Mme Mbụme Ẹtode Mme Andikot

Mme ntọt ẹbọde ke mme isua ifan̄ ẹwụt ẹte ke ibat mme andidia n̄kpọ idiọn̄ọ Editi ọdọk esisịt. Ndi emi ọnọ ekikere nte ke ẹyet ediwak mbufa owo aran ke edisana spirit?

Eti ntak odu ndinịm ke akpanikọ nte ke ibat Christian 144,000 oro ẹyetde aran ama ekem ke ediwak isua ẹmi ẹkebede.

Ke Utom 2:1-4, nnyịn imokot iban̄a mme akpa owo ke ekpri otu oro: “Ekem ke ini osịmde usen Pentecost, kpukpru mmọ ẹdu ọtọ kiet. Ndien idaha kiet uyom oto ke enyọn̄ edi, ebiet uyom ata ọkpọsọn̄ oyobio eke ofịmede, enye onyụn̄ ọyọhọ ofụri ufọk oro mmọ ẹtiede ke esịt. Mmọ ẹnyụn̄ ẹkụt mme edeme eke ẹsakde ikan̄, nte ẹdemede idem ẹdoro mmọ ke ibuot, edeme kiet ke owo kiet, edeme kiet ke owo kiet. Ndien Edisana Spirit ọyọhọ kpukpru mmọ ke idem, mmọ ẹnyụn̄ ẹtọn̄ọ ndisem nsio-nsio usem, nte Spirit ọnọde mmọ ukeme nditịn̄.”

Ke oro ebede, Jehovah ama emek mbon en̄wen, ndien enye ama eyet mmọ aran ke edisana spirit. Ẹma ẹdian ediwak tọsịn ke mme ntọn̄ọ ntọn̄ọ isua Ido Ukpono Christ. Ke ini usọrọ Editi ke eyo nnyịn, etịn̄ikọ esiwak ndidụri ntịn̄enyịn n̄ka mme ikọ apostle Paul ke Rome 8:15-17, emi etịn̄de ete ke mbon oro ẹyetde aran ‘ẹkebọ spirit eke enyenede mmọ ẹmi ẹdade ẹsịn nte nditọ.’ Paul ama adian ete ke edisana spirit oro mmọ ẹbọde ‘etiene spirit mmọ edi ntiense ete, mmọ ẹdi nditọ Abasi, mme ada udeme ye Christ.’ Mbon oro ke ata akpanikọ ẹyetde aran ke spirit mi ẹtịm ẹfiọk emi. Enye idịghe ikpîkpu udọn̄ m̀mê ekikere eke ntụk ye enyọn̄ enyọn̄ ekikere ẹnyenede ẹban̄a idemmọ.

Nnyịn imọfiọk ite ke ikot eke heaven emi ama aka iso ke ediwak isua ikie, okposụkedi ke ini Eyo Ekịm, ekeme ndidi mme ini ẹma ẹdu emi ibat mbon oro ẹyetde aran ẹkedide ata esisịt.a Ye edifiak n̄wụk ata Ido Ukpono Christ ke utịt utịt isua ikie emi ekebede, ẹma ẹkot ẹnyụn̄ ẹmek ediwak owo. Edi etie nte ke ufọt ufọt iduọkisua 1930, ofụri ibat 144,000 akpan akpan ama ekem. Ntem otu mme anam-akpanikọ Christian ẹmi ẹnyenede idotenyịn uwem eke isọn̄ ẹma ẹtọn̄ọ ndiwụt idem. Jesus okokot utọ mbon oro “mme erọn̄ en̄wen,” ẹmi ẹdianade kiet ke utuakibuot ye mbon oro ẹyetde aran nte otuerọn̄ kiet emi ẹnọde unyịme.—John 10:14-16.

Se idade itie ke ediwak isua ẹmi ẹbede ẹwụt ẹte ke edikot mbon oro ẹyetde aran ama ọyọhọ onyụn̄ owụt edidiọn̄ Jehovah ke idem “akwa otuowo” oro ọkọride-kọri, ẹmi ẹdoride enyịn ndibọhọ “akwa ukụt.” (Ediyarade 7:9, 14) Ke uwụtn̄kpọ, ke usọrọ Editi ke 1935, emi owo 63,146 ẹkedụkde, mbon oro ẹkediade mme n̄kpọ idiọn̄ọ ke uyarade edidọhọ ke mmimọ idi mbon oro ẹyetde aran ẹma ẹwak ẹsịm owo 52,465. Isua 30 ke ukperedem, m̀mê ke 1965, ibat mme andidụk ekedi owo 1,933,089, ke adan̄aemi mme andidia ẹkesụhọrede ẹkesịm owo 11,550. Ke akade iso ke isua 30, ke 1995 ibat mme andidụk ama ọkọri okosịm owo 13,147,201, edi n̄kpasịp owo 8,645 ẹketa uyo ẹnyụn̄ ẹn̄wọn̄ wine. (1 Corinth 11:23-26) In̄wan̄în̄wan̄, nte mme isua ẹbede, ibat mbon oro ẹdọhọde nte idide nsụhọ osụhọde akamba akamba—n̄kpọ nte owo 52,400 ke 1935; 11,500 ke 1965; 8,600 ke 1995. Nte ededi, ẹdiọn̄ mbon oro ẹnyenede idotenyịn uwem ke isọn̄, ndien ibat mmọ ọkọri akamba akamba.

Ibat eke ata ndondo emi edi eke 1995, ndien enye owụt owo 28 efen efen ẹdiade n̄kpọ idiọn̄ọ awak akan eke isua oko okposụkedi ibat mme andidia n̄kpọ idiọn̄ọ ke ẹmende ẹdomo ye mme andidụk osụhọde ata etieti. Ke ofụri ofụri, akpanikọ oro nte ke ibat ibat owo efen ẹmek ndidia mme n̄kpọ idiọn̄ọ idịghe n̄kpọ akpafịnade nnyịn. Ke ndusụk isua ẹmi ẹbede ndusụk owo, idem mbon oro ẹnade baptism obufa obufa, ẹtọn̄ọ ndidia n̄kpọ idiọn̄ọ inikiet inikiet. Ke ediwak idaha, ke ndusụk ini ama ekebe mmọ ẹma ẹfiọk ẹte ke ekedi ndudue. Ndusụk owo ẹfiọk ẹte ke mmimọ ikadia ke ntak ntụk eke ikpọkidem m̀mê mfịna ibuot. Edi mmọ ẹma ẹdifiọk ẹte ke owo ikakam ikotke mmimọ inọ uwem eke heaven. Mmọ ẹma ẹben̄e Abasi edidahado. Ndien mmọ ẹka iso ndinam n̄kpọ esie nte nti, mme anam-akpanikọ Christian, oro ẹnyenede idotenyịn nsinsi uwem ke isọn̄.

Ufọn idụhe owo nnyịn ndomokiet ndifịna idem edieke owo kiet ọtọn̄ọde ndidia mme n̄kpọ idiọn̄ọ m̀mê etrede ndinam ntre. Inen̄ekede ibehe nnyịn m̀mê ẹma ẹyet owo aran ke spirit ẹnyụn̄ ẹkot enye ẹnọ uwem eke heaven ke akpanikọ m̀mê owo inamke. Ti eti nsọn̄ọ oro Jesus ọkọnọde ete: “Ami ndi eti ekpeme-erọn̄; mmọfiọk se inyenede Mi.” (John 10:14) Kpa nte ẹnọde nsọn̄ọ, Jehovah ọfiọk mbon oro enye emekde nte nditọ eke spirit. Kpukpru eti ntak odu ndinịm ke akpanikọ nte ke ibat mbon oro ẹyetde aran eyeka iso ndisụhọde nte usọn̄ ye mme unọmọ ẹnamde isua uwem mmọ ebe efep ke isọn̄. Edi, idem kpa nte ata mbon ẹmi ẹyetde aran ẹnamde akpanikọ tutu osịm n̄kpa, ye idotenyịn edibọ anyanya uwem, mme erọn̄ en̄wen, ẹmi ẹyetde ọfọn̄idem mmọ ke iyịp Eyenerọn̄, ẹkeme ndidori enyịn ndibọhọ akwa ukụt emi ekperede.—2 Timothy 4:6-8; Ediyarade 2:10.

[Ikọ idakisọn̄]