Mmọ Ẹma Ẹnam Uduak Jehovah
Ekpri Eyenan̄wan Emi Eketịn̄de Ikọ ye Uko
KE ỌYỌHỌ isua ikie duop M.E.N., ebuana ke ufọt Israel ye Syria okodu ke nsịn̄ede. En̄wan ekesidi ọsọ n̄kpọ anamde ke ini isua ita ẹkebede ye unana afai, enye ekedi onịm-mbụk n̄kpọ.—1 Ndidem 22:1.
Se ikotịmde idi n̄kpọndịk ke ini oro ekesidi otu mbonekọn̄ Syria, emi ndusụk ẹkesisịnede mbonekọn̄ ke mme itie ikie. Mbonekọn̄ ẹmi ẹma ẹsibụmede ẹn̄wana ẹnyụn̄ ẹbụme nditọ Israel, ẹmụmde ẹnyụn̄ ẹsịnde ediwak owo ke ufụn—idem nditọwọn̄.
Ke ini en̄wan kiet, ẹma ẹdianade “ekpri eyen-an̄wan kiet” ẹkpọn̄ ubon esie oro eketen̄ede Abasi. (2 Ndidem 5:2) Ke ẹmende ẹka Syria, ẹma ẹnyịk enye ndidụn̄ ke otu mbon oro ẹkemede ndidi ẹma ẹnam enye okop ndịk onyụn̄ etie enye esen esen ke idem—mbon oro ẹketuakde ibuot ẹnọ utịn, ọfiọn̄, mme ntantaọfiọn̄, mme eto, mbiet, ye idem mme itiat. Mmọ ẹkekpụhọde didie ntem ye ubon ye mme ufan esie, ẹmi ẹketuakde ibuot ẹnọ ata Abasi kierakiet, Jehovah! Idem ke esen esen n̄kann̄kụk emi, nte ededi, eyenan̄wan emi ama enyene n̄wọrọnda uko kaban̄a utuakibuot Jehovah. Nte utịp, enye ama okpụhọde uwem ọwọrọiso akwa owo ukara kiet emi akanamde utom ke idak edidem Syria. Ẹyak nnyịn ise nte emi okotịbede.
Uko ke Nditịn̄ Ikọ
Owo isiakke enyịn̄ ekpri eyenan̄wan oro ke mbụk Bible. Enye ama akabade edi eyenufọk n̄wan Naaman, okopodudu etubom ekọn̄ ke idak Edidem Ben-hadad II. (2 Ndidem 5:1) Okposụkedi ẹketịmde ẹkpono enye, Naaman ama enyene akama-itekesịt udọn̄ọ akpamfia.
Ekeme ndidi ukpono ukpono edu eyenan̄wan emi ama onụk n̄wan Naaman nditịn̄ ikọ idịbi nnọ enye. Ekeme ndidi n̄wan oro ama obụp eyenan̄wan emi ete, ‘Nso ke ẹsinam ẹnọ mbon akpamfia ke Israel?’ Eyenan̄wan Israel emi ikokopke bụt nditịn̄ ikọ uko uko ete: “Ete mi akpakam odu ke iso prophet emi odude ke Samaria! enye akpanam ndien akpa-mfia okụre enye.”—2 Ndidem 5:3.
Owo ikofụmike mme ikọ eyenan̄wan emi nte mfụmmfụm ekikere eyenọwọn̄. Ke edide isio ye oro, ẹma ẹtịn̄ ẹnọ Edidem Ben-hadad, emi okosiode Naaman ye mbon efen ọdọn̄ isan̄ usụn̄ kilomita 150 ndika Samaria n̄koyom prọfet emi.—2 Ndidem 5:4, 5.
Ndikọk Naaman Udọn̄ọ
Naaman ye irenowo esie ẹma ẹka ẹbịne Edidem Jehoram eke Israel, ẹkamade leta edimen n̄wụt emi otode Ben-hadad ye ediwak okụk ke enọ. Ye unana n̄kpaidem, Edidem Jehoram emi akatuakde ibuot ọnọ eyenenan̄ ikọbuọtke idem ke prọfet Abasi oro eyenan̄wan emi ọkọbuọtde. Utu ke oro, enye ekekere ke Naaman ekedi ndiyom imọ ikọ. Ke ini Elisha prọfet Abasi okokopde ndịk emi akanamde Jehoram, enye ye unana ubiatini ama ọdọn̄ etop eben̄ede ete edidem ọnọ Naaman edi ufọk imọ.—2 Ndidem 5:6-8.
Ke ini Naaman okosịmde ufọk Elisha, prọfet oro ama osio isụn̄ ọdọn̄ ọkọdọhọ enye ete: “Ka keyere mmọn̄ ke Jordan utịm ikatiaba, ndien obụkidem fo eyefiak odụk fi ke idem, ndien afo eyesana.” (2 Ndidem 5:9, 10) Naaman ama akpaha esịt. Ke odoride enyịn ndikụt utịbe utịbe edinam n̄wụtidem, enye ama obụp ete: “N̄kọm Abanah ye Pharpar, akpa Damascus, ẹfọn ẹkan kpukpru mmọn̄ Israel? Nte n̄kemeke ndiyere ke mmọ nnyụn̄ nsana?” Naaman ama ọwọrọ ọkpọn̄ ufọk Elisha ye ikpahaesịt. Edi ke ini mme asan̄autom Naaman ẹkekọkde ibuot ye enye, enye ke akpatre ama onyịme. Ke ama ekeyere mmọn̄ utịm ikatiaba ke Akpa Jordan, “obụk esie [ama] akabade nte obụk ekpri eyenọwọn̄, enye onyụn̄ asana n̄ko.”—2 Ndidem 5:11-14.
Ke afiakde etiene Elisha, Naaman ama ọdọhọ ete: “Mbọk, sese, mmọfiọk nte ke baba Abasi kiet idụhe ke ofụri ererimbot, ke mîbọhọke ke Israel.” Naaman ama ọn̄wọn̄ọ ete ke imọ “[idi]waha aba edifọp uwa ye uwa ekọm inọ Abasi efen, ke mîbọhọke Jehovah.”—2 Ndidem 5:15-17.
Ukpepn̄kpọ Ẹdude ẹnọ Nnyịn
Naaman ikpakakaha ibịne prọfet Elisha edieke eyenan̄wan edide eyenufọk do mîkpeketịn̄ke ikọ uko uko. Mfịn, ediwak uyen ke ẹnam n̄kpọ ke ukem usụn̄ oro. Ke ufọkn̄wed, nditọ ufọkn̄wed oro mînyeneke udọn̄ ndomokiet ke ndinam n̄kpọ Abasi ẹkeme ndikan mmọ n̄kụk. Edi, mmọ ẹsitịn̄ ẹban̄a se mmọ ẹnịmde ke akpanikọ. Ndusụk mmọ ẹsitọn̄ọ ndinam ntre ke ata ini uyen.
Kere ban̄a Alexandra, eyenan̄wan isua ition ke Australia. Ke ini enye ọkọtọn̄ọde ufọkn̄wed, eka esie ama anam ndutịm ndineme mme n̄kpọ oro Mme Ntiense Jehovah ẹnịmde ke akpanikọ ye andikpep. Edi eka Alexandra ama osobo n̄kpọ n̄kpaidem. Andikpep ama ọdọhọ ete: “Ami mmememehe ye ediwak n̄kpọ oro mbufo ẹnịmde ke akpanikọ, ọkọrọ ye se Alexandra edinamde ye se mîdinamke ke ufọkn̄wed.” Eka Alexandra ama odu ke n̄kpaidem, sia nditọ Ntiense efen ndomokiet mîkodụhe ke ufọkn̄wed oro. Andikpep ama anam an̄wan̄a ete: “Alexandra ama asian nnyịn.” Ih, ekpri eyenan̄wan emi ama enyenyene usọ usọ nneme ye andikpep esie.
Mme utọ n̄kpri owo oro ẹsitịn̄ ikọ uko uko. Mmọ ke ntre ẹnam n̄kpọ ke n̄kemuyo ye Psalm 148:12, 13: “N̄kparawa, ye nditọ-iban; n̄kani iren, ye nditọwọn̄: yak mmọ ẹtoro enyịn̄ Jehovah: koro enyịn̄ esie ikpọn̄-ikpọn̄ okon̄de; ubọn̄ esie emenede akan isọn̄ ye enyọn̄.”