Ke Ini ‘Ofụm Ndomokiet Mîdịghe Eti Ofụm’

“KE INI owo mîfiọkke itie mbehe ubom oro enye akade, ofụm ndomokiet idịghe eti ofụm.” Mme ikọ ẹmi, oro ẹdọhọde ke edi owo akwaifiọk Rome eke akpa isua ikie oro Lucius Annaeus Seneca eketịn̄, ọsọn̄ọ akpanikọ anyanini emi: Man uwem enyene ndausụn̄, mme utịtmbuba ẹdi akpan n̄kpọ.

Nte ededi, ediwak ini, uwem isinyeneke uduak. Ediwak owo ẹkop uyụhọ n̄kukụre ke ndifep mme itiat ye mme esịk ke uwem ofụri usen. Sia mînyeneke ubiere, mmọ ẹkabade ẹtie nte mbufụt inyan̄ oro “ofụm ini kiet eberide akaiso onyụn̄ eberide afiak edem ini efen.” (James 1:6, “Phillips”) Ye mme utọ owo oro, “ofụm ndomokiet idịghe eti ofụm.”

Bible ọnọ uwụtn̄kpọ mmọ oro ẹkenyenede utịtmbuba, ntem ẹdide uwụtn̄kpọ anade ẹtiene ẹnọ mme Christian mfịn. Moses ama “[owụk] enyịn ese utịp eke ẹdinọde enye.” (Mme Hebrew 11:26) Paul ekewet ete: “Mfehe nnennen mbịne utịtmbuba man mbọ utịp.” Enye ama esịn udọn̄ ọnọ ekemmọ mme andinịm ke akpanikọ ete “ẹnyene ukem edu emi.”—Philippi 3:14, 15, “Today’s English Version.”

Sia isọn̄ọde iwụk enyịn nnyịn ke mme un̄wọn̄ọ Bible, nnyịn ikpakam ikpebe mbuọtidem mme utọ iren oro ẹkenyenede utịtmbuba do.—Men Mme Hebrew 13:7 domo.