Ufụp Ama Ekpere Ndibiat Uwem Mi

UFỤP ama enen̄ede ọtọn̄ọ ndidia mi idem idiọk idiọk ke ini n̄kọdọde Mark, ọyọhọ ebe mi iba.a Nnyịn mbiba ikenyene ndise mban̄a ediwak nditọ akpa ndọ nnyụn̄ nnam n̄kpọ ye mme akpa nsan̄a nnyịn. Ndusụk ini idaha emi ama esisọn̄ ndiyọ. Ke ini ekededi oro ntuaha okodude ke ubon, ekesitie nte Mark ikesibereke ye ami. Mma ntọn̄ọ ndikere ke enye okosụk amama akpa n̄wan esie. Utu ke ndikara ufụp mi, mma nyak enye akara uwem mi. Mma nsikop ndịk ini ekededi emi akpa n̄wan Mark edide.

Mma nsiwụk enyịn nse Mark, idem nsede enyịn esie ndikụt ebiet emi enye esede. Idem mme n̄kpọ emi enye mîsehe nyedọhọ ke ese. Ndusụk ini nyedọhọ an̄wan̄wa nte ke enye ke osụk amama akpa n̄wan esie. Ini kiet emi ama enen̄ede abiak enye tutu enye adaha ada onyụn̄ ọwọrọ ke mbono Christian. Esịt ama obiom mi ikpe ke iso Jehovah. Mma nnam uwem ubon mi anana inemesịt koro emi ama otụk nditọ n̄ko ke akpatre. Mma nsua idemmi kaban̄a se n̄kanamde, edi inamke n̄kpọ m̀mê n̄kodomo ọkpọsọn̄ adan̄a didie, etie nte n̄kakam n̄kemeke ndikara ufụp mi.

Utu ke ndin̄wam mi, Mark ama ọtọn̄ọ ndisio usiene. Ke ini n̄kodoride enye ikọ, enye ama ofiori mi, “Ufụp, afo akam ofụbe ufụp.” Akam etie nte enye ama esikokoi odomo ndinam mi mfụbe ufụp. Ekeme ndidi enye ekesikere ke emi eyenam mi ntre ndifụbe ufụp, edi enye n̄kukụre akananam mme n̄kpọ ẹdiọk ẹkan. Enye ama ọtọn̄ọ ndise iban en̄wen, etịn̄de aban̄a nte mmọ ẹyede. Emi ama anam mi ntotịm n̄kere ke ndi usụhọde owo ye se owo mîyomke. Emi ama osịm udomo emi ntụk en̄wen—usua—ekedemerede. Ke idaha oro, ibuot ama oyon̄ mi tutu mma n̄kam nyom ndidianade n̄kpọn̄ enye ye ubon esie.

Ke ini Bible ọdọhọde ete ke “ufụp edi nyap ọkpọ,” ukem oro ke enye edi. (Mme N̄ke 14:30) Ama ọtọn̄ọ ndifịna nsọn̄idem mi idahaemi. Mma nnyene ndọk idịbi emi akadade anyanini ndikpa. Mma n̄kaiso nnam uwem mi anana inemesịt ebe ke ndinyene eyịghe ke kpukpru se Mark akanamde. Nyedọn̄ ubọk ke ekpatọfọn̄ esie, ndien edieke n̄kụtde nọmba urụk ukopikọ, nyedụn̄ọde mfiọk mbon ẹmi ẹsikotde enye. Mma nsikop bụt ke ata esịt idemmi, tutu nsitua nnọ Jehovah ke ntak bụt oro. Kpa ye oro n̄kekemeke nditre. N̄kedi ndiọkn̄kan asua nnọ idemmi.

Idaha eke spirit mi ama ọdiọk okosịm udomo oro mmen̄kekemeke aba ndibọn̄ akam. Mma mma Jehovah nnyụn̄ nnen̄ede nyom ndinam se inende. Mma mfiọk kpukpru mme itien̄wed Abasi oro ẹtịn̄de n̄kpọ ẹtụk mme ebe ye ibanndọ, edi n̄kekemeke ndida mmọ nsịn ke edinam. Ke akpa ini ke uwem mi, mma nyom ndikpa, kpa ye oro n̄kenyenede ata nti nditọ.

Mbiowo ke esop Christian ẹkedi akwa ebiet nsịnudọn̄ ẹma ẹnyụn̄ ẹdomo ofụri ukeme mmọ ndin̄wam mi. Edi ke ini mmọ ẹketịn̄de n̄kpọ ẹban̄a ufụp oro n̄kofụbede, ami nyeneni ke ntak bụt, nyomke ndinyịme nte ke mmenyene utọ mfịna oro.

Ekem, idem ama ọdiọk mi okosịm udomo oro akanade n̄ka usiakidem ke ufọkibọk. Ke adan̄aemi n̄kodude do mma n̄kụt nte ke uwem ikekemeke ndikaiso nte ekedide. Ami ye Mark ima ibiere ndidianade ntie ke ọfiọn̄ ita man idụn̄ọde idaha nnyịn ye unana editịm nyak ntụk abuana. Ke ini emi utịben̄kpọ ama ada itie. Ibuotikọ emi ọkọdọhọde “Help for Adult Children of Alcoholics” (Un̄wam Oro Odude Ọnọ Ikpọ Nditọ Ẹmi Ete m̀mê Eka Ẹdide Mbon Mbumehe Mmịn) ama odu ke magazine Awake!b

Omokụt, eka mi ekedi owo mbumehe mmịn. Okposụkedi owo mîkesimiaha mi, ete ye eka mi akananam itụkke kiet eken ndiwụt ima m̀mê nditụk mi. N̄kemeke nditi nte eka mi akananam afatde mi akama mîdịghe ọdọhọde ke imọ imama mi. Ntre mma n̄kọri n̄kpon ye unana editịm mfiọk nte ẹwụtde ima m̀mê, ke edide akpan n̄kpọ ukem ntre, edidi se ẹmade.

Eka mi ama esiwak nditịn̄ nnọ mi mban̄a itie ebuana ete mi ye iban efen ye nte ke imọ ikemeke ndinyene mbuọtidem ke enye. Ntre n̄kere ke n̄kọkọri n̄kpon ye unana edinyene mbuọtidem ke irenowo ke ofụri ofụri. Ke ntak nte ẹkebọkde mi, mma nsise idem ke usụhọde kpukpru ini ke otu mmọ en̄wen, akpan akpan iban en̄wen. Ndikot ibuotikọ Awake! oro ama an̄wam mi ndifiọk se mme n̄kpọ ẹmi ẹwọrọde. Emi ekedi akpa ini oro n̄kọfiọkde mme akpan ntak mfịna oro n̄kenyenede ye ufụp.

Mma n̄wụt Mark, ebe mi, ibuotikọ Awake! oro, ndien emi n̄ko ama an̄wam enye ndifiọk mi ọfọn akan. Ikebịghike ami ye enye ima ikeme nditiene item Bible ẹnọde mme ọdọndọ ẹmi ẹkerede ẹban̄a ẹdidianade ntie. Nnyịn ima ikpe emem. (1 Corinth 7:10, 11) Idahaemi ndọ nnyịn ọfọn akan nte akanam edide. Nnyịn imesinam ekese n̄kpọ ọtọkiet, akpan akpan ke ini mme edinam Christian ẹbuanade. Mark omowụt edikere mban̄a akan. Ekpere ndidi kpukpru usen enye esitịn̄ adan̄a nte imọ imade mi, ndien mmotịm nnịm oro ke akpanikọ idahaemi.

Ke ini ekededi oro mfiọkde ke imọn̄ isobo ye akpa n̄wan Mark, nyebọn̄ akam nnọ Jehovah nyom odudu, ndọhọde enye an̄wam mi ndinam n̄kpọ nte Christian oro ọkọride osịm ọyọhọ idaha. Ndien emi esinyene ufọn. Idem mme ekikere usua oro n̄kenyenede mban̄a enye ke osụhọrede. Ami nnyeneke aba mme etikwo etikwo ekikere m̀mê ndiyak mfụmmfụm ekikere ẹkara mi.

Nsụk nnyenyene ndusụk ndiọi ekikere ufụp. Mfọnmma uwem ke obufa ererimbot Abasi kpọt edisio enye ofụri ofụri efep ke idemmi. Kan̄a kemi, mmekpep ndikara ufụp, utu ke ndiyak enye akara mi. Ih, ufụp ama ekpere ndibiat uwem mi, edi ebede ke un̄wam Jehovah ye esop esie, ami idahaemi ndi owo emi otịmde okop inemesịt akan, mmonyụn̄ mfiak n̄kop nsọn̄idem. Mmafiak nnyene itie ebuana oro ọsọn̄de idem ye Abasi mi, Jehovah.—Utịp-usịn.

[Mme Ikọ idakisọn̄]