“Ana Nte Mbufo Ẹnyene Ime”
ANA nnyịn ‘inyene ime,’ edieke anade nnyịn ibọ ‘se ẹken̄wọn̄ọde.’ (Mme Hebrew 10:36) Eyen ukpepn̄kpọ Bible kiet anam an̄wan̄a ete ke ikọ Greek oro adade ọnọ “ime” oro apostle Paul akadade ke itien̄wed emi ndusụk ini ama esitịn̄ aban̄a “ukeme oro eto enyenede ndidu uwem ke n̄kpọsọn̄ idaha oro mîfọnke ye enye.”
Ke mme obot Europe, sụk utọ eto oro ọkọri. Nte enemde, ẹkot enye uwem-nsinsi. Nte ededi, eto emi esikọride ke enyọn̄ obot mi isidụhe uwem ke nsinsi, edi enye esidu uwem ke ediwak isua, osion̄ode ndiye flawa kpukpru ndaeyo. The New Encyclopædia Britannica anam an̄wan̄a ete ke ẹkenọ eto emi enyịn̄ oro uwem-nsinsi etiene nte enye “ọsọn̄de idem onyụn̄ ebịghide.” (Enyịn̄ ifiọk ntaifiọk oro ẹnọde mme eto ẹmi ẹdide orụk eke Sempervivum ọwọrọ n̄ko “uwem-nsinsi.”)
Se inamde eto emi esidude ebịghi mi edi n̄wọrọnda edi nte ke enye esikọri ke ata n̄kpọsọn̄ itie. Ẹkeme ndikụt enye ke ata etịn̄e n̄kokon̄ obot emi ofụm esibarade, emi eyo ekemede ndisụhọde ke 35° C ke hour 24 kpọt. Enye ekeme ndidọn̄ n̄kam ke nsiaha isọn̄ itiat emi ntan mîwakke. Nso idi ndusụk ntak ẹmi ẹsinamde enye ekeme ndiyọ ke mme utọ n̄kpọsọn̄ idaha oro?
Uwem-nsinsi enyene mme ikọn̄ oro ẹtiede mmọn̄ mmọn̄, ẹmi ẹsitịmde ẹmụm mmọn̄ ẹkama. Emi esin̄wam enye ndibọ ufọn ntọ kpukpru mmọn̄ oro otode edịm m̀mê snow oro atarade. Akande oro, enye esikọri ke etuek oro anamde odudu oro mmọ ẹnyenede adiana kiet ndisọn̄ọ mmụm isọn̄ mmọ oro etiede itiat itiat n̄kama. Ebede ke ndidọn̄ n̄kam ke nsiaha isọn̄, enye enyene se ikpemede enye ibiọn̄ọ idaha eyo, idem okposụkedi oro ntan mîwakke. Ke ikọ efen, enye ọkọri ebe ke ndida n̄kpọsọn̄ idaha nnam n̄kpọ.
Ke nditịn̄ ke usụn̄ eke spirit, nnyịn imekeme ndikụt idem nnyịn ke mme idaha oro ẹdomode nte ime nnyịn ọsọn̄de idem. Nso idin̄wam nnyịn ndiyọ ke idak idomo? Ukem nte eto uwem-nsinsi, nnyịn imekeme ndimụm ọnọ-uwem mmọn̄ eke Ikọ Abasi n̄kama nnyụn̄ mbuana ọtọkiet ye mme ata Christian man inyene ibetedem ye ukpeme. Ke akande kpukpru n̄kpọ, ukem nte flawa enyọn̄ obot emi, ana nnyịn isọn̄ọ imụm “akwa itiat” nnyịn, kpa Jehovah ikama, ọkọrọ ye Ikọ ye esop esie.—2 Samuel 22:3.
Ke akpanikọ, eto uwem-nsinsi edi inem inem n̄kpọ editi nte ke, idem ke n̄kpọsọn̄ n̄kann̄kụk, nnyịn imekeme ndiyọ edieke nnyịn ibọde ufọn ito mme un̄wam oro ẹdude. Jehovah ọnọ nnyịn nsọn̄ọ nte ke utọ ediyọ oro eyeda nnyịn okosịm ‘edibọ se ẹken̄wọn̄ọde,’ emi ke ataata usụn̄ ediwọrọde ndidu uwem ke nsinsi.—Mme Hebrew 6:12; Matthew 25:46.