Ẹsọn̄ọ Ẹmụm Ifụre Ido Ukpono Ẹkama Ke Japan

KE EDIWAK isua ke Japan, mme uyen ufọkn̄wed ẹmi ẹdide Mme Ntiense Jehovah ẹma ẹsobo ọkpọsọn̄ mfịna: Nte mmọ ẹkpetiene ubieresịt mmọ oro Bible ọnọde ukpep, m̀mê nte mmọ ẹkpetiene ukpepn̄kpọ ufọkn̄wed oro atuahade ye ubieresịt mmọ. Ntak ọkpọsọn̄ mfịna emi? Koro en̄wan unyan̄a-idem ẹkotde karete ẹdi ubak ukpepn̄kpọ usịn̄ede idem ke ufọkn̄wed mmọ. Mme uyen Ntiense ẹma ẹkere ke mme utọ ukpep oro idụhe ke n̄kemuyo ye mme edumbet Bible, utọ nte enyeoro ẹkụtde ke Isaiah ibuot 2, ufan̄ikọ 4. Do okot ete: “Ndien mmọ ẹyeda ofụt mmọ ẹdom n̄kpọ ufụn̄ isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.”

Ke mîyomke ndikpep mme usọ ẹbietde eke un̄wana ekọn̄, emi abuanade edinọ owo efen unan, mme uyen Christian ẹdide Mme Ntiense ẹma ẹnam an̄wan̄a mme andikpep mmọ nte ke mmimọ idikemeke nditiene mbuana ke en̄wan unyan̄a-idem ke ntak ubieresịt mmimọ. Ke ẹma ẹkekpek nditọ ufọkn̄wed ẹmi ndinyịme ndibọ ukpepn̄kpọ ufọkn̄wed emi, ediwak mme andikpep ẹmi ẹnyenede ifiọk ẹma ẹdinyịme ke akpatre ndiwụt ukpono nnọ ubieresịt nditọ ufọkn̄wed ẹmi nnyụn̄ nnọ mmọ n̄kpọ efen ndinam ke ukpụhọ.

Nte ededi, ndusụk mme andikpep ẹma ẹkabade ẹkop idiọkesịt, ndien ndusụk ufọkn̄wed ẹma ẹsịn ndinọ mme uyen ẹdide Mme Ntiense n̄weditoro ke ukpepn̄kpọ usịn̄ede idem. Ke 1993, ẹma ẹsịn ndinam ke nsụhọde n̄kaha Mme Ntiense usụkkiet ẹbe ẹdụk ubet ukpepn̄kpọ efen ẹnyụn̄ ẹnyịk mmọ ndiwọrọ ke ufọkn̄wed mîdịghe ntre ẹbịn mmọ ke ntak mîtieneke ibuana ke en̄wan unyan̄a-idem.

Nte an̄wan̄ade, emi ekedi ini ndinam n̄kpọ mban̄a unen oro mme uyen Christian ẹmi ẹnyenede ndibọ ukpepn̄kpọ ye unana edibiat ubieresịt mmọ. Nditọ ufọkn̄wed ition oro ẹkesịnde ndinam mmọ ẹbe ẹdụk ubet ukpepn̄kpọ en̄wen ke Kobe Municipal Industrial Technical College (ẹkotde ibio ibio Kobe Tech) ẹma ẹbiere ndisịn ikpe ke esop.

Nso Ikedi Mfịna?

Ke ntọn̄ọ ntọn̄ọ 1990 ke ini nditọ ufọkn̄wed ition ẹmi ẹkedụkde Kobe Tech, mmọ ẹma ẹnam an̄wan̄a mme andikpep nte ke mmimọ idikemeke nditiene mbuana ke ukpep kendo (mbre ukwa mbon Japan) ke ntak ekikere mmọ oro ọkọn̄ọde ke Bible. Ikpehe ukpepn̄kpọ esede aban̄a usịn̄ede idem ama ọsọn̄ọ asua emi onyụn̄ esịn ndinọ mmọ n̄kpọ efen ke ukpụhọ emi akpanamde mmọ ẹdot ndibe ukpepn̄kpọ usịn̄ede idem. Ke akpatre, nditọ ufọkn̄wed oro ikebehe ukpepn̄kpọ usịn̄ede idem oro ndien nte utịp ẹkenyene ndifiak ntọn̄ọ ukpepn̄kpọ oro (ukpepn̄kpọ akpa isua ufọkn̄wed). Ke April 1991 mmọ ẹma ẹsịn n̄wed ukot ikpe ke Esopikpe Obio Kobe, ẹdọhọde ke edinam ufọkn̄wed oro atuaha ye ubiọn̄ oro ibet ọnọde kaban̄a ifụre ido ukpono.a

Ufọkn̄wed oro ama ọdọhọ ete ke ndinọ mmọ n̄kpọ efen ndinam ke ukpụhọ ọwọrọ ndiwụt ido ukpono kiet uma ndien ke ntre ediwọrọ ndiwụt asari ke ufọkn̄wed. Akande oro, mmọ ẹma ẹdọhọ ẹte ke mmimọ inyeneke mme n̄kpọ m̀mê mme andikpep ndinọ utọ ukpụhọ edinam usịn̄ede idem oro.

Ubiere Esop N̄kann̄kụk Onụk Mme Ọfiọkn̄kpọ Owo Ndinam N̄kpọ

Ke adan̄aemi ẹkesụk ẹkpede ikpe, iba ke otu nditọ ufọkn̄wed ition oro ikebehe udomo usịn̄ede idem oro inikiet efen, ke adan̄aemi ita eken mîkebehe ọfọn ndien ẹsio ẹsịn ke udiana ubet ukpepn̄kpọ. Ibet ufọkn̄wed ọdọhọ ete ke ẹnyene ndibịn nditọ ufọkn̄wed oro mîbehe n̄wed ọfọn ẹmi ẹnyụn̄ ẹfiakde ẹdu ke ukem ubet ukpepn̄kpọ ke isua iba ke adiana ke adiana. Ke ekerede aban̄a emi, kiet ke otu nditọ ufọkn̄wed iba oro ama ebiere ndiwọrọ ke ufọkn̄wed oro mbemiso ẹbịnde-bịn enye, edi enye eken, Kunihito Kobayashi, ama esịn ndiwọrọ. Ntre ẹma ẹbịn enye. Nte enemde, ke ẹtan̄de kpukpru mak udomo oro Kunihito eketiede ẹdian ọtọkiet, esịnede ukpepn̄kpọ usịn̄ede idem emi enye mîkebehe, oro enye ekenyenede mak 48, ẹnyụn̄ ẹbaharede ukem ukem, ekedi 90.2 ke otu 100. Enye ekedi akpa ke ubet ukpepn̄kpọ esie emi ekesịnede owo 42.

Ke February 22, 1993, Esopikpe N̄kann̄kụk Kobe ama enyịme ye Kobe Tech onyụn̄ ọdọhọ ete: “Se ufọkn̄wed oro akanamde ituahake ye ibet,” okposụkedi enye ọkọfiọkde ete “ke nte mfan̄a mîdụhe n̄kpọ oro ufọkn̄wed okoyomde ke nditiene mbuana ke ukpep kendo ke usụn̄ kiet m̀mê eken ama atuaha ye ifụre utuakibuot mme okot ikpe.”

Ukem nte apostle Paul ke akpa isua ikie, mme okot ikpe oro ẹma ẹbiere ndision̄o ikpe n̄ka esopikpe oro okponde akan. (Utom 25:11, 12) Ikpe oro ama odụk Esop Enyọn̄ Osaka.

Edu Unana Ibụk Okot Mme Ikpe

Ọwọrọetop ọfiọkn̄wed owo kiet, Prọfesọ Tetsuo Shimomura eke Ufọkn̄wed Ntaifiọk Tsukuba, ama enyịme ndinọ ikọ ntiense nte owo emi enyenede usọ ke nditie ntiense ke Esop Enyọn̄ Osaka. Nte ata ke ukpepn̄wed ye ibet, enye ama ọsọn̄ọ etịn̄ nte mme edinam ufọkn̄wed oro mîkowụtke edikere mban̄a ke ndinam n̄kpọ ye nditọ ufọkn̄wed oro. Kunihito Kobayashi ama etịn̄ ekikere esie ke esop, ndien edu esịt akpanikọ esie ama otụk esịt mbon oro ẹkedude ke ufọkesop. N̄ko-n̄ko, ke February 22, 1994, N̄ka Mme Ekpeibet ke Kobe, ke etịn̄de nte ke mme edinam ufọkn̄wed oro ama ọbiọn̄ọ ifụre utuakibuot Kunihito ye unen esie ndibọ ukpep, ama ọdọhọ ete ẹfiak ẹda enye.

Nte ini akasan̄ade ekpere ndinọ ubiereikpe ke Esop Enyọn̄ Osaka, ama ọdọn̄ kpukpru n̄kparawa Christian oro n̄kpọ emi akabuanade nditiene n̄n̄wana tutu esịm akpatre. Mmọ ẹkeda nte ke ikan̄wana en̄wan oro ibet enyịmede ke ibuot ediwak tọsịn n̄kparawa Mme Ntiense ẹmi ẹsobode ukem mfịna emi ke mme ufọkn̄wed ke ofụri Japan. Edi sia owo mîkebịnke mmọ isio ke ufọkn̄wed, eketịm etie nte esop ayabiat ikpe mmọ efep. Ndien mmọ ẹma ẹkụt ẹte ke edieke mmimọ ision̄ode idem ikpọn̄ eben̄e mmimọ, unana eti ibuot mbon ufọkn̄wed oro ke ndikebịn Kunihito ọyọwọrọ owụt idem. Ntem, kpukpru nditọ ufọkn̄wed ke mîbọhọke Kunihito ẹma ẹbiere ndision̄o idem n̄kpọn̄ ikpe oro.

Ke December 22, 1994, Akwa Ebiereikpe Reisuke Shimada eke Esop Enyọn̄ Osaka ama ọnọ ubiereikpe oro akabiatde ubiere Esop N̄kann̄kụk Kobe. Esop ama okụt ete ke ntak oro Kunihito ọkọnọde ke ndikesịn ndibọ ukpep kendo ama enen ye nte ke unan oro enye ọkọbọde ke ntak edinam esie emi ọkọkọn̄ọde ke edinịm ke akpanikọ ido ukpono esie ama okpon akaha. Akwa Ebiereikpe Shimada ama ọdọhọ ke akpakana ufọkn̄wed ọnọ n̄kpọ efen ndinam ke ukpụhọ. Mbon oro ẹnyenede udọn̄ ẹban̄a unen mme owo ẹma ẹma ubiereikpe emi. Nte ededi, ufọkn̄wed oro ama osion̄o ikpe aka N̄kponn̄kan Esopikpe Japan, etrede Kunihito ukpepn̄wed ke se ikande isua kiet efen.

Ke N̄kponn̄kan Esopikpe

Mbụk n̄kpọntịbe ke n̄wedmbụk Kobe Shimbun ama ọdọhọ ke ukperedem ete: “Mme Akamautom Ufọkn̄wed Obio Kobe ye ufọkn̄wed oro ẹkpekenyene ndifiak nda Ete Kobayashi ke ufọkn̄wed ini oro [ke Esop Enyọn̄ Osaka ama ọkọnọ ubiereikpe]. . . . Ntuaha mmọ oro mînyeneke ufọn ọmọbiọn̄ọ eyen ufọkn̄wed akpan ikpehe ini uyen esie.” Kpa ye oro, Kobe Tech okosụk ọsọsọn̄ọ eyịre ke ikọ emi. Nte utịp, enye ama akabade edi ibuotikọ mbụk n̄kpọntịbe ofụri idụt. Mme andikpep ye mme akamautom ufọkn̄wed ke ofụri idụt oro ẹma ẹkpep n̄kpọ ẹto emi, ndien ubiereikpe otode n̄kponn̄kan esopikpe ke idụt oro ọyọsọn̄ọ ada nte okopodudu ubiereikpe ọnọ mme ukem ikpe oro ke ini iso.

Ke January 17, 1995, n̄kpọ nte urua kiet ke ufọkn̄wed oro ama okosion̄o ikpe aka N̄kponn̄kan Esopikpe, unyekisọn̄ oro eketịbede ke Kobe ama ọnọmọ Ashiya City emi Kunihito ye ubon esie ẹkedụn̄de. Ke n̄kpọ nte n̄kanika ebe ition ke usenubọk oro, minit ifan̄ mbemiso unyekisọn̄ oro ọkọnọmọde ikpehe oro, Kunihito ama ọkpọn̄ ufọk esie aka utom ibio ini esie. Enye akawat enan̄ukwak ke usụn̄ oro okodude ke idak Akwa Usụn̄mbakara Hanshin, ndien ke ini unyekisọn̄ eketịbede, akayak esisịt enye ndisịm ikpehe oro ọkọduọde. Enye ama ọsọsọp ọwọn̄ọde iso afiak ọnyọn̄ ufọk onyụn̄ okokụt isọn̄ ufọkenyọn̄ oro ufọk esie okodude nte owụrede ofụri ofụri. Kunihito ama okụt ete ke imọ ikpakataba uwem imọ mmemmem mmemmem ke unyekisọn̄ oro ndien enye ama ọkọm Jehovah ke ndikayak enye ọbọhọ. Edieke enye akpakakpade, etie nte ikpe kendo ekpeketre do ye unana ubiereikpe otode N̄kponn̄kan Esopikpe.

N̄kponn̄kan Esopikpe ke Japan esiwak ndidụn̄ọde ikpe oro ẹsion̄ode ke n̄wed kpọt onyụn̄ odụn̄ọde m̀mê ubiere n̄kpri esop ẹma ẹnen m̀mê ikenenke. Owo isifiakke ikpe ikpe ibọhọke ata akpan ntak odu ndikpụhọde ubiereikpe n̄kpri esop. Esop isitọtke okot ikpe ye akan̄ idem usenọfiọn̄ oro ẹdinọde ubiereikpe. Ntre Kunihito ama odu ke n̄kpaidem ke usenubọk March 8, 1996, ke ini ẹkesiande enye nte ke ẹmọn̄ ẹnọ ubiereikpe usenubọk oro. Ke idatesịt esie, enye ama okop ete ke N̄kponn̄kan Esopikpe ama ọsọn̄ọ ada ye ubiereikpe Esop Enyọn̄ Osaka.

Mme ebiereikpe inan̄, ye Ebiereikpe Shinichi Kawai etiede ibuot, ẹma ẹbiere ye uyo kiet ẹte ke “ẹkpenyene ndida edinam ufọkn̄wed oro nte se mîdotke ke baba usụn̄ ndomokiet ke ẹkerede ẹban̄a edumbet oro ọbọpde n̄kaowo, ọwọrọ ọkpọn̄ ifiọk oro ibet enyịmede, ndien ke ntre ikemke ye ibet.” Esop ama enyịme edisịn oro Kunihito ke esịt akpanikọ ekesịnde ndibọ ukpep kendo onyụn̄ ọdọhọ ete: “Ntak oro owo emi ẹsion̄ode ikpe esie edi mi ọnọde ke ndikesịn nditiene mbuana ke ukpep kendo okoto esịt onyụn̄ enyene n̄kpet n̄kpet ebuana ye ata akpan ikpehe mbuọtidem esie.” N̄kponn̄kan Esopikpe ama ebiere ete ke ufọkn̄wed oro akpakana, okponyụn̄ enyene ndinọ n̄kpọ efen ke ukpụhọ man owụt ukpono ọnọ se owo emi ẹsion̄ode ikpe esie edi mi enịmde ke akpanikọ.

Ntatara Utịp

Ubiereikpe emi nte eyịghe mîdụhe eyenịm eti uwụtn̄kpọ ke ufọn ifụre utuakibuot ke mme ufọkn̄wed. The Japan Times ama ọdọhọ ete: “Ubiereikpe oro edi akpa emi N̄kponn̄kan Esopikpe ọnọde ke ikpe aban̄ade ukpepn̄wed ye ifụre ido ukpono.” Ubiereikpe oro, nte ededi, ibiomokede uyen kiet kiet emi edide eyen ufọkn̄wed mbiomo ndisọn̄ọ nda ye eti ubiere ke ini osobode mme idomo mbuọtidem.

Prọfesọ Masayuki Uchino eke Ufọkn̄wed Ntaifiọk Tsukuba ama etịn̄ ete ke kiet ke otu ntak oro okonụkde mme ebiereikpe ndinọ Kunihito edikan ekedi nte ke enye ekedi “eti eyen ufọkn̄wed emi ifiọkn̄wed esie ekedide n̄wọrọnda.” Bible ọnọ mme Christian ẹmi ẹsobode idomo mbuọtidem item emi: “Ẹkama idem nte odotde ke otu mme Gentile, man ke nde eke mmọ ẹtịn̄de n̄kpọ ẹbiat mbufo ẹte ẹdi mme anam-idiọk, mmọ ẹkpeda nti ido mbufo, ẹmi ẹdikụtde ke ini eke ẹdide ndidomo mbufo nse, ẹnọ Abasi ubọn̄.” (1 Peter 2:12) Mme anam-akpanikọ n̄kparawa Christian ẹkeme ndiwụt nte ke idaha mmimọ emi ọkọn̄ọde ke Bible odot se mme owo ẹkponode ebe ke ndidu ofụri uwem mmọ nte ekemde ye mme edumbet Bible.

Ke N̄kponn̄kan Esopikpe oro ama ọkọnọ ubiereikpe, ẹma ẹfiak ẹda Kunihito Kobayashi ke Kobe Tech. Ata ediwak ke otu nditọ ufọkn̄wed ẹmi ẹkedụkde ufọkn̄wed ini kiet ye Kunihito ẹma ẹkokụre ukpep. Kunihito idahaemi ọbọ ukpep ye nditọ ufọkn̄wed oro ẹkpride ẹkan enye ke isua ition. Ke enyịn ediwak owo ke ererimbot, etie nte ọsọn̄urua isua ition eke ini uyen esie atatak. Nte ededi, nsọn̄ọnda Kunihito edi ọsọn̄urua n̄kpọ ke enyịn Jehovah Abasi, ndien n̄waidem esie ke akpanikọ idịghe ke ikpîkpu.

[Ikọ idakisọn̄]

[Mme Ndise ke page 20]

Ufien: Ufọk Kunihito ke unyekisọn̄ ama eketịbe

Isọn̄ isọn̄: Kunihito mfịn