Nte Afo Emeti?

Nte afo omotịm ọnọ ntịn̄enyịn ke mme nsiondi Enyọn̄-Ukpeme eke ndondo emi? Eyedi inem n̄kpọ nditi se itienede mi:

◻ Didie ke owo ‘edi ebịne Jesus’ ke n̄kemuyo ye ikot oro enye ọnọde ke Matthew 11:28?

Jesus ọkọdọhọ ete: “Edieke owo ekededi oyomde nditiene Mi, yak enye otụk idem esie, onyụn̄ emen [eto ndutụhọ, NW] esie, etiene Mi.” (Matthew 16:24) Ntem, ndidi mbịne Jesus ọwọrọ owo ndikpọn̄ uduak idemesie nnịm nnam eke Abasi ye eke Christ, enyịmede ndibọ ndusụk mbiomo mbiom onyụn̄ anamde ntre kpukpru ini.—8/15, page 17.

◻ Ntak edide ‘ibat ibat’ owo kpọt ẹkụt ‘mfafaha usụn̄ emi adade osịm uwem’ nte Jesus eketịn̄de ke Matthew 7:13, 14?

Ibet ye mme edumbet Abasi ẹdori ukpan ke mfafaha usụn̄. Ntem, enye n̄kukụre edemede udọn̄ owo emi ke ofụri esịt oyomde ndidu uwem ekekem ye mme idaha Abasi. Okposụkedi emi etiede ukpan ukpan, ‘mfafaha usụn̄’ osio owo ke ufụn ke kpukpru akpan ikpehe. “Ata edifọn ibet Abasi emi anamde owo ọwọrọ ufụn” onịm mme adan̄a esie. (James 1:25)—9/1, page 5.

◻ Didie ke ẹkeme ndikọri mbufiọk?

Imemke utom owo ndinyene mbufiọk m̀mê ndidada mmana. Edi ye ime, akam, ọkpọsọn̄ ukeme, eti nsan̄a, edikpep Bible ye editie n̄kere enye, ye ediberi edem ke edisana spirit Jehovah, ẹkeme ndikọri mbufiọk.—9/1, page 21.

◻ Didie ke ufụp oro owo ofụbede ekeme ndinyene eti uduak?

Enye ekeme ndinụk owo ekpeme owo ima osio ke ndiọi odudu. Akan oro, mme owo ẹkeme ndifụbe ufụp nte odotde mban̄a Jehovah ye utuakibuot esie. (1 Ndidem 19:10)—9/15, page 8, 9.

◻ Ikọ oro ke Genesis 50:23 emi ọdọhọde aban̄a nditọ nditọ Joseph ete: “Mmọ ẹkemana ẹdoro Joseph ke edọn̄” ọwọrọ nso?

Emi ekeme ndikam n̄wọrọ nte ke Joseph akada nditọ oro nte mme andito ubon esie. Enye n̄ko ekeme ndiwụt nte ke enye ama esibre mbre ye nditọ oro ima ima, emen mmọ odori ke ukot esie otop. Mfịn mme ete ẹyenam ọfọn ndiwụt nditọ mmọ ukem ima oro.—9/15, page 20, 21.

◻ Nso idi ata akpan n̄kpọ kaban̄a ndọ ye uwem ubon oro okụtde unen?

Man ẹnyene utọ nti utịp oro, ana mme nsan̄andọ ẹnịm uduak Abasi akpa kpukpru ini. Ke ndinam ntre, mme ọdọ ndọ ẹdomo ndidiana kiet nnyụn̄ n̄kọk mme mfịna mmọ ebe ke ndida item Ikọ Abasi nsịn ke edinam. Mmọ ke ntre ẹyefep kpukpru orụk mfịna oro ẹsisụn̄ọde ke ini ẹfụmide uduak Abasi. (Psalm 19:7-11)—10/1, page 11.

◻ Ifiọk aban̄ade nte ini edide usọp usọp emi Abasi ọnọde edi akpan n̄kpọ adan̄a didie?

Ifiọk aban̄ade nte ini edide usọp usọp emi Abasi ọnọde edi akpan ubak utom ofụri ukpọn̄ oro ẹnamde ẹnọ Jehovah. Enye ekpeme owo onyụn̄ abiat mme ukeme oro Devil esịnde ndinam mme asan̄autom Abasi ‘ẹkpa mba.’ (Mme Hebrew 12:3) Enye ekpeme mmọ osio ke edisịn idem nte mîdotke ke ererimbot ye uma-inyene esie, anamde ekikere mmọ owụhọ ke mme n̄kpọ eke enyọn̄—kpa “ata uwem.” (1 Timothy 6:19)—10/1, page 28.

◻ Ke n̄ke erọn̄ ye ebot, ini ewe ke Jesus osụhọde etie ke ebekpo esie ndien ntak-a? (Matthew 25:31-33)

N̄ke oro iwụtke nte ke enye osụhọde etie ke usụn̄ifiọk eke edikabade ndi Edidem. Utu ke oro, enye osụhọde etie nte Ebiereikpe. Edibiere ikpe oro idịghe n̄kpọ oro akade iso ke ufan̄ ediwak isua. Utu ke oro, n̄ke oro anyan ubọk owụt ini iso emi Jesus ke ekpri ibio ini edinọde mme idụt ubiereikpe onyụn̄ okụt ete ke ẹnam enye.—10/15, page 22, 23.

◻ Nso idi “emana” emi Jesus eketịn̄de aban̄a ndien ndien?

Jesus akada ikọ oro “emana emi” etịn̄ aban̄a mbon eyo esie ye “nnan mme ẹda-usụn̄” mmọ ẹmi ẹkenamde idụt mme Jew. (Matthew 11:16; 15:14; 24:34)—11/1, page 14.

◻ Ke akpatre edisu eke prọfesi Jesus ke Matthew 24:34-39, nso ke ikọ oro “emana emi” ada aban̄a?

Nte an̄wan̄ade Jesus etịn̄ aban̄a mme owo ke isọn̄ ẹmi ẹkụtde idiọn̄ọ edidu Christ edi ẹkpude ndikpụhọde mme usụn̄ mmọ.—11/1, page 19, 31.

◻ Didie ke ndutịm kaban̄a mme obio ubọhọ ye mme ukpan oro ẹkedoride mmọ ekenyene ufọn ọnọ mme owo ke Israel eset?

Enye ama anam nditọ Israel ẹfiọk ẹte ke mmimọ ikpenyeneke ndinam n̄kpọ ye unana ntịn̄enyịn m̀mê ndinana udọn̄ ke uwem owo. Enye n̄ko ama ọsọn̄ọ owụt ufọn ediwụt mbọm ke ini oyomde ẹnam oro. (James 2:13)—11/15, page 14.

◻ Nso idi ndamban̄a obio ubọhọ?

Emi edi ndutịm oro Abasi anamde ndikpeme nnyịn nsio ke n̄kpa emi otode edibiat ewụhọ esie aban̄ade nte iyịp edide edisana n̄kpọ. (Genesis 9:6)—11/15, page 17.

◻ Didie ke otu nditọete Christian ekeme ndin̄wam nnyịn ‘ifiak ikop nsọn̄idem’? (Isaiah 40:31)

Ke otu nditọete Christian nnyịn iren ye iban, odu ndusụk owo ẹmi ẹsobode ukem mfịghe ye mme idomo ẹmi ẹnyụn̄ ẹnyenede ukem ekikere oro otịmde ebiet eke nnyịn. (1 Peter 5:9) Edi n̄kpọ ndọn̄esịt ye n̄kpọ oro ọsọn̄ọde mbuọtidem ndifiọk nte ke se nnyịn isobode idịghe obufa n̄kpọ ye nte ke nte etiede nnyịn ke idem idịghe esen n̄kpọ.—12/1, page 15, 16.