, Peter eketeme ete: “Edieke owo anamde n̄kpọ ọnọ ekemmọ owo, yak enye anam nte ada odudu eke Abasi ọnọde anam; man ke kpukpru n̄kpọ Abasi edinyene ubọn̄ oto Jesus Christ.” (1 Peter 4:11) Eyenete kiet emi ekedide esenyịn oro asan̄ade-san̄a ke ediwak isua ama ọsọn̄ọ etịn̄ ufọn ediberi edem ke Abasi, ọdọhọde ete: “Beri edem ke Jehovah kpukpru ini ke ndise mban̄a mme mfịna, nyụn̄ yom un̄wam esop esie.”
7. Didie ke edida ukem ukem enyene udeme ke utom esenyịn oro asan̄ade-san̄a?
7 Esenyịn oro asan̄ade-san̄a emi okụtde unen oyom edida ukem ukem. Nte mme Christian eken, enye odomo “ndidomo mfiọk se ifọnde ikan.” (Philippi 1:10)a Ke ini mbiowo n̄kann̄kụk ẹnyenede mme mbụme ẹban̄a n̄kpọ, owụt eti ibuot mmọ ndisobo ye esenyịn circuit oro edide. (Mme N̄ke 11:14; 15:22) Eyedi, se enye etịn̄de ye item N̄wed Abasi esie oro adade ukem ukem eyedi ata n̄kpọ un̄wam nte mbiowo ẹkade iso ndise mban̄a n̄kpọ ke enye ama ọkọkpọn̄ esop oro. Ke ukem afan̄ oro, Paul ọkọdọhọ Timothy ete: “Men mme ikọ emi okokopde mi ke inua ke iso ediwak ntiense, yak nọ mbon akpanikọ, eke ẹdikemede ndikpep owo en̄wen n̄ko.”—2 Timothy 2:2.
8. Ntak emi edikpep Bible, ndụn̄ọde, ye editie n̄kere ẹdide akpan n̄kpọ?
8 Edikpep, edidụn̄ọde, ye editie n̄kere N̄wed Abasi edi se ẹyomde kaban̄a edinọ eti item. (Mme N̄ke 15:28) Esenyịn district kiet ọkọdọhọ ete: “Ke ini isobode ye mbiowo, nnyịn ikpenyeneke ndikop ndịk ndinyịme nte ke nnyịn ifiọkke ibọrọ akpan mbụme.” Ndisịn ukeme ndinyene “ekikere Christ” ke n̄kpọ anam edi mmemmem ndinọ item ọkọn̄ọde ke Bible oro edin̄wamde mbon en̄wen ndinam n̄kpọ ekekem ye uduak Abasi. (1 Corinth 2:16) Ndusụk ini esiyom esenyịn oro asan̄ade-san̄a ọnọ n̄wed ẹsọk Watch Tower Society kaban̄a ndausụn̄. Ke idaha ekededi, mbuọtidem ke Jehovah ye ima ẹnyenede ẹnọ akpanikọ ẹtịm ẹdi akpan n̄kpọ ẹkan enyịn̄ m̀mê udọnikọ. Utu ke ndikedi ye “akan ikọ m̀mê ifiọk,” Paul ọkọtọn̄ọ utom ukwọrọikọ esie ke Corinth “ke mmem-idem, ye ndịk, ye akwa nnyek-idem.” Ndi emi ama anam enye okûnyene uforo? Ke edide isio ye oro, enye ama an̄wam mbon Corinth ndinyene mbuọtidem, idịghe “ke ifiọk owo, edi ọkọn̄ọ ke odudu Abasi.”—1 Corinth 2:1-5.
Nti Edu En̄wen
9. Ntak emi oyomde mbiowo oro ẹsan̄ade-san̄a ẹnịm idem ke itie owo en̄wen?
9 Edinịm idem ke itie owo en̄wen an̄wam mme esenyịn oro ẹsan̄ade-san̄a ndinyene nti utịp. Peter ama akpak kpukpru Christian ete “ẹkop mbọm ye kiet eken.” (1 Peter 3:8) Esenyịn circuit kiet ama okụt ke oyom ‘inyene udọn̄ ke idem kpukpru owo ke esop inyụn̄ inen̄ede ikpan̄ utọn̄.’ Ye ukem edu oro, Paul ekewet ete: “Ẹdara ye mmọ ẹmi ẹdarade; ẹtuan̄a ye mmọ ẹmi ẹtuan̄ade.” (Rome 12:15) Utọ edu oro onụk mme esenyịn oro ẹsan̄ade-san̄a ndisịn ukeme ofụri esịt ndifiọk mme mfịna ye mme idaha ekemmọ mme andinịm ke akpanikọ. Do mmọ ẹkeme ndinọ item N̄wed Abasi emi ọbọpde-bọp emi ekemede ndinam ata ekese ufọn edieke ẹdade enye ẹsịn ke edinam. Esenyịn circuit emi anamde ọfọn akan ke ndinịm idem ke itie owo en̄wen ama ọbọ leta oto esop kiet ekperede Turin, Italy: “Edieke oyomde ẹnyene udọn̄ ke idemfo, nyene udọn̄ ke idem mbon en̄wen; edieke oyomde ẹdara fi, dara mbon en̄wen; edieke oyomde ẹma fi, ma mbon en̄wen; edieke oyomde ẹn̄wam fi, du ke mben̄eidem ndin̄wam mbon en̄wen. Emi edi se nnyịn ikpepde ito fi!”
10. Nso ke mme esenyịn circuit ye district ẹtịn̄ ẹban̄a edisụhọde idem, ndien nso uwụtn̄kpọ ke Jesus ekenịm ke afan̄ emi?
10 Ndisụhọde idem nnyụn̄ ndi se ẹsan̄ade ẹkpere an̄wam mme esenyịn oro ẹsan̄ade-san̄a ndinam ekese ufọn. Esenyịn circuit kiet ọkọdọhọ ete: “Edi ata akpan n̄kpọ ndisọn̄ọ nnyene edu nsụhọdeidem.” Enye esiteme mbufa mme esenyịn oro ẹsan̄ade-san̄a ete: “Ẹkûyak nditọete oro ẹdide imọ ẹkara mbufo nte mîdotke oto se mmọ ẹkemede ndinam nnọ mbufo, ẹkûnyụn̄ ẹnam ufan ye utọ mbon oro kpọt, edi ẹdomo kpukpru ini ndinam n̄kpọ ye mbon eken ye unana asari.” (2 Chronicles 19:6, 7) Esenyịn oro asan̄ade-san̄a emi enen̄erede osụhọde idem ididaha ke imọ imedi akpan n̄kpọ ikaha nte andida ke ibuot N̄ka. Esenyịn district kiet ama etịn̄ nte enende ete: “Sụhọde idem nyụn̄ nyịme ndikpan̄ utọn̄ nnọ nditọete. Kpukpru ini di se ẹkemede ndisan̄a n̄kpere.” Nte akakan owo oro akanam odude uwem, Jesus Christ ekpekekeme ndinam mme owo ẹkûdu ke ifụre, edi enye ama osụhọde idem onyụn̄ edi se ẹkemede ndisan̄a n̄kpere tutu idem nditọwọn̄ ẹnyene ifụre ndidu ye enye. (Matthew 18:5; Mark 10:13-16) Mme esenyịn oro ẹsan̄ade-san̄a ẹyom nditọwọn̄, mme uyen, mbonusọn̄—ke akpanikọ owo ekededi ye kpukpru owo ke esop—ndinyene ifụre ndisan̄a n̄kpere mmọ.
11. Ke ini oyomde, nso utịp ke n̄kpeubọk ekeme ndinyene?
11 Nte ededi, “kpukpru nnyịn idedue ke ediwak n̄kpọ,” ndien idụhe esenyịn oro asan̄ade-san̄a emi mîkemeke ndinam ndudue. (James 3:2) Ke ini mmọ ẹnamde ndudue, n̄kpeubọk ofụri esịt ọnọ mbiowo eken uwụtn̄kpọ nsụhọdeidem. Nte ekemde ye Mme N̄ke 22:4, “utịp nsụkesịt ye eke [ukpono ukpono] uten̄e Jehovah edi inyene, ye ukpono, ye uwem.” Ndien ndi iyomke kpukpru asan̄autom Abasi ‘ẹsụk idem ẹsan̄a ye Abasi mmọ’? (Micah 6:8) Ke ini ẹkebụpde m̀mê nso item ke enye ọkpọnọ obufa ebiowo oro asan̄ade-san̄a, esenyịn circuit kiet ọkọdọhọ ete: “Nyene n̄kokon̄ ukpono ye edikere mban̄a nọ kpukpru nditọete, nyụn̄ da ke mmọ ẹfọn ẹkan fi. Afo eyekpep ekese n̄kpọ oto nditọete. Sụhọde idem. Nam n̄kpọ ke ndammana usụn̄. Kûkohode idem.”—Philippi 2:3.
12. Ntak emi ifịk ke utom ukwọrọikọ Christian edide akpan n̄kpọ ntre?
12 Ifịk enyenede ke utom ukwọrọikọ Christian anam mme ikọ esenyịn oro asan̄ade-san̄a enyene udobi. Ke akpanikọ, ke ini enye ye n̄wan esie ẹnịmde ifịk ifịk uwụtn̄kpọ ke utom ukwọrọikọ, ẹsịn udọn̄ ẹnọ mbiowo, iban mmọ, ye ofụri esop ndisịn ifịk ke utom ukwọrọikọ mmọ. “Sịn ifịk ke an̄wautom,” ntre ke esenyịn circuit kiet eketeme. Enye ama adian do ete: “Mmokụt, ke ofụri ofụri, nte esop esịnde ifịk ke utom ukwọrọikọ, ntre ke mfịna mmọ osụhọrede ibat.” Esenyịn circuit efen ọkọdọhọ ete: “Mmenịm nte edieke mbiowo ẹnamde utom ke an̄wautom ye nditọete iren ye iban ẹnyụn̄ ẹn̄wamde mmọ ndidara utom ukwọrọikọ mmọ, emi edida ikesịm ifụre ekikere ye akakan uyụhọ ke utom Jehovah.” Apostle Paul ‘akada uko ọkwọrọ gospel Abasi onọ mbon Thessalonica ke ufọt ọkpọsọn̄ en̄wan.’ Eyịghe idụhe mmọ ẹketide ima ima ẹban̄a edidi ye utom ukwọrọikọ esie onyụn̄ ọdọn̄de mmọ ndifiak n̄kụt enye!—1 Thessalonica 2:1, 2; 3:6.
13. Nso ke esenyịn oro asan̄ade-san̄a esikere aban̄a ke ini enye asan̄ade ye ekemmọ mme Christian ke utom an̄wautom?
13 Ke ini asan̄ade ye ekemmọ mme Christian ke utom ukwọrọikọ, esenyịn oro asan̄ade-san̄a esikere aban̄a mme idaha ye mme ukeme mmọ. Okposụkedi mme ekikere esie ẹkemede ndin̄wam, enye ọfiọk ete ke idem ekeme ndinyek ndusụk owo ke ini ẹkwọrọde ikọ ye ebiowo oro enyenede ifiọk. Ke ntre, ke ndusụk idaha nsịnudọn̄ ekeme ndinyene ufọn n̄kan item. Ke ini enye asan̄ade ye mme asuanetop m̀mê mme asiakusụn̄ aka ukpepn̄kpọ Bible, mmọ ẹkeme ndidọhọ enye enịm. Eyedi emi edi man mmọ ẹmehe ye ndusụk usụn̄ ndifori mme ido ukpepn̄kpọ mmọ.
14. Ntak emi ẹkemede ndidọhọ ke mme ifịk ifịk esenyịn oro ẹsan̄ade-san̄a ẹsidemerede ifịk ke idem mbon en̄wen?
14 Mme ifịk ifịk esenyịn oro ẹsan̄ade-san̄a ẹsidemede ifịk ke idem mbon en̄wen. Esenyịn circuit kiet ke Uganda ama asan̄a hour kiet ke akai man asan̄a ye eyenete eren kiet aka ukpepn̄kpọ Bible oro akanamde esisịt n̄kọri. Ke usụn̄ edịm ama edep ọkpọsọn̄ tutu ke ini mmọ ẹsịmde ofụri idem mmọ ama ebịt. Ke ini ubon owo itiokiet emi ẹkefiọkde ke esenowo mmọ ekedi esenyịn oro asan̄ade-san̄a, ama otụk mmọ etieti. Mmọ ẹma ẹfiọk ẹte ke mme asan̄autom ufọkabasi mmọ ikpedehede iwụt utọ udọn̄ oro ke idem otuerọn̄. Ke Sunday efen, mmọ ẹma ẹdụk akpa mbonoesop mmọ ẹnyụn̄ ẹtịn̄ udọn̄ mmọ ndikabade ndi Mme Ntiense Jehovah.
15. Nso eti ifiọkutom ke ifịk ifịk esenyịn circuit kiet ekenyene ke Mexico?
15 Ke stet Oaxaca ke Mexico, esenyịn circuit kiet ama esịn ukeme oro owo mîkenen̄ekede iyom ito enye. Enye ama odiomi ndidu ke ufọk-n̄kpọkọbi ke okoneyo inan̄ man ekeme ndika n̄kese otu edide mbon n̄kpọkọbi itiaba ẹmi ẹkekabarede ẹdi mme asuanetop Obio Ubọn̄. Enye ama asan̄a ye mbon n̄kpọkọbi ẹmi ke usen ifan̄ nte mmọ ẹkenọde ikọ ntiense to ke ubet ufọk-n̄kpọkọbi sịm ubet ufọk-n̄kpọkọbi ẹnyụn̄ ẹnịmde mme ukpepn̄kpọ Bible. Ke ntak udọn̄ oro ẹkewụtde, ẹma ẹka iso ke ndusụk ukpepn̄kpọ ẹmi tutu ke ata okoneyo. “Ke utịt edidi ndise emi, ami ye mbon n̄kpọkọbi ima iyọhọ ye idatesịt nte utịp nsịnudọn̄ edem mbiba emi,” ntem ke ifịk ifịk esenyịn circuit emi ewet.
16. Ntak emi esinọde ufọn ntre ke ini mme esenyịn oro ẹsan̄ade-san̄a ye iban mmọ ẹnọde nsịnudọn̄?
16 Mme esenyịn oro ẹsan̄ade-san̄a ẹsidomo ndinọ nsịnudọn̄. Ke ini Paul akakade ekese mme esop ke Macedonia, enye ‘ama ada ekese ikọ esịn udọn̄ ọnọ mmọ.’ (Utom 20:1, 2, NW) Mme ikọ nsịnudọn̄ ẹkeme ndidi ata n̄kpọ un̄wam ke nditeme n̄kpri ye ikpọ mme utịtmbuba eke spirit. Ke akamba n̄kọk itieutom Watch Tower Society kiet, ndụn̄ọde ido nneme ama ayarade ete ke mme esenyịn circuit ẹkesịn udọn̄ ẹnọ se ikperede mbahade 20 eke ikie ke otu mbon utom unyịmesịt ndidụk utom uyọhọ ini. Ebede ke eti uwụtn̄kpọ esie nte atan̄a Obio Ubọn̄ uyọhọ ini, n̄wan esenyịn oro asan̄ade-san̄a n̄ko edi akwa ebiet emi nsịnudọn̄ otode.
17. Didie ke esenyịn circuit kiet oro ọsọn̄de ada ifet esie ndinọ mbon en̄wen un̄wam?
17 N̄kani owo ye mbon oro ẹkopde mfụhọ akpan akpan ẹyom nsịnudọn̄. Esenyịn circuit kiet oro ọsọn̄de ewet ete: “Ikpehe utom mi oro ọnọde idatesịt oro inua mîkemeke nditịn̄ edi ifet edinọ mbon oro mînamke utom aba ye mbon mmemidem ke otuerọn̄ Abasi un̄wam. Mme ikọ Rome 1:11, 12 ẹnyene se ẹwọrọde ẹnọ mi san̄asan̄a, nte nsibọde ekese nsịnudọn̄ ye odudu ke adan̄aemi ‘nnọde mme utọ owo oro mme enọ eke spirit, man oto do ẹnam mmọ ẹsọn̄ọ ẹda.’”
Mme Utịp Idara Idara Utom Mmọ
18. Mme uduak N̄wed Abasi ewe ke mme esenyịn oro ẹsan̄ade-san̄a ẹnyene?
18 Mme esenyịn oro ẹsan̄ade-san̄a ẹnen̄ede ẹnyene udọn̄ edin̄wam ekemmọ mme andinịm ke akpanikọ. Mmọ ẹyom ndisọn̄ọ mme esop idem nnyụn̄ nnam mmọ ẹkọri ke n̄kan̄ eke spirit. (Utom 15:41) Esenyịn kiet oro asan̄ade-san̄a esinam utom ọkpọsọn̄ “ndinọ nsịnudọn̄, nnọ nduọkodudu, onyụn̄ emenede udọn̄ ediyọhọ utom ukwọrọikọ nnyụn̄ n̄ka iso ndu uwem nte ekemde ye akpanikọ.” (3 John 3) Efen esiyom ndinam ekemmọ mme andinịm ke akpanikọ ẹsọn̄ọ ẹda ke mbuọtidem. (Colossae 2:6, 7) Ti ete ke esenyịn oro asan̄ade-san̄a edi “ata nsan̄a-utom,” idịghe andikara mmọ en̄wen ke n̄kpọ mbuọtidem. (Philippi 4:3; 2 Corinth 1:24) Edidi esie edi ini nsịnudọn̄ ye utom efen efen, ọkọrọ ye ifet otu mbiowo ndidụn̄ọde n̄kọri oro ẹnamde nnyụn̄ n̄kere mban̄a mme utịtmbuba ini iso. Ebede ke ikọ ye uwụtn̄kpọ esie, mme asuanetop esop, mme asiakusụn̄, mme asan̄autom unamutom, ye mbiowo ẹkeme ndidori enyịn ndidi se ẹnamde ẹkọri nnyụn̄ ndi se ẹdemerede kaban̄a mme utom ini iso. (Men 1 Thessalonica 5:11 domo.) Ntre, ndien, nọ edidi esenyịn circuit ibetedem ofụri esịt, nyụn̄ bọ ọyọhọ ufọn to utom oro esenyịn district anamde.
19, 20. Didie ke ẹnọ mme esenyịn oro ẹsan̄ade-san̄a ye iban mmọ utịp ke utom akpanikọ mmọ?
19 Ẹnọ mme esenyịn oro ẹsan̄ade-san̄a ye iban mmọ utịp akamba akamba kaban̄a utom edinam akpanikọ mmọ, mmọ ẹnyụn̄ ẹkeme ndinyene mbuọtidem nte ke Jehovah ọyọdiọn̄ mmọ kaban̄a eti n̄kpọ oro mmọ ẹnamde. (Mme N̄ke 19:17; Ephesus 6:8) Georg ye Magdalena ẹdi usọn̄ ebe ye n̄wan oro ẹma ẹkenam utom ke ediwak isua ke utom oro ẹsan̄ade-san̄a. Ke akamba mbono kiet ke Luxembourg, owo emi Magdalena ọkọnọde ikọ ntiense ke isua 20 ke mbemiso ama aka ebịne enye. N̄wed Bible oro Magdalena ọkọnọde n̄wan Jew emi ama edemede enye udọn̄ kaban̄a akpanikọ, ndien nte ini akade enye ama ana baptism. Eyenete an̄wan eke spirit emi eketide nte Georg ekedide edise enye ke se ikperede isua 40 ẹmi ẹkebede, ama aka ebịne Georg. Nte enye ekenemede eti mbụk ufiop ufiop ke akpatre ama ada ekesịm enye ye ebe esie ndibọ akpanikọ. Ufọn idụhe nditetịn̄, Georg ye Magdalena ẹma ẹnen̄ede ẹkop idatesịt.
20 Utom ukwọrọikọ Paul oro okon̄wụmde mfri ke Ephesus ama ada idatesịt ọsọk enye ndien ekeme ndidi enye okonụk enye ndikot nto mme ikọ Jesus: “Ọfọn ndinọ akan ndibọ.” (Utom 20:35) Sia utom edisasan̄a abuanade edinọnọ kpukpru ini, mbon oro ẹdude ke enye ẹnyene inemesịt, akpan akpan ke ini mmọ ẹkụtde nti utịp utom mmọ. Ẹma ẹwet leta ẹsian esenyịn circuit kiet emi akan̄wamde ebiowo emi okokopde mmemidem ẹte: “Afo emenen̄ede ‘anam mi n̄kop ndọn̄esịt’ ke uwem eke spirit mi—akan nte afo ọfiọkde. . . . Tutu amama afo udunen̄ekede ufiọk adan̄a nte afo edide un̄wam ọnọ Asaph eyomfịn, emi ‘osụhọde esisịt ukot ọkpọfiọnọrede.’”—Colossae 4:11; Psalm 73:2.
21. Ntak emi afo ọkpọdọhọde ke 1 Corinth 15:58 enyene ebuana ye utom mme esenyịn oro ẹsan̄ade-san̄a?
21 Usọn̄ a-Christian kiet emi okodude ke utom circuit ke ediwak isua esima ndikere mban̄a 1 Corinth 15:58, emi Paul eketemede ete: “Ẹsọn̄ọ ẹda, ẹkûyak n̄kpọ esehede mbufo; ẹyọhọ kpukpru ini ke utom Ọbọn̄; sia ẹmọfiọk ẹte utom eke mme imọ inamde idiwọrọke idi ikpîkpu ke Ọbọn̄.” Mme esenyịn ẹmi ẹsan̄ade-san̄a ke akpan ẹyọhọ ke utom Ọbọn̄. Ndien nnyịn iwụt esịtekọm didie ntem nte ke mmọ ẹnam utom ke ata idatesịt ntre nte mme anam-akpanikọ mme akama-ukpọhọde ufọn Jehovah!
[Ikọ idakisọn̄]
a Se ibuotikọ oro “Nte Afo Emekeme Ndikop Inemesịt ye Ekese Oro Enyenede Ndinam?” ke Enyọn̄-Ukpeme eke May 15, 1991, page 28-31.
Didie ke Afo Ọkpọbọrọ?
◻ Ntak emi ẹkemede ndise mme esenyịn oro ẹsan̄ade-san̄a nte “nti akama-ukpọhọde”?
◻ Nso idi ndusụk n̄kpọ ẹmi ẹn̄wamde mme esenyịn circuit ye district ndinam ekese ufọn?
◻ Ntak emi nsụhọdeidem ye ifịk ẹdide akpan n̄kpọ ntre ẹnọ mbon oro ẹdude ke utom oro ẹsan̄ade-san̄a?
◻ Nti uduakesịt ewe ke mme esenyịn oro ẹsan̄ade-san̄a ẹnyene?
[Ndise ke page 16]
Esenyịn oro ẹsan̄ade-san̄a ẹsiyom ndisịn udọn̄ nnọ ekemmọ mme andinịm ke akpanikọ
[Mme ndise ke page 17]
N̄kpri ye ikpọ ẹkeme ndibọ ufọn nto ebuana ye mme esenyịn oro ẹsan̄ade-san̄a ye iban mmọ
[Ndise ke page 18]
Ifịk ifịk utom esenyịn oro asan̄ade-san̄a esidemede ifịk ke idem mbon en̄wen