Ntaifiọk Ẹkere Ẹban̄a Ukpụhọ Ibọk Ke Itie Iyịp

N̄KPỌ nte ntaifiọk 200 ẹtode ofụri United States ẹma ẹsop idem ke Cleveland, Ohio, ke Saturday, October 7, 1995, ndineme n̄kpọ emi akade-ka iso ndidemede udọn̄ ke afan̄ ibọkusọbọ: ibọkusọbọ ye usiakidem oro owo mîsịnke iyịp.

Ẹma ẹneme ẹban̄a ediwak idaha oro ẹkamade mfịna. Ke uwụtn̄kpọ, nso edieke owo udọn̄ọ enyenede ọkpọsọn̄ udọn̄ọ unana iyịp? Didie ke ẹkeme ndinọ nsekeyen oro amanade ke adan̄aemi ini mîkpereke-kpere ndikem usọbọ ye unana edinọ iyịp? Nte ẹkeme ndinam usiakidem ke esịt uforo uforo ye unana edikịm iyịp nsịn ke idem? Nte enemde, usiakidem oro owo mîsịnke iyịp—emi ẹsiwakde ndida mme usụn̄ oro ẹn̄wamde idem owo ndinam iyịp esie ọkọri—edi se ẹma ẹkeda ẹnam n̄kpọ ke kpukpru idaha ẹmi ye nti utịp.a

Ntak emi oyomde ẹda ukpụhọ ibọkusọbọ utu ke edikịm iyịp nsịn owo ke idem-e? Sharon Vernon, adausụn̄ ke Ufọkutom Emi Esede Aban̄a Ibọkusọbọ ye Usiakidem Oro Owo Mîsịnke Iyịp ke St. Vincent Charity Hospital ke Cleveland ọdọhọ ete: “Nnyịn imọfiọk ite ke edikịm iyịp nsịn ke idem esiwak ndinọ udọn̄ọ, akpan akpan udọn̄ọ edidiana ekpa.” Enye aka iso etịn̄ ete: “Idem ke ini iyịp mînọhọ udọn̄ọ oro ekemede ndibe owo enye ekeme ndifịk editịbe owo udọn̄ọ nnịm.” Okposụkedi edinyene AIDS ebe ke edikịm iyịp nsịn ke idem ama okosụhọrede ubọk ebe ke ndụn̄ọde iyịp, ediwak udọn̄ọ ẹsụk ẹdodu ẹmi owo mîkemeke ndikụt ebe ke mme utọ ndụn̄ọde oro. Ndien kpa ye oro oyomde ẹnam akwa ntịmidem, ẹkụt usiakidem oro owo mîsịnke iyịp nte osụhọrede ubiatokụk ọnọ mme ufọkibọk, koro enye osụhọrede mme mfịna ikpe oro ẹkemede ndisụn̄ọ ke ini owo udọn̄ọ ọbọde iyịp oro abiarade.

Ye Mme Ntiense Jehovah, ata akpan ntak odu ndisịn edida iyịp: ibet Abasi akpan emi. (Utom 15:29) Kpa ye oro, mmọ ẹyom ndibọ mfọnn̄kan usọbọ oro ẹkemede ndinọ. Ntem, mmọ ẹdiana kiet ye mme dọkta oro ẹdade iso ke ndinam ndụn̄ọde nyom usụn̄ unọ usọbọ ye unana edisịn iyịp. Emi idaha ufọn isọk Mme Ntiense Jehovah kpọt edi n̄ko ediwak mbon efen oro ẹkerede ẹban̄a n̄kpọndịk emi edikịm iyịp nsịn ke idem akamade.

[Ikọ idakisọn̄]

[[Ebiet Ẹdade Ndise Ẹto ke page 32]

WHO photo eke P. Almasy