Mbuọtidem Ama Onụk Enye Anam N̄kpọ

KE INI Jehovah ọkọdọn̄de Moses ete ada idụt Israel usụn̄ ọwọrọ ke ufụn mbon Egypt, Moses ke akpa ama ọdọhọ okûdọn̄ imọ, ọdọhọde ete: “Mbọk, Ọbọn̄ mi, ami ndịghe owo udọn-ikọ, akananam, ye idem ini emi afo ọdọhọde ye owo fo: koro ami ndobide inua, nnyụn̄ ndobide edeme.” (Exodus 4:10) Ih, Moses ikekereke ke imodot ndinam utọ akamba utom oro.

Kpasụk ntre mfịn, ediwak ke otu mme asan̄autom Jehovah ndusụk ini ẹsikere ke mmimọ idotke ndinam utom oro ẹnọde mmimọ ndinam. Ke uwụtn̄kpọ, esenyịn Christian kiet ekerede Theodore obụk ete: “Ke otu kpukpru n̄kpọ emi Jehovah ọdọhọde mi nnam, utom an̄wautom ọsọn̄ akan. Ke ini n̄kedide akparawa, mma nsisọsọp nsan̄a n̄ka enyịnusụn̄, nnam nte mmia n̄kanika enyịnusụn̄, ndien nsan̄a sụn̄sụn̄ ndaha, ndoride enyịn ke owo ndomokiet idikopke m̀mê idikwe mi. Nte n̄kọkọride n̄kpon, mma ntre ndinam oro, edi ekikere edisan̄a ke enyịnusụn̄ ke enyịnusụn̄ ama esinam mi ndọn̄ọ. Idem tutu osịm mfịn emi, mmesiduọ udọn̄ọ mbemiso n̄wọrọde an̄wautom, edi mmesika nte ededi.”

Nso idi n̄kpọ oro akan̄wamde Moses ye Mme Ntiense eyomfịn nte Theodore ndikan mme utọ ndịk oro? Bible ọbọrọ ete: “Oto mbuọtidem [Moses] ọwọrọ ọkpọn̄ Egypt, . . . koro enye ọsọn̄ọde ada nte n̄kpọ eke okụtde Enye emi enyịn owo mîkwe.”—Mme Hebrew 11:27.

Ke akpanikọ, ebede ke ndibuọt idem ke Jehovah, Moses ama ekeme ndikan mme ntụk unana edidot esie onyụn̄ anam mme utom oro ẹkenọde enye nte ebiereikpe, prọfet, adaiso idụt, esịne-ufọt Ibet ediomi, etubom ekọn̄, ewetmbụk, ye andiwet Bible.

Ke ukem usụn̄ oro, ke ini nnyịn inyenede mbuọtidem nte Moses, nnyịn iyesan̄a nte n̄kpọ eke ‘ikụtde Enye emi enyịn owo mîkwe.’ Utọ mbuọtidem oro esinam inyene uko, an̄wamde nnyịn ndibiom mme mbiomo Christian nnyịn—idem ke ini nnyịn ikerede ke nnyịn idotke.