Ntọt M’ọkwọrọ Obio Ubọn̄
Ikọ Ntiense On̄wụm Mfri ke Ufọk ye ke Ufọkn̄wed
UWEM Christian abuana edinam eti n̄kpọ nnọ mbon en̄wen, akpan akpan ebe ke ndibuana eti mbụk Obio Ubọn̄ Abasi ye mmọ. Mme N̄ke 3:27 ọdọhọ: “Kûsịn ndida eti n̄kpọ nnọ mmọ eke ẹkpenyenede enye, ke ini ubọk fo ekemede ndinam.” Ke Argentina akparawa Ntiense kiet ke ọyọhọ isua ita esie ke ufọkn̄wed sekọndri ama oyom ndibuana eti mbụk Obio Ubọn̄ ye ufan kiet ke ufọkn̄wed. Enye ndinam ntre ama ada ekese utịp edi.
Usen kiet akparawa Ntiense emi ama etịn̄ ọnọ ufan esie ete ke idịghe kpukpru ido ukpono ẹfọn. Ke ini akparawa oro ọkọbọrọde ete ke imọ ikanamke n̄kpọ ndomokiet ọdiọkde, Ntiense oro ama ọdọhọ ete: “Afo n̄ko unamke n̄kpọ ndomokiet unọ Abasi.” Emi ama anam uyen oro ekere n̄kpọ. Ekem Ntiense oro ama anam an̄wan̄a ete ke ẹmi ẹdi ukperedem ini ndien ke man owo enyene unyịme Abasi, ana owo enyene nnennen ifiọk Bible onyụn̄ ada enye esịn ke edinam. Ufan ufọkn̄wed esie oro ama onyịme. Edi nte ubon esie eyenyịme enye ndinyene ukpepn̄kpọ Bible? Man ọnọ ufan esie n̄kpọ ndikere mban̄a, Ntiense oro ama ọdọhọ enye okot n̄wed Afo Emekeme Ndidu Uwem ke Nsinsi ke Paradise ke Isọn̄.
Ini ama ebe, ufan oro onyụn̄ ọkpọn̄ ufọkn̄wed. Owo ikokopke n̄kpọ ndomokiet ito enye ke se ibede isua kiet. Ekem usen kiet idem ama akpa akparawa Ntiense emi ndibọ ikot ke urụk ukopikọ nto ufan esie emi ọkọdọhọde ke imọ imekeme ndikụt nte ke mme prọfesi Bible ẹsu ke akpanikọ. Ntiense oro ama anam ndutịm iwiwa ndikpep Bible ye enye.
Ke ini enye akakade ufọk akani ufan ufọkn̄wed esie emi, enye ama okụt nte ke ete ye eka esie ẹma ẹfịna etieti ẹban̄a se eyeneren mmọ esịnde idem. Idem udọeka ufan esie ekekere ke idat anam enye. Ntre ete ye eka ẹma ẹdọhọ udọeka etiene abuana ke ukpepn̄kpọ en̄wen. Ekem, ye mmọn̄eyet ke enyịn esie, akparawa emi ama ọtọt ete ye eka nte ke idat inamke akpan eka imọ, emi akanamde eka esie ofiori ete, “Utu ke mfịna kiet, idahaemi ndinyene iba!”
Ntem, ke ukpepn̄kpọ en̄wen enye ke idemesie ama etiene odu ndien ekenyene ndinyịme nte ke idat inamke nditọiren ẹmi. Nte ini akade ẹma ẹnam ndutịm ndinịm ukpepn̄kpọ Bible ye enye ye ebe esie. Ikebịghike ofụri ubon ama ọtọn̄ọ ndidụk mme mbonoesop ke Ufọkmbono Obio Ubọn̄. Nte ini akade, ekaeka ye eteeka n̄ko ẹma ẹtọn̄ọ ndikpep Bible ẹnyụn̄ ẹtọn̄ọ ndika mme mbonoesop. Toto ke ini oro, akpa akparawa oro ama ana baptism. Enye ama ọdọ ndọ, ndien enye ye n̄wan esie ẹdi mme esịn ifịk asuanetop.
N̄ko-n̄ko, ebede ke ikọ ntiense ido nneme ke ufọkn̄wed, akparawa Ntiense emi aman̄wam nsan̄a ufọkn̄wed iba en̄wen ọkọrọ ye eka ye eyeneka an̄wan owo kiet ke otu mmọ nditọn̄ọ ndikpep Bible. Ke ofụri ofụri, owo 11 ẹkekpep akpanikọ Bible ke ntak akparawa Ntiense emi mîketreke ndinam eti n̄kpọ nnọ mme nsan̄a ufọkn̄wed esie. Nso inem inem utịp ke emi ekedi ntem! Ke akpanikọ, “Ọfọfọn ọnọ mbon eke Jehovah edide Abasi mmọ.”—Psalm 144:15.